宏泰閣、宏建閣災民周五（1日）繼續分批上樓收拾家當，是日開放宏泰中層及宏建較高樓層。不少宏建住戶表示單位大致完好，僅獲 3 小時執拾並不足夠，日後會再申請上樓，亦有居民盼政府考慮修復大樓、讓居民回遷。
另一方面，有宏泰閣住戶稱，原定上月 29 日上樓，因爸親要覆診 5 度要求改期不果，直至接受傳媒採訪後，即日獲通知可延期，批評安排欠人情味、資訊混亂，更透露火災後發現自己懷孕卻最終流產，形容「無咗個屋企，連小朋友都無埋」。
早前講述自救經過的 85 歲冼婆婆亦重返家園，因無升降機未能上樓，由女兒代為執拾。當她見到受損家園難掩傷心落淚，稱要「咬實牙根斷捨離」，仍會一生記住這個曾屬於她的家。
宏福苑回家特寫｜「也許這輩子再沒機會上樓」 85歲冼婆婆的原址重建夢
宏建76歲陳生：外骨骼借用計劃取消 幸仍能「一口氣」走上15樓
76 歲宏建閣居民陳先生與兒子周四上樓收拾，成功帶走 29 袋家當，把部分家當寄倉後，今天再乘接駁車搬回善樓。早前有民間團體免費借出機械外骨骼予居民上落樓梯，陳於上樓前曾練習使用機械外骨骼，惟計劃臨時取消。
他坦言一度憂心，「但都冇計呀，唔通你唔上咩，焗住都要上啦」，最終在兒子及民安隊、警方等協助下，「一口氣」登上 15 樓，更來回兩次。
他形容「屋企都好齊整、冇損失」，成功把貴重物品取走，包括工藝品及玉器，「幾十年嚟辛辛苦苦搜羅返嚟」，衣物則「完全冇攞」。但「屋企住咗幾十年，仲有好多嘢帶唔到走住」，希望政府容許居民有多幾次上樓機會，已向社工表示希望再上樓。
陳子亦稱，「希望有三、四次」，「應該要畀人拎晒啲嘢為止，先合理」，「嗰啲係居民自己財產嚟」。
相隔 5 個月再重返家園，陳先生感觸指，「見到隔籬嗰啲燒得咁厲害，我哋雖然幸運咁倖存落嚟，但都要離開喇，好悲哀」，又對街坊痛失家人感到百感交集。
宏建29樓陳生：大部分單位無損毀 可考慮修復後讓居民回遷
住宏建 29 樓的陳家，因爸爸媽媽年事已高，由長子等子孫上樓收拾物品。長子下樓後表示，單位可說是完全沒損毀，連水和煙熏痕跡都沒有，形容若大樓能駁電，他爸爸媽媽便可即日回家。而今次上樓，他們優先帶走父母要求的物品，例如老人家最緊張的果皮，亦有視像致電兩老讓他們看單位。
陳生續說，許多宏建街坊今次回家後，見到只是一個半個單位出事，開始思考除了宏志閣外，是否宏建閣的居民也可以搬回來居住，認為修復兩幢樓宇供居民重新入住，亦是可行方案。
他希望可盡快召開業主大會，因現時居民甚麼都不知道，希望能透露業主大會商量方案、取得共識，又說今次「辣到埋身」，相信業主都會走出來，出席的不會是授權、種票的人。
被問及大火當天情況，陳說爸爸當天外出看醫生，其後與他午餐，媽媽則一人在家，起先也不知起火。直至有朋友向他表示，新聞說其父母的屋苑火警，他隨即致電媽媽，但未能即時聯絡上。
後來得知，原來媽媽當時聞到煙味、「𤓓味」，走到洗手間窗口觀察，亦只能聞到味道，未見火光，於是打去管理處查詢。
陳稱管理處人員當時跟媽媽說：『你住邊坐呀？宏建呀？喔，無問題，你隔離兩座火燭啫，你閂好門窗就得喇』。好彩我媽無聽佢點，即刻落樓、八卦。但佢銀包電話乜都冇拎，剩係一對拖鞋落去。」
