大埔宏福苑受災居民，周四（28 日）繼續第二輪上樓。其中宏盛中層住戶陳太今日穿上自製的 T 裇，上面寫有「等待公義」、「Not Ideal！」、「唔理想！」，靈感源自政府一直以「唔理想」回應事件。她形容公義必定會彰顯，「願我能夠在地上等到，可能等唔到呀天家等囉。必定等到。」
宏道閣現「原址重建」字句 居民：想表達希望原址重建非少數
宏道閣一個中層單位，周四（28 日）貼上「還我宏福」、「徹查問責」、「原址重建」、「我要返屋企」的紙條。貼上紙條的居民表示，貼這幾句話是「好基本要做嘅嘢嚟啫⋯應該將我想講嘅嘢講出嚟」。
他解釋，徹查問責「係最基本確保以後唔會再發生嘅第一步，但係連呢啲基本嘢都變咗一個要貼大字報嘅訴求係不能接受」，即使最終可能被移除，亦「唔等於我唔應該講⋯想俾（畀）大家睇到希望原址重建嘅唔係少數」。
宏道謝小姐：獲酌情一家五口回家合照 貼「我❤️宏福」被阻止
住宏道閣 40 多年的謝家，周三（27 日）回家執拾。謝小姐自出生住在宏福苑，結婚後遷出，家中仍留着她的睡床，充滿她成長的回憶。她原本打算在窗口貼上「我❤️宏福」、「I❤️WFC」的紙條，表達「我真係好鍾意呢個地方」，但被警察阻止，指「警察話『唔可以貼嘢喺個窗度』咁樣囉，佢哋話指引唔畀貼嘢」。她最終改為在家中已經燒焦的牆壁貼上字句。
謝小姐認為她貼的字句中性，「唔知點解唔貼得，其他人都有貼㗎啦⋯⋯鬧人就話唔得啫，我嗰句又唔係鬧人，純粹話我愛（宏福苑）咁樣之嘛，我覺得冇乜嘢，但係佢哋又『指引就唔畀』，我都搲晒頭⋯⋯暫時間屋都仲係我哋㗎嘛，佢哋都無權（禁止貼紙）」。
謝形容居民向外界表達心聲的渠道「其實咁耐以嚟都係『零』㗎，你本身都見唔到我哋㗎，你平時都唔知我哋去晒邊，一開始都俾人打散啦」，現在她「貼張紙都唔得，其實咪即係乜都唔講得囉」。
上一輪上樓時，因只有 4 個上樓名額，謝家五口未能拍攝全家福，這次謝家獲酌情處理，可以一家五口進入單位合照。謝媽媽行動不便，上次沒有上樓，這次她也一同回家，中途有警員主動提出揹起謝媽媽走了一段路。
謝家的單位損毀嚴重，牆身幾乎全部熏黑，空氣混雜着灰塵，謝小姐的父母逗留短時間便離開，留下謝在家中，再拍攝每一個角落，「因為驚最後一次吖嘛，我唔想都未夠鐘就咁快走」。離開之前，謝不住落淚，「由細到大都喺呢度，唔捨得咁樣囉，如果冇呢件事，我可以、就算拜拜、要搬屋，我都可以慢慢影下相呀，再拜拜，唔係好似而家走難咁樣囉」。
她說父母性格比較樂天，覺得在火災中倖存已屬萬幸，「我都好多謝天父保守啦，咁但係我都覺得，唔係淨係天父保守，咁都有公義㗎嘛，無理由聽證會話，全部都無問題，講咗每個部門都有失職，但係你繼續啦，都係冇嘢嘅，即係唔使罰呀、唔使落台呀，乜都唔使就可以加薪」。
她亦希望盡快開業主大會，「之前都有街坊簽名收集好啦，咁做乜嘢啫？又喺度拖，呢個係我哋合法咁做呢樣嘢，我哋嘅權力嚟㗎嘛」，質疑是否會拖至 6 月 30 日收購建議信件的期限屆滿後，「哦唔使開喇，你已經唔係業主喇」。她希望在業主大會可商討不同安置方案，「而家都冇得揀㗎，總之你就硬食啦，佢話咩，你就『哦』，你冇得 say，冇得鍾意定唔鍾意，冇得揀嘅」。
宏盛低層廖太自嘲：日後買屋莫與家人同屋苑
