住在宏昌閣的崔生周二（26 日）帶着鐵剷，第 3 次走上 30 層樓梯，想在幾寸厚的灰燼之中，找回當年在日本旅遊時，與崔太一同選購的求婚戒指。上月第一輪上樓時，崔家堆滿外來物品，因而額外獲安排上樓。
崔生一再在廢墟中挖掘，「唔想咁快同自己講話我放棄」，結果還是空手而回。他再次滿身是灰，蹲坐着整理一小袋家當，苦笑說着：「命運就係咁囉，當你以為珍藏住嗰樣嘢，唔戴嘅時候，其實佢就一次意外，咁就搵唔返。」
崔生在宏福苑出生、長大，成家後搬到屋苑另一單位居住，全屋裝修由他與太太親手設計，可惜在大火中灰飛煙滅。這次回去亦希望見多一面，「感性上就好想望多佢幾眼，繼續有啲留戀咁望多佢幾眼，但係理性上就不斷話畀自己聽，你返去都冇乜大作用㗎喇，算啦」。
猶有餘悸
半年前的 11 月 26 日，同樣是個風和日麗的日子，崔生把一歲半女兒送到外母家中暫托，然後上班。下班時，他在宏昌閣的單位已被火舌吞沒。
「好彩做咗呢個行動，冇叫婆婆過嚟湊，如果唔係個女就唔喺度喇。」
說起火災當天的經歷，崔生猶有餘悸，聲音略為抖震，當晚他踩着單車在廣福公園，目睹家園被燒毀，「其實、其實到而家都係⋯⋯好深刻一件事，即係好似睇戲咁，我諗未親眼見過嘅人，唔會知道其實係有幾咁、有幾咁震撼呀嗰個情景」。他形容這場火對全家人來說，都是很大的創傷。
三度回家
上月第一次回到家園，崔生崔太震驚地發現，已被燒成廢墟的家堆滿外來的煙盒、垃圾等雜物。說話溫文爾雅的崔生落樓後，氣憤地控訴自己家被當成「垃圾站」，質疑「工人係咪以為我已經死咗？」
4 日後崔生獲安排再次上樓，並有工作人員協助移走雜物，但大部分時間用作清理，崔生筋疲力盡落樓，還是找不到送給崔太的求婚戒指。穿着沾滿灰塵的上衣，崔生坦言失望，「早知唔返嚟」。
事隔 1 個月第二輪上樓，崔生說之前回家後，「成日個人都會諗，會唔會係自己睇漏眼呀？或者係其實佢可能跌咗喺某個角落度呢，即係我深信佢唔會無啦啦唔見咗㗎嘛」，所以再次踏上回家的路，把握尋回求婚戒指的機會。
崔太第一次回家時，已感到整個空間令她心情沉重，想起在火災中過世的鄰居，所以不想再上樓，由崔生擔起這個重任。
失望而回
周二（26 日）上午陽光普照，一陣風吹起幾寸厚的灰燼，崔生戴着頭盔、口罩，在灰塵之中翻找，可惜拿着鐵剷，在主人房床架下翻了又翻、挖了再挖，還是找不到求婚戒指，和女兒出生時親友送的金粒。
崔生幾乎用盡 3 小時時限，把全身弄得灰濛濛，再次失望而回。
「其實都幾氣餒講真，本身其實已經降低晒個期望，但係都想，即係始終都係抱住仲有希望嘅心情⋯⋯雖然都唔相信呢個世界有咩奇蹟㗎喇，但係就會覺得，如果我仲生勾勾喺度，咁我能力上可以做到嘅嘢咁咪做囉。」
這隻鑽戒，是崔生崔太當年去日本旅遊時，在銀座首飾店 Tiffany 一同挑選的求婚戒指。求婚成功之後，崔太戴着戒指，「成個旅行嘅時候就好開心咁樣，影相又盛咁」，雖然戒指可以再買，但卻買不回當時的浪漫回憶，「始終拍緊拖嘅心情，同而家生咗小朋友、做父母嘅心情又有啲唔同，即係嗰陣時年輕人嗰種浪漫」。
崔太對這隻戒指珍而重之，平日不捨得戴，擔心丟失、弄花，一直擺在櫃桶裡，「命運就係咁囉，當你以為珍藏住嗰樣嘢，唔戴嘅時候，其實佢就一次意外，咁就搵唔返」。
這次帶上樓的紅白藍袋，主要裝着上次他忘了帶走的小物，包括一些已燒毀的菲林相機、膠卷、朋友送的結婚禮物、在希臘旅行時購買的咖啡壼、在法國購入的門牌、父母去捷克旅行買的小擺設。崔生一直鍾情菲林相機，可惜家中的膠卷盡毀，部分已沖曬的菲林相，儲存在家中的硬碟裡，亦在大火中焚毀。
