福苑受災居民一連九日第二輪上樓，周五（29 日）是最後一日。宏泰居民歐太準備了「宏福人 宏福情常在」、「心繫宏福」等字句在屋內張貼。她說居民只想表達心聲，不明白貼字句為何變得敏感，強調並非想與任何部門作對。
她下樓後表示，在單位貼字句時沒受阻，警察曾在外面巡邏，亦有「上嚟打聲招呼，你會點樣黐呀」，但沒阻止她，形容雙方互相尊重。
政府發言人指，過去 9 日 7 幢大廈 1,736 戶當中，有 1,438 戶共 5,220 人完成上樓，當中 14 戶、共 37 人因特別原因獲准在期間內再上樓一次，選擇不上樓的有 298 戶。
相關部門合組的綜合詢問處，期間共接獲 11 宗居民求警協助個案，及 33 宗不適求助個案。警方同期收到 11 宗求警協助個案，涉及居民懷疑遺失手錶、飾物、現金和金飾等財物。
警方指派員搜查後，其中一宗個案成功協助住戶尋回失物；5 宗個案的單位損毀較嚴重，經調查後，居民亦相信財物可能已焚毀；餘下 5 宗的單位無搜掠痕跡，居民亦未能提供財物詳細資料。
宏泰歐太：事情令我想起《聖經》四字「眼中梁木」
宏泰低層住戶歐太，上樓前向記者展示她預備在屋內張貼的物品，包括一幅小熊啤啤全家福，稱最大兩隻是她和丈夫，其他幾隻小熊啤啤則是兩夫婦每有一個小朋友出世，就會再添一隻，「象徵我屋企」。
歐太亦帶備兩張自製過膠橫幅，一張寫「宏福人 宏福情常在」，稱宏福人的感情不是其他屋苑可媲。另一張是「心繫宏福」，附加兩張屋苑內的毛毛蟲及蝸牛爬架，稱是宏福內自己最牽掛、最喜愛的地方，而這種舊式游樂設施在外面已難找到，亦想向街坊表達「You are not alone（你不是獨自一人）」，「大家面對呢件事之後，大家都係手牽手同行，大家面對嘅困難都係一樣。」
歐太說，留意到街坊張貼字句被阻止的新聞，她感到「有啲心噏」、受牽動和感同身受，「其實而家發生緊咩事呢？我會諗起《聖經》裡面 4 個字囉，『眼中梁木』囉。」
歐太解釋，「聽證會，咁多嘢講咗出嚟，政府都可以接受到所有嘅『唔理想』，老套啲講句，每一個 party （持份者）都係講緊一句說話之嘛，『依單嘢唔係我跟開』。咁佢可以接受到呢一種唔理想喎。」
「在返我災民角度嚟講，我貼嘅字，係咪真係對你哋有影響呢？但係偏偏，你包容唔到我哋嘅一啲字，一啲嘅我哋嘅小小心聲。呢條木刺，係咪真係，對你嚟講咁大影響、咁『哽眼』呢？」
「我哋其實都係，大家宏福人，大家互相勉勵，大家畀大家知道，大家唔係得一個人，呢件事係大家一齊面對緊。咁點解要將一件咁簡單嘅事，睇得咁敏感呢？」
歐太續說，居民張貼的標語，都是常見的中英文字組合，「所以希望其實政府真係睇下我哋嘅情況，睇下我哋嘅心態。我哋唔係做緊任何嘢你覺得咁大威脅⋯⋯只係啲字啫，我哋自己嘅一啲心聲啫。希望喺唔違反法例嘅情況下，我哋順心而言，希望可以畀我哋做囉。」
她其後哽咽稱，「出面嘅人可能覺得，咦你呢個字係爭取緊啲乜嘢？係咪同邊一度、任何一個機構或者部門作對？絕對唔係。」
