8 月 31 日為宏福苑業主出售業權期限，最終有 99.1% 住戶交回「收購建議信」，餘下 17 戶未有交信。遺屬葉家駒、李國鴻出於不同考量，在死線前交信。
葉家駒的兒子同住宏福苑，因背負按揭只能賣業權；葉家駒掙扎下亦決定賣業權，協助兒子再置業。李國鴻則指，政府表明不排除立法，嘆「點同佢鬥」，只好先交信「拖住佢先」，之後再決定是否正式簽買賣協議。兩人同感不忿、無奈，葉坦言：「我一賣，就係肉隨砧板上，『人為刀俎，我為魚肉』。」
儘管失去業主身分，李國鴻表明「公義同土地係兩件事」，會堅持追尋真相；葉家駒亦說，他追究的是太太為何死亡，「無論我係唔係呢個地方嘅業主，改變唔到太太喺度過身嘅事實。」
原址重建夢碎
在大火失去妻子的葉家駒、失去母親與外傭的李國鴻，在收購限期屆滿前數天，帶着不忿、無奈提交「收購建議信」，當中經歷不少掙扎。
回望大火初期，政府提及受大火波及的 7 座大廈損毀嚴重，居民傾向無法回到宏福苑居住。然而，聽證會上展示各大廈單位的燒毀情況，除了損毀最嚴重的宏昌、宏泰、宏新閣，其餘幾座的單位多數無恙，讓兩人發現，宏福苑並非政府說得那麼惡劣。
葉家駒說，宏建閣的單位分布表上，只有少量單位是紅色、即嚴重損毀，大部分單位是「一片綠」、即沒燒毀，在場居民見狀不禁嘩然，更讓他堅定支持原址重建或修復後入住。
兩人亦不滿政府沒有公開驗樓報告，葉家駒說最近的九號風球，宏福苑仍然屹立不倒，「大自然同我做咗一次勘察」。
就政府劃一收購價，李國鴻質疑「一樓個價同頂樓個價都唔同價錢」。收購價包括轉讓保險索償權，葉家駒則指：「買保險我現兜兜畀錢，依家你話畀我聽，買我個業權買埋我份保險，呢個 lumpsum（一筆錢）包晒，我唔知裡面百分比，幾多成係保險、幾多成係樓價？」
談及會否有第三次上樓執拾，政府說會盡量配合住戶新居入伙時間再安排，兩人對此更不滿。葉家駒指，大埔頌雅路西居屋料於 2030 年入伙，「係咪可以等到 2030 年先攞（物品）？如果係，咁你唔好逼我咁急吖，你要我今年 831 就搞掂（售出業權）？」
葉家駒：賣業權助子置業
種種疑惑下，直到 6 月 30 日首個限期後，兩人維持不賣業權想法。不過，出售業權不僅是一個人的選擇，而是牽連到整個家庭。
葉家駒的次子居於宏昌閣，數年前以 500 多萬元購入單位，因背負按揭一早接受政府方案出售業權，但對於按揭如何處理，銀行回覆指，政府也未有清晰定論。
他說，兒子「過去嗰幾年係白供」，等於一無所有，為減低損失只能賣業權。他又說，長子有自己的家庭，日後自己將會跟次子同住，「我都要諗辦法唔好令佢 suffer 咁多。」
葉家駒不時到寶蓮寺探太太，最近一次也有跟太太談起業權事宜。從前大小事務均由太太打理，他盼對方今次也能給予意見，「如果可以，畀啲提示畀我，或者佢點處理」。
沒有太太在旁，三父子經常圍在一起商量。葉家駒說，站在兩名兒子角度，「拉扯落去都唔係長遠辦法」，兒子不欲他花掉積蓄買樓，「諗過好多唔同組合方法，點樣能夠喺日後有一個穩定居所。」
「佢哋都明白到我嘅堅持，佢哋唔介意、冇逼我喺死線前作一個決定，咁其實都由得我，我同佢講，畀我再堅持多陣，最快都過 831。」
可是，見到兒子忙於打點簽約事宜，葉家駒擔心其現金流不足，多番掙扎下，終決定賣業權取回現金，「呢嚿錢輔助我個仔再置業。」
葉坦言無奈，形容政府像地產商、巧取豪奪，跟災民做業權買賣。「政府運用佢嘅公權力，逼我哋將個地方賣咗佢，仲要冇得諗。」他強調非「你情我願」，「我唔情願呀，你立法喎，即係話呢撻地，我拆硬㗎喇，呢個安置嚟㗎咩？」
「我一賣，就係肉隨砧板上，『人為刀俎，我為魚肉』，你要切、要剁我無反抗能力，但我唔忿氣，你話畀我聽呢個叫安置，sorry 呢個唔係。」
李國鴻：交信「拖住佢先」
李國鴻亦說，弟妹着他領取現金作罷，讓他感不忿氣。「咁多嘢唔清唔楚，你叫人賣業權，其實好唔公道」，又指「你攞返嚿錢之後，宏福苑後着嘅嘢，保險、賠償，你有冇權出聲？呢個係一個問題。」
他說，政府表明不排除立法，「點同佢鬥」，只好先交信，盼能等到聽證會出報告，再決定是否正式簽買賣協議。「我唯有拖住佢先，個意向書叫你賣業權啫，其實條件係咪可以再考慮，保險、賠償會點，你都要話畀我聽先得㗎嘛，唔係簽完先同我講。」
李國鴻又質疑，「點解要急攞你業權呢？我諗唔明，你個聽證會（報告）可以押後，點解你呢個期唔可以押後？你要人服你先得㗎嘛，如果你用權維持社會秩序係好難，冇人服你。」
遺屬盼追究下去
兩人成為聽證會家屬方後，幾乎每日到場旁聽，盼為家人、168 名死者討回公道。惟出售業權後，就不再是宏福苑業主。
李國鴻說：「政府根本上可以用權去做嘢，淡化你、唔睬你，將你業主、死難者家屬身分消失」。但他強調，「公義同土地係兩件事」。
葉家駒亦毫不猶豫說會繼續追究，「我追究嘅，係我太太嘅死亡，我唔係追究間屋點解會燒爛咗。無論我係唔係呢個地方嘅業主，改變唔到太太喺度過身嘅事實，就算你拆左呢 8 座大廈，都改變唔到呢個事實。」
他再說：「一個係人命，一個係土地，兩樣嘢嚟。我老婆喺度出事，呢個係鐵一般事實，亦唔能夠抹殺，你唔能夠用任何方式、任何手段，將呢件事由一個事實變成無存在。」
周三「最後一次」業主大會，兩人說會出席。「起碼土地註冊處 record（紀錄），仲係我個名。」葉家駒說。
政府：99.1%業主確認意向
餘下 17 戶沒交信
房屋局發言人周一（8 月 31 日）晚上表示，宏福苑 8 座共有 1,967 戶業主簽署並交回「接受收購建議信件」，佔總數 99.1%。換言之，最後有 17 戶未有交信。截至周一下午，政府已與 1,559 戶簽署正式《買賣協議》，佔總數約 78.6%。
發言人指，政府會繼續全速跟進餘下業權買賣程序，以推進業權收購工作。
房屋局局長何永賢在 FB 指，下月會為參與「特設銷售計劃」的業主，進行電腦隨機排序，分批按每日約 50 至 80 戶的數量，於 9 月底前開始進行揀樓。