被問及兩老今天在樓下等的心情，陳生說他們為免年輕人擔心，表面上看似沒事，但哽咽稱，自己臨走時也感到不捨。他特別記得，小學四年級時遷入宏福苑，與父母成為首批居民。入住後翌晚就碰上八號風球，因未試過住高層，他們還問為何大廈會搖，故很有印象。
宏建27樓吳氏夫婦：錢財身外物，最重要帶走古董
住宏建 27 樓、今年 70 多歲的吳氏夫婦，今趟特意上樓帶走家裡古董，稱錢財都是身外物，最重要是古董。
說起古董，吳太如數家珍，說家裡有百多件珍藏，最早的有同治年代的收藏，涵蓋畫、瓷器、木傢俬、絲綢，例如有孫枝的中國畫、百鳥朝王，又有酸枝、花梨木的傢俬，亦有關公像。
她亦即場為記者「補習」，以英文教授不同瓷器的類型，講到家裡有一珍藏是清朝時小姐坐的瓷器椅，稱之為「小姐櫈」，上面上了「釉下彩」。言談間，吳太透露她曾師從吳老爺，學習古董知識，「咁呀教識你一堂喇」。
吳生亦分享，說瓷器收藏中最好的是關公像，說「胚面」做工非常細緻，現已找不到。
問起會否擔心失竊，吳太說有擔心，但希望賊人「不識貨」，拿走錢財便算，不要碰她的古董。她說藏品並不打算賣，與丈夫百年歸老之後會捐贈出去。
問起宏建閣損毀不嚴重仍要收購，吳太表示不賣不行，因政務司副司長卓永興說過，如遲了賣，政府就不再收購。現時兩夫婦寄居友人家中，聞悉卓的說法感到無助。她亦擔心要搬至偏遠地區，難以適應。至於重建，吳太說「你起得嚟，我都走啦（已過世）」。
吳太上樓後表示，單位幸未受損，今次帶走部分瓷器，包括一個清朝大碗，將暫存於仁濟醫院與多間公司合作提供的迷你倉。她又向記者展示其他收藏品，包括裝有萬寶龍鋼筆的酸枝盒，另有老爺傳下來的收藏，是一幅從廟宇拆下來的長方型木牌，上面鑄有數個全身金屬人像。至於其餘重要傢俬，會留待下次再上樓搬走。
宏建24樓王小姐：「有新樓住梗係住新樓，仲住舊樓？」
宏建 24 樓王小姐表示，家人持有單位 40 多年，自己則在結婚後遷出，大火時只剩媽媽和工人居住，兩人幸運逃生。大火後，媽媽轉入老人院，但因「老人痴呆，乜都唔知」。
她說要爬 24 層樓梯不覺辛苦，笑言自己有運動習慣因此不怕，「我嫌行得慢，如果得我一個人，我諗我 10 分鐘已經行到上去」，但因必須等齊人，所以沒辦法。
她透露，宏建閣應該 16 樓燒得最厲害，因走樓梯時經過見到，該層走廊被熏黑。而自己單位，有一幅牆原本貼滿生活照，例如自己兒時照片、與媽媽合照，均已被熏黑。
被問及會否想繼續住宏建閣，王小姐表示不會，因宏建已有 40 多年樓齡，「有新樓住，梗係住新樓，仲住舊樓？」
宏泰17樓Simon：見證鄰里四代情 哽咽同層3鄰居已離世
居民 Simon 與哥哥分別住在宏泰閣 17 及 11 樓，Simon 早上先陪哥哥到宏福苑搬運家當。Simon 則獲安排於周六上樓收拾。事隔 5 個月終可回家，Simon 形容心情「唔好受」，亦遊說自己「唔好畀咁大壓力自己，如果唔係，好大負擔」。
哥哥單位未受嚴重破壞僅薰黑，成功取回首飾、現金及金器等貴重物品，但「大件嘢都攞唔到，唯有唔要，當係劃咗個句號」，部分家電、衣物亦已無法取回。
