在宏志閣長大的 Feon 和黃小姐，小學時因搭校車相識，Feon 出嫁後搬離宏福苑，一場火災卻令兩人重新聯繫，時常交換宏福資訊。「我哋面對緊嘅嘢係大家會好明白」黃小姐說。
她們周五（15 日）分別回到居住 40 多年的家，黃小姐在已變成爛地的公園，尋回已被拆走的毛毛蟲攀架，隨即拍下照片與 Feon 分享。Feon 慨嘆：「係宏福苑人、特別喺宏福苑成長嘅二代人嘅集體回憶」。
兩人又不約而同在家中窗前貼上字句表達思念。Feon 請子女繪下她兒時在窗口常見的彩虹，希望表達「宏福苑仲係有希望，我哋可以返去」。黃小姐則寫上「♥︎宏福回家♥︎ 」，提到父親前年去世，這個家是「係我爸爸嘅心血嚟」。
隨着賣業權的抉擇臨近，兩人都說到眼眶泛淚，直言不想出售，Feon 形容，感覺「好似你扣押住我嘅財產，然後問我賣唔賣？咁我係咪好似被逼一定要賣，我先可以攞返我銀包入面嘅錢呢？」
希望
周五（15 日）早上不時下起陣陣細雨，Feon 拿着子女前一晚繪畫的彩虹畫作，貼在她兒時的家中，為窗外灰濛濛的天色添上一抺色彩。
「見到彩虹好似希望咁樣，我希望表達到，即係宏福苑都仲係有希望，我哋可以返去。」
拿着兩幅子女畫作，Feon 雙手抖震，眼眶開始泛紅。
Feon 是三姊弟妹中的大家姐，一歲多便遷入宏志閣的中層單位，至出嫁才搬走。她說兒時望着窗外的海景，雨過天晴常會見到彩虹，象徵着她的童年回憶。
上次陪妹妹到宏昌閣單位執拾時，Feon 驚覺到處一片頹垣敗瓦，她希望這兩幅色彩斑爛的畫作，可重新照亮變得黯淡失色的宏福苑，「我希望令到個屋苑可以加添返啲生氣同埋色彩，同埋表達下，我哋都好掛住宏福苑」。
另一幅寫上「愛回家」的畫作，除了是 Feon 與子女每晚收看的劇集名稱，亦代表了她簡單的願望。她哽咽指：「大家都會希望有個地方、有瓦遮頭，其實係每一個人好基本嘅願望嚟嘅啫，咁我覺得係、真係好卑微呀呢個願望，咁所以我覺得係，都好想去貼喺呢個窗度話畀大家聽，其實我哋都好想返屋企」。
大火後災民失去家園，在外租屋或搬入臨時房屋，Feon 形容「每次講親而家我哋返屋企喇，我都會窒一窒，會諗『你返屋企先啦』，呢個係咪真係我哋嘅屋企嚟嘅呢？係唔長遠㗎喎⋯⋯即係冇咗我哋個根」。
愛回家
「我返屋企喇！」
事隔半年重回舊居，Feon 望着昔日一家人齊齊整整過節的客廳，「而家空寥寥，個梳化冇晒嘢喇，就會有啲唔捨得囉，係有啲感觸」。窗外吐露港的無敵大海景，Feon 努力拍下影片、全景照片記錄，「望咗廿幾年嘅風景，廿幾年喇去到我嫁，其實咁所以就望出去，都係好熟悉嘅風景，走嗰陣時我都有提我阿媽，你再望下個窗嘅風景啦，唔知幾時仲有機會」。
火災後，Feon 整理爸爸的攝錄機影片，尋找一家人在宏福生活的足跡，發現父母的睡房擺設幾乎從沒改動，「原來喺我哋好細個嘅時候，我阿媽已經係每個禮拜會買花，好有心機整靚自己間房，睇返啲片原來咁多年前已經係有呢個習慣，一直到而家都係」。
不過幾個月前上樓為免滋生蚊蟲，家人已經帶走了家中的花束。
Feon 的弟弟已經移民，妹妺這天因心理上未準備好，沒有陪同上樓，透過視像通話，一家五口在家中微笑拍下「全家福」。
離開宏志閣前，Feon 特意拍下大門口的「宏志閣」牌匾，頓時想起一家人或已再沒機會再齊整回家，「三兄弟姊妹一齊，或者我阿爸阿媽跟住成咋人行出嚟，咁就呢個機會應該難啲喇」。
父母比 Feon 灑脫，住了 40 多年的家，檢走幾袋家當便離開，未必會再上樓。反而是 Feon 還想再回家，有更多時間在窗前呆坐，「望到幾多次就幾多次啦⋯⋯如果可以逗留耐啲嘅，仲想有個聯繫喺度」。
「我暫時就未係好放得低。」
鄰舍情
「我哋面對緊嘅嘢係大家會好明白⋯⋯變咗一講嘅時候，我自己就會好感觸，就會好唔開心。」
住在宏志閣另一個中層單位的黃小姐，在旁看着 Feon 受訪，也忍不住泛淚，她說雖然外界很關愛宏福居民，但居民之間始終最了解彼此，每次聽到街坊的心聲都會很感觸，「真係好心痛其實，我哋呢一個屋苑發生呢一個情況」。