「只係我哋咁多街坊試過向公眾發聲，向政府發聲，我哋大家好努力嗌過救命，但係阻止唔到呢件事發生嘅時候。而家，其實我哋依個願望只係好卑微，大家可以有一個空間，講自己嘅諗法，講自己嘅心聲。所以希望大家明白，我哋真係唔係想做任何嘢，只係我哋忠於自己，講出呢幾個月嘅感受。」
她說現階段不打算售出業權，要看清看透才可下決定，又指單位將來會是屬於小朋友，故希望為小朋友找到與宏福苑相若的環境，再重新組織一個家，「令到佢哋再次安穩地成長囉」。
歐太：貼字句未受阻 警員「上嚟打聲招呼，你會點樣黐呀」
歐太下樓後表示，上樓時以收拾物品為主。在收拾尾聲，自己「有同警察禮貌上講聲」，他們已收拾得七七八八，預備會張貼字句，「佢都無好特別阻止」。自己為求安全，有在張貼的物品上打洞，再以索帶索好。
過程中，她說見到警察在外面巡邏，亦有「上嚟打聲招呼，你會點樣黐呀」，但沒阻止她，只提醒她要確保物品穩妥，以免它墜樓傷及他人，形容當時雙方是互相尊重。
歐太又說，發現屋企有物品不見，已經報警，警方有在徵詢她同意下入屋協助尋找，但亦無果。她另帶走了小朋友曾鍾愛、但已被燒毀的的單車，「呢樣嘢真係曾經佢覺得好重要。雖然個樣已經變咗，都希望有機去畀佢摸下佢。」
她希望可有第三次上樓，讓小朋友可有機會上樓道別，「喺宏福苑呢個家劃上一個句號，重新開始佢哋嘅新生活」。但恐防沒有下一次，故有在屋內拍照留念，「唔好畀自己遺憾」。
宏盛袁先生：邊個被炒其實對我無用
袁先生說由出生起，就跟父母居在宏盛閣高層，成家後再於宏建閣置業，方便父母照顧孫兒，今日替父母上樓執拾。袁先生說，對比上一次上樓更感無奈、憤怒，「不過依家，我諗大家講嘢都要小心一啲，因為唔知邊啲嘢講得啱，邊啲嘢講得唔啱。」
袁先生說，居民在大火後遭怪責，屋苑應是自己管理，他強調居民在大維修期間，已經盡力向政府部門投訴，居民亦不可能每天到後樓梯視察窗口有沒有問題。他指，政府有監察責任，惟最後在聽證會上，有人「理直氣壯」地說「唔關我事」、「法例冇要求我咁做」，對此感到憤怒。
他指，「我相信（大火）都係一個意外，但原來前面大家都好努力地去做咗、講咗，但係冇人去理過 。」他又指，宏福苑居民都很乖，從業主簡介會可見，大部分居民交齊維修費，因大家都想盡快完成工程、安居樂業。
袁先生說：「係咁話邊個落鑊、邊個要被人炒，其實對我一啲用處都冇，我淨係知道我依家冇咗兩個屋企，所以真係好無奈，唔知點樣行下一步。」
袁先生：十八歲至今首次感徬徨
他解釋，「我唔係唔贊成去賣業權，政府你都要話畀我哋聽，有咩理據唔畀我哋重建。」他指，樓換樓亦沒問題，「但我哋依家咩都唔清楚，咩都唔知道嘅情況下去買。」
袁先生續指，曾就房貸問題向解說專隊查詢，對方指「問到自己就問，我都等緊政府覆我」；他自行向銀行查詢，對方表示不知道政府安排。「我要去做一啲現實嘅事嘅時候，我哋係冇答案，我唔知道答案喺邊度，我帶住兩個屋企，對我嚟講係好困難。」
他哽咽：「十八歲到依家呢一刻，我第一次有咁徬徨嘅感覺，我唔知道我聽日究竟係點，呢個問題係好辛苦、好難受。我應該要點去做一個正確決定，我諗唔到，我唔係話我去反抗、一定要唔跟你哋政府走，但係我唔知道後面嗰啲路，你想我哋點行。」
