宏昌閣、宏道閣的災民周一（27 日）繼續分批上樓，宏昌閣的李太帶了鮮花及石頭上樓，在家悼念在火災中喪命的 62 歲丈夫和 11 歲柴犬 Bobby，她說丈夫在最後通話跟她說「我愛你」，囑咐她與子女「好好生活」。兒子表示在家中找回 Bobby 部分遺骸，與爸爸和牠「做咗最後嘅道別」。
曾在聽證會自責未及時提醒鄰居逃生的高以蕾，與胞姊回到現場，她們放低一隻紙鶴悼念。胞姊哽咽對妹妹說，「無論變成點，我哋都好想返嚟，係咪呀？」高以蕾點頭回應，說「多謝家姐」。
政府晚上指，全日共 119 戶 443 人上樓，進出大廈的平均時間是 2 小時 32 分鐘。
宏道11樓葉生：好難斷捨離
住咗咁多年、歡喜啲鄰居
宏道閣 11 樓住戶葉生，傍晚時分拖着單車落樓，離開宏福苑。他稱取回單車感開心，指單位「燒唔晒」，裡面有水、牆身熏黑，但慶幸沒燒毀，所以亦能取回文件、紀念性物品，但指只能「攞得幾多得幾多」。
被問及重回家園有何心情，他嘆息一句後沉默半刻，哽咽稱「好多嘢諗，好難『斷捨離』」。他其後說，自己由 1983 年起在宏福苑居住，已在此居住 40 多年，哽咽稱「最難受就係，住咗咁多年⋯⋯主要係家居無咗，跟住鄰居，我⋯⋯我嘅家。我⋯⋯我歡喜啲鄰居，所以好難捨」。
宏道閣魏生：勞力士手錶不翼而飛
已向警方報案
周日已上樓、居於宏道閣嚴重損毀單位的魏先生，周一推着妻子乘坐的輪椅途經宏福苑，他向記者表示剛去了向警方報案，指落樓後發現，原放在房間桌子上的勞力士手錶消失不見，「唔好話貴啦，數萬元」，但其他東西能找回。
魏太坐在輪椅上，對記者舉起戴在手上的戒指展示，笑稱「唔係今日（執），阿仔執㗎，我好開心呀，返嚟見到佢（戒指）」。魏生與家人昨帶備燒烤網充當筲箕，上樓收拾時成功尋回戒指及細小物件。
宏道中層莫小姐：若未能上樓一定遺憾
宏道閣中層 60 多歲住戶莫小姐指，其一家自宏福苑建成起入伙，即家人持有單位 40 多年。莫小姐自己曾住了該單位廿多年才搬出，餘下兄長、兄嫂、侄子繼續居住。
她指今天自己是「後備」，準備接替家人幫忙收拾物品。被問及她今次暫未能上樓會否有遺憾，她說「一定會，跟住就冇（得再上）㗎喇嘛，再見唔到間屋㗎喇」，已囑咐家人代取物品、拍照留念。她提到，其兄嫂一家上樓前有說擔心「會唔會爆喊」，但她認為要調較心理，「係會（爆喊），但要理智啲」。她亦希望自己有機會可上樓道別單位。
她又說，對宏福苑的感受很深，一來有 40 多年的記憶在此，屋苑亦環境好、交通方便，「係好唔捨得嘅」。今次火災，「好好彩（家人）全部無事，算係咁」、「最緊要屋企人齊全」，亦替失去親人的街坊傷心。
宏道閣中層陳生：希望我哋嘅遭遇
香港市民唔需要再重遇一次
宏道閣中層住戶、60 多歲陳生表示，自己是宏福苑第一批入伙居民，已住了 43 年，「本來可以住多廿年，住到我呢世，但係無。我哋對屋苑同間屋，係唔想走嘅⋯⋯如果唔大維修，住到 80（歲）都得㗎」。他說願望是繼續居於大埔，正考慮重建方案，亦正等候政府的居屋計劃。
他又說，事前沒收到社工的照片，故認為單位狀況尚可、應沒受大火波及，但「係咪完全 OK 未知，要上到先知」。
他事發時不在家，但一直有透過 Facebook 了解情況，「返到嚟都燒到⋯⋯個零鐘燒到好犀利。當晚已經，震撼嘅狀態。」他指想了解事件真相，「我哋都係想知道點解會咁樣」，會留意聽證會情況和結果，又指「希望我哋嘅遭遇，香港市民唔需要再重遇一次。我哋已經係去到呢個地步呢，希望政府做好啲啦，善後」。
