宏昌閣、宏仁閣災民周五（24 日）繼續分批上樓，經常受訪堅持徹查真相的葉家駒協助兒子到宏昌閣單位執拾，途經與亡妻居住的宏泰閣，感嘆景物面目全非。同樣經常受訪的 Phyllis 亦回到媽媽喪生的宏昌閣單位，離家前說「我哋走喇，一齊走喇」。
早前遇意外、腳有骨折的郭先生撐拐󠄆杖到場，他與 3 名朋友上樓，回到宏昌閣 7 樓，那裡是爸爸的故居。8 樓 Jasmine 的爸爸在大火中不幸離世，她找到爸爸一雙波鞋，帶走留念。
政府晚上公布，全日共 413 人上樓，進出大廈的平均時間為 2 小時 28 分鐘。
Day4｜宏昌謝小姐重回逃生現場 江祥發指不夠時間執拾
助兒子執拾宏昌單位
葉家駒：往返昌泰景物面目全非
「所有好多有印象嘅景物全部無晒，譬如好似個遊樂場啦，我哋所謂嘅中央公園啦，咁我記得喺宏盛、宏泰中間有幾棵樹，都無晒啦」。
葉家駒今天協助住在宏昌閣的細仔葉信霆上樓執拾，是他在火災失去妻子之後，首次踏足封鎖範圍。宏昌閣位於宏福苑東南一端，旁邊就是葉生與妻子居住的宏泰閣。「頭先我一路行過去宏昌嘅時候，我企喺宏泰嗰度，我係停咗一陣（哽咽）好難形容」。
葉生說，昔日「我哋無論出去買餸也好，出去搭車也好，係必經㗎呢條路，我哋基本上每一日，都喺呢條路來來回回」，但今日再在相同角度看，感覺已完全不同，「覺得好似呢度唔係我嘅地方，已經完全唔係印象裡面嗰個感覺」。
細仔與媳婦今日返回宏昌閣 6 樓的家，葉生與大仔亦一同幫忙，4 人一早分工，將單位分為幾區，最後搬走 30 幾袋物品，包括葉太送給媳婦的首飾，以及細仔收藏的模型，並將大部分物品運到迷你倉暫存。
葉信霆就說，回到家門時心情複雜，「同時間去搵我要搵嘅嘢，又要望好多嘢都無晒，同時處理幾個情緒，一路嘆氣一路執」，後來盡量不去想，把握時間執拾。他坦言，看到家裡的情況很難受，「兩口子花咗咁多心機、時間，呢個地方就係諗住係自己嘅居所，而家就變成咁樣一個廢墟」，有憤怒也有不快，「幾種情緒混雜埋一齊」。
大火至今近 5 個月，葉家駒不時到宏福苑外圍最接近宏泰閣的地方，獻花予亡妻，他又接受多間傳媒訪問，堅持要徹查真相，並以涉事方身分參與聽證會。
他與妻子居住的宏泰閣下周三才開始安排上樓，但他說，不想只上樓一次，「唔係純粹為咗執嘢，因為始終呢個地方係每一日我哋喺度生活，生活咗幾十年，裡面嘅每一個角落，我哋都好熟悉，如果你話突然間要我斷絕呢個關係，其實係好難接受」。
「所以到我返上我單位嘅時候，我會點，我呢刻我都唔敢講。」
葉家駒在火災後曾接受《法庭線》專訪，詳見報道。
宏昌Phyllis：媽咪，我哋返嚟喇一齊走
在大火中失去媽媽、曾在聽證會作供的宏昌閣 8 樓住戶羅曉琪 Phyllis ，周五亦上樓收拾。
她表示，上樓後曾好奇屋內的鋼琴「響唔響」，因此「彈咗一陣，都有影相留念」。她形容媽媽生前將屋企「執得好整齊」，故 3 小時的收拾足夠，又指大部分物品已熏黑，他們亦帶不走太多身外物，只帶走了一些媽媽準備將來傳給她的首飾，生前親手編織的衣物如頸巾、牛仔背心，當中後者「雖然熏黑同有味，但覺得攞咗落嚟先」。