宏盛住戶廖太與兒子、兒媳婦、孫兒一同上樓。她說一家人中，自己持有宏盛一個單位，亦是宏福苑第一批居民；長子成家後再持同座另一層單位，「當時好開心㗎，因為同座唔使轉𨋢，同一部𨋢上落，（孫仔）出世推車仔落（我單位）唔使轉𨋢」，當時有街坊覺得他們能買到同座同𨋢的單位很幸運，「但原來幸運咗 10 幾年，終於一齊大家齊齊被燒咗間屋。」
廖太表示，孻仔在大火之前，本來也想在宏福苑購入單位自住，但不幸之中的大幸是，當時尚未購入。她說大火後孻仔自嘲，「以後買屋呢，一家人買屋唔好住埋一座、唔好買埋一個屋苑。當然唔希望再有宏福苑嘅情況⋯⋯邊個諗到宏福一陣間就滅咗個邨呢？」
她指，大火前自己的單位住 3 人，長子單位亦住 3 人。大火後要找地方安置一家六口很彷徨，兩家人現暫居同一幢中轉屋兩個不同單位，但呎數大減，各自只有百餘呎，小朋友「做咩都係坐喺床」，煮食位置也「好逼好逼」。
但她形容能住同一幢中轉屋已是幸運，「所以講得啱，買樓唔好咁近，同屋苑唔好同座，太危險啦。」
孫兒特意學校早退上樓
廖太身旁的孫兒今年 7、8 歲，受訪前對著記者做鬼臉，嫲嫲受訪期間偶爾依傍她打頓。
廖太說，孫兒特意從學校早退與家人上樓，從單位帶走幼稚園畢業公仔。問他有否不捨家園，他輕輕搖頭，但廖太說，今趟是孫兒提出想上樓，「小朋友始終掛住，（但）唔識話傷感屋企」，並提到孫兒也在宏福苑出生，「都睇下啦，唔係第日大咗可能一個遺憾。」
廖太又表示，自己居住宏福苑 40 多年，單位沒受大火波及，故最想回家居住或原址重建，不解為何原址重建報稱要耗時 10 年，但自己願意等，等不到就交給兒子，兒子等不到就交給孫兒。
街坊被禁貼標語 廖太：有人唔想聽、唔想睇
廖太認為，現時安置方案「唔係好似無得揀，係直頭無得揀呀」，唯有考慮換樓換方案，但指政府名目上似有千多單位供居民選擇，實際上「都係啲豬頭骨嚟嘅、揀剩嘅」，大單位數量亦少。
她又認為收購價不合理，不解為何政府會用善款收購業權，「點解政府會咁虐待我哋宏福苑啲人。其實我哋好克制⋯⋯無做任何激烈嘅嘢，只不過用把口去表達、用啲標語去表達，有人唔想聽都無辦法。有人唔想聽、唔想睇⋯⋯我唔知而家會係咩世界。」
廖太緊接擁著孫兒說，「我唔知第日到佢哋嘅時候會係點樣囉，個社會、個環境。係咪？」
外界稱居民因災發達 廖太哽咽：我哋無發達
廖太表示，「我哋而家其實係可以講係申訴無援。政府都係咁樣做嘢，仲有邊個可以幫到我哋？⋯⋯唯有街坊同記者講，等外面啲人清楚情況，我哋唔係貪心、唔係貪得無厭」。
她說，就算宏福苑居民能換樓，「一頭家重新開始嚟過，係幾多嘢要（添）置⋯⋯希望出面嘅人，唔好覺得我哋因火災而發達。」
她哽咽稱，「聽到呢啲說話，其實好傷心。我哋無發達⋯⋯燒咗，我哋係乜嘢都無。唔好覺得少少錢就發達。無咗間屋，我寧願畀返啲錢你，你畀返間屋我。」
廖太說每次見到有人說災民發達，「每睇一次自己都喊。點解會俾人咁話我哋呢？事實上我哋唔係咁樣㗎嘛。點解要話我哋貪心呢？唔係一次、半次。一有事就話我哋貪得無厭。我哋宏福居民唔係咁。個個都唔係貪錢。好多錢唔係用喺我哋身上⋯⋯政府買我哋業權，用市民嘅錢擺自己袋，可以點？我哋無嘢做到。」
廖太媳婦：好多嘢都唔透明，我哋咩都唔知
廖太住宏盛閣 17 樓的媳婦亦指，在宏福苑住了十年，形容此處是 「一住就會愛上」，認為社區有人情味，「喺呢十年期間都好開心，因為生咗個仔」。
她認為「成件事，咁多人無咗生命，我都唔知點講⋯⋯真係好可惜」，批評在聽證會上各個部門「不斷踢來踢去啲波」，亦未知責任屬誰。她希望可以召開業主大會，「起碼最基本知道⋯⋯有幾多人想原址重建，定係賣業權，定係樓換樓，大家都想知道。」
