宏志閣居民周四（14 日）繼續獲安排上樓，有家庭欲一家六口入屋拍全家福被拒；另有居民批評安置方案反覆混亂，「本身話賣嗰陣時，你諗咗好多嘢啦係咪呀，配合佢啦、睇樓啦、揀嘢啦，跟住前日又話，唔係呀，你係可以維修㗎喎，咁你即係叫我點？」
政府同日向業主發收購建議信，指宏志閣需有 75 % 業主於 6 月底前回覆同意出售業權，方可納入安置方案。有居民認為期限帶來壓力，「威脅囉我覺得係⋯⋯佢好似講緊，你而家唔揀就冇」。
蔡女士：親友想一家六口入屋影全家福 現場人員不准稱「照order做嘢」
「咩都係整定㗎喇，就影張相啫，希望一家六個人，齊齊整整紀念，喺間屋嗰度影張相，係咁多喇」。
蔡女士今天準備陪同親友到宏志閣執拾，她說親人希望兩夫婦與女兒、女婿、兒子、媳婦，一家六口在單位內拍照，惟社工初步回覆只容許 6 人輪流上樓，但不能同時在單位內拍照，尚待稍後登記後再確認最終安排，「點解唔畀我哋，又唔係多人，6 個啫」。
她質疑宏志閣沒受大火波及，升降機都能運作，為何還需要限制人數，「點解唔可以畀我哋，上去影張相就走㗎喇⋯⋯真係唔捨得呢間屋㗎嘛係咪？」
蔡女士入內登記後，透過訊息回覆記者查詢，指家人最終無法 6 人一同入屋拍全家福，「我哋有問過點解唔可以啦，影完相就即刻落返嚟㗎囉，佢（工作人員）話上頭嗌落咗係每戶 4 個人，𨋢口都唔准入，入到個門嗰度，要我哋全部要走，咁唔可以呀咁樣，佢話照 order 做嘢，佢話唔好意思，講得好客氣嘅，咁冇辦法」。
宏志須75%業主下月內同意賣業權才納入收購方案 11樓潘生：威脅囉我覺得係
住 11 樓的潘生，今天打算回家「盡攞」家當，因預計短時間內無法返回單位。對於安置方案，他指「我嘅意願就係開個業主大會先，如果業主大會都冇開嘅 ，我都冇辦法知道大家嘅意願點⋯⋯如果佢最後出聲嘅機會都唔畀我，淨係政府單方便畀啲 Information 我嘅，我覺得唔 work 囉」。他指傾向跟隨街坊的意願決定，「如果大部分嘅意願都係咁（回遷），我都傾向返去住」。
政府中午發稿，指已向業主發出「收購建議信件」，其中宏志閣需有 75 % 業主於 6 月 30 日前回覆同意出售業權，政府提出的長遠方案才會開放予宏志閣。潘認為期限為他帶來壓力，「威脅囉我覺得係⋯⋯佢好似講緊，你而家唔揀就冇，你嘅感覺就係咁囉，即係好強烈嘅感覺」。
潘生日前亦有參與線上簡介會，覺得合安的定位模糊，「我都好唔明，佢合安唔係居民代表咩？佢而家完全唔係呢個角色，佢好似係政府代表」，例如業主聯署要求召開業主大會，合安都需要業主提供簽署樣本再確認，「我哋嗰陣時開業主大會，點解又冇咁認真嘅呢？突然間認真成咁，我又好困惑」。他說，對最終能否召開業主大會感悲觀。
潘又指，合安在會上未有公布驗樓報告，現時亦未知 3,000 萬維修費會否再加，沒有足夠資料做決定，「而家我資料係唔清晰，係好單方面，政府畀嘅資料我哋聽囉，我哋想問嘅嘢佢又冇答」。
逾5個月才第二輪上樓 孫生：當然耐啦，本來我諗住可以返翻去住
宏志閣居民孫先生今天上樓，帶走了重要文件及洗衣機、雪櫃等大型電器，他說這次上樓較認真執拾，「今次認真啲囉，上次諗住可能好快返翻嚟呀咁樣，呢次可能唔再返嚟」，但指現住的地方空間不夠，今次上樓取走的部分物品會送給朋友，「可以嘅話想再上多次（樓）」。
他指，事隔逾 5 個月才可第二次上樓，「當然耐啦，本來我諗住可以返翻去住」，現在則打算出售業權，「賣啦，而家諗住賣」，被問及轉變想法的原因，他稱「都唔知呀，個個都話賣喇，咁咪賣咗佢囉」，惟他希望能在業主大會了解詳情後才作最後決定。
孫生稱，覺得樓換樓方案「都 OK」，但未能回應對價錢、選址的看法，因暫時未仔細看資料。他忘記參與日前的業主網上簡介會，但得知要 3,000 萬元維修費，他表示「驚唔驚呀？我驚呀⋯⋯畀咁多錢」。
中層司徒太：安置方案混亂無所適從 「買樓唔係買棵菜」
住宏志閣中層的司徒太太表示，日前聽完業主簡介會，合安突然提出若復修宏志閣要 3,000 萬費用，令她「好頭痛」，亦覺得對住戶不公平，「我哋用咗啲錢去裝修，跟住你又冇問過我哋嘅意見，跟住又拆晒個棚，拆完之後又話你哋返去，又要你哋畀錢裝修，裝修完之後點樣呢？」
她指簡介會未能解答她的疑問，包括宏志閣的樓宇狀況、維修後能否回遷等，「冇㗎，全部你係冇得出聲㗎，全部你係、資訊係畀你㗎咋，你冇得反映㗎，我去邊度反映呀？」
她形容安置方案混亂，令她無所適從，「本身話賣嗰陣時，你諗咗好多嘢啦係咪呀，配合佢啦、睇樓啦、揀嘢啦，跟住前日又話，唔係呀，你係可以維修㗎喎，咁你即係叫我點？」
她指政府只提供出售業權、樓換樓方案的大綱，但欠缺細節，例如實際樓價、抽樓次數、若落籤有甚麼安排等，令她難以作出決定，「而家買樓唔係買棵菜，香港地最難係乜嘢？層樓呀嘛！」，「見步行步㗎咋喎，每一日都唔同，每一日係唔同㗎，我哋係決定唔到㗎」。
司徒太住在宏福 30 多年，坦言不想搬走，「我喺呢度結婚生仔，咁係有感情嘅（哽咽），但你而家搞到咁樣，唔知啊，真係唔知」。
