宏福苑大火至今 9 個月，距離下周一（31 日）業主出售業權期限僅剩兩日。房屋局指截至周四，收到逾 96% 業主交回「收購建議信」，只餘 70 戶未交。政府指，限期屬「嚴肅的時間線」、不會延期，以免影響後續工作，不排除立法收回業權。
有原不打算出售業權的居民，為了安頓家人，無奈在死線前交信；有居民過去一周在賣與不賣之間反覆思量；亦有居民說，即使成為不賣業權的 1%，仍會堅持到最後。
出售業權，是否宏福苑的最終章？1,984 戶居民各有抉擇，《法庭線》訪問 5 名居民，聽聽他們在安居與不屈之間如何掙扎。
宏新 Dorz：給嫲嫲的安樂窩
8 月中的某日，宏新閣居民 Dorz 與嫲嫲到律師樓簽約，出售單位業權。
Dorz 心情複雜，「終於去到呢日，簽完之後其實宏福苑唔再係屋企。」嫲嫲一臉平靜，沒有太不捨，只是覺得放下心頭大石，更重要的是，之後能將單位業權轉讓予 Dorz 及妹妹。
「我諗佢平靜都有原因嘅，就係有個安樂窩，終於有個屋企喇。」Dorz 補充。
Dorz 早於 6 月 30 日第一個限期前交信，選擇了「Plan B」，即接受現金收購及購新居屋，
他說這個選擇是雙重保障。「萬一揀淨係樓換樓，但冇錢點算，啲樓會俾人揀晒，或者揀唔啱我住邊，都係我要諗嘅嘢，同埋老人家想要更多重嘅安心喺度，所以揀呢個。」
Dorz 心儀啟德啟陽苑，覺得位置方便，但距離落成仍有一段時間，「嫲嫲唔想等兩年，（覺得）等唔等到 90 歲？」為了盡快入伙，Dorz 有意揀選九龍灣盛緻苑、粉嶺樂嶺軒，說後者是房協發展項目，已有一定裝修，能節省部分費用。
若未能選購合意居屋，Dorz 或會在二手市場選擇，以現時 300 多萬元的收購價，相信能購入大埔居屋。但考慮到區內不少居屋尚未展開大維修，他直言「唔敢再經歷多次」，「我呢一生人，都唔想再經歷多次大維修呢樣嘢。」
簽約後，一切彷彿塵埃落定，為宏福苑這一章劃上句點。
「咁係咪代表我可以好順利有新嘅屋企呢？」Dorz 說，仍要面對攪珠結果、裝修、供樓，「好似係放下又唔係真係放下，因為就係嗰種不安、未知壓力伴隨而嚟。」
他說：「擔心又要再供樓，其實唔想供樓嘅原因，係因為層樓供斷咗好耐，我點解又要另外（供樓）。屋企已經冇咗喇，仲要嘔錢出嚟」，希望政府能夠補貼，減輕居民經濟負擔。
8 個月以來，Dorz 形容如坐針氈，如今唯一心願是再上樓執拾，「我淨係覺得快啲啦，希望你會盡返少少人性，大家都行到呢一步，你可唔可以都還大家心願，點解變到我哋去乞求返佢轉頭，好似係我哋做錯事？」
儘管不再是居民身分，他說會「保持憤怒」，「依件事擺到明係人禍嚟，要記得呢啲人，曾經影響咗大家嘅命運、大家嘅一生，唔好忘記呢啲人做過嘅嘢，希望有朝一日會攞返個公道，同埋將佢哋繩之於法，保持住嗰種憤怒，或者係嗰種恨喺度。」
宏泰 Tina：想要平靜生活
1983 年，住在港島區的 Tina，與丈夫、兒子第一次踏入大埔，成為宏福苑第一手業主，這裡自此成為她的家。
Tina 喜歡大埔、宏福苑，但不喜歡「食風」的宏泰閣單位，因為每逢打風總讓她頭痛，風聲就像一盤盤波子倒在牆身，響個不停。「後生唔識揀」，她笑說。
大維修讓居民苦不堪言，「唔開燈，間屋好似密室咁樣，好恐怖」。Tina 一度覺得自己住不下去，打算到深圳租屋，最後打消念頭，更不時在居民群組分享，用畫作遮蓋被封的窗，苦中作樂，又向街坊推薦從淘寶購入的蚊網，達致防塵效果。
距離大維修終點不遠，一場大火燒毀 Tina 的希望。大火當日，學佛的 Tina 剛好外出讀經、逃過一劫；她那從前不怎喜愛的單位，也僥倖安然無恙。但一夜之間，她失去了 42 年的家園。