「而家唔公開，所以好多嘢都唔透明，外面嘅人以為好透明，但我哋咩都唔知。」
宏道中層冼太：不考慮原址重建 無膽量喺度住
宏道中層住戶冼太，是宏福苑第一批入伙的居民，現時已退休。她說要收拾的物品，上次已帶走得七七八八，今趟上樓，「只不過嚟道別一下」，但不會特別做儀式，「個心道（別）就得㗎喇」，又哽咽稱在此住了「40 年，足足 40 年」。
大火過去半年，冼太說起火當天一直看電視事態發展，「無諗過係可以咁嘅結果。最簡單就係，以為夜晚可以返番上去，點知唔得」。她期望會有大火成因等報告出現，「都會畀啲時間佢哋，我相信會等到」。
現時她仍需時間與家人商量接受哪個安置方案，但預料會是樓換樓，不會考慮原址重建。冼太解釋，這半年要盡量想辦法令自己接受現實，「我自己本身，無呢個膽量喺度住，所以我一定唔會揀⋯⋯你點樣起返我都唔會」。
記者追問是否因對事件或死難者有陰影，冼太說「會令到你生活得唔開心，既然係咁，點解我點解要重建喺度住呢？係真係好我個人想法嚟嘅，唔代表其他居民。」
宏泰中層林生：香港適合安居置業？我睇唔到
宏泰閣中層林生今日第二次上樓，他批評政府在整件事都是單向溝通，只是向居民解說，「但無做到佢應該畀我哋嘅嘢」。他形容解說員如其名負責「解說」，但有沒有向政府反映居民意見就不得而知。
「成件事可以睇到香港係一個點樣嘅地方，係咪一個適合大家安居置業、生兒育女嘅地方？我真係睇唔到。」
林生亦批評安置方案相當不合理，選擇都是「豬頭骨」，亦沒有詳細資料，「樣樣嘢都迫你在好短時間、唔夠充足資訊嘅情況下做決擇，無得揀」。
宏盛20樓張生：不應用善款收購業權
住宏道閣 20 樓的張生，今午上樓執拾，他形容政府收購業權的方案是「強制性咁、霸道性咁去處理佢嘅問題，佢嘅要求其實就唔係我哋嘅要求囉」。他擔心一旦抽樓失敗，會失去租金津貼，「抽唔到你就死喇，嗰啲租津你又冇晒又冇盛，都係令到人唔知點囉」。
張生亦質疑，政府不應用善款收購業權，「快啲畀返啲錢我哋啦，將嗰啲善款呀⋯⋯有乜理由攞嚟嘅善款咁樣用嘅啫？佢基本上好多嘢都係佢話點就點，唔係我哋居民嗰個意願囉」，他並不介意搬走，但希望政府先解決上述問題，妥善安置居民。
他亦希望能獲安排第三輪、第四輪上樓，因一家四口只執拾了兩成家當，今次主要執拾夏天衣物，但還未執拾秋冬衣物。
宏盛中層陳太自製 T 裇 寫有「等待公義」、「唔理想」
宏盛中層住戶陳太，今天特意穿著一件自製 T 裇，前面寫「等待公義」、「Not Ideal！」，後面則寫「唔理想！」
陳太說，衣服的靈感源自大火之後，一直有人說「唔理想、唔理想、唔理想」，待終於有較高級的人說「唔應該、可以好啲」、「佢哋話唔理想、唔理想、唔理想，然後繼續係唔理想」。她希望政府可聽到居民聲音，待居民好一點，「似有人性啲」。
陳太續說，「我哋始終相信天有眼嘅。天父在看見，神已經畀咗每個人都有個良心喺心入面。 我相信，神會啟動佢良心。」
其兒子在旁擁她的肩，陳太即哽咽稱「如果唔係，做父母唔識教仔女，做錯事應該點做。我都要教佢㗎嘛，係咪？做錯事等於無見過、睇唔到，咁點呢？你教返我吖。等吖，有盼望嘅。太陽每天都喺度升起，公義必定會彰顯嘅。願我能夠在地上等到，可能等唔到呀天家等囉。必定等到。」
