周二（21 日）的早上剛下過一場大雨，天色陰霾不散，Dorz 牽着嫲嫲的手，途徑他年幼時就讀的小學，準備回到他成長的家道別，「我諗都係當最後一次，所有嘢都當係最後一次咁做」。
87 歲的嫲嫲剛出院，未能爬上位於中層的家，只能由孫兒透過視像通話，替嫲嫲取回回憶之物，幸好家中情況不算太差，兒時學生相、嫲嫲舊照、爺爺生前行醫的「仁心仁術」牌匾，雖然熏黑，尚算完好無缺。但望見家園頓成廢墟，Dorz 形容心情在悲傷和憤怒之間遊走，「點解會發生一件咁悲慘嘅事？我哋 1,900 戶要無端端食呢樣咁無情嘅嘢？」
Dorz 仍希望待嫲嫲復康，可獲安排再次上樓，讓她與家園好好道別，「我今日啱啱上完去，都覺得嗰下釋放，即係件事終於完喇，我諗佢都好想，就係差呢下」。
相關報道：
宏福苑居民上樓Day2 模型、鏡頭、茶具與戒指 災民帶走帶不走的物品
再次回到熟悉的社區，說起在宏福苑成長的記憶，還未回家的 Dorz 已忍不住哽咽、雙眼微紅，「好似真係冇咗，真係你好似燒咗咁樣，我都唔識點講，其他嗰啲身外物冇咗都冇咩大不了，你會嗰啲回憶冇咗，你本身住嘅地方⋯⋯」。
他估計上樓後「可能喊一喊先⋯⋯覺得好震撼，好恐怖，我諗可能會⋯⋯即係喺度發呆。」他亦帶備了隨身攝錄機，希望拍下最後回憶，「都會想記錄低呢度嘅點滴，因為得呢啲片同相可以留低咋嘛。」
87 歲的嫲嫲最近動過手術，無法爬上 14 樓，不能與孫兒一同回家，上樓後 Dorz 的妹妹與嫲嫲視像通話，讓她決定取走甚麼物品，「今朝佢（嫲嫲）都話好開心，終於可以上到去睇喇⋯⋯叫做間接上樓可以睇到啲嘢」。
面目全非
事隔近 5 個月終於回家，Dorz 形容每一步走近家園，看到每一層的災情都覺得難受，甫進入單位看到廚房已成一片頹垣敗瓦，「望到嗰下都『嘩』，覺得有啲窒息感囉，真係好似你⋯⋯你要面對呢件事，你之前你做好多心理準備都好似冇乜用」。
牆壁、書櫃全部熏黑，碌架床沾滿灰燼，雜物佈滿一地，但相比其他只剩一堆瓦礫的鄰居，Dorz 的情況不算太差，他想取回的童年照、爺爺的遺照、嫲嫲年輕時的舊照、首戰渣打馬拉松的獎牌未被燒盡，爺爺生前行醫的「仁心仁術」牌匾，擦拭過後光潔如新。
他亦順利找回嫲嫲的查經筆記，「我諗都叫做好彩，我覺得係 bonus 喇，因為本身作最壞打算嘅話，你唔會希望到你攞到嘢㗎嘛」，嫲嫲取回心愛之物亦覺欣喜。
原本打算「見到咩都攞咗先」，Dorz 結果沒有用盡 3 小時，簡單執拾、在屋內默哀、哭泣、放空後提早約半小時離開，留下一屋的雜物，「個人好辛苦、好焗、好頭暈⋯⋯自己個心情都唔可以再捱到落去，咁就選擇咗離開⋯⋯驚自己會越諗越多」。
悲憤交織
眼見 20 多年的家園頓成廢墟，Dorz 形容心情在憤怒和悲傷之間遊走，「大家好地地小康之家，點解會發生咁嘅事情？我哋 1,900 戶無端端要食呢件咁無情嘅事⋯⋯即係當權者係咪要咁樣處理呢？用呢個咁嘅方法處理就覺得好恰當？」
Dorz 指，在住所樓下被要求關掉攝錄機，稱是以免拍到鄰居單位，回到家中才准拍攝，「即係我有啲不解呀，點解要⋯⋯即係影相都唔得？點解要叫我哋收埋 cam 咁樣？即係我覺得⋯⋯好似要冚過晒一切咁」，亦質疑拍攝樓梯等空間，根本不涉鄰居私隱。
告別家園
他更希望嫲嫲康復後，可獲安排再次上樓，讓嫲嫲亦有機會「圓夢」告別家園，「即係好似我咁，我今日啱啱上完去，都覺得嗰下釋放，即係件事終於完喇，我諗佢都好想，就係差呢下」，幸然嫲嫲亦一直堅強，每周仍會回到廣福邨與教友相聚，沒有切斷與社區聯繫。
而對 Dorz 而言，跟家園道別過後，眼前仍然有很多未知要面對，「之後仲有好多正經嘅嘢，安置方案呀、件事查成點呀等等。」
客廳的窗前原本養着幾棵盆栽，大維修後搬入窗內，Dorz 望着已經淍零、乾涸的植物更覺傷感，「我覺得好悒囉，即係好似我對唔住你哋⋯⋯植物咁樣，都因為咁樣而死咗，跟住你望出面咁樣個窗又爛晒，一片頹垣敗瓦囉」。
「冇呀，重新開始囉，諗唔到可以點，真係悲劇嚟㗎，係咁樣⋯⋯即係好好地⋯⋯我唔識講。」