宏昌閣高以蕾放紙鶴悼鄰居：
我有好好咁道歉
住在宏昌閣 2405 室的高以蕾，曾在聽證會作證，自責做得不夠好、未及時提鄰居逃生。高與胞姊落樓後心情仍未平復，需由姊姊牽着手陪伴。高眼泛淚光、身體微微顫抖，沉默近 30 秒之後，語帶哽咽地說，「我做咗我想做嘅嘢，我有好好咁道歉」。高形容，道歉後心情稍為好一點，因為逃生後，「所有嘢都好辛苦⋯⋯因為好多人走咗」，又指今天終回家了，但「返屋企好難」。
高以蕾續說，自己在宏福苑出世、長大，今天也拿回了充滿兒時回憶及宏福苑環境的相簿等。胞姊亦指，宏福苑對她們來說非常重要，「根本成個地方都係我哋嘅童年」，她們這次回家，不是道別，離家時也說，「我哋下次見」，她亦哽咽地對妹妹說，「無論變成點，我哋都好想返嚟，係咪呀？」高以蕾點頭回應，說「多謝家姐」。
高以蕾與胞姊下午一同乘搭接駁巴士進入宏福苑，並在大埔墟站接受訪問。胞姊表示，今早開始感到緊張，擔心不夠時間收拾物品，哽咽稱「同埋係咁耐以嚟第一次返番去，有少少擔心，即係睇到面目全非嗰一下囉」。
高以蕾亦說，對回家感到緊張，「因為你行番屋企嗰條路，本身應該係最安全、最有安全感嗰條路，但係你而家一啲安全感都無，同埋好緊張，陣間見到嘅嘢應該係會，應該係會好恐怖囉。」
記者追問擔心見到甚麼，她深呼頭、眼淚盈眶，一度未能說話。其胞姊摸一摸其頭，代答稱「擔心環境同以前熟悉嘅唔同晒，遇到咁大嘅災難」。
其胞姊續說，宏福苑住戶有共同回憶的地方例如公園，政府未徵詢居民已剷走，「其實災後我哋已經心靈好脆弱㗎喇，但係連嗰啲剩低落嚟嗰小小叫精神支柱、心靈安慰到嘅地方，問都無問我哋就已經拆晒。返到去好驚見到，即係已經唔同晒嘅畫面，驚自己會喊。」高以蕾期間在旁以手指拭淚。
其後高以蕾說，自己是宏昌住戶，哽咽稱「我知道樓上、樓下，好多都已經無晒⋯⋯同層亦都，有啲走咗喇，我最想⋯⋯最想先係返上去道個歉⋯⋯」她一度哽咽未道發言，其後續說，「希望佢哋喺天堂，唔會再有痛苦」。
高以蕾提到，最想取到「由細到大（喺）宏福苑長大嘅相簿」以及電腦，亦會帶紙鶴上樓悼念鄰居。
宏昌22樓李太與家人悼亡夫：
我而家要過新嘅生活啦
兒子稱尋回柴犬骸骨
住在宏昌閣 2201 室的李太與兒子，落樓後再受訪。兒子稱，「成間屋徹底咁樣燒晒，見到走廊、𨋢都好似因為太熱起晒泡泡咁」，而單位有難聞氣味，而且漆黑一片，「好沉重嘅心情」。
他又指，在單位找到柴犬 Bobby 的骸骨，「我無諗過會咁樣搵返出嚟，對我嚟講好錯愕⋯⋯所有火化程序已經完成晒，其實我無諗過會咁樣搵得返出嚟，對我嚟講係好錯愕，要啲時間處理」。找到遺骸令他「感覺實在啲，無話可唔可以向前，但達成到某樣心願」。李太則指找到的骸骨好零碎，而 Bobby 的陶瓷食具沒有被燒毀，因此已取回留念。
李太續說，心理學家教他們在單位放低物件，他們在丈夫與 Bobby 離世的房間放下兩束花和石頭，亦是「放低過去嘅包袱、重擔，做一個道別」，她說在單位向亡夫說，「我而家要過新嘅生活啦，始終都要放低」。兒子則指，「上到去好具體，視覺、觸覺或者係嗅覺，其實都能夠感受到爸爸同 Bobby 嗰個情境，做咗最後嘅道別」。