至於 Simon 家中的情況，他指從社工提供的照片可見，單位受較嚴重破壞，廚房被焚燒，但未知其他詳細情況，「裡面點要等聽日揭曉，Up to 呢個 moment 都唔知攞到啲咩落嚟」。其單位只容許兩人出入，Simon 預計只會取回重要文件、證件等。
Simon 形容自己為宏福苑「開荒牛」，「由 day1 到依家」，哥哥亦已入住宏福苑 20 多年，當時母親仍在世，「諗住一家人喺埋一齊，估唔到依家發生咁嘅事」。
住在宏福苑 40 多年，Simon 見證鄰居經歷不同人生階段，「幾乎三至四代（同住宏福苑），由我哋呢代、到佢哋細路仔、到結咗婚長大、到佢哋細路仔，都喺度住。我眼睇佢哋，4 代人。」
Simon 形容宏福苑「實在係好好嘅地方，清靜、乾淨、空氣好、有景觀」，又指「我實在唔願意放棄呢個位置，但奈何好多因素，政府強行要我哋離開，呢個係鐵一般事實」，「係唔捨得嘅，但係⋯⋯奈何」，又形容原址重建「呢個希望已經係渺茫」。
Simon 憶起昔日在宏福苑的鄰居，忍不住哽咽說：「隔籬爸爸同個女、斜對面葉太（均已離世），大家都好熟、好 friend，我嗰層已經有 3 位街坊唔喺度」。起火當日 Simon 家人均不在單位，「如果喺屋企，真係唔敢諗」。
宏建26樓范小姐：人數所限兒子未能上樓 代攜晝作回家
宏建 26 樓住戶范小姐，對記者展示 11 歲兒子，為宏福苑單位繪畫的手繪畫作，上面寫上「我愛宏福苑」、「這裏是我的家」。范小姐指，兒子不捨單位，今天亦想上樓，曾向她撒嬌問可否叫「警察先生、社工姐姐」讓他上樓，但無奈他們需要更有力氣的大人收拾和帶走物品，只能透過視像讓兒子看到屋內情景，以及替他把畫作放在屋內。
范小姐提到，兒子在大火後一度情況低落，幾天都說沒胃口、不肯吃飯，幸得班主任開解，現已放下情緒，但仍會說好想回家，回家是他的心願。
今次上樓，范指單位沒收到照片，亦准 4 人入內，故希望可找回所有重要文件，以及小朋友成長的照片、物品，尤其是 BB 時期的乳齒，以及當時造的手模、腳模，「因為嗰啲可一不可再，小朋友唔會變返細個 BB 畀返你去做」。
對於宏建閣要被收購，她說感到無奈，不想出售業權，指如想賣，早在大維修時已賣、不住宏福苑。她希望政府可以考慮居民意願、原址重建。
范小姐下樓後，表示慶幸單位沒有搜晾痕跡，笑指對消防員「爆門」的技術感到震撼，因離開時仍可用鎖頭關起鐵閘。
她又說，將仔仔的畫作貼了在房間窗戶，笑稱因位於高層，畫的字也不算很大，希望能看得到。而她原先打算上樓後致電兒子，但入屋後時間緊逼，只能及時為兒子帶走他所有玩具，例如恐龍、火車，一度掩臉稱「男仔都係咁」。
她說今次帶走了重要文件如樓契、兒子出世紙等，亦帶走了金器，並笑說亦能帶走仔仔 BB 時的腳仔模、BB 牙和乳齒。其後她哽咽表示，最不捨得是這個家，亦說不出「拜拜」，因她愛惜單位的一切，裡面仍然新淨，也滿載與仔仔的回憶，要離開好似把回憶丟下，感到傷心。
宏建23樓黃太：不想原址重建 但想原區安置
宏建 23 樓黃太表示，今天帶備了紅白藍膠袋，「執得幾多得幾」，最想帶走金錢、金器、文件，但指只有 3 小時，「住喺度幾廿年嘅嘢，點執吖。」
黃太又指，希望能召開業主大會，釐清發生了甚麼事、有甚麼可以做，「你都要畀個答案我哋，而家真係完全乜都唔知，一味佢哋講晒。」