宏道盧生：我好似流浪漢咁，何處是吾家？
宏道住戶盧生，今天和太太、女兒一同回家。盧生說今次上樓，打算和單位「say goodbye（說再見）」，因不知還會否有第三次上樓。在旁的女兒即拌嘴說「無㗎喇，痴線咩，仲有第三次」。
盧生感嘆，自己在宏福苑住了 40 多年，單位算不上大，但起碼有一個家，身旁的女兒也在宏福苑出生、長大，但一場大火失去 40 年的家，又要「同我講斷、捨、離」。此情此景，他說只得五字感言——「無奈嘆奈何」。
盧生說自己的單位沒受大火波及，「我退休嘅安樂窩，而家變咗一樣嘢。我哋而家好似啲無主孤魂咁，四圍飄泊⋯⋯我好似啲流浪漢咁，何處是吾家？」
盧生稱失去了家，他一個男人也哭過無數次，甚至當街痛哭半小時。他認為政府的特惠方案無補於事，又提到早前有居民指援助金多到用不盡，「有啲住客話咩洗唔晒，我可以咁講，嗰位住客你諗下，有啲人喺上面犧牲咗，洗唔洗得晒呢？⋯喺嗰啲有傷亡嘅人嘅傷口灑鹽」。
盧生又說不想重住宏福苑，「呢啲傷心地方，畀我都未必想留。就算畀我，都未必肯住」，但他望政府可聽宏福苑居民訴求。
他身旁的女兒則說，原址重建「無乜可能㗎喇」，稱雖然很多街坊想，自己亦想，但覺得政府不會願意撥款重建一個多年前的屋苑，「無可奈可⋯⋯要向現實低頭，我哋唔係甚麼大財團。一個小市民，唯有跟住佢個 flow 走。」
宏道何小姐：焗住都要賣業權，唔通瞓街？
宏道閣居民何小姐表示，有燒毀及無燒毀的單位結果一樣，都是要出售業權，「焗住都要賣業權，唔通瞓街呀？」她指，自己一把年紀難以「孭住層樓」，只能接受樓換樓。
何小姐又指，「宏福苑居民唔係貪心，冇人想間屋咁樣，去換取人哋嘅捐助」，希望「嗰啲人積下口德」，不要再指責居民，「你冇咗間屋、冇咗個家，屋企人死亡嘅，咁佢係咪想用呢啲嚟交換呀？」她希望街坊以後平安生活，及早找到安樂窩。
宏盛脫生：事後回想質疑是否真的要強制大維修
宏盛 22 樓住戶脫生表示，家人在宏福苑共持有 3 個單位，當中宏盛有 2 個，宏建有 1 個。大火發生時，合共有 10 幾人在家，若然有事就會形同「滅族」，「其實係好嬲㗎我係」。
記者問最令他生氣的是甚麼，脫生手指向宏福苑比劃稱「啊⋯⋯好似無一個理據要強制大維修囉，諗返轉頭。因為當初講到好似好嚴重、危樓咁，先強制大維修。但最後結果燒咗成咁多個鐘之後，幢樓無諗到仲喺度喎。咁點解當初講到好危樓咁，要即刻做大維修？」
脫生亦質疑當初是否需多個項目同一時間做，又認為其實有「縫縫補補」方案，即「邊度爛就整邊度」，毋須搭棚數個月。他憶述，當初搭棚大維修，每次開工工時都是非常短，經歷兩次 10 號風球後，「佢個棚網明顯係換咗㗎你見到」，隨後就發生火災。
至於上樓，他稱第一次上樓時心存期盼單位會沒事，「點知上到去原來唔係無事，原來係隔離屋已經完全焚毀咗喇，波及咗我哋少少」。
脫生描述，衫褲鞋襪袋「好似俾燙斗『辣』過咁」，令收拾更加困難。當時只帶走重要物品，例如寵物骨灰、家庭相簿、身分證明文件等。今次再上樓，他說上次因斷捨離放棄帶走許多物品，既然有第二次機會，「不如唔好斷捨離喇」，他計劃帶走兒時玩具等。