兒子表示整間屋被焚毀，氣味非常難聞，「所有嘢漆黑一片，好沉重嘅心情」。李太指，名錶已完全燒毀，只有少量金器可以取回，「整間屋變成灰燼，除了鐵之外，所有嘢都係灰燼」，因此大部分已溶解，無法找回。
李太下午與子女及媳婦共 4 人上樓，他們帶了鮮花及一顆石頭，在家悼念在火災中喪命的 62 歲丈夫和 11 歲柴犬 Bobby，「代表將呢份重擔，喺嗰度放低，唔好再攞啦，唔好再擔起喇，重新過新嘅生活」。
李太說，火災時女兒喚爸爸離開，但「叫落嚟但落唔到嚟，已經啲火上咗去喇」，而他們打電話聯絡丈夫，「好感恩就係話，佢走嘅時間呢都仲有兩個鐘頭畀我哋大家相處，喺度傾返啲嘢，先生就叫我哋『好好生活』咁樣，好好照顧家庭」，當時是下午，但到了 4 時至 5 時，「（丈夫稱）『啲火已經入晒嚟，消防員喺邊呀？』我就話畀佢聽上緊嚟啦，但佢話已經透唔到氣啦，喺間房躺平咗，連埋隻狗」，之後丈夫就失聯，知道他在主人房離世。
「佢知自己走唔到，其實佢好平靜，真係好平靜，面對呢個事實，佢唔會走嚟走去，只係安安靜靜喺度等，喺度爭取時間同我哋傾計」。
李太透露，丈夫在最後通話說了很少說的話，「佢嗌咗我個名，佢話『我愛你呀』咁樣，我跟住同佢講，『我都好愛你呀』，好少講『我愛你』呢個字㗎佢真係，所以係佢最後嘅遺言，咁話『你真係好好同佢哋生活』」。
30 歲的兒子指，他出世開始就住在宏福苑，而他「最後係唔敢去睇爸爸嘅遺體」，形容是一個遺憾，故自己亦需要「向前嘅一個儀式」，他又指，曾在遠處望入單位發現損毀嚴重，「唔期望可以搵到啲咩，但睇下會唔會搵到，即使係燒爛咗，係爸爸同埋隻狗嘅一啲物件，睇下搵唔搵得返」。
宏昌高層李小姐：單位狀況良好仲住到人 唔捨得走
李小姐的父母居住在宏昌閣高層單位，家人已在此居住 43 年。她今日特意上樓，取回父母的古董花樽。
她指單位並沒有被火燒毀，其情況良好，「真係仲可以住到人，唔係捨得走㗎。」
宏昌24樓簡生：四代人住宏福苑 寫心意卡感謝多年守護
居住在宏昌閣 24 樓的簡生，透露遺失約十萬元的現金與外幣，以及手錶等貴重物品，家中櫃桶明顯有被打開過，目前家人正報案。簡生又指上樓過程很辛苦，認為只得 3 小時收拾並不足夠。
他指單位廚房、廁所燒毀情況較為嚴重，感嘆全家四代都曾經住在宏福苑，每一代人都對這個地方有其記憶。他今日上樓見這個家園最後一面，並留下了一張心意卡，「自己有啲心意，寫咗張卡，寫咗啲說話留返俾屋企」。
他向記者展示照片，可見心意卡上面寫著：「謝謝你多年守護我們一家」。
他亦特意買了一束花，悼念離世的鄰居，「左右隔離都認識，幾十年街坊，由細睇到我哋大，都知道佢哋呢場火唔喺度」。
宏昌21樓胡生：一家四口住咗一百四十幾年
胡生住在宏昌閣 21 樓，「我哋一家四口，總共住咗一百四十幾年（記者：即係四口加埋住咗一百四十幾年？）係喇，我哋用 12 小時執咗頭先嘅嘢」。
胡生指，今日取回的東西都別具意義，非金錢能夠衡量，包括是其法國老虎狗的骨灰和遺物，「屋企裡一隻匙羹都有感情，陪伴我哋咁多年」。他表示，自己和太太當日也是從災場被救出，他因吸入過量一氧化碳，下肢肌肉及關節受損。他在醫院住了 14 日，出院後做復健才能再走路，如今已經行動自如。
胡生回憶逃生當日的情況，指因為其腳部受傷，只走了兩層樓梯就無法繼續行走，由消防員背着落樓，「消防員、前線嗰啲，我好想感激佢哋。」