目前方案中，黃太表示不會考慮原址重建，「你就算原址，都好難原址重建返㗎。因為你始終嗰撻地方，走咗咁多人。對於啲陰影嚟講，始終都係好大。所以原址重建，呢個可能性，我就唔會 buy」，但她希望可原區安置，因小朋友在此出世、生活、讀書，「希望盡量畀返大埔我哋，第二度唔會點諗，希望喺大埔。」
宏泰中層婆婆： 1983年建家「由冇到有，而家由有到冇」
居於宏泰閣中層、不透露姓名的婆婆，表示大火前單位剛新裝修、重新入住約一個月，當時花了約 20 萬元。今次上樓收拾，見到單位「燒咗好多嘢」，當中廚房、客廳、睡房均燒到「冧咗、冧晒」。
但婆婆說第一眼見到時，「無嘢㗎，已經發生咗嘅嘢就發生咗㗎喇，無得追㗎啦係咪先。你只能夠向好嗰方面看，其實你燒咗嘅嘢，追又追唔返，亦都唔知邊個負責任，但自己就處之泰然囉，開心啲囉，唔好咁緊張。」
不過她承認有不捨的感覺，指自己是第一批入住居民、住了 40 多年，仍記得自己是 1983 年 7 月 30 日搬入，「係自己建返嚟，由冇到有，而家就變咗由有到冇喇。」
她表示不考慮原址重建，「我想快啲走，真係想快啲，有個自己嘅，屬於自己嘅家。而家住緊嘅地方，無安全感⋯⋯我想要安全感」。
宏建26樓蘇生：執拾期間被溫和催促「你仲有幾耐㗎？」
宏建 26 樓住戶蘇生指，上樓收拾時有些忙亂，稱他們一行有 4 人收拾「有 12 個鐘，但係都唔太夠嘅」，主要帶走具價值的東西，尤其是錢買不到的東西。
他又說，期間有部門溫和地催促、提醒他們，引述對方稱「你仲有幾耐㗎？嗱，你仲有兩個半鐘，你而家用咗半個鐘。唔緊要，明白嘅，都要話畀你聽」，認為應是程序上的做法，他亦理解。
他續說，聽到對方催促時，「你都無咩感受㗎喇，自從有咗呢個大維修之後，我個人都冇乜感受㗎喇，因為你畀錢出嚟，跟住你無部門監管，你而家仲要係，所有人都唔覺得自己有問題但係我會改善。」
他比喻稱，「好似幼稚園讀書咁，一支鉛筆嘅道理之嘛。點解一支鉛筆後面有舊刷膠？因為你細個、你有改善機會。大個點解你要原子筆吖？因為你會留意到，幾時先係要一個正確嘅嘢，你先會去做。但係咁佢哋都無㗎啦。佢覺得自己用緊鉛筆之嘛，刷咗咪得囉。但人生原來唔係你樣樣嘢都刷得㗎嘛。我哋就係犧牲品。」
大火事隔五個月，蘇說希望召開業主大會，讓政府「聽下我哋究竟要啲咩」，又指有業主大會，「你先知道究竟我哋嘅訴求、我哋嘅心聲。如果唔係點解要夠 5％ 就開業主大會？⋯⋯我哋已經錯過好多次喇喎⋯⋯連我都係（曾經）不瞅不睬，但係殺到埋身，就無得不瞅不睬。」
他亦質疑政府提出的未補地價和已補地價的呎價是如何得出，「我真係唔識計喎，DeepSeek 都唔係咁計㗎啦。」
對於宏建損毀不嚴重但要拆，蘇表示「梗係可惜啦，我呢個價錢係買依個地段㗎嘛。咁而家佢夾硬要去搵、要去揀你心目中唔要、唔鍾意嘅嘢。七樣嘢、九樣嘢、十樣嘢，退而求其次去揀喎。唔係你畀咩我就要咩，我唔係難民喎，我唔係偷渡嚟㗎喎，我係 local 嚟，我有交稅㗎。但原來，仲衰過新移民，哈。」
宏建住戶袁生：忍受維修終遇意外 「大家唔會明白我哋心情」
宏建住戶袁先生表示，自幼在宏福苑長大，原與爸爸媽媽在宏盛閣居住了 30 幾年，後來自己一度遷出，直至有小朋友，約一年前再搬回宏福苑、在宏建閣居住。他說搬回來之前，「都睇晒成個大埔，真係得呢度適合屋企人同小朋友喺度居住，先至再搬返番嚟」。
