身在現場 見證記錄

被指毀國旗、區旗旗桿 19歲自閉症男生侮辱國旗等罪成 聞還押失控哭叫1小時

被指毀國旗、區旗旗桿 19歲自閉症男生侮辱國旗等罪成 聞還押失控哭叫1小時

分享:

患自閉症 19 歲男學生,被指於 2022 年 10 月 1 日,在深水埗 3 度損毀 5 支國旗及區旗旗桿,旗幟並沒受損。他經審訊後,周三(31 日)在西九龍裁判法院被裁定「侮辱國旗」及兩項「侮辱區旗」共 3 罪全數罪成,押後 6 月 14 日判刑,被告須還押。

裁判官李志豪裁決指,被告證供前後矛盾,庭上說是針對旗桿不是國旗,但又說旗幟顏色鮮艷令他不適而扯下;警誡下被問遭他扯爛的東西為何物,又能答出是國旗。李志豪又指,兩名辯方證人試圖隱瞞事件真相,不予任何比重。官最終指被告是故意針對國旗,因旗幟要依賴旗桿才能在空中飄揚,其行為致旗幟未能莊嚴展示,削弱國家尊嚴,控罪全數罪成。被告聞決即高呼「我咩都無做!」並抖大氣,發出嗚咽聲。

裁判官明言「我唔打算畀佢擔保」後,被告即大哭嗚咽「唔好呀!」。裁判官見狀稱「帶佢入去(被告欄)先」並休庭。被告之後情緒激動,大哭尖叫持續約 1 小時。期間書記指會轉庭處理求情,被告與親友則留在原庭被告欄。辯方大狀提出,望法庭能縮短索報告時間,但裁判官反問,「係咩原因我要特別優待佢?」
官明言「唔打算畀佢擔保」
被告大哭尖叫「唔好呀」、持續約 1 小時

裁判官李志豪表示擬為被告索取更生中心及精神科醫生報告,並明言「我唔打算畀佢擔保」後,被告即大哭「唔好呀!唔係呀!」有旁聽人士見狀指「阿俊你冷靜啲呀」。裁判官即稱「帶佢入去先」並休庭。被告聞言再大哭大叫「唔好呀」、「唔好呀」、「我無呀」。

其後有 3 名警察走近被告,其中一人擬拉起他入被告欄,被告即手拉住前方木欄,繼續大哭尖叫,「唔好呀」、「我無呀」。有旁聽人士向警員表示「畀我入去」,「如果唔係你哋 control 唔到㗎」。被告繼續手抓前方木欄,大哭「佢拎報告…我無得擔保呀」,並尖叫「唔好呀」、「想見媽咪呀,唔好呀」。

其後有女親友獲准走近被告,被告即抱住她叫「媽咪呀…媽咪呀…」。女親友即安撫他稱「喊晒出嚟就好啲」。被告繼續哭叫,「我今晚返唔到屋企呀」、「我要返屋企呀」、「我想返屋企呀」。

親友陪同下入被告欄
女親友哭勸:我今晚陪你坐好無

在場有人勸稱「冷靜啲先…你會令到你媽咪好傷心㗎」,亦有旁聽人士同哭泣,「一個自閉仔,一個傻仔嚟咋…點會判佢呀…佢真係驚呀嘛」、「點會咁樣㗎,一個青年」。

約 10 分鐘後,在兩名親友抱住陪同下,被告進入被告欄,但繼續大哭、掙扎尖叫。有女親友勸「乖啦,我哋一齊啦」,但被告繼續掙扎。女親友嗚咽稱「唔係就綁你架啦,你唔入去」。兩名女親友最後一左一右坐在被告身旁,被告數度欲站起,大哭掙扎離開。女親友嗚咽「我今晚陪你坐好無」。

再約 20 分鐘後,書記指裁判官會轉庭處理求情,留下一名女親友陪同被告,在原先法庭內的被告欄,由數名警員看守。求情完成後,被告仍抱緊女親友、伏在其大腿上哭。至下午約 5 時接近法院關閉時間,再有警察及職員要求被告還押,被告再嗚咽尖叫「唔好呀…我乜嘢嘢都無喇…我想返屋企瞓呀…我唔要去懲教署呀…」女親友其後向他說,「光明正大行落去!」最終被告手撓著女親友步入羈留室。

辯方求情望縮短索報告時間
官反問:「係咩原因我要特別優待佢?」

辯方求情指,被告現年 20 歲,於 IVE 就讀電腦及電子工程一年級。其母親求情信提及家庭不幸,被告父親在 2021 年離世,家庭頓失經濟及精神支柱,明白被告犯錯應要受罰,「媽媽其實都好自責」。社工信件則提及,被告「好需要人哋幫」。

辯方續指,明白本案控罪嚴重,但有見被告家庭背景,身體狀況,望法庭考慮押後 7 天才索報告,以減少還押時間。但裁判官反問「係咩原因我要特別優待佢」,指所有被告索取報告一般都需 14 日,「睇唔到點解要特別畀短啲佢」,其後他修正說法,「唔係優待,我唔知用咩字眼喇」。

裁判官退庭前又對辯方指,「有機會可以勸服你當事人,如果佢情緒好似今次咁仍未能平靜,好似咁激動,我諗聆訊開唔到,喺佢在場之下…無論如何,我諗你會向佢好好解釋㗎喇」,遂下令被告還押懲教看管。

男學生被控深水埗侮辱國旗、區旗

被告黃俊樂(19 歲,學生)被控 1 項「侮辱國旗」罪及2項「侮辱香港特別行政區區旗」罪。控罪指,他於 2022 年 10 月 1 日在深水埗南昌街休憩處外,公開及故意地以玷污國旗的方式侮辱一支國旗。及於同日在深水埗荔枝角道及界限街交界,聚魚道及通州街交界,公開及故意地以玷污的方式侮辱 1 支及 3 支區旗。

裁判官裁決時亦簡述案情,指案發日為國慶日,警方接報深水埗南昌街有國旗旗桿金屬表面屈曲損毀,翻查閉路電視後見被告以雙手屈曲旗桿,再揭他在另外兩地點拉扯旗桿。被告警誡下稱「見到成條街係國旗,個心唔舒服,扯爛佢」,其後庭上親自作供解釋,因當時突然滿街國旗,但稱心無侮辱之意。

WKCC3705/2022
焦點
最新文章
最新專題影片