宏志閣居民一連五日安排上樓執拾。住 10 樓的楊生，周四（14 日）上午回家時，發現雪櫃有不屬於他的食品，出現佈滿蛆蟲的蛋殼，大床更有不明淺黃色、發出異味的污跡。他覺得種種跡象「匪夷所思」，懷疑曾有人進入單位逗留。
楊生強調，上次 12 月回家時已清空雪櫃、執拾單位，故「絕對係有人郁過個雪櫃啦，我就覺得呢樣嘢已經令我非常之嘔心」，又質疑宏志閣沒受大火波及，為何會有人爆門入屋。他即日報警落案，指對方回應「係呀？咁你冇唔見到錢，咪得囉。」
警方回覆查詢指，周四接獲相關求助，指有關單位在火災後，木門沒有損毀，事主去年 12 月初返回單位後，鐵閘已加裝鐵鏈鎖上。警方又指，調查木門及鐵鏈後，沒發現被撬痕跡，單位內亦未發現失物，並指「已向事主提供適切協助，事主其後表示毋需進一步協助」。
雪櫃佈滿斑點、蛆蟲
楊生一家四口周四回家時，入到廚房打開雪櫃，發覺有人使用的痕跡，雪櫃有烏蠅飛出，佈滿黑色、啡色斑點，蛋格上有 3 隻佈滿蛆蟲的蛋殼，雪櫃內亦放了不屬於楊生一家的涼茶、酒、調味料等。
楊生指去年 12 月上樓時，已預計短時間內不能回家，故已清空雪櫃，「我哋應該都冇蠢到會將一啲明顯（會）腐爛嘅物品，繼續保留喺呢個雪櫃」。他當時亦放入一個竹炭除臭劑，但這個除臭劑亦不翼而飛，「咁即係話絕對係有人郁過個雪櫃啦，我就覺得呢樣嘢已經令我非常之嘔心囉，我覺得即係有人入過我屋企喎」。
床褥現不明污跡
他執拾期間，再發現已摺疊的毛巾被人打開使用，主人房床褥上有不明淺黃色污跡，床單有異味，「我諗大家可以想像一下時鐘酒店床單嘅味道⋯⋯呢個味道應該係我哋想像緊嘅嘢嚟嘅，但當然我哋都無從稽考係邊個啦。」他又指，床單並非以他平常的習慣鋪上，思疑有人更換過床單。
楊補充，在 12 月上樓時，單位的鐵閘已被爆開，沒有上鎖，他執拾後關上鐵閘離開，其後「一戶一社工」在 4 月尾通知其母親，會在鐵閘加上鐵鏈。
楊生：報警後獲覆「冇唔見錢咪得囉」
發現上述可疑痕跡後，楊生一家即時決定盡量拿走所有物品，「就算攞去抌，我都唔要畀一啲同我素未謀面嘅陌生人」。他形容自己一邊壓抑「呢間屋即將要離我哋而去嘅憤慨」，一邊在被烏蠅環繞的家中執拾，其母親亦震怒，「佢嬲到係，接近係個身體都無法控制自己地抽搐，塊面非常之紅，我睇到佢極度憤怒」。
楊生一家周四即日報警，「我哋對警方畀我哋嘅回應係極度不理解嘅，佢嘅回應係：『係呀？咁你冇唔見到錢，咪得囉。』呢個就係佢嘅回覆」，於是他取得報案紙便離開。
他形容「呢個世界究竟有幾荒謬，我都開始唔奇怪喇，我只不過覺得自己點解咁好彩，人生抽咁多次獎都抽唔中，點解咁易抽中我啫，即係大火又抽中我哋啦，跟住入屋咁樣（被人）渡假又抽中我哋啦，非常之啼笑皆非」。
質疑宏志毋須加固 無人需要入屋
楊生亦質疑，宏志閣沒被大火波及，為何會有外人進入單位，「我都好好奇，究竟係咩行動要喺一個冇被火波及，唔需要做加固，但係又需要走入我哋間房，就喺度搞我哋間屋，但同時佢又冇幫我哋鎖門㗎喎，究竟佢幾時幫我哋加呢個鎖嘅呢？咁呢啲所有一切我哋都覺得好奇怪、解釋唔到」。