說起自己的單位，她說狀況良好，又憶述原先在家中，可以每天看到日出和月亮升起，以及兩者倒影在海上的美景，哽咽稱「但要同佢分手」。
至於安置方案，陳太說期望有多些資料和選項，「如果唔係，全部都豬頭骨，揀唔到」。她又認為，召開業主大會至少可聽到居民聲音。
宏盛何小姐掛「我愛宏福」直幡隨即被移除 有警員屋苑外圍巡邏
近日宏福苑居民在窗戶掛起的字句屢被移除。宏盛閣居民何小姐今日上樓，在窗戶掛起「我愛宏福」的直幡，但直幡除即被移去。而在宏福苑地下，有一批警員巡邏，不時望向她的單位方向。
何小姐上樓前已表示，希望可以在窗戶張貼字句，「大家都知最近啲 banner 有啲咩問題㗎啦，都會貼返一啲佢哋所謂正常啲（的字句）」，但稱因其單位座向不是對正，故或較難看到。上樓前何小姐向記者展示自己準備張貼的標語，當中有手繪的「宏❤️福」。
她又說知道最近貼字句會受阻撓，「但係盡做啦我自己就。因為自己，即係各個街坊都係想原址重建，但我又唔係好明點解『原址重建』呢 4 個字唔出得街」，她稱有問過是動用甚麼法例阻止「原址重建」四字見街，因自己沒售出業權，「所以唔知點解要制止我哋，或者黐咗要你搣返。」
何小姐批評政府有事情沒足做，大火至今沒人下台，而聽證會即將結束，道歉、下台、負責各樣也沒做，「剩係識得第一日叫你賣業權⋯⋯點解一火燭就要賣業權？呢個唔係好make sense」。她認為政府可把善款和保險放出，交回居民自行處理，「唔相信我哋無街坊做到」，稱先前都是居民自己找承辦商處理大維修事宜，就不用政府阻止開業主大會、不做原址重建。距離業權售出限期只剩約一個月，何小姐說昨天才收到收購同意書的文件，而她不打算售出業權。
何小姐下樓後，表示自己曾在廁所窗戶張貼「我愛宏福」字句，「已經唔黐嗰『4 個字』啦」（指「原址重建」），但遭警方勸說稱「不如你拎返入嚟、黐去第二度，或者唔好黐」，最終要先把字句收入屋內才准下樓。她形容情況「荒謬」。
「咁我覺得，我剩係……『我愛宏福』啫，我無其他嘢㗎嘛，咁都唔好。我都唔知。我直頭同佢講，間屋係我嘅，咁我要原址重建，你又話唔得，咁又話唔好黐。好喇我和應你唔黐，咁我黐『我愛宏福』啫，咁佢又話唔好，咁我都唔知佢有咩好」。
對於宏福苑接連有字句被撕走，《法庭線》日前向警方查詢，現場是否有警員要求居民移除標語、有何理據，以及航拍機是否由警方或其他部門安排。警方周二晚上回覆「採取任何行動，均會按實際情況處理」。
宏福苑居民稱收電話禁掛「原址重建」字句 改掛「我愛宏福」後亦須移除 屢被警叫出單位外溝通
火災後半年：疲倦、不快、憤怒
「其實好攰嘅 ，即係由火災到而家都成個人都好攰嘅。」
回望過去半年的生活，何小姐表示，政府的資訊「日日唔同」、「日日新鮮」，而她在火災後初期，不時與朋友外出共膳，現時卻不欲與友人見面，改為向宏福苑的街坊傾訴，「即係出出吓就唔係好想出去…亦都可能個話題，我唔想去圍繞講我呢啲（事）」，又指朋友曾向其稱「政府做得好」，「但係其實唔係㗎嘛，唔係外界睇嗰啲㗎嘛，因為佢唔係我哋宏福苑人…都係靠我哋講，但係我嗰刻，我又唔想去講呢樣嘢」。
不快、憤怒的情緒亦充斥何小姐這半年間的生活。她過去不時旁聽聽證會，「因為我都想知個事實㗎嘛，雖然都知佢哋可能講緊大話呀剩，但係我都要知返，即係關於宏福苑嘅嘢，知道佢哋究竟邊個出事、（誰的）責任」，直言聽到「火滾」，「即係完全係真係將個波踢到冇雷公咁遠，你冇人承認責任㗎到而家，完全係唔知呢個政府做緊乜囉」，加上上樓後目睹住所的情況，「我（心情）仲會更加唔好」。