由於身體狀況，今日他沒有上樓，由家人代勞。他今日所穿的衣服及鞋子，正正和當日逃生所穿的相同，指一來對自己有意義，二來他亦沒有買新衣服。
說到因大火離世的街坊，他特別感觸，哽咽道：「放唔低啲街坊，啲街坊有老有嫩，因為咁走咗，好放唔低。」他指，自己認識大部分鄰居，「有時喺街見到大家無事，都好多感觸」。胡生又指，相信大部分街坊都希望可以原址重建，但他認為機會不大。
政務司副司長卓永興曾回應只容許災民上樓 3 小時、時間不足的質疑，稱「如你 4 人上去，有 3 個鐘，其實有 12 個鐘做嘢」。
宏昌22樓張生：盼讓居民選擇原址重建
「政府部門做少一步令呢件事發生
而家只想政府做多一步」
住在宏昌閣 22 樓的張先生，曾發起聯署，亦在 YouTube 發布與街坊對談影片，爭取原址重建。他今日取回自己的模型收藏品、大學畢業證書等十幾袋個人物品。他指家中被燒黑，「佢話燒得唔嚴重嘅，但入到去，我覺得黑到都幾嚴重，即係個感覺就係，如果嗰日無走都應該係死㗎啦。」當天逃生時帶了貓貓與雀仔，搭𨋢離開。
不過他認為，「真係要執嘅，唔係屋企啲嘢，而係個地方」，指原本希望拍照，「好鍾意呢個單位嘅海，但係因為我啲窗都灰晒，我睇唔到，唯一爛咗個窗可以影少少」。
他指自己花 500 多萬元購入該海景單位，「我就係自己自由市場買嘅，買 500 零萬，可能啲人覺得貴啦，但係如果大家知宏福苑有幾正嘅話，其實唔係好貴，咁我又全部望晒海其實我覺得 OK 吖，但係我比較徬徨就係唔知日後會住返咩地方。」
數分鐘訪問，他提了幾次憂慮未來住處，「真係搵唔到，你畀多一個 doub（double），大家去望下白石角啲盤，都無咁靚。」又指政府現時的選項未能滿足需要，「我真係唔知，而家比較徬徨，政府畀我哋抽嗰啲樓又好似，我哋全部要住細單位，你如果唔想住細單位，就要博嗰啲頌雅路西嗰啲」。
他又指，這單位對他有特別意義，「呢個地方，係我十零歲開始打工，自己儲錢儲到 28 歲，買咗一個自己好鍾意嘅地方。佢對我嚟講好似一個獎項、一個 trophy。」位置亦接近住在廣福邨的父母。
「其實我哋居民我哋自己做咗好多嘢去嘗試去保障我哋屋企，但係好遺憾做唔到啦，咁好似每個部門都做少咗一步令到呢件事發生，但其實我哋而家只係想政府做多一步啫，即係做多一步，起碼想返去嘅人有呢個選擇，做多一步畀我哋原址重建，可以返去，我哋已經好多情緒嘅嘢，好多未來嘅嘢唔使擔心喇。」
宏昌27樓馮小姐：媽媽被困20小時獲救
貓貓不知所終
宏昌閣 2704 住戶馮小姐，與其 70 幾歲媽媽一同回到單位收拾。她說自己自幼在宏福苑長大，一住就廿多年。大火當天，媽媽被困單位內 20 小時，幸得消防救出。
記者追問單位情況，她多次無奈搖頭，嘆息道「渣滓、渣滓，乜都冇，全部化為灰、鐵。可以溶嘅都溶晒喇，乜都無」，哽咽稱「我諗住攞返啲以前細個啲獎牌，有紀念價值嘅嘢，全部都冇晒，乜都冇。所有細個嘅回憶⋯⋯攞唔返落嚟，全部都無晒。」
她補充，宏昌閣向海的單位大多「冇乜點燒」、「好多都好完整」，其單位雖向海，且媽媽獲救時單位無事，「但可能啱啱我哋食風，又再返燒⋯⋯可能再返燒，所以乜都冇晒」。
被問及有否與單位道別，她哽咽稱「拜拜囉，真係拜拜。我隻貓無咗，喺上面，（養咗）10 幾年，落唔到嚟。頹垣敗瓦，真係講聲拜拜」。而她在單位內找不到貓貓「小寶」的遺體，「我完全唔知佢走甩咗，定係真係化為灰定係乜嘢。總之就，無晒，剩係得個吉」。