他哽咽表示今天上樓一回家「都已經忍唔到㗎喇已經⋯⋯成個屋企都唔同晒，成個環境都⋯⋯我諗係唔捨得囉」，又說「我諗大家都好難去忍受到，就係維修嘅時間⋯⋯大家情況喺裡面都應該裡面封晒窗、無陽光，成屋咁坐喺度⋯⋯忍咗一年啦，諗住大家都差唔多埋尾，點知遇到啲意外。我諗大家都唔會明白我哋嘅心情」。
他說收拾時能帶走的物品比預期多，故時間不足，但他不透露有否失竊，「唔講喇嗰啲，我諗大家都知咩事喇。我諗屋企人安全、平安已經夠喇」。
宏泰14樓歐先生：大火前3個月遷入單位 新傢俬化灰
宏泰 14 樓住戶歐先生指其一家是租戶，大火時剛遷入單位 3 個月，指屋內傢俬、電器均全新，「新傢俬全部都係自己嵌。晚晚放工、10 幾日，夜晚收工係度嵌」，原打算讓小朋友有新環境、住得舒服，「點知⋯⋯大家都唔想嘅。」
他表示，親眼看到單位時心情「比較失落，希望諗住⋯⋯唔係想像中咁嚴重。希望一啲得、一啲唔得。見到全部都變晒做瓦⋯⋯咁⋯⋯唉⋯⋯」最後只能帶走少許紀念品，包括小朋友的獎盃殘渣、少量金器，「其他冇晒喇」。
從歐先生提供的相片可見，屋內損毀情況嚴重，部分區域需以鐵柱支撐，只准一人入內。被問及感受，歐先生說「總之都好失落。唉呀⋯⋯唔知講乜，都唔識講呀。」
宏建26樓戶主朋友陳生：單位疑遭搜掠 失名貴手錶暫不報警
今天陪伴朋友上宏建 26 樓住戶收拾的陳生，指朋友的單位懷疑曾遭搜掠，「全部閘都爆晒㗎喇」，不過裡面沒有受損。經收拾後，初步發現不見了一隻勞力士手錶，但暫沒報警打算，因為今次上樓時間不足、可能未找清楚，如有機會上去會再找，屆時再決定。
陳生說，朋友收拾了 4 袋紅白藍膠袋，載有具紀念價值物品如相簿等，亦有一袋高爾夫球桿，稱因朋友喜歡做運動、較昂貴，另也想帶走雪櫃，但因身處 26 樓難以搬運而放棄。同行亦有 70 多歲的老人家，走得比較吃力。
陳生又說，眼見朋友上樓收拾時起先沒異樣，但臨走時難掩傷痛、忍不住哭，稱「好唔捨得呢度呀」。據他所知，朋友不想賣單位，但無奈或將要清拆。
宏泰85歲冼婆婆回家 步入屋苑見家園盡毀不禁抹淚
早前受訪講述被困自救經過、居在宏泰閣的 85 歲冼婆婆周五（1 日）回家，因沒有升降機、不夠體力行樓梯，由其女兒上樓執拾，她在樓下等候。戴着頭盔的冼婆婆，由親友攙扶步入宏福苑，女兒 June 指向大廈，冼婆婆見到破爛家園，難掩傷心以紙巾抹淚，親友拍肩安慰。
冼婆婆今早 6 時起床，和女兒從上水出發，乘搭接駁巴士抵達宏福苑。隨着上樓時間漸近，冼婆婆說心情變得不穩，「會湧到有淚水喺眼角」，特別見到火時，「我唔識得點樣去形容，成個人俾人 chok 一 chok 咁嘅感覺」，知道需時平伏，「我會努力嘅」。
她說，只能「咬實牙根斷捨離」，但不會跟單位告別，「我呢一生人都會諗住呢度，曾經係我嘅家園，係我最喜歡嘅家園」，尤是樓宇縫隙之間的風景，「有黃永玉嘅畫作嘅感覺」，哽咽稱：「我對唔住間屋，我唔可以守護佢」。
June 說，「其實間屋只係受咗傷，但依家俾人殺咗，受傷係可以醫返好，但夾硬俾人殺咗係冇得醫」。她又質疑為何不能修理升降機，「依家你未拆住㗎嘛，唔拆住做乜要咁趕呢，點解要啲居民咁辛苦呢？」
