37 歲父親被指虐殺 3 歲女兒案，周二（11 日）在高等法院踏入第 15 日審訊，被告作供時解釋部分 WhatsApp 訊息，其中一則提及「好似湊狗仔咁狗仔喺邊度賴尿你即刻罰佢、打佢」，被告稱只是比喻，著女友要教女兒。
他另在控方盤問下確認，與警方進行錄影會面時沒提及曾搖晃女兒，「驚講出嚟會冇得見個女，所以隱瞞咗」。控方提到女童渴望被父親愛錫，被告稱，「我都好愛個女，只不過我管教嚴啫，我唔係唔愛佢喎，啱唔啱呀？」，又否認作供「講大話」。案件周三續。
被告錄影會面否認搖晃女兒
庭上同意有隱瞞
被告劉佳坪周一主問下供稱，在事發 7 月 18 日，曾以雙手捉著女兒雅思雙膊「嗷咗佢幾下」，女兒遂「收聲開始忍泣」。被告其後入廁所，事隔一會聽到「嘭一聲」，入房見女兒倒地。
劉周二續接受辯方大律師張耀良主問，提到雅思入院後情況，指其女友梁小欣當時拍片錄下醫生的說話，提到雅思的傷勢是搖晃所致，懷疑涉虐兒。劉遂想起自己早上曾搖晃雅思。
他在辯方提問下承認，與警方進行錄影會面時否認曾搖晃女兒，「因為聽過醫生講嗷過佢，自己好驚，跌落嚟冇咁嚴重，但又懷疑自己…會唔會咁樣出咗事，唔知道搖佢原來咁嚴重 ，自己都係想阻止佢喊… 驚講出嚟會冇得見個女，所以隱瞞咗」。
辯方續指，當時警員問劉其女友有否打雅思，劉答沒有，是否事實？劉稱不是，「嗰陣我喺差館錄緊口供，驚個女醒返冇人照顧個女，所以冇將啲事實講出嚟」。
訊息提及「好似湊狗仔咁」
被告稱僅比喻
針對劉曾在 WhatsApp 稱，「你係要即時去罰先有效呀，如果唔係佢唔知你係因咩事罰佢呀，即係好似湊狗仔咁狗仔喺邊度賴尿你即刻罰佢、打佢，佢咪以後唔敢囉」。
劉解釋，這只是比喻，著女友如何管教女兒，強調自己沒想過將女兒「當狗仔咁湊」。官問，「咁咩叫即刻罰佢、打佢？」劉重申打及罰屬管教。
控方指幼童頸部脆弱屬常識
被告不同意
劉之後接受控方盤問，指雅思在 2020 年 6 至 7 月，即案發時段較少喊，見到他與梁小欣爭吵才會喊。控方問，雅思在深水埗住所是否經常喊？劉稱，「都可以話係，因為同梁小欣成日嗌交」。控方問，劉會做甚麼令女兒停止哭泣？劉稱，會「氹」、「罰企」望牆、扭耳仔、罰跪、打屁股等，但案發當日沒做過上述事情。
劉另確認，其胞姊及胞妹均有小朋友，曾與他們玩耍，同意自己有照顧外甥的經驗。控方問劉，是否知悉幼童頸部很脆弱？劉稱，「嗰陣我未做人爸爸，我唔知好脆弱…」，亦不知幼童腦部仍發展中，不可大力搖晃。控方指「呢個係常識嚟㗎喎」，劉回應「唔同意，因為我唔係成日對住我啲外甥。」
控方問，劉在被捕前是否覺得搖晃幼童沒有問題？劉一度指「我唔係咁嘅意思」，在澄清問題後，確認當時認為沒有問題。
控方提向女友淋腐液一事
劉：我都有受傷
控方又問及劉與梁小欣的關係，「佢係好愛你，同唔同意？」劉稱不同意，亦不同意梁對他好。控方提及，劉 2017 年 8 月曾用通渠水淋梁，是蓄意傷害她？劉同意，稱「我已經因為呢單嘢做咗判決，我亦都好後悔做咗呢個動作。」控方續問，「佢全身多處受傷，同埋毀咗容，你知㗎嘛？」劉稱「我都有受傷」，再同意控方所指。
控方續指，「但佢仍然原諒你，同你一齊？」劉同意，「大家都想一齊湊雅思，所以先繼續一齊想修補個關係」。
控方：租金主要由梁津貼支付
劉：「但我都有借財仔」
控方另指深水埗涉案單位租金，大部分由梁的社署津貼支付？劉稱，「係，之後後補。」控方追問，「你補 1000 咋嘛？」劉聞言稱，「佢（梁）都係補 1000 咋嘛。」控方質疑，「津貼係佢㗎嘛」，劉稱知道，「但我都有借財仔，同佢一齊生活。」