她續說，單位只餘下「最靚」、向海的風景。她提到，因為宏昌閣向海，所以就算要爬上 27 層「都好輕鬆」，稱過程「舒服嘅，因為有海風吹住。嗰幢樓係保佑咗我哋⋯⋯因為對住個海，我哋宏昌對住個海，每一個位置、單位，都通風、好舒服。每層佢開咗個窗，啲風吹入嚟，上去都唔使點出汗⋯⋯係上到去，就乜都無囉，見到。」
她最後說，將來不打算再上去，因單位已經只餘灰燼，「搵唔到幾多嘢出嚟」，只能找到一些金幣、銀幣，哽咽稱「都認唔到啲樣，盡量攞。攞返多少做紀念都好呀。呢個屋企嚟㗎嘛」。她又說，宏福苑有不少住了幾十年的老街坊、老人家，「唔係新移民邨，全部（人都）好熟悉」，但現在「無咗個家」。
何女士：業主原本僅讓兒子一人上樓
後來同意加名
宏道閣租戶何女士，原本因業主只提供一個名額，只能由兒子代她上樓執拾，但她下午向記者補充，業主最後同意加名，讓她能與兒子一同上樓，他們亦順利取回首飾、文件等重要財物。她指最終 5 人上樓，業主一行 3 人，稱要記錄石油氣錶的度數，但逗留短短數十分鐘便離開，「逗留咗好短時間，就落咗去⋯⋯佢唔知上去做咩㗎，我見佢影咗少少相，就走咗」。
何女士指，她住的單位幾乎沒有燒過，僅有燒焦氣味和大量灰塵，但路經低層單位則見「好多燒得好勁」，她亦知道曾有警察搜查，故單位內物品「東歪西扯」，但沒有發現失竊。
何女士早上受訪時指，今日無法親自上樓執拾自己的個人物品。她已與業主溝通多次，但業主只容許簽租約的兒子衛先生上樓收拾。
她指，兒子並沒有在單位內居住，只有她自己才清楚知道個人物品的位置。她感到無力為力，「只有一個人上 17 樓，可以攞到咩？」她只能叫兒子盡量取回物品，「攞唔到、重嗰啲就唔好攞，都無辦法。」
她又指曾經向政府查詢，但政府僅叫她與業主自行溝通。「咩都話係業主，但（政務司副司長）卓永興唔係咁講㗎嘛，卓永興話會畀酌情權我哋。」她亦曾向區議員求助，但亦無法爭取上樓。她亦曾向社工提議，不進入單位內，只進入大廈走廊範圍，但都被拒絕，對此感到無助，「都唔知搵邊個人」。
何女士指，最希望取回貴重物品、有紀念價值的相片，以及遺囑等文件，「我就嚟 70 歲，只係想攞返自己啲嘢。屋內全部係我嘅嘢，我唔明點解政府唔幫我哋。」何女士強調，單位內僅洗衣機及冷氣機屬於業主，「啲家俬全部係我嘅」，而業主一直拒絕和她溝通。
衛先生則指，程序上是由業主提交上樓人士名單。最後名單包括業主 3 人及簽租約的他一人。「我哋（租戶）無話語權」，他指曾與「一戶一社工」溝通，但社工亦指程序無法改變。
翻查資料，政務司副司長卓永興曾經在本月 12 日向傳媒交代宏福苑居民上樓安排。被問到租戶與業主就上樓方面有爭拗，他當時表明住戶一定要有合理機會上樓取回物品，「因為單位內的物品是住戶的」。卓永興當時承諾，「一定會有足夠名額讓住戶上去，讓他如其他住戶般取回其想取回的物品」。
社署新聞組指，就報道中的個案，業主和租戶方二人（即租客及其家人）今早已成功返回單位執拾，過程順利。「一戶一社工」會主動聯絡有關租戶了解其訴求，並按此積極跟進他們返回單位執拾的安排。
住宏道8樓牧師謝志宏：
坐梳化想起與父母的時光
