宏福苑宏道閣居民周日（26 日）首日上樓，早前聽證會提到 2 號、3 號單位幾乎嚴重損毀。魏先生一家住在相關單位，帶同燒烤網作筲箕，成功尋回戒指。一家人告別單位時，在牆上寫上「宏福苑是我家」。單位沒損毀的住戶，則帶走金器等物品，希望可以再上樓執拾。
有宏昌閣居民受訪時哽咽稱「燒晒喇」，並透露是徒手挖掘，「因為所有嘢都變晒灰，你好難搵到啲好細微嘅嘢」，最後找到少量金鏈、陶瓷及硬幣。
周日（26 日）為宏道閣首日、宏昌閣第四日開放予居民上樓收拾。有居民帶半個人高的鐵鏟、紙箱、行李箱到場，有人離開時拿走吸塵機、電腦主機等。政府晚上公布，有 116 戶共 424 人上樓，當中 62 戶共 151 人上落不止一次。
據早前聽證會透露，2 號、3 號單位幾乎嚴重損毀，其餘單位則幾乎未受損。
宏道閣魏家單位嚴重損毀
魏氏一家四口居於宏道閣嚴重損毀的單位，父親魏先生憶述大火當日經過。他指，知悉火警後與太太下樓，「大家都慢慢行，冇人諗住會咁樣燒法，初時以為唔係逃生、唔使走難」，打算會再上樓，甚麼東西都沒帶，指向太太說僅「拎咗佢」，「點知落到嚟，變咗走難、變咗災民」。
兒子指從相片可見，「燒到地下都係垃圾」，又指在宏福苑長大，希望尋回紀念品、兒時照片，父母年輕照片、金器，但知道機會不大，「都見到（燒到）七七八八」。他們又帶燒烤網作筲箕，打算剷起灰燼中的戒指，形容像淘金，「篩篩篩，咪有金粒喺度囉」。
魏生稱希望重建願候十年
魏太表示「我諗我上到去會喊，我好眼淺，我依家俾你哋訪問我都想喊」。兒子說，始終對屋苑有感情。父親希望重建，「但政府方案唔畀呀嘛，想冇用㗎，佢肯起我要呀，但佢唔肯起呀」，也願意等十年候重建，「等唔到咪我個仔等，我咁後生實等到啦」。
魏先生說鍾情宏福苑，「好似我鍾情我老婆一樣」。魏太補充宏福苑好住，風景優美、交通方便，鄰里亦相識多年。魏先生又說：「我心情好放得開，唔燒都燒咗⋯⋯ 你喊都冇用，喊一頭半個月好喇，唔好再喊，精神科、心理測試我完全滿分」，但如太太有事，「我就唔樂天㗎啦」。
告別時牆上寫「宏福苑是我家」
兒子其後透過訊息回覆指，回家後發現單位狀況比預期好，「我預期係乜都冇」。他指，透過燒烤網成功尋回戒指及細小物件，形容好用、方便，但只能找到少量文件，「搵得返都濕晒」。他們告別單位時，在牆上寫「宏福苑是我家」。
住在 803 室數年的鄭先生亦指單位熏黑、「燒咗」，幸好能拾回部分東西，包括相簿、魚竿。
宏道閣黃太：單位完整、取回金器
有居民的單位未受影響，取回不少物品。住在 7 樓的黃太表示，居在上址五年，指單位完整、「無事」，取回衣物、相片、金器等貴重物品，但沒拿走電器等大型物品，「依家攞啲細細件，容易攞啲嘅」，已申請第二次上樓。
事隔五個月回家，黃太指有不開心，因想起火災，開心則是「畀我哋返去、有希望咁攞啲嘢」，又指有在單位內「講一聲再見」。
宏道閣黎生：衣櫃被打開但不見失物
居於 9 樓的黎先生則指，「尋晚都瞓唔著，因為隔咗咁耐，唔知屋企係點樣」，抵達家中發現單位沒怎損毀，但情況混亂，例如衣櫃被打開、「兩個櫃桶去咗大房」，但點算後沒發現不見物品，「利是、啲錢都好似仲喺度，好似放心咗啲」，亦有取回樓契、證件，「都走咗四、五轉」。
宏道閣潘小姐：在家再影一次全家福
居於低層的潘小姐表示，與父母、妹妹上樓收拾，他們等候時遇到鄰居，激動相擁、互相慰問。
潘小姐指沒收過單位相片，形容回家如「開盲盒」、心情矛盾，哽咽稱：「當係最後一次上去⋯⋯我哋講好咗，要再喺屋企影一次全家福」。
她又希望取回重要文件、相簿、小朋友的玩具。她之後透過訊息回覆表示：「屋企完好無缺，感恩」，也有取回童年照片，以及發現一個仍未腐爛的橙。
宏昌閣居民哽咽「燒晒」
至於居於宏昌閣 17 樓的鄧太與女兒上樓後表示，居在宏福苑 43 年，哽咽稱「燒晒喇、冇晒，廚房、士多房都燒埋，金鏈仔、細路仔嗰啲嘢咩都冇晒」。
她說，「辛苦都要想去，睇吓自己屋企變成點樣，但一上到去，係比我想像中燒得好（更）犀利」，又指其樓層有 3 人去世感難過。
鄧太的女兒指，從相片知悉損毀嚴重，上樓後看到「單位九成啲嘢都燒晒」。她指，樓層有剷借出，「但因為所有嘢都變晒灰，你挖都好難，你好難搵到啲好細微嘅嘢」，最後徒手挖掘到少量紀念品、金鏈、陶瓷及硬幣。
宏昌閣馬生攜花悼鄰居
居於宏昌閣 19 樓的馬先生與太太受訪指，得悉沒有嚴重損毀，想取回貴重物品，亦帶鮮花到場悼去世鄰居。馬先生指，在 Facebook 看到與該鄰居相關的尋人啟事，指鄰居 30 多歲、是一位媽媽，「畀返少少心意佢」。
