37 歲父親被指虐殺 3 歲女兒案，周一（11 日）在高等法院踏入第 14 日審訊，被告出庭作供，形容女兒「有啲粗魯」、會搶玩具又「跳跳紮紮」、「叫佢嗌人冇嗌人」，故曾罰她「企階磚」、望牆及跪地。他又承認曾因女兒沒回應他，捉著對方雙膊「搖咗佢 5、6 下」。
被告解釋，嚴厲管教因擔心女兒學壞，「因為自己本身喺屋企做得唔係咁好，想佢喺家姐啲細路面前做得好啲」，又指「驚佢會步我自己後塵，一樣細細個出嚟玩」。
被告另指，與女友、即女童母親因管教等問題不時爭執，並確認曾向對方淋腐液，事後感後悔。他指，現時對女友仍有愛，希望兩人能修補關係。
被告稱女友懷孕時曾同住
兩人「兩三日小吵、四五日大吵」
被告劉佳坪身穿藍裇衫、黑冷衫，戴上黑框眼鏡，由兩名懲教人員押解下，從被告欄步向證人檯作供，劉作供期間旁邊坐著一名懲教人員。
劉提到，2016 年與女兒雅思的母親梁小欣相識、同居，梁於 2017 年懷孕，安胎時曾到劉家人位於沙田住所暫住，但因二人經常吵架，「兩三日小吵、四五日大吵」，梁住了約一個月就搬走。
就梁供稱 2017 年誕下雅思後，劉隨即要求性交，劉庭上否認，稱「喺嗰啲地方冇可能作出咁嘅要求，咁多人出出入入」，亦否認曾經與梁爭執後掉爛對方電話。
被告認向女友淋腐液
事後感抱歉
劉承認，曾向女友淋腐蝕性液體致其受傷，2019 年在法官張慧玲席前判刑。劉稱「嗰陣時發生呢件事真係好抱歉」，其後曾探望對方，並告知她「一時嬲得濟，我都好後悔，大家都覺得有個女一齊，都想有將來咁嘅，大家都想繼續一齊返」。
劉承認，當時曾違反保釋條件，繼續與女友聯絡，又指入獄期間，有經常寫信給女友，期望出獄後與對方一同照顧女兒及維繫關係；女友亦有寫信及探望他。
被告稱因管教等問題與女友爭執
劉服刑至 2020 年 4 月後，與兩母女於深水埗一單位暫住數天，其後三人搬到劉家人位於沙田的住所。劉續指，同年 4 月他想為女兒改名「劉雅稀」、又因管教及女友飲酒問題，先後與女友起爭執。劉又指，女兒「有啲粗魯」，「見佢搶玩具又跳跳紮紮」，又指她不時發脾氣哭泣，「叫佢嗌人冇嗌人」。
劉指，一開頭會「氹佢咁樣教佢，過多一兩次都係冇理會，開始半罵半氹，再之後鬧完佢，都有照做，開始話有鬧佢同會罰佢」 ，形容懲罰包括「叫佢企階磚、望牆」及跪地。劉又稱，曾著女友見到女兒犯錯時要教導她，「一個做石堅，一個做黃飛鴻，即係一個惡一個唔惡…即係唔好我做晒衰人，佢做晒好人」。
被告：嚴厲管教因擔心女兒學壞
劉供稱，同年 5 月 13 日女兒因病服藥，他與女兒晚上早睡，女友則不斷留意他是否睡著。劉稱當時覺得女友想趁他入睡便喝酒，故著對方「唔好飲酒」，兩人繼而爭執大吵。梁最終執拾物品帶女兒離開。劉父曾著梁，「如果你走咗去唔好返嚟喇，呢度唔係酒店可以出出入入」。劉與雅思其後搬回深水埗單位居住。
同月 20 日，雅思發燒留院，劉曾探望並為雅思拍片，庭上播放相關片段，雅思在片中稱自己「冇事」。
被問及對女兒有何期望，劉一度哽咽稱，「因為自己本身喺屋企做得唔係咁好，想佢喺家姐啲細路面前做得好啲，我喺管教嗰時，想喺屋企人面前叻過佢哋啲小朋友」。劉續指，自己對雅思期望較高，擔心她學壞，故會嚴厲管教，「驚佢會步我自己後塵，一樣細細個出嚟玩」。
被告認曾捉女兒雙膊搖晃
至 5 月 23 日，劉到深水埗單位探望女兒並為她洗澡。雅思其後走出客廳玩玩具，劉稱曾大聲叫她「雅稀」不獲回應，再大叫「雅思」，女兒才回到房間並哭泣。劉稱，「我嗰下好嬲，要叫佢雅思先應我，我好嬲，捉住佢膊頭，叫佢收聲」，並指當時捉著雅思雙膊，「搖咗佢 5、6 下咁樣」， 其身體、頭部「前後咁郁」。
劉另提到，同月女兒曾於客廳便溺，相信是因為女兒不想執玩具、睡覺，「佢呢啲應該係畀我鬧完發脾氣屙尿」。劉指，他其後為女兒淋身時曾責罵她，但否認對著女兒臉部淋水，又否認曾用身體壓著女兒臉部致其臉發青、抽其小腿令她跌倒等。
被告稱仍對女友仍有愛
望修補關係
辯方在庭上播放一段音樂，指劉曾唱歌及播音樂給女友。劉稱，歌詞提及「相愛相親」，當時因二人吵架，故向女友發送音樂。辯方問，「對於第一證人（梁小欣）仍然有一份愛喺度？」劉稱「有」，望兩人維繫、修補關係。
劉又指，有次曾問女兒，「爸爸唔喺度嗰時，有冇叔叔上過嚟，囡囡嗰陣時答有」，女友隨即「掌咗佢兩下嘴」，並捉著女兒膊頭搖晃兩下，「同個女講點解亂講嘢」。
被告稱入廁所後聞巨響
入房見女兒倒地
在事發 7 月 18 日，劉稱當日起床時聽到女兒哭泣，相信她「扭計食蛋糕」，故著女友買早餐。劉稱，女兒當時在床上站著，曾大聲問她「做咩喊呀你」，指自己剛睡醒便聽到哭聲，「有少少嬲」，用雙手「捉住佢雙膊嗷咗佢幾下」，形容力度為中度，雅思遂「收聲開始忍泣」。
劉指，他之後入了廁所，「廿零秒聽到嘭一聲，入到房間隨即見到「 BB （雅思）跌咗喺床尾嗰度」，雙手抽搐，雙腳有郁動， 眼睛「剩係見到眼白嗰個位」，「條脷好似想伸出嚟咁樣」，故他伸手到其口部以防她受傷，期間致電女友。
控方不接納被告認誤殺
被告劉佳坪（案發時 37 歲，報稱送貨員）被控虐兒、謀殺兩罪，指他於 2020 年 5 月至 7 月 18 日，故意襲擊、虐待親生女兒梁雅思；7 月 29 日在香港謀殺梁雅思。庭上透露，被告承認虐兒罪，另承認誤殺罪（法律 101 文章），不獲控方接納。
案件由法官黎婉姫及 4 男 3 女陪審團共同審理。控方由高級檢控官林曉敏、黃樂同代表；辯方由大律師張耀良、陳思齊代表。
據控方案情，雅思她過身時剛好生日、踏入 3 歲；其母梁小欣，與被告為沒結婚的情侶。
HCCC61/2022