住在宏道 8 樓的牧師謝志宏，上樓執拾後再受訪，稱回家後在梳化坐下拍照，浮現很多回憶，想起與父母吃飯的時光。謝說爸爸在約 10 年前離世，媽媽仍健在，因在大火前入院而避過一劫，否則「以她的行動及聽覺，如果在場都可能不測了」。他在單位亦取回自己的聖經。
謝志宏早上只帶備 Ikea 袋到場，受訪指，只打算取回簡單物品，「第日再返嚟」。他解釋，「我哋都盼望返嚟。佢唔開 lift 即係想我哋唔搬嘢走，唔搬嘢走即係（可以）返嚟囉。」但被問及是否有信心可以再上樓，他稱「冇信心㗎喇，盡量做啦」。
謝亦指，未有收到單位照片故預料「無乜嘢、應該無乜損失裡面應該」。被問及最想取回的物品，他答「攞返本聖經啦，攞返啲媽媽食藥嗰啲嘅即熱水機」。記者追問為何是聖經，他中氣十足答「信耶穌呀嘛！」記者再追問，會否擔心聖經不見或被焚毀，他說，「應該唔會。聖經應該唔會有人偷啩？被火燒呀？應該燒唔到我哋嗰度」。
他又提到，自己打算向申訴專員公署投訴，稱石屎結構已證實無問題，但只因電線、喉管而要把 7 幢全拆「係好戇居嘅事」。
他亦指，自己在中學起居住宏福苑，至今已有廿年。入屋之後，他最想做的事，是「坐返梳化度，舒服嘅位呀嘛全屋度」。
宏道76歲鍾生：希望行到上去啦
鍾生居住在宏道閣 14 樓，在宏福苑已經生活了 40 多年。他指早前已收到單位的相片，情況「大致 OK」，今日帶了紅白藍膠袋作收拾之用。
76 歲的鍾生拿着拐杖，表示會自己步行上樓，「我希望行到上去啦，我哋老人家⋯⋯」。被問到會否與單位道別，他說：「唔多唔少都講返句啦，呢啲心安理得嘅嘢」。
宏道19樓盧生：留紙條與家說再見
住咗幾廿年喇，住咗好多年
盧生住在宏道閣 19 樓，他未有從社工收到單位照片，故未知單位情況，「即係仲未知波及到有幾多，就盡量執啦，盡下人事啦⋯⋯希望有好消息，（但）就算係，都唔可以喺度住，有啲可惜。」
盧續說，今天帶備了背囊，希望取回有紀念價值、父母留下的物品，如單位沒受火災波及，3 小時將不足夠收拾。
他又說，最後一次回家，會「同屋企嗰度講再見。住咗幾廿年喇，住咗好多年」，稱自己已寫下紙條，裡面有一些與家園有關的回憶，到埗後會把紙條留下。
宏道15樓Edan：取回比賽獎牌
13 歲 Edan 上樓收拾後表示，家中環境「無乜」改變，但廚房和廁所燒毀，而執拾上亦沒特別困難、不辛苦，能取走對他來說重要的獎狀，包括不同名次的數學比賽獎項。他稱「因為付出咗好多努力」，因此想取回。
他亦在家中取回小提琴，但沒有在家中重彈，另有些大型傢俬、電器未及取走，希望能再一次回家收拾。
13 歲的 Edan 原本居住在宏道閣 15 樓，在宏福苑居住了5 、6 年。他今早到場登記時表示心情緊張，未知道單位的情況，事前未有收到屋內情況的相片。
他表示，希望可以取回自己的數學比賽的獎座、獎牌，今日是自己主動向父母要求回家，「想見返屋企最後一面」。
宏昌21樓胡太：希望盡量攞
就算一隻匙羹都係我嘅
住在宏昌閣 21 樓的胡太，今早帶一大卷包裝發泡膠紙到場，稱希望盡量帶走所有物品，「就算一隻匙羹都係我嘅，希望盡量攞」。她已預料行樓梯回家有一定困難，但稱「擔心都要㗎啦，死頂啦」，她有練緊行樓梯，亦有朋友借她外骨骼，她覺得有用，惟「背囊頂住，我用唔到」。
她又指，特別想取回「有錢買唔到嘅嘢」，包括相簿、證書、出世紙，以及多年工作的公司紀念品，例如一些紀念鈔，「講唔到（晒），好多好多，成間屋都係我哋嘅回憶」。