控方指，根據兩人的 WhatsApp 訊息，梁經常向劉道歉，劉稱，「因為佢知道激嬲我，因為佢報警做啲嘢傷害我…同埋佢每次知道飲酒鬧事鬧大交先走。」控方問，其意思是否指自己從沒做錯？劉稱，「唔係冇錯過，係好多生活細節，各有各錯，但有一段時間佢成日借啲意將少少問題攞嚟化大，令大家嘈交」。
控方指女友傷後仍為被告求情
劉質疑控方是否可重提舊案
控方另指，梁被劉淋通渠水後都沒離開他，「係咪知道你做啲咩嘢，佢都唔會舉報你？」劉稱，「唔係，佢點會冇舉報我呢？佢試過報過 4 次警…」，但確認除了淋通渠水一事外，沒就其他事件被控。
控方再指，梁小欣在該案中亦為劉撰寫求情信。劉同意，但指「其實係咪可以攞返之前嗰單案嚟講，如果你想搞清楚，不如攞返個判詞嚟睇。」 控方指出，「所以你先夠膽喺涉案單位，喺梁小欣面前多次襲擊雅思呀嘛？」劉不同意。
劉稱愛錫女兒「只不過我管教嚴」
控方其後指，「雅思好愛你，亦都好想你愛佢？」劉稱，「同意，我都好愛個女，只不過我管教嚴啫，我唔係唔愛佢喎，啱唔啱呀？」
控方提到雅思身上傷勢，「你作為佢老豆，（傷勢）個解釋係我唔知點解？」劉稱當時沒見到，如果見到會為她塗藥膏。控方指出，劉的胞妹在 2020 年 7 月 15 日留意到雅思身上有瘀傷，劉再襲擊、虐待雅思時更小心，會捉著其身體較難發現的地方，例如大髀內側，劉否認。
控方質疑被告庭上撒謊
控方稱，劉在雅思出世兩星期後，向梁小欣淋通渠水，致梁受傷住院，女兒無人照顧才須送到保良局。劉稱「如果係嘅話，佢（梁）唔會走咗去啦」，澄清下指梁懷孕時經常外出「周圍走」。
控方反駁指，「因為你會傷害佢同個 BB，佢要避開你」，劉稱不同意，又指曾致電負責保護令的社工，要求照顧雅思，但對方指不能確認劉為其父親，「我唔係想唔湊佢，我係有爭取過」。
控方引述劉在首次錄影會面提到，「因為嗰陣時大家諗住唔一齊…我又可能唔想自己一個人照顧」，質疑劉沒爭取照顧女兒，「你都冇愛錫過雅思，你嚟到法庭講大話咋嘛」，劉否認。
控方質疑隱瞞曾搖雅思
劉：「嗰下好驚唔知點樣講」
控方問及事發當日情況，指雅思昏迷抽搐時，劉是否知悉情況嚴重？劉稱當時不敢肯定，因不清楚雅思的病歷，故先致電女友。
劉盤問下同意，當時應如實向救護員交代女兒情況，「但我當時唔記得咗講，同埋我好驚，同埋冇諗到搖佢嗰度，剩係諗到佢撻落嚟嗰度。」
控方質疑，劉知道「嗷」雅思的動作大力、危險，故刻意沒告知他人，劉稱，「我冇特登唔講…因為嗰下好驚唔知點樣講」，但同意沒即時報警。法官問，為何沒即時報警？劉稱他曾到廁所取毛巾，致電梁後才報警。
至於雅思入院後，當醫生提及雅思的情況或是搖晃所致，他有否告知其他人曾搖晃雅思，劉稱「嗰下我冇做到。」
控方不接納被告認誤殺
被告劉佳坪（案發時 37 歲，報稱送貨員）被控虐兒、謀殺兩罪，指他於 2020 年 5 月至 7 月 18 日，故意襲擊、虐待親生女兒梁雅思；7 月 29 日在香港謀殺梁雅思。庭上透露，被告承認虐兒罪，另承認誤殺罪（法律 101 文章），不獲控方接納。
案件由法官黎婉姫及 4 男 3 女陪審團共同審理。控方由高級檢控官林曉敏、黃樂同代表；辯方由大律師張耀良、陳思齊代表。
據控方案情，雅思她過身時剛好生日、踏入 3 歲；其生母梁小欣，與被告為沒結婚的情侶。
HCCC61/2022