Tina 自言與其他人不同，除了看到消防員殉職、街坊失去家人的新聞會難過，事發至今甚少感到傷心，反而有種隔岸觀火的感覺。「我見過心理學家，心理學家同我講，佢話我哋呢種，啟動咗保護機制，保護住自己唔好太傷心，但我依家都係咁，都麻木。」
Tina 兒子一家最近移民，她現時住在媳婦留下的單位，不愁棲身之處。她曾希望原址重建，但政府很快否決這選項，她知道只是一場幻想。
她想起受災初期，每日為資助頻撲、飄泊不定，仍然心有餘悸。政府長遠居住方案一出，她便決定出售業權，希望盡快安頓下來。
Tina 去過「睇樓團」，但單位不合她意，不是間隔差，就是附近生活配套不足，又擔心預留給宏福苑居民的單位是「豬頭骨」，最終決定收取現金。
「肉隨砧板上，我冇諗過唔賣，唔賣乜都冇，你唔賣佢都唔會賠畀你，你同佢打官司呀？都冇錢囉我哋，就算有錢都好傷神啦，（依家）都已經夠傷神。」
在第二次上樓，Tina 在單位牆壁寫下「宏泰 2707 多謝你」，告別單位以及那些不快回憶。
她說，現在只求平靜生活，「想有一個了斷，年紀大咗，爭取嘅嘢唔同咗，公道自在人心，報告擺明係監管不力，你點樣講都冇辦法，嬲都冇用。」
宏道謝生：不忍母親情緒受困改賣業權
6 月 30 日首個期限，不少居民仍未出售業權；但隨最後期限逼近，部分人開始改變想法，包括宏道閣的謝生。
謝生成家後已搬離宏福苑，但每周都會留宿，陪伴獨居母親。他原不打算出售業權，一直拒絕聯絡解說隊；因沒交出郵寄地址，也收不到收購建議信。
他覺得，由發生大火到安置充滿不公，曾向申訴專員公署投訴程序不當，質疑為何大維修期間監管不力的房屋局，如今卻有權決定宏福苑不宜居住。
他指，署方回覆指港大檢查後認為宏福苑結構沒問題，但房屋局評估長遠不適合居住，令他更疑惑為何不能在修復後回遷，「你話危樓咁我諗大家都心甘命抵嘅⋯⋯咁你唔係吖嘛。」
另一方面，他得悉有遺屬仍希望回遷，故曾盡力爭取回遷的機會，表達對 168 名死者及遺屬的支持，「希望能夠多一個人喺度，佢哋多一份力量、多一個選擇」。
他一度萌生堅持不賣的念頭，也預想過最壞結果是政府立法收樓，「最差就賠都唔賠囉⋯⋯我又覺得有啲嘢你控制唔到，你冇能力去改變佢，咁樣你咪接受結果。」
不過，近月謝生留意到 88 歲母親始終不適應臨時房屋的生活，時常失眠，擔心曾有抑鬱症的母親情緒受困，亦察覺到她始終需要安穩居所，「（臨時房屋）租兩年畀我哋，佢成日間唔中都問，咁之後點樣啊？」
經過一星期掙扎，謝生決定簽署收購建議信，將自行在新界物色單位，盡快安頓母親。為了家人，無奈也只能妥協，謝生坦言不甘心，但自言已盡力，「能力範圍之內，我企到幾耐咪企幾耐囉。」
謝生自中五搬入宏福苑，已離世父親是第一手業主，家中滿載回憶。訪問那天他由大埔火車站走到宏福苑，每走幾步就停下來拍照留念。
決定賣業權後，謝生多次提到要「擺低」對宏福的感情，又說希望「完結」這件事，但這不代表他會忘記一切，「忘記唔到㗎，擺低住先啦。」
他形容，雖然法律上即將結束與宏福苑的關係，但作為香港巿民，他會繼續關注宏福苑後續發展，「我唔可以用業主角色去講啫，但我作為一個巿民，政府嘅做法我覺得我可以有聲音。」
他以電影《大濛》中雲與霧的故事，類比自己與宏福苑，「咁你冇咩可以做啊嘛，一個小巿民，咁你咪等囉⋯⋯到了時候，霧就散去了，宏福苑都係咁樣。」
「去到咩時候霧散呢？唔知啊，就算個報告出咗嚟，係咪代表住公義嘅聲音呢？我真係唔知⋯⋯困難當中繼續前行囉。」
宏志熊小姐：我瞓街無問題，仔女唔可以
2003 年，熊小姐跟丈夫、女兒搬入宏志閣，翌年兒子出生。
大火那天，她在廣福平台遙望宏志閣，希望火勢不要波及自己單位。雖然宏志閣最終不受影響，但她也從此無法回家。
