23 歲瑜伽導師周慧賢伏屍尖沙咀麗思卡爾頓酒店房，死者前男友否認謀殺罪，案件周三（10 日）在高等法院踏入第 8 日審訊。被告勞浚銘供稱，他因欠債問題打算在酒店房內割脈自殺，死前想見「最愛嘅女人」周慧賢一面。
勞稱後來兩人在酒店房見面，他和周因買手袋問題爭執，他拿起刀作勢割脈稱「我要死喺你面前」，但周覆「你早死早著呀！⋯⋯唔怕話埋畀你知，之前啲 BB 唔係你㗎！」勞稱這句令他腦部「爆炸」，「我乜都諗唔到，向前衝」，結果錯手殺死「最心愛嘅女人」。案件周四續，將由控方盤問。
被告：瀕臨自殺想起「心底最愛女人」
被告勞浚銘第三日作供。主控、外聘大律師韋浩棠向法庭申請，為被告的時任女友頒下匿名令。法官郭啟安批准，並指示往後以 X 稱呼她。
勞浚銘供稱，案發前兩周他因債務問題，告知時任女友 X 想自殺，對方對他稱「金錢上幫我唔到，但係會一直陪伴你」，惟翌日於他「最需要人陪伴」時，女友確診新冠肺炎，因此兩人不能見面兩周。
勞稱，「呢兩個禮拜時間，我收到好多財務公司嘅 call loan 追債。喺我最需要人陪伴、開解嘅時候，X 唔喺度。我嗰陣時，好接近自殺。」
他續稱，「好接近死亡嘅邊緣嘅時候，我個腦突然間清醒咗少少，記返起我心底入面最愛嘅女人，我嘅未婚妻，Aqua。」據早前庭上證供，Aqua 是死者周慧賢。
被告：趁死者赴美前多見幾面
勞浚銘表示，他其後以 Telegram 聯絡 Aqua，對方答應與他 6 月 26 日晚餐。勞報稱當時心態是希望在自殺之前「見到 Aqua 最後一面」，並計劃當天飯後自殺。其後當晚與 Aqua 共進 Omakase，他覺得雙方如故、沒「距離感」，期間他拿出現金 6 萬元送她，她當時很開心、「即刻攬住我」。
勞又說，兩人談至有否新對象時，他向 Aqua 表示有正了解中的人，她遂問「想唔想要多個女朋友呀」，而勞認為 Aqua 意指想否她成為他「第二個女朋友」。勞說「我嗰時仲係好掛住 Aqua，仲係好愛 Aqua，但係我一啲都唔興奮囉⋯因為我知道自己當晚自殺，我係必死㗎。」
不過勞說，因應 Aqua 透露將在 6 月 30 日凌晨赴美國學瑜伽，勞遂決定要多見她幾面，改為她去美國之後才自殺。
訂閱／贊助／購物，支持《法庭線》報道香港，記錄香港。
被告押後自殺念頭
勞浚銘表示，與 Aqua 在 27 號再見面，她帶他至 K11 Musea 的店舖 Delvaux，並指向櫥窗一個袋稱「好靚」。勞認為 Aqua 「暗示畀我聽，叫我買個袋」。
勞續說，28 號他相約女友 X 在尖沙咀麗思卡爾頓酒店相聚。不過勞稱，兩人到達酒店後，他完全沒心機、只喝過一、兩口酒，而 X 因不能過夜提早離開，勞遂赴 Aqua 家。
勞稱，到達樓下時致電予 Aqua，她回覆「你做唔到我想要嘅嘢，你唔好嚟喇」，而他當時理解，Aqua 是指想要手袋。他其後入屋，Aqua 要求他翌日回店拍攝手袋，「睇吓佢鍾意邊個」。勞稱當時答應後，Aqua 變得開心，「我哋仲 kiss 㖭」，但他稱知道與 Aqua 沒將來，「因為我，一定會自殺」。
被告：因沒買手袋贈死者
遭威脅將「砌生豬肉」
勞表示至 29 號，他因打算割脈自殺，故經過油麻地果欄時買了一把刀。之後回店為 Aqua 拍下手袋照。兩人輾轉相約到酒店房見面，Aqua 入房後第一時間走往窗邊，望向海景稱「嘩好靚呀」，其後問他「有冇買個手袋畀佢」。勞稱當時答「冇呀，我呢排冇錢」，而 Aqua 追問「咁你幾時買畀我呀」，他遂答「你去完美國之後返嚟先啦。」
勞稱，「嗰陣時 Aqua 即刻變臉，佢個樣望我，係發脾氣咁嘅樣」，又說她指向房內紅酒樽，問他是否與其他女人上過酒店，及質疑衣櫃內是否收起了其他女人的東西。
勞續說，Aqua 開門後見到沒女人東西後說，「如果你唔買個袋畀我，我哋以後唔好見喇。」他亦加重語氣複述他當時稱「冇錢，點買個袋畀你呀？」同時又模仿 Aqua 生氣語氣答「冇錢，又約啲女上嚟酒店？」
勞再加重語氣說，「Aqua 之後話，如果你唔買個手袋畀我，我就會聯絡 1 月份負責我哋單案嘅警察，話你畀 6 萬蚊騷擾我，我要砌你生豬肉！」
勞維持重語氣稱，「我嗰時，好嬲、好嬲。我個腦啲回憶，同 Aqua 啲回憶，一次過返晒嚟。我記返起，我同 Aqua 拍拖嘅時候，佢叫我買袋，我買袋！佢叫我買乜，我買乜！」
勞改為略為哽咽續說，「Aqua 出軌⋯我原諒佢。Aqua 叫我借錢，我去財務公司，借錢畀佢，令到我而家，欠債纍纍，要自殺。」