何小姐又指，居民「講十句」，政府「都無聽到一句」，「我哋有啲嘢做咗出嚟，佢（政府）又反對我哋做，變咗其實係真係得佢講囉，而家係無我哋講嘅」，批評政府一意孤行地收回業權，卻不曾有官員解釋，「之前坊間好多都話我哋宏福苑啲人好貪心，政府俾咗好多嘢我哋，其實唔係，而家最大貪嗰個真係政府，佢哋擸住曬所有嘢」。
問責與安置同等重要
問責和安置一直是宏福苑居民關注的議題。何小姐指兩項議題同等重要。就安置方面，她希望居民能盡快安置，指部分居民現時所居住的過渡性房屋空間不多，「如果我入咗去嗰啲百零呎呢，我都覺得我一定係有抑鬱…佢將我哋嘅生活質素完全係降到好低囉而家，變咗好多街坊都係唔開心」。
至於問責方面，她堅決指「一定係要有人問責」，「之前我哋咁多投訴，你無理由巡查、調查 12 次，12 次都唔理㗎嘛，消防嚟到巡查，又可以淨係睇管理處個簿，又唔會巡查嗰樣嘢，實質嗰樣物件你係要睇㗎嘛，你有冇水啊，水缸有冇事，你都要望啊嘛，呢啲完全冇」，火災後「無官員出嚟鞠個躬㗎喎，亦都無去同啲死傷家屬探訪」，「點解你可以仲安然咁坐喺度，逗咁高嘅人工…點解你哋唔負返一啲責任」。
惟她認為難以有官員被問責，並舉出早前的冒牌水事件為例，「而家搵親啲（官員）都係退咗休，退休咪又冇事囉…（冒牌）水事件都係嗰個退休（官員），你攞咗佢嗰個勳章，但係而家嗰啲可能無勳章嘅，咪冇事囉，咁邊個負責呢？」
宏盛14樓黎小姐：收購業權全部被迫，處之泰然啦
居住在宏盛閣 14 樓的黎小姐表示，母親在此居住了 40 年，自己亦居住了 20 年才搬走，第二次上樓希望取回金鏈及人民幣。
她指自己的家沒有被燒毀，但不知道為何是亂七八糟、「成地垃圾」，幸好沒有遺失個人物品。
對於政府打算收購業權，黎小姐表示：「都無辦法，全部都係被迫，處之泰然啦，無計㗎啦。」她認為數棟大廈的燒毀情況，已經無可能原址重建，「咁大場火災，再住都危險」。
她亦指，樓換樓的重置方案經常改變，「突然無咗呢個屋苑揀，要重新再諗過」。母親原本想選擇元朗朗天苑，「突然間無咗，唔係咁開心」。
宏盛1樓關小姐：姑姐昨上樓暈倒
宏盛 1 樓住戶關小姐，昨天獲准一家六口回家收拾物品，不過因天氣炎熱，其姑姐在屋內收拾時不適，隨後暈倒送院，因此獲當局酌情批准今天再回家收拾，同樣時限是 3 小時，惟事出突然，一家六口今天只得兩人上樓。
據天文台紀錄，昨天酷熱天氣警告生效，最高氣溫達 33.7 度。由於大廈沒有通電，故居民在室內收拾時亦沒冷氣。
關小姐講述昨天情況，稱「琴日太熱啦個天氣」，以致其姑姐在屋內收拾時血壓飆升，「一下子覺得成個人抖唔到氣，即刻出咗後樓梯坐」，但在後樓梯亦未見好，再獲移至走廊休息，但姑姐已見暈，拍醒也再次暈倒，總計暈倒兩次，遂立即通知消防、救護，「要救護真係去處理佢，即刻急送去入院」，幸好已即日出院。
關小姐續說，「Madam 都好好，真係人命緊要啲，畀多次酌情權」，批准其一家再次上樓。但關小姐哽咽稱，「遺憾就係，琴日可以 6 個上，咁但係（而家）影唔到⋯⋯合家福⋯⋯影唔到個合照有少少遺憾」，只好稍後修圖把沒能同場的家人增添上去。
關小姐期望今天盡量收拾單位，因政府不斷促交業權，「叫做無遺憾，真係一間吉屋咁畀佢，佢鍾意點收就點收，因為點都，任人魚肉㗎喇。」她另期望政府可以原址重建，「網開一面，畀返啲尊重，或者對於我哋嚟講係一個補償」。
