闊別家園 4 個月，宏福苑受火災波及的 7 幢大廈居民，周一（20 日）終可上樓取回物品。首批的是宏新閣低層居民，不少人的單位都燒至只剩灰燼。
有人在灰堆中尋回婚戒，有人意外找回五大袋舊相，有人在瓦礫中找到一隻 CD，是他唯一可帶走的物品；但亦有人找不到愛犬骸骨，只餘「燒剩嘅狗仔床」。
鄰居重遇，有人情緒激動，原來「大家都未死」。各自能帶走的物品，大多只有少量金器，一些相冊。最後的道別，有人拍照留念，有人留下情書：「寫咗喺宏福苑住嗰八年嘅回憶。」
首日264人上樓 一人喘氣送院 有人難覓愛犬骸骨 有人尋回舊相
黃生攜泥耙尋愛犬遺骸
在宏福苑居住接近四分一個世紀的黃先生，上樓之前向記者表示心情複雜，指「件事隔咗咁耐，其實最有事嘅時候，應該係頭一、兩個禮拜。但係將件事擺低咗之後，如果我而家要再親歷其境，上返去單位嘅時候，一定會複雜好多」。
他說最記掛不幸葬身火海，陪伴了他 10 多年的貴婦狗「多多」，他還特意帶了泥耙，說要找回「多多」的骸骨。
黃生：單位燻黑只剩「燒剩嘅狗仔床」
下樓之後，黃先生說他在 7 樓的家逗留約 1 小時，其後向記者提供單位照片，可見屋內的窗戶只燒剩一個又一個的大洞，由橙網圍封。天花和牆壁均被燒至燻黑，伴隨油漆剝落。室內物品則幾乎只燒剩鐵支架，一地都被灰覆蓋。
而他最牽掛的「多多」，黃生說「骨頭挖唔到⋯⋯得張燒剩嘅狗仔床」。能帶走的，只有少量金器，和藏在一隅的玩具。
被問及單位內的損毀情況有否令其感到心痛，他說「預咗」，後來補充稱「出事嗰晚我喺屋企樓下見到都燒得好犀利，已經有最壞打算」。
梁生：拾回婚戒「有交代」
居於 9 樓、40 多歲的梁生，表示屋內只燒剩灰，本身已預期自己只能取回少量金器，找到婚戒的一刻，他鬆一口氣，「有交代啦」。
他描述婚戒重見天日的過程，稱「其實都喺間房，我自己擺好咗個位，一掘已經係㗎喇。其實好多嘢都灰晒，零零舍舍反光嗰嚿嘢執返出嚟就係⋯⋯真金不怕洪爐火，就係嗰嚿金仲喺度」。
他向記者展示被火燒後的金飾，當中可見略有灰塵。他又透露，離開單位時放下了一封信：「寫咗封情信畀間屋，放低咗俾佢。」
梁生補充，那封情信是由妻子撰寫，「我老婆本身就寫返封信同呢間屋嘅道別嘅情信嚟嘅⋯⋯個內容係我老婆寫咗好耐嘅」，又指妻子沒讓他看信件內容，她透露「寫咗喺宏福苑住嗰八年嘅回憶」，「我見（妻）手寫 A4 白紙，五毫子咁大隻字寫咗 8 張紙，一年一張」。
鄭小姐：單位的灰燼高度
淹沒單位三分一
在宏福苑長大、居於 3 樓的鄭小姐，表示自己的單位「已經燒到無，全部都係灰㗎喇，一件傢俬都無。入到去嗰陣時，個灰已經高到⋯⋯淹沒左我屋企嘅三分一」。
家園被大火吞沒，她說感到非常傷心，指今次上樓，「其實都係諗住同自己屋企講再見」，但因時間緊逼，「基本上一上到去，你就係即刻執嘢⋯⋯吓，3 個鐘㗎喇？咁就走囉。但係自己個單位都有影到相，去留念咁樣」。
她又說，親眼見到家園現況時，「心裡有數，因為無期望，所以都無乜野失望，都係燒到無晒」。而屋內因大部分東西被燒燼，故「無乜太多嘢可以執」，不過屋內有一個櫃，剛好被灰淹沒，「唔知係咪算 protect 咗個櫃，咁我只要掘一掘嘅時候，跟住都發現個櫃嘅入面嘅嘢，都仲有剩。」
被問及會否再上去單位，鄭說暫沒打算。她又說，上樓時只可停留自己單位的層數，鄰居的單位「可能睄到一兩下」，形容政府「protect 得好好」，另或因時間有限，也沒與鄰居閒談，各自收拾。
鍾生：「屬於我嘅物品就燒剩隻 CD」
另一低層住戶鍾先生，表示母親上樓後，見到鄰居時情緒激動，原因是「大家都未死囉」。
鍾說其單位損毀的程度，「都係無晒㗎喇啲嘢，都無咩嘢好講」。從他提供的相片可見，單位內大部分物品嚴重燒毀，只剩下焦黑殘骸。
其中一張相片顯示瓦礫堆有一隻歌手鄭中基的《時間 人物 地點》CD，封面仍清晰可辨。鍾先生說，這是他唯一能帶走的物品，形容「屬於我嘅物品就燒剩隻 CD」，感慨「回憶、故事變成碎片」。
他指在單位已沒甚麼可做，「影幾張相，睇下有啲咩⋯⋯但都冇啲咩（可帶走）咪走囉。」
鍾母：屋被燒熔「賊都唔會偷」
其母曾女士受訪時表示，早已有心理準備屋企「燒到熔咗」，「因為難聽啲講，其實任佢燒⋯⋯無救過火，任佢燒，你間屋就係會燒熔」。到埗後，她說屋內無水，「但係成地都係碎晒」，又形容一屋垃圾，洗手間的洗手盤也「崩晒」，牆身的石屎「跌出嚟爆開」。
她又說當初只打算上去拍照留念，幸運地找到藏於床下底的首飾箱，「就啱啱好，好多灰砸住咗⋯⋯全間屋就係得一個首飾箱執得返」。她又說不怕被盜竊，「我成間屋熔晒，賊都唔會偷」。
李小姐：屋內損毀嚴重
只帶走相簿、少量金器
同樣住低層的李小姐，早上出發上樓前，向記者表示早前已看過家中現況照片，「爛晒，乜都無呀」，但指對回家持平常心，「有心理準備㗎喇已經」。
下樓後，她表示屋內「損毀嚴重，路面係好多碎石，但係可以行走」。能帶走的物品，只有一本相簿、少量金器，「 因為已經冇其他嘢攞，只剩返呢兩樣嘢」。至於廚房，她說「損毀唔嚴重，但啲嘢唔值錢，所以無攞」。
她最後說，「最唔捨得係小朋友嘅相同物品，同埋樓下個公園嘅回憶」。她特別提到，小朋友一直提起想取回公仔、「好掛住個公園」，心願是「有機會喺呢度起返一個一模一樣嘅公園」，「小朋友一直話想寫封信去同政府反映，所以我相信呢樣係佢最唔捨得嘅地方」。