崔生自言每次都抱着最後一次的心態上樓，「如果畀機會我，我又許可嘅，咪盡力去試下囉，咁但係當然理智上，就係既然已經一次、兩次、三次咁樣搵，而嗰樣嘢又好似真係唔喺度喎，咁所以就係，會覺得都係唔好上去喇，係囉算啦」。
宏福為家
崔生在宏福苑出生，與哥哥在宏建閣長大，7、8 年前購入宏昌閣單位與太太同住。他形容「宏福苑嘅人係有一份感情喺入邊，即係佢係好似一個小社區、小小村莊」，許多鄰居自小在樓下公園遊玩、在附近中小學上學、一同成長，對宏福、對街坊都有感情，「就算自己成家立室之後，都唔係話特別想離開囉，即係唔會諗搬去九龍方便啲返工啊，或者搬去啲新嗰啲私樓度住得靚啲、精緻啲啊，即係好奇怪，就係冇乜呢個諗法，好直觀地就覺得，我買樓呀，我買返阿爸阿媽隔離囉，買唔到同一座，買隔離座，住返宏福苑囉」。
自己小時候遊玩的遊樂場，設施大致沒有改變，也成為女兒的遊樂場，「雖然佢得歲半倒，佢應該都唔係太明嘅，但我都有同佢講，爸爸細個都係喺度玩嘅，你而家都係喺度玩啦」。
搬入宏昌閣時，崔生與崔太一手包辦所有裝修設計，「全部都係我哋自己諗點裝修，點樣砌牆，連牆壁嗰啲磚、或者啱啱地下一入門口嗰啲花嗰啲磚，其實係我同太太兩個人自己 design」，設計揉合了兩夫妻喜歡的風格，是他們一手一腳打造的安樂窩。
這天再回家，崔也希望多看一眼、多拍幾張照片，「感性上就好想望多佢幾眼，繼續有啲留戀咁望多佢幾眼，但係理性上就不斷話畀自己聽，你返去都冇乜大作用㗎喇，算啦」。
崔生不時翻看單位舊照片，與這幾次回家的現況對比，「但係每次對比嘅時候，又好唔開心，又突然間覺得⋯⋯即係會覺得自己好慘啊，咁樣嗰啲嘢，我又唔想成日都咁樣生活，所以就係囉，即係都盡量叫自己唔好咁」。
選擇
兩次問到崔生想有甚麼安置方案，他都說希望「畀多啲選擇」、「有得揀」，覺得居民掌握的資訊不清晰，「我哋都唔知道嚟緊究竟要派去邊、抽中去邊度住、搬去邊度住，其實唔知囉，淨係知道要填表囉，嗰份表我感覺上⋯⋯係填囉，冇乜得 say」。
即使要搬到新居，他亦希望能有更多選擇，例如他需要父母協助照顧女兒，不希望日後的居所相隔太遠，「我哋其實唔係話抱怨，而係我哋想知道啫，想知道個選擇係點，或者之後個安排係點，我可以選擇接唔接受，你而家連嗰個資訊都冇嘅時候，我好難選擇」。
他坦言自己仍在猶䂊想不想搬回宏福苑，對於原址重建是否最好的選擇抱有疑問，因為整個單位已經燒盡、許多鄰居過世，「你畀我返去住，我都唔係話⋯⋯唔係最想囉」。
但他認為每位街坊的處境不同，「原址重建我覺得都要成為其中一個選擇」，例如他的父母年事已高，「你夾硬要佢搬走，其實對佢哋嚟講係心理同精神嘅虐待」，尤其兩老在宏福生活 40 多年，現在踏入人生最後的 20 至 30 年，「你叫佢哋重新去建立過鄰里關係，或者適應新嘅地方，對佢哋嚟講係唔合情理囉」。
既快又慢
大火至今天剛好滿半年，崔生形容半年時間過得既快又慢，快在於火災當天的每一刻仍歷歷在目，慢則在於這半年來，生活需要慢慢適應。
「其實到而家為止，都係仲適應緊點樣過而家嘅生活囉，係咪一個新生活我唔夠膽講，因為仲有好多唔肯定嘅地方，嚟緊要搬去邊度啊？政府會畀咩選擇我啊？要住咩地方啊？其實全部都係未知之數囉。」
「每一次嘅轉變同埋搬遷，我覺得都係我同埋我屋企人，都要好努力咁去適應。」