脫生又指，希望能原址重建，亦在第一輪問卷中表達了有關意願，但感覺結果被歪曲。他又說，外界聽到「樓換樓」方案，以為「好似有機會舊樓換新樓，新界樓換市區樓」，但其實宏福居民仍需補回呎價和地價差價，「唔係做到『樓換樓』佢原本個口號咁」。
宏道羅生：整個屋苑賣業權 需各業主一同商量
宏道高層住戶羅生表示，自己的單位沒被燒毀，沒特別計劃帶走甚麼，「見到咩呀執咩」，但會帶走具紀念價值的物品，「值唔值錢，唔係用呢個衡量」。
羅生形容，自己現時狀態是「一日望一日」，又形容居民形同被逼賣業權，「我哋賣畀你，好，但你要清晰啲畀我哋」，舉例稱大火後半年間樓價一直攀升，宏福苑的呎價卻「定咗落嚟」。他又批評這次揀選單位就似「指鹿為馬」，稱大埔的頌雅路西原本的設計是興建公屋，「你改咗個名係居屋」，情況是「你收我間居屋，去賠返間公屋畀我，公平定係唔公平呀？」
至於業主大會，他點名提到民青局局長麥美娟，稱麥美娟說過賣業權是業主自己的事，但今次不是單一個單位出售業權，而是牽涉整個屋苑，認為需要各個業主一同商量，「業主立案法團呢，係你香港政府要求我哋做嘅」，他反問如是業主自己決定，還需要法團作甚麼，「我想知，係咪以後唔需要法團？」
翻查資料，麥美娟在本月 23 日，就「合安」向土地審裁處申請延遲召開業主大會一事，回應稱「如果喺一啲業主，佢哋就住佢哋個別單位嘅處理呢，呢個係私人嘅地方，係業主自己嗰個考慮，咁就並唔係呢，透過業主大會嘅形式去處理。如果一個業主佢要考慮是否出售佢嘅私人單位，佢自己個單位呢，其實係按照佢哋自己嗰個嘅情況嚟到考慮，所以呢其實就，同開唔開業主大會呢，根本就係唔應該係掛勾。」
古箏演奏家馬忠駒：最唔開心嘅事，唔好再彈唔開心嘅歌
古箏演奏家馬忠駒的宏道閣 31 樓單位，收藏了 40 多部古箏。第一次上樓時，他在朋友及關愛隊協助下搬走其中十多架古箏，包括他稱由老師發明的「蝶式箏」。
這次上樓，他說主力帶走樂譜、手稿、書籍等，剩下的琴只能寄望有第三次上樓時再帶走。馬生亦帶不走一堆藏品，當中有瓷器、老師送的絕版公仔、紀念品等。
宏福苑有不少音樂人，上樓期間都為告別家園憑歌寄意。但馬生說自己心中沒有選曲， 「無曲喇，無咩曲㗎喇。當你一個最唔開心嘅一件事，我覺得你千祈唔好再彈一啲唔開心嘅歌。你明唔明？如果講一首好慘嘅，講畀你聽係無意思嘅，盡量自己 EQ 搞掂⋯⋯知道有啲人特登彈歌，佢鍾意點呀點，作為演奏嘅人我唔需要。」
宏盛蔡生：居民是受害者，不是「自己燒自己間屋」
76 歲的蔡生，因腳痛錯過第一輪上樓，今天是大火事隔大半年後，首度回到宏盛閣的家。他說不知自己體力能否撐過 30 層樓，但自己在宏福苑住了 40 年，現時「經常瞓覺發夢都醒⋯⋯成日都掛住。今次有機會返到去，係咪都望吓住咗 40 年嘅屋係點樣⋯⋯有感情吖嘛、大家都唔捨得㗎。」
他希望稍後可以在家拍照，以及帶走個人物品，例如書簿、支票、紀念品等。問及會否擔心今次是最後一次上樓，他答「無乜擔心㗎」，只能珍惜僅有的 3 小時，坦言時間不足夠，「但無辦法啦，政府規定咗啦嘛。」