宏泰3樓莫小姐：五度聯絡社工未能改期 受訪同日獲延期
莫小姐表示，一家五口住宏泰閣 3 樓，本來被安排 4 月 29 日上樓，經轉折下才獲准延至今天上樓。她說，原定的上樓日，撞上爸爸不可改期的醫院檢查，曾聯絡社工要求改期，稱由 3 月 30 日起前後聯絡了五次，要求代為詢問，但都沒回音。後來她找記者幫忙、做訪問，報道見街當天便獲社工通知可以改期，「仲有幾日畀我揀」，最後選了今天她趁放假上樓。
她哽咽表示不開心，「因為成個過程，係好多嘢都安排得好差。我哋嘅要求、我哋嘅訴求，政府無聽到。每一次我哋講完之後，佢就好似選擇性失聰，跟住擺低咗，然後畀其他嘢我哋。但嗰啲嘢唔係我哋想要嘅，或者唔夠嘅。但佢無打算同我哋去傾，冇真係坐低傾。政府開始話議程行先，但係覺得成件事無人情味。」
她又說，大火過後五個月，她說「仲係好唔開心，個心都仲係會『那住』，都仲係會發夢返屋企，想返屋企」。
莫小姐：災後流產「我保唔到個 BB」
她續說，自己在大火之後發現自己懷孕，「我保唔到個 BB，因為我冇咗個屋企。我冇地方安胎呀。後尾 BB 就無咗囉，即係被逼要流產⋯⋯一個大火，係無咗好多嘢，無咗個屋企，無咗個實際嘅家，連小朋友都無埋。呢件事本來係有得避免嘅。」
莫小姐：不贊成回購方案 如同「㩒住嚟搶」
莫小姐由大維修說起，指一開始由舊法團決定請鴻毅起，「已經有好多街坊出聲話，呢間嘢唔得喎，點解要搵呢間呀？呢間嘢係好多問題，你睇報紙都知，但冇人理我哋，冇人幫到我哋出聲。委員會出咗聲鬧又好、咩都好，都係冇用。」
她續說，「未計⋯⋯阿當時區議員點樣去做一啲嘢令我哋收聲啦。佢係會同啲老人家，叫你屋企個女，即係同我阿爸阿媽講，叫你個女唔好出聲 ，去到咁樣」，又提到許多居民都有投訴工人抽煙，曾拍片上網，但沒人跟進。
現時，她說由於政府安置的中轉屋單位細小，形容是「細過大學宿舍」，不夠一家人居住，因此一家人要分散，爸爸住在樂善村，其餘要出去租屋，另提到媽媽入住老人院。
問起安置方案，莫小姐說不贊成回購安排，因自己在此住了 40 多年，希望政府有重建方案，一幢也好，三、四幢也好，讓想回來的居民可以優先回購或選擇。
她亦說，老人家的想法就是當政府「一嘢就話我冇重建㗎喇，咁好自然佢就褪後一步，我退一步、我退我自己底線，再去睇政府畀咩我」，而政府拋出數據稱不是那麼多人想要原址重建，又說政府就宏志閣的情況稱如收購達某個百分比，其餘的會用立法方式解決，批評「 咁即係㩒住嚟搶啦」。
莫小姐：災後資訊混亂猶如「捉精靈」
回憶大火，她說當日自己上班，爸爸在屋內嗅到燒焦味，去了廚房開窗觀察，見到樓下起火，就立即關窗離開，一出門已很大煙，當時爸爸以為只是普通走火警、小事，故沒帶走太多東西、貴重物品。
她又提到，爸爸逃生後一度失踪 3 個小時，電話未能找到他，她和丈夫就四周尋找，終於由丈夫在街上遇到爸爸。她說，「我頭三日都未喊得出，後尾真係叫做啲嘢開始停，先至叫做喊得到」，因災後資訊混亂，形容情況就似「捉精靈」，哪裡有訊息出現就去找資源。
