「骨頭挖唔到，得張燒剩嘅狗仔床。」住在宏新閣的黃先生 4 月首度回家，一心打算尋回葬身火海、16 歲的愛犬 Dor Dor 卻不果，落樓後跟記者訴說經過。
故事經傳媒報道，促成寵物善終公司的協助，黃先生在第二輪上樓，放低白色玫瑰悼念，偕職員在瓦礫中，終於尋回 Dor Dor 遺骸。「上次第一次上去，我又認唔到係佢，好彩今次搵到寵物善終幫我認。」
Dor Dor 每個表情，從初見的內斂，到熟稔後的扭計、爭寵，黃先生都一一記得。大火後，他在胸口紋上愛犬的樣子，「之前已經諗定，心口個位會留畀佢。」
黃先生相信，Dor Dor 已身處彩虹橋「食玩瞓」，「我唔可以親手送你，我都有接你返嚟。」
寵愛
16 歲的 Dor Dor 最初是黃先生親戚的寵物，後來交由其婆婆照顧，至婆婆逝世，由黃先生接手領養，陪伴對方 10 載。黃先生說，Dor Dor 入屋時文靜、細膽，「養養吓唔知係咪縱得佢多，識扭計、識發脾氣、識燶我面。」
他打開手機內 Dor Dor 的照片，喃喃道：「好多張都好得意」，最深得他心的一張相片，是 Dor Dor 學會「爭寵」，趴在他的肩膊，睜大眼睛望向鏡頭，好像說：「唔好過嚟同我搶爸爸。」言談間，黃先生滿溢對 Dor Dor 的寵愛，又形容牠「好痴身」、每晚一起睡，連他去廁所，Dor Dor 也會不斷抓門。
「為人做的後事」
平淡幸福的生活，因去年 11 月 26 日的大火戛然而止。
黃先生記得，當日知悉宏福苑火警，原以為只是隔壁大廈起火、沒多理會。後來他擔心 Dor Dor 吸入濃煙，還是着母親帶牠落街，惟當時母親已外出，回到樓下才發現大廈被封鎖。黃先生立刻從公司趕回家，見到火勢猛烈，擔心屋內 Dor Dor 的安全。
大火後數日，黃先生不斷在宏福苑附近來回，貼街招、向消防及愛協求救，均沒有 Dor Dor 的消息。「我有心理準備，佢始終都 16 歲，身子其實唔係特別好，我都有諗過，佢未必捱到兩三日。」甚至，他找來動物傳心，到現場叫 Dor Dor 跟自己走。
失去 Dor Dor 後，黃先生難過不已，每當想起牠在火場獨處，「會唔會怪我唔喺佢身邊」、「做咩要返工擺低我一個」，便會不住哭泣，故他盡力不回想，唯一願望是回家帶走愛犬。
「佢臨死嗰陣，我唔喺佢身邊，咁好老套嗰句生養死葬，咁呢啲你一定要做，你就算陪唔到佢走，你都要送佢走。其實喺佢角度，未必係有啲咩幫到㗎，係 for 自己、叫做係為人做，起碼我自己我盡咗自己責任先。」
出現轉機
直至政府宣布首輪上樓收拾安排，黃先生收到單位相片，見到從前的安樂窩，變成一片瓦礫，他不預期能帶走物品，只盼從中尋回 Dor Dor 的骸骨。
黃先生帶同鏟、泥耙尋找 Dor Dor ，「我唔係好熟動物燒完嘅狀態係點樣，喺我心目中認知係碎骨」，經過一番搜索後沒有結果，僅在睡房找到一張燒剩的狗仔床。他感無奈，「都覺得都冇辦法，有機會被冧落嚟嘅傢俬壓住，會唔會係我唔識去搵？」
毫無頭緒之際，事件的轉機在黃先生受訪後出現。他上樓後，向傳媒提供狗仔床的照片，有網民在帖文下，圈出照片中的一部分，留言指出 Dor Dor 骸骨位置：「佢喺度」。
初時，黃先生沒將留言放心上，「唔知佢係咪專業嘅人」，後來經《香港動物報》轉介至寵物善終公司，對方亦認為，該物件有機會是遺體。
既難受又安慰
第二輪上樓，黃先生決定跟善終公司職員再覓 Dor Dor 。他說，職員進入單位時大叫 Dor Dor ，我哋嚟接你走喇，你乖啲出嚟畀我哋搵到。」黃先生心中也默念：「你乖啦，唔好百厭啦，出嚟啦，依家接你走喇。」
原本黃先生翻看相片後，有信心在狗仔床四周尋獲 Dor Dor ，「總之我搵得返嗰嚿嘢，我上到去就會見到㗎喇」，可惜上樓後不見相中物體，一度令他失望。他在灰爐中挖掘，發現疑似骸骨，「其實唔係好似個樣，但嚿嘢個樣怪怪地、唔似我啲嘢」，隨即讓職員檢驗。
所謂「檢驗」，其實是由職員鑿開檢查，「燒到硬咗，佢要證實入面有冇動物組織，骨呀、血管、肌肉嗰啲⋯⋯見到佢掀開入面呢，有啲肉同有啲骨，佢哋見到都九成確定係。」
等候結果期間，黃先生不時心急追問「點呀？」、「係唔係？」，直到職員高呼「黃生，係呀！」。他形容當刻「醒一醒」，但短暫開心過後，繼續打起精神，尋找 Dor Dor 其他部分。
親手尋回 Dor Dor 骸骨，黃先生說意義重大，也多得善終公司職員在場，否則「可能好似上次行過咗、miss 咗都唔出奇。」他形容，既難受又安慰，「安慰嘅係，我終於搵得返，終於可以接你走，難受係咁樣接你。」
憶起確認 Dor Dor 經過，黃先生難免心痛，「唔舒服㗎，要攞鎚仔鑿我個仔喎。」不過，他明白這是必需的一步，「如果我唔證實嘅話，我又帶唔走佢。」
留給 Dor Dor 的胸口位置
告別單位之際，黃先生放下白玫瑰悼念愛犬，職員則用印有佛教經文的黃布，包好 Dor Dor 的骸骨，連同床底一包 Dor Dor 狗毛，由善終公司暫時保管。
他考慮火化 Dor Dor ，一度想把骨灰放在家中，但母親不允許。
黃先生又想起， Dor Dor 不愛玩水，「平時沖涼都雞咁腳走」，未必適合海葬；「落到街又唔算周圍走，草地又唔算特別踴躍」，把骨灰撒草地亦未必適合，初步決定將 Dor Dor 的骨灰龕存放在善終公司，「搵個地方擺會好少少，佢都宅宅地。」
成功找回 Dor Dor 骸骨，黃先生鬆一口氣，也填補了他內心缺口。「盡咗責任喇，同自己講，終於可以為你做到啲嘢喇，接到你走喇。」
在 Dor Dor 離世後，黃先生在胸口紋上牠的可愛模樣。
「之前已經諗定，心口個位會留畀佢，意思係『喺心入面』嘅意思。我預咗佢始終有一日係會走，喺佢走之前嗰個位，都唔會紋其他嘢。」
他說，相信 Dor Dor 這刻已在彩虹橋上「食緊雞髀」，跟其他小狗玩樂。
「我想佢，如果投胎嘅話搵返我，再做我嘅小朋友。」