酷熱天氣警告生效，他說預料上樓過程肯定會辛苦，大汗疊細汗的他稱「我而家都熱啦」，但帶上樓的消暑法寶，只有乾、濕毛巾各一條，「慢慢上囉」。
至於未來，他說覺得現時被政府規定要售出業權，但希望政府可有長遠安置計劃，讓每名居民可獲長遠居所，「唔好話你畀咗錢之後，你自己就自己顧自己啦。你喺街、喺市場，買到喇就買，買唔到就你自己嘅事喇。千祈唔好咁樣。」
他續說，宏福苑居民是受害者，不是「自己燒自己間屋」，認為香港市面上有許多居屋，而宏福苑居民的要求也不算高，郊區、二手亦無所謂，並提到以前自己住 400 多呎，現時只有 200 多呎，希望政府能提供明確前景、承諾保障居民可找到與宏福苑呎數相若的居屋，「唔係剩係話，你而家得砂煲罌罉樽，得 5 樣嘢揀，5 個地方，你揀到就揀，揀唔到就下一期啦，揀到幾時唔知道⋯⋯千祈唔好咁」。
他亦稱，外面樓價現時至少索價 400 多萬，而宏福苑收購價或只得 300 多萬，以自己 70 多歲高齡，將未能供樓。若是樓換樓，亦擔心未能中籤，期望政府盡量提供方案、盡快解決。
宏道雷生：傾向賣業權、盼原區安置
宏道閣 26 樓居民雷先生說，單位燒毀不算嚴重，今次主要執拾剩餘物品、玩具。他說傾向售出業權，認為居住選擇多，「多咗大埔單位畀我哋揀」。他考慮生活習慣、朋友圈子，心儀原區頌雅路西單位，「富善邨再入少少」。
雷先生說，該位置沒宏福苑方便，亦知道要等候幾年才落成，指現時暫住在外母單位，「有個竇先，唔使咁慘」。被問及會否希望召開業主大會，雷先生指「都想開嘅」，認為大會主要目的是𨤳清維修費、保險，「知道返真相」，對於賣業權沒有太大影響。
江洋發上樓執拾 未有回應記者提問
本月與妻被指詐騙「百分百擔保貸款計劃」而一度被警方扣查的宏福苑法團前委員江祥發，周五揹著背囊、斜揹袋，手執一個 Ikea 袋上樓。他沒回應傳媒提問，亦重申不會受訪。
他早前被扣查獲釋後，稱「從今以後，我唔會再接受任何訪問，亦唔好再追我任何嘢，我唔會再回應㗎喇。」這
酷熱天氣警告生效 現場氣溫高達35.7度
宏福苑 7 幢受災大廈一連 9 日的第二輪上樓，將在今天完結。酷熱天氣警告自本周二起（26 日）一直生效，宏福苑現場周五氣溫一度高達攝氏 35.7 度。
早前宏盛 1 樓住戶在屋內收拾物品時不適暈倒，送院治理。其家人稱當時天氣太熱，「（佢）一下子覺得成個人抖唔到氣」。
警方周四（28 日）回覆《法庭線》指，由第二輪上樓首日（21 日）至本周三（27 日），共收到 25 名居民及 2 名工作人員不適求助個案，其中 3 名居民及 2 名工作人員需送院，全部經治理後已出院。
就酷熱天氣有否對居民提供額外支援，警方指駐守大廈樓層及陪同居民上樓的警務人員，會按照居民需要提供適切支援。
民政事務總署則表示，安排宏福苑居民上樓以來，一直為每戶居民準備物資包，當中含退熱貼、冰涼濕紙巾，另在多個地點設樽裝水站，登記中心和居民等候區亦有冷氣供應。因應酷熱天氣，署方已在戶外範圍加裝帳篷、風機及風扇，盡量為居民及工作人員降溫。