被問到有居民貼原址重建字句在窗口被撕走，關小姐認為情況「好唔尊重」，稱始終居民不是貼在公眾地方，而是自己的家，而且字句不涉粗言穢語，「所以點解我哋識得尊重自己嘅時候，人哋唔識得尊重我哋呢？呢樣真係，好失禮嘅一件事⋯⋯希望呢段說話唔會畀人捉走啦。」
關小姐下樓後，向記者表示在自己單位的牆上，手寫了一段感言「致宏盛 多謝照顧我地（哋） 我地（哋）暫時要離開 只係暫時，我地（哋）會再見 唔會永別的！」
其後她哽咽稱，「你話捨唔捨得，咁就一定係唔捨得，但係我都⋯⋯我一路影相就一路⋯⋯啲眼淚就湧出嚟⋯⋯所以都好難形容自己個心情。住咗咁耐，即係當你玩咗一件玩具，由細玩到大，當俾人搶咗、據為己有嘅時候，你都好心悒囉。所以好難形容個心情，希望再有機會重聚。」
宏道中層梁婆婆：憂新單位廁所細難攙扶
在宏道中層居住的梁婆婆，今日到場準備上樓。她接受傳媒訪問時情緒激動，形容自己「谷氣谷咗好耐」。
她指宏福苑深得長者喜愛，是因為洗手間可以容納 3 個人，方便攙扶長者。對於政府的收購方案，她形容是「好有問題、好反感」，質疑未能事先看單位就要揀樓，亦未能顧及長者需要：「我差唔多 8 字頭，隨時都會跌，你洗手間咁細，一個人入，如果我跌親，係咪要人扶呀？扶行架入唔入到去？⋯⋯你畀間屋我，我願意，都用唔到。」
她希望可以補錢，換較大的單位，但政府拒絕，「我唔係搶，唔係攞政府著數」，「佢迫你、搶你幅地，我哋係蟻民、災民，你話佢係咪大石砸死蟹？我哋有冇得反抗先？如果有得反抗，今日開咗業主大會啦！點解開唔成業主大會，你哋心知肚明啦！」她又批評，現時表達意見的渠道不足，「政府一味話數據、數據，咁你要人服你先得㗎」。
梁婆婆又指，自己還有一位過百歲的母親要照顧，自己多年來都是睡在客廳，把房間讓給母親。母親去年 5 月始入往老人院，才能避過大火免被燒死。
宏道15樓黃生：官字兩個口
宏道閣 15 樓住戶黃生，表示自己單位沒受大火波及，但如想收拾物品，就得靠中「六合彩」。追問下，他笑言因自己想帶走洗衣機，但大廈沒有通電，亦沒有升降機，「所以咪話中六合彩囉，如果有得執嘅話。」
說起回購方案，黃生即說「唉，唔想講喇嗰啲就⋯⋯『失望』得㗎喇，兩個字。無嘢講。」
被問及單位無恙，政府卻要收購會否感可惜，黃生答「有乜嘢可唔可惜啫？佢而家五隻手指壓落嚟，你一定要賣個業權畀佢㗎。你唔賣都唔得㗎。係咪先？佢係政府，你唔係吖嘛。我哋五千年來嘅文化，就官字兩個口⋯⋯我哋中國都係永遠講呢個字㗎嘛。由中央一路講到落嚟都係，五千年文化，官字兩個口。咁壓落嚟，咪由得佢壓囉。唔係點呀？壓到大家都無氣嘅時候，咪反囉。『官逼民反』4 個字，係中國發明㗎嘛，啱唔啱呀？唔係外國發明㗎嘛，我哋中國文化就係咁囉。」
至於未來生活如何安置，黃生稱「唔諗喇，你睇我頭髮都咁白喇，仲諗未來？留返後面嗰啲人去諗啦。你點知聽日咩環境呀？」
黃生認為政府不會批准原址重建，亦認為如政府願賠償，就會安置居民入公屋，「佢一點頭，1,700 幾戶入晒屋啦可以。肯唔肯畀你先得㗎？唔肯呀嘛。」有記者追問為何覺得不肯，他答「我哋呢啲卑賤市民嚟㗎嘛⋯⋯香港係有錢人嘅世界嚟呀嘛。我哋活到 70 幾（歲）人，都係諗呢樣嘢㗎喇。」
現時黃生暫住中轉屋，「老人家，安排你去邊度呀邊度㗎啦。畀間安老院你，你都要去」。