Phyllis 又指，以往每天回家，媽媽都會對她說「返嚟喇？肚唔肚餓，整咩畀你食呀？」而她昨天有特意回來一趟宏福苑，「有一個咁樣嘅諗法，今次返嚟媽咪唔喺度，情緒激動啲」，但因昨天已有預演，「今日返嚟好冷靜」。
她說離開之前有為單位拍照，為母親送上一紮花，以及點起電子蠟燭。她哽咽稱，入屋時有說「媽咪，我哋返嚟喇。」離開則有說「我哋走喇，一齊走喇」。
她期望未來可再上單位，亦已向社工申請，「今日天又黑，唔係睇得好多。有機會上嚟，好想上嚟，始終生活咗三、四十年。」
Phyllis 今午登記上樓前指，看過相片認為單位情況尚可，應可取回部分物品。她希望取回媽媽的首飾、手錶，「繼續延續物件的生命，和我一齊繼續生活⋯⋯對她的懷念和紀念」。她準備了絲花和蠟燭，準備回家悼念媽媽，「話畀媽咪知，我返嚟啦」。Phyllis 形容，昨日在腦海中預演回家，心情激動，但經過呼吸練習後轉為平靜。
Phyllis 又質疑上樓安排混亂，「唔知點解我返屋企要咁困難」，「咁多人陪我上去，又唔畀我多啲屋企人上去，唔知個負重點樣計。」
關於 Phyllis 的故事，另見早前專訪。
七旬父母一同上樓
宏仁18樓陳生：係意志力
陳先生的父母在宏福苑落成時便買入宏仁閣 18 樓的單位，今天他與父母及哥哥，一家四口回到已燒至一片頹垣敗瓦的家，將近七旬的父母為了回家，氣喘吁吁爬上 18 層樓梯，「我覺得係呢個意志力，同埋有個心去上⋯⋯當然一定會喘氣啊等等啦，咁但係接受到嘅程度」。
他說家中情況已比預期好，「有一啲位置呢都仲有啲嘢可以殘存到、可以攞到」，取走了還能運作的夾萬，裡面裝着屋契、太爺和爺爺留下的金器、母親的嫁妝，睡房的油壓床更倖存，留下一家人珍重的相簿。
陳生與胞兄上落樓約 3 次，希望盡量拿走所有物品，他認為因為單位已「燒得七七八八」，3 小時收拾勉強足夠，但指若單位完好，3 小時則「絕對唔夠」。
今次可能是最後一次回到自己長大的家，陳生說，「其實就冇乜特別話點樣道別㗎啦 ，因為始終都要向前行㗎，即係已經過咗去，亦都知道冇辦法去⋯⋯去挽回返，咁都睇開啲囉」。
他亦覺得上樓安排「做得幾好、比我想像中好啦」，每層約有兩名警員，上樓後的人員不算太多，由登記到上樓程序順暢，惟他認為，處理登記的小學入面有太多關愛隊成員，「唔係話佢哋唔好，但係因為空間有限⋯⋯關愛隊嗰度有好大班人啦，咁其實真係做嘢嘅呢，就其實唔係好多」，指有不少關愛隊人員「行行企企」居多，佔用了居民擺放物品的位置。
他另建議政府可以提供安全眼鏡，指燒得較嚴重的單位空氣有物質飄浮，逗留時間長的話，眼睛感刺痛、乾澀。
宏仁18樓李先生：找回父親昔日「木銼」
在宏仁閣 18 樓居住的李氏一家，共有八兄弟姊妹。排第八的孻仔，今天與其中一位胞兄上樓收拾物品。他說收拾時沒太多情緒，「因為最主要真係一路諗梗要執啲乜嘢