兩人在小學搭校車時認識，年紀相近，是小學兼大學同學。雖然 Feon 已搬走，但一場大火令兩人重新聯絡，時常交換宏福最新資訊。
Feon 上午上完樓，下午輪到黃小姐上樓，兩人趁中間的空檔短暫碰面，談起兒時在公園玩過的毛毛蟲攀架已被拆卸。Feon 說自有記憶以來，便有這個攀架，「係宏福苑人、特別喺宏福苑成長嘅二代人嘅集體回憶」，結婚生子後，子女每逢探望公公婆婆時也定必停駐。
黃小姐下午找到這條被拆走的毛毛蟲，被蓋上帆布放在一旁，Feon 收到毛毛蟲的照片，形容「好似見返老朋友咁」，因災後一直以為已被拆走棄置，「而家知道佢仲喺度其實好感動」。
一生心血
黃小姐自出生在宏福居住，爸爸前年過世後，她與媽媽、弟弟繼續住在單位，「呢個屋企其實係我爸爸留畀我哋嘅一個好溫暖嘅家，同埋佢一生嘅心血嚟」。
黃小姐上次回家是火災後一星期，只有一個半小時執拾，帶走一些貴重物品和冬衣，今次需要拿取夏季衣服，媽媽亦想帶走參茸海味和廚具，「（上次）因為時間好趕，其實我哋冇時間去真係去坐低喺屋企，靜落嚟，去望下屋企⋯⋯嗰一刻其實係冇諗過需要咁長嘅時間，先至能夠再返屋企」。
上樓前來到廣福商場平台受訪，她眺望着宏志閣，拿起電話拍照記錄，「呢個就係我屋企喇，住咗咁多年嘅屋企，今日返嚟覺得個感受好深」。
她用藍色麥克筆寫下「♥︎宏福回家♥︎ 」的字條，貼在家中窗口，表達她對家的思念，「我好似乜嘢都同屋企做唔到呀，除咗上網抒發一下我哋自己嘅感情呀、我哋好掛住屋企之外」。
時間緊迫
火災過後，黃小姐一直期望可回家居住，「一開始收到嘅資訊，係話會復修㗎嘛，咁所以我哋嘅期望就係，ok，我哋返去住喇」，復修期由起初預計 3、4 個月，到後來修訂為 9 個月，「然之後呢，你就突然之間同我哋講，而家有兩個月嘅限期，呢度就已經有 77% 嘅居民係願意賣啦」。
數字一出，原本滿心以為可以回遷的街坊，即時惆悵是否要出售業權，「政府成日話唔想我哋自己互相影響決定，但係佢將呢啲數據喺一個好唔清晰同透明嘅方法講咗出嚟呢，其實某程度上影響咗我哋街坊嘅諗法」。
政府周四（14 日）公布，已發出收購建議信，指宏志閣需有 75 % 業主於 6 月底前回覆同意出售業權，方可納入安置方案。黃小姐覺得時限太短、有關出售業權的資訊亦不充足，「牽涉咁多金錢，同埋仲要係一個咁有感情嘅地方，我諗兩個月係絕對決定唔到囉，所以個感覺就係趕囉，好似逼我哋要快啲去決定，冇資訊底下就要做呢個決定喇」。
她質疑，政府時常稱會提供資料，卻一直未能回答一些實質問題，例如若出售業權，6 月底後臨時房屋和租金津貼的安排、3,000 萬復修費為何要宏志居民承擔、火險能否支付維修費、宏志的驗樓報告詳情等，「我哋即係冇資訊去決定到，呢個單位究竟係點，咁我就覺得我唔賣喇，你畀多啲資訊我就再考慮啦」。
住在宏志 40 多年，黃小姐原以為單位會是媽媽百年歸老的住所，甚至自己也打算住到年老，一家百般不捨得離開，「（單位）係我爸爸嘅心血嚟，所以我哋其實就唔想賣，亦都唔明點解要賣」。
她說只要能回家居住，街坊必定會配合，現在若需要核實簽名召開業主大會，她亦會合作，「其實我哋街坊係非常配合，每一下都係盡量可以都行出嚟嘅，已經做咗好多嘢 ，但我哋得唔到好多嘅回應囉」。
她亦質疑為何事隔這麼多個月，仍無法召開業主大會，既然政府可以發信請業主賣業權，同樣亦可以相同的速度核實業主身分，召開業主大會，「我哋只係需要一個會一齊去開，面對面傾清楚，去攞啲資訊，你講到咁困難呢，我哋係唔明囉，即係以香港人嘅速度，係冇可能搞幾個月都搞唔到個會」。
不對等交易
Feon 的父母則傾向出售業權，但現時手上資料不足以讓他們作最終決定，「有啲人話『買樓唔係買棵菜』，其實我覺得連買棵菜都不如，我自己覺得，你買棵菜都可以拎上手睇下，但其實而家咩都唔知、唔清楚」。
Feon 形容居民受災後，單位如同被扣押，政府更稱不排除立法強制收回業權，「感覺好似你扣押住我嘅財產，然後問我賣唔賣？咁我係咪好似被逼一定要賣，我先可以攞返我銀包入面嘅錢呢？咁我覺得係好唔對等」。