熊小姐原本希望原址重建，「我話我等 10 年、100 年都等，就算我等唔到，我仔女都喺度。因為心入面，宏福苑係我嘅根，屋企嘅根。」
即使最後未如願，熊小姐早已決定出售業權。「我哋初初好天真，因為香港（政府）公正嚴明，唔需要擔心呀嘛，佢畀你嘅安排，一定係最好㗎嘛。」
但近半年來，熊小姐覺得政府安排與期望有落差，指政府以善款購買災民業權，安置猶如「抽盲盒」，地區偏遠、面積不如舊居，而最令她不滿是政府官員的態度。
她提到房屋局局長何永賢一度在社交平台，形容接受收購的居民百分比「節節高升」，「屍骨未寒，你仲一日喺度笑哈哈、節節高升，喜事嚟㗎？你知唔知成二千災民點過㗎？」
熊小姐又說，政府經常提及不排除最後透過立法處理餘下業權，又看到報道提及行政會議成員、民建聯立法會議員陳克勤指，若立法收回單位，「按市值可能係零」。
「我小市民、小蟻民，我梗係怕，我接受唔到自己心入面嗰關，我係願意賣，但佢越咁樣做，我越過唔到心入面嗰關，我越唔肯賣畀佢。」熊小姐一方面不能接受政府做法，一方面擔憂家人未來居住問題，兩個念頭在心中相互拉扯，使她精神恍惚、無法工作。
談起宏福苑，熊小姐總愁眉苦臉，但說起一對子女，她難得露出笑容。
熊小姐的房間放滿食材，地上的一盤南瓜，是她為工作繁忙、無暇午膳的女兒預備，切好後一包包冷凍保存，方便女兒肚餓時自行解凍；手機內則盡是兒子領獎、表演片段。她強調，從不讓子女處理業權事宜，希望他們專心工作、學業，一切決定由自己默默承擔。
訪問當日，熊小姐說會再拖一會才決定；掙扎了一日，她最終交回「收購建議信」，選擇現金方案。
「睇到仔女同我一齊擔心，算啦。」熊小姐向記者說。
熊小姐聲線微弱，無奈指：「一家人一世積蓄就係層樓⋯⋯我自己瞓街無問題，仔女唔可以呀嘛，我哋蟻民喺佢面前都要接受現實」，只盼一家人不用再為居所憂心。
宏盛何小姐：成為不賣的 1%，也要爭取到最後
賣與不賣，在居民腦海纏繞不休，亦有人堅持不賣，從未動搖。
經常受訪的宏盛閣何小姐，從出席聽證會、上樓至業主大會，不時表達對原址重建的盼望，堅持不出售業權。她甚至沒跟解說專員聯絡，由「一戶一社工」代為傳話。
何小姐在 1991 年購入單位，與母親同住，家中多年來珍藏多啦 A 夢公仔、Tomica 車仔、梅艷芳黑膠碟。她的母親近年入住老人院，她自己則於去年退休，人生下半場才剛開始。大火當日，她剛去完旅行、在家休息，同事致電始知屋苑起火。
她一直認為，原址重建「都可以快」，即使不重建亦希望維修後可回遷，「但依家方案係兩樣都唔做，亦都唔係搵街坊（商討）。」她不滿政府跟居民溝通不足、沒公開驗樓報告，不打算出售業權。「我覺得唔合理之下，我係堅持唔賣。」
她亦不滿收購價過低，「300 幾萬我唔相信買到 400 幾呎嘅樓，我舊年又退咗休，我邊度搵錢繼續供呢？我冇可能將自己畢生積蓄抌埋落去，咁我之後點呢，呢個真係唔可能。」
宏盛閣的單位，代表何小姐畢生心血，也有多年感情，她質疑政府動用善款購買業權，「我廿幾歲供層樓出嚟，你依家一毫子都唔使畀就垂手可得，呢樣係我最唔順。」
賣業權人數漸增，何小姐成為政府口中的「少數派」。
「聽到真係會唔開心嘅，不過呢個冇辦法⋯⋯每個人嘅需求都唔同，你唔可能制止街坊唔賣，會唔開心，相信有啲街坊都知，但冇辦法，佢哋要賣我都冇辦法，你唔可能要人堅持跟你。」
她說已有心理準備，政府會立法收回業權，「我依家都一無所有嘅時候，所以我咁堅持唔賣畀你，因為就算到最後，你可以話將個價壓到好低，可能冇 300 幾萬、得百零萬，或者冇𠻹。我依家一無所有嘅時候，我又唔覺我損失太多，我自己感覺係咁。」
收購限期後的生活，何小姐說只能見步行步，「雖然可能佢已經收晒嗰 90 幾 % 業權，但我覺得始終淨返我 1%，我都係覺得我要爭取到最後。」