5 月初，住在宏泰閣 17 樓的葉家駒，大火後首次回家，悼念捨身救人的太太白瑞蓮，在太太遇難的廁所，放下她最愛的玫瑰。葉家駒從灰燼中尋回婚戒，卻不見太太那枚。臨別一刻，他輕聲道：「老婆，走喇，唔好再留喺呢度喇，去你想去嘅地方。」
事隔三星期，葉家駒再度與兒子、媳婦回家，一家人的行裝輕便不少。廁所的花束猶在，他相信太太已離去，抵達彩虹橋。葉家駒未能尋回太太婚戒，卻意外找到太太常佩戴的手錶，雖然只剩錶殼，仍為他帶來一絲安慰，「算係其中一個同佢有個聯繫嘅嘢。」
盛載回憶的單位，如今是一片頹垣敗瓦，葉家駒堅持：「無論我屋企變成點，都係我屋企嚟。」然而，政府定下的收購業權「死線」逼近，他坦言「唔會依個階段去諗」，又質疑：「何來你情我願呢？其實喺成個過程，你都係不停咁壓逼緊我哋咋嘛。」
相關報道：
宏新周婆婆漆黑中奏《耶和華是愛》 孫兒Dorz：嫲嫲一口氣攀14樓引全場鼓掌
未能尋回太太婚戒
葉家駒早上跟兩名兒子、大媳婦吃早餐後，登上接駁巴來到宏福苑。上次回家，找到母親和外母留給太太的玉珮、金鏈及戒指，惟不見太太的婚戒。「上次我未搵到太太結婚戒指，我自己嗰隻搵到，都溶咗，希望今次搵埋佢嗰隻。」他憶起多年來，太太對婚戒珍以重之，一向放在家中，只會在兒子結婚等隆重場合戴。
出發前，他如常向太太傳訊息，「保佑我搵得返啲嘢。」雖然已上樓一次，也了解單位燒毀程度，「基本上可以燒到嘅嘢都燒晒，打完仗咁」，惟葉家駒這次比較緊張，「唔知點解，尋日瞓得唔好、瞓唔着。」
這趟回家，葉家駒只拿了少量搜索工具，也沒有攜帶花束悼念，「相信佢應該好完整上到彩虹橋。」他嘗試在睡房從前擺放戒指的位置尋覓，用燒烤網當筲箕，「都好似喺度尋寶，一面掘一面挖，睇吓會唔會挖到我想要嘅嘢，見到類似咪執起嚟睇吓」，但不見戒指蹤影。
由於單位只限兩人同時進入，兩名兒子擔心他辛苦，着他在門口等候，由兩人接力尋找，可惜同樣沒結果。「失望呀，佢哋係有期望，覺得會搵到媽咪嗰隻戒指㗎，搵唔到冇辦法。」葉生說。
意外尋回妻手錶
目標落空之際，葉家駒找回多年前買給太太、她生前常佩戴的手錶，「算係其中一個同佢有個聯繫嘅嘢，算係少少安慰，總好過咩都搵唔到。」雖然手錶只剩下錶殼，但葉家駒說仍會好好收藏，也盼能修復婚戒，「可以嘅話會攞嚟戴。」
臨行前，葉家駒拍下廁所內上次擺放的花束，又放下電子蠟燭，「我諗佢唔喺嗰度㗎喇，相信佢離開咗，已經去咗佢應該去嘅地方。」
兩次上樓也無法尋回太太婚戒，葉家駒希望能第三次上樓，「未必係搵嘢啦，可能係真係憑弔我呢個屋企，今次冇時間。」不過，他不認為社工會聆聽他的訴求，「其實佢（政府）一早盤算好、佢有計劃，所以其實有冇第三次（上樓），同有冇同社工講，係一啲關係都冇。」
「其他人點可能決定我私人產業嘅命運？」
至於政府早前公布，陸續向宏福苑業主發出「收購建議信件」，重申 6 月 30 日及 8 月 31 日為接受政府長遠安置方案的相關限期，葉家駒表示「唔會依個階段去諗」。
「你問我，私人產業係唔應該由少數服從多數去決定，唔可能你講有七成想賣，然之後你就去推呢啲方案，我覺得呢個係好荒謬，我私人產業，其他人點可能決定我私人產業嘅命運？當然我自己決定啦，我賣唔賣。」
他續說：「當然你畀出嚟嗰個市場價，咁我喺我角度，我屋企、我嘅物業，從來都唔係由市場價決定佢嘅價值，我有我自己嘅價值，你依家所畀出嚟所謂市場價，唔係我心目中嘅價錢，咁我自然唔會賣啦。」
「何來你情我願？」
葉家駒指，政府定下收購業權限期，「呢個更加係 ridiculous（荒謬）措施，佢對住全香港人講『你情我願』，你 set 咗 8 月 31 號為死線，呢日之前一定要決定，咁何來你情我願呢？其實喺成個過程，你都係不停咁壓逼緊我哋咋嘛，咁叫『你情我願』，我就真係唔知咩係『情』、咩係『願』。」
他指，仍未有獨立委員會調查報告，「你就要喺佢出報告之前，settle 晒所有賣業權呢個做法，唔係應該先問責後安置㗎咩？點解佢要調返轉嚟做呢，我唔明白囉。」葉家駒形容政府對災民巧取豪奪、輸打贏要，「係冇人情㗎，根本冇人情，從開始到依家，我都唔覺得有關當局有甚何人情，sorry 我真係睇唔到。」
至於法團管理人「合安」稱，需時核對業主身分，向土地審裁處申請延長召開會議期限，葉家駒則指事件已進入司法程序、他不評論，但指「佢用呢個作為理由，去申請延期呀嘛，佢點會搵我哋啫，佢搵我哋咪即係自己冚自己、自掌嘴巴？」
葉家駒強調，土地審裁處應該有自己專業判斷，「咁我哋唯有等佢出囉，好話唔好聽你可以拖，甚至乎可能土審話畀我哋聽，佢判出嚟可能拖十年八年，我哋都係跟佢司法程序去做囉，我咪上訴囉，冇嘢㗎。」