他放緩語氣稱，「我係最後，見 Aqua 最後一面，我特登東併西湊呢 6 萬蚊，諗住送畀佢做驚喜⋯」隨即生氣稱，「但係，Aqua 居然話要，砌我生豬肉」。
被告激動喘氣模仿死者
「之前啲 BB 唔係你㗎」
勞續說，當時 Aqua 拿出電話，動作與之前要打給警察一模一樣，隨即加重語氣表示，「我一手搶咗佢電話，丟咗落床。Aqua，摃開我。Aqua 發脾氣，將個櫃上面啲水，一嘢掃晒落地下。」
勞表示，他即時彈後幾步，對 Aqua 激動稱「唔好發癲啦，有把刀喺度呀！」而 Aqua 答「你嚇鬼呀？」勞當時隨即在櫃上取刀，向 Aqua 稱「你係咪報警呀？」Aqua 則答，「你夠膽就插我！」他遂右手拿刀，對准自己左腕，向 Aqua 激動說，「我要死喺你面前，我要你成世都記住我！」
勞隨即激動喘氣模仿 Aqua，右手指向前方作指罵狀，稱她說「你早死早著呀！如果唔係，我實告到你甩褲呀！唔怕話埋畀你知！之前啲 BB，唔係你㗎！」
被告：「我乜都諗唔到，向前衝⋯⋯」
勞繼續大聲供稱，「我嗰陣時個腦，我爆炸，我乜都諗唔到，向前衝，Aqua 轉身跑⋯」
勞緊接改為放緩語氣，「我剩係記得，我撞咗落 Aqua 度，把刀插咗落佢度。我⋯我斷咗片呀我。我剩係記得幾個畫面。」
他頓一頓稱，「我剩係記得個時，對住個衣櫃；第二個畫面係對住另外一個衣櫃；跟住，最後一個畫面，Aqua 瞓咗喺地下，我跪咗喺地下⋯我⋯當時手上面，乜都冇。我⋯我跪咗喺度唔知幾耐。突然之間，我聽到一聲，唔知道係吸氣聲定呼吸聲⋯」
勞續說，「我嗰時醒咗少少，我見到 Aqua，成身都係血。我係咁拍佢，叫醒佢。我見到地下有水樽，我拎起水樽，係咁喂佢飲，係咁叫醒佢。」他邊說，邊以手勢示範拍打。
勞緊接搖頭稱，「但係佢，一直都冇反應，完全冇理過我」。
勞再以遲疑語氣稱，「我先至⋯意識到，我⋯錯手殺死咗，我最心愛嘅女人」勞再說，「好驚呀我嗰陣時，我完全唔知道應該做啲乜呀。我唔夠膽望 Aqua，我對佢唔住呀。」
「所以我先至，起身，擺咗佢喺個浴缸到。我唔敢見佢到，我唔夠膽望到佢。我見到地下有把刀，我執起咗把刀，放咗喺浴缸入面。我見到我自己，周圍都係血，我就將啲衫，丟咗喺個浴缸入面。我記得，我開咗水，將一條好大嘅毛巾，遮住 Aqua，因為我唔夠膽望佢呀。」
勞提到他之後見到自己身上有血，於是入沖涼房洗澡，但仍然見血，才發現自己手指有傷。一出浴室，才見地下多血，於是拿起枕頭等疊在上方。而酒店房內的膠布不足以止血，故他離開酒店往藥房，惟電話不斷響，是財務公司追債。
勞稱再次回到酒店，他跪在廁所門口沒血的地方，單方面與 Aqua 「傾計」，指「我向佢講咗好多嘢。我同佢講，『我今世對你唔住呀，我來世照顧你』。我話，『我而家就去搵你』。」
被告：「未試過咁嬲」
勞供稱，他隨即上了酒店高層的酒吧，打算一躍而下，但該處已以圍板封起，「根本都冇位跳落去」。他遂下樓駕車轉其他地方，期間撞到的士。他說去過 IFC、黃大仙附近的山等，但及至 K11 Musea 時，他見下面已有人流，怕跳下傷到他人，於是坐在地上哭，「嗰時我，應該廿幾三十個鐘冇瞓過覺」。
勞又說當時因距離案發已一段時間，他想起有愛他的家人、朋友，於是致電胞姊尋求法律援助，「我記得我嗰陣時，喊到兩副 con 甩咗，我乜都望唔到，我有 400 度近視，我都唔記得自己係點揸車返屋企，搵我嘅屋企人。」
其代表大狀 David Boyton 問，死者提到會告他、BB 不是他的時候，對他有何影響？勞答「好刺激我呀⋯我聽到，好嬲好嬲好嬲好嬲⋯⋯」
Boyton 再問，死者的說話，與他斷片有何關係？勞答，「就係聽到佢講嗰句說話，話『你早死早著呀，如果唔係，實告到你甩褲，之前啲 BB 唔係你㗎』，我先至咁嬲、斷咗片。我從來未試過咁嬲」，並提到他本身以刀對着自己手腕，聽到死者的話才「完全控制唔到，剩係想向前衝」。
至於為何警方調查時問他周慧賢在哪時他答不知，勞稱「因為我準備搵律師。」案件周四續，將展開控方盤問。
被控在酒店房謀殺
被告勞浚銘（被控時 28 歲）被控一項謀殺罪。控罪指，被告於 2022 年 6 月 29 日至 6 月 30 日期間，於香港尖沙咀麗思卡爾頓酒店一房間內謀殺女子周慧賢。
案件由原訟庭法官郭啟安會同 5 男 2 女陪審團審訊。控方代表為外聘大律師韋浩棠、高級檢控官陳穎琛；辯方代表為大狀 David Boyton。
HCCC148/2024