宏新閣高層住戶周三（22 日）回家執拾，住在 20 幾樓的 Ada 昨晚寫信與家道別，又指經過大堂、樓梯想起往事，發現面目全非，「好奇怪，好熟悉但係又好陌生，係好傷心㗎嗰一下」，而最終完成上樓，能好好道別，「我覺得係有一種都圓滿嘅感覺」。
住在 25 樓的麥生，單位幸未受波及，他滿屋收藏品，指執拾時間不夠，「得 4 個人，幾個袋，執得幾多嘢？」他亦帶了花束悼念在大火中離世的愛貓「小吉」。
政府晚上指，周三共 78 戶 264 人上樓，進出大廈的平均時間是 2 小時 34 分鐘，又指收到 5 宗市民身體不適的求助個案，以及 3 宗個案需要尋求心理輔導服務。
Day2｜模型、鏡頭、茶具與戒指 災民帶走帶不走的物品
87歲嫲嫲無法親自上樓 孫兒視像通話助收拾舊物 盼嫲嫲可親自告別家園
25樓吳生：心情唔會好
等待獨立調查結果
44 歲、住在 25 樓的吳先生，與七旬爸爸一同上樓，他準備了鏟，也為爸爸買了摺凳，「上面唔知環境係點，一定比平常惡劣」，又指要走 20 多層樓梯，自己也覺有難度，希望「盡量靠自己能力上，用意志力上去做個告別」。
他指單位「應該大部分都燒咗」，預計只有少數物品能帶走，亦會拍攝幾張相留念。吳生又指，與爸爸「心情都唔會好，雖然我屋企無話有任何人命傷亡，但始終呢個屋苑住咗咁耐，知道咁多人都唔喺度，我諗而家係等結果啦，等獨立調查委員會有咩結果再發生，同埋抽樓（居屋）啦」。
25樓麥生指時間不夠：
得四個人，幾個袋，執得幾多嘢？
住在 25 樓的麥先生，與弟弟、表弟一同上樓，他指單位未受大火波及，故預期較多物品需搬走，但樓層高不能多次上落，而每次只能由兩人進入單位，故帶備數個大袋，會由兩人將家中物品取出，交由單位外的另外兩人執拾，善用有限的時間。
他又指，一家在宏福苑住了 30 多年，有兩隻愛貓，其中一隻的骨灰在單位內，今日會取回，而另一隻相處 10 幾年的愛貓則於火災中喪命，「應該第一日已經焗死，消防員（數天後救出貓屍）帶落嚟嗰時，無燒過，都大約知道我間屋嘅情況囉，即係見到佢都仲好靚」。他帶了一紮花在家悼念愛貓。
麥生指，媽媽年紀大今日未能同行，「都無辦法，唯有留返個美好回憶」，而他預計 3 小時不足夠搬走物品，「一定係執唔晒，得4個人，幾個袋，執得幾多嘢？平時搬屋都四五十箱啦，好老實講」，希望再有機會上樓。
他在落樓後向記者提供影片及相片，顯示單位大致完好，他說部分植物仍生存，但由於時間不夠，只能帶走部分收藏品。麥生又向記者補充，火災中離世的愛貓是「小吉」，又指「消防好好人貓貓連佢張床一齊攞落嚟」。
高層住戶Ada：寫信同屋企講再見
「好熟悉但係又好陌生，係好傷心嗰一下」
住在 20 幾樓的 Ada，與弟弟、快 70 歲的媽媽一同上樓，她的單位嚴重燒毀，但能找回部分財物。她說大火時「已經知道自己屋企真係燒足兩日」，沒想過有機會回去，得知能回家時「其實我真係都很開心」。
Ada 說昨晚特別寫了一封信今早放在單位，「因為噚日諗諗下都覺得好傷心，所以都特登寫咗封信放喺單位裡面，同屋企講再見」，現在完成上樓，「我覺得係有一種都圓滿嘅感覺」。
她指媽媽樂觀、體能好，「如果唔係我哋叫她休息，基本上她一口氣都可以上去」。而她自己就有很大感受，「其實（哽咽），我自己一路走進去，大堂已經黑晒⋯⋯好奇怪，好熟悉但係又好陌生，係好傷心㗎嗰一下」。
她指上樓時發現，梯間牆身都已變黑，充滿特色、每層不同的瓷磚已不復見，「其實根本你一去返個環境（哽咽），你所有嘅記憶都會返返嚟，以前點解你會行呢條樓梯，係因為你屋企可能停電呀，係你細個嘅時候，你未升上中學，你會因為屋企停電你去行呢條樓梯，其實一年可能行一次，嗰個樓梯畀你感覺其實唔係好強嘅，但係唔知道點解你去到嗰個環境，你知道呢個係你屋企，而你係最後一次可以返返嚟呢度，其實你真係百感交集」。
回到家時，Ada 形容要像「考古」般挖掘，「一定要用鏟嘅，仲有我嘅放喺櫃裡面嘅時候，都麻煩，因為個櫃可能燒到變形，所以都要拆開櫃門，然後你攞個鏟喺裡面將啲嘢拆出嚟」，「你開始好忙碌，你就要爭取時間去掘東西，去搵嘢，去篩選，嗰個情緒係真係暫時放咗嘅，不過我知呢一樣嘢就是嗰個回憶啦，畀你嘅感情其實是唔會放得低嘅」。
她亦說，在家中嘗試拍下窗外風景，「但係因為都圍咗橙色格仔網⋯⋯連窗框都沒咗喇，已經唔再一樣喇」，她們可帶走的東西不多，所以覺得 3 小時足夠，但亦知道對部分多物品的居民來說未必足夠。
她又提及上樓安排「真係好好」，「民安隊又好，警察又好，他們都會一直同你打氣，加油呀，加油呀，畀心機呀，你就會覺得唔孤獨，同埋我們每一 group 上去嘅人，其實都是有民安隊，佢哋都會跟你傾計，所以呢個過程俾你感覺到，係有人情味嘅裡面，你喺個咁惡劣嘅環境裡面，都唔會覺得被遺棄」。
Ada 與家人在樓層亦遇見鄰居，不過警員提醒「盡量返去自己單位嗰度」，所以打招呼後就未再聊天，但他們與街坊落樓後有再聚首。
「其實我希望，政府可以有一啲好嘅方案去安置我哋成班宏福居民，因為我哋真係喺呢度住咗咁多年，宏福呢個地方點解咁好，係因為人情⋯⋯有啲時候可能大家都要各散東西，但係都希望畀每個街坊有一個自己嘅選擇，有人係想樓換樓去一個新嘅地方，但係同時都有人想原址重建，但係無論點都好，總係希望有個地方可以有宏福苑居民多啲可以集中到。」