莫小姐上樓後，透過 WhatsApp 回覆記者，指她中學時用零用錢購買的錢穆《國史大綱》、郭廷以《近代中國史綱》都被燒毁。她說已收藏書籍二、三十年，現時已無法回購，特別是一 套 70 年代出版，以白話文書寫的《資治通鑑》，當年由老師贈送，本打算留給女兒。
她又說，「我覺得好心痛，大火嗰日我除咗諗住搵家父都諗唔到其他，搵到家父後先諗起啲書，諗住屋企閂晒窗可能冇事，但場火太大，連窗都燒爆」。
被問及會否擔心單位失竊，蕭子表示，「一早都講過有咁嘅機會嘅，不過無人理過啫。同埋驚一定驚㗎喇，老人家擺好多金器同埋現金㗎嘛。」
他提到宏建閣只有一單位損毀，但政府仍要收購，「無奈囉，係呀無奈囉⋯⋯其實之前你（政府）公布呢樣嘢嘅時候，根本冇人知道單位或者大廈損毀嘅情況。咁你，根本你嗰陣時候都無得做選擇。當佢（政府）公布咗喇，先知道原來得一個單位（被燒毀） ，嗰陣時政府亦都公布咗，嚟緊有咩設施⋯⋯有咩方案可以做，咁你冇得揀 。」
蕭子又說，父母本身不支持回購方案，「但係，你無得揀嘅選擇下，就惟有支持」。他形容是無奈接受，「咁你老人家，你唔可以等到好多年㗎嘛。咁不如你真係攞嗰舊錢慢慢使。租地方住又好，買地方都好啦，你話等就等唔到㗎喇，幾年都廢事等呀。同埋其實而家你收購我，我都要畀律師費，我都要蝕返畀佢。其實你就算換樓，你都要律師費，一樣㗎咋，不如攞錢呀真係。」
至於會否不捨宏福苑，蕭子轉身喚爸爸，「你問我爸爸啦，問你會唔會唔捨得喎」。蕭爸爸答，「梗係唔捨得啦，但都要學識放手囉，都冇辦法 」。
宏建28樓關太：要爬28層樓梯「盡能力囉唯有」
宏建 28 樓住戶關太在宏福苑住了 42 年，是第一批收樓後便入住的居民。今天回家要爬 28 層樓梯，她苦笑稱「盡能力囉唯有」，表示大維修前曾因停電而要走樓梯上 28 樓，「但心情可能同今日唔同」，因今日要爭取在 3 小時內把東西收拾，而家人都不在香港居住，只能靠她把東西取出。她又說，「我希望我上去嗰程順利啲，唔好令到佢哋（其他家人）喺度等我。因為你要人齊先至計時間。」
談及現況，關指社工起初安排她住「啟航1331」，但稱「嗰度真係接受唔到」，因不可煮食，大部分設施亦要共享，曾從群組中見過有人放波鞋入洗衣機清洗，「點可以共享洗衣機，唔得囉真係」。後來她獲轉至筲箕灣的明華大廈，「設施齊晒，好過住啟航⋯⋯而家叫做可以接受到。層樓係舊啲，但裡面 OK。」
問起將來，關說「唉呀，揀樓嗰度真係好痛苦囉我覺得」，指政府現時開價 8,000 元一呎，「我都唔知買咩」，因本來有 500 多呎，兒子和媳婦回港尚叫有地方可住，但擔心屆時新居會不夠住。
關太下樓後表示，能拾回自己親手曬了幾十年的果皮，笑稱有特別記在清單，一定要帶走，另亦找回海參、兒子小時候的照片、公司在其入職 30 年時送贈的手錶。
她又懷疑，有人曾進入單位嘗試偷竊，指單位沒受大火波及，但屋裡的門全被爆開，客廳、睡房、廁所等多個櫃門亦被打開，慶幸屋內兩部 iPad 仍在，暫時未發現有東西失竊。
至於未來安置，關太指若宏建閣不重建，她不會回去單位居住，指雖然住了幾十年有感情、感可惜，但「我寧願重新開始一個新的生活」，形容是沒辦法，「否則我哋係零價值」，擔心即使可回去繼續居住，將來也沒人會買。
但她說，如政府可原區或原址重建，她一定選擇，因對這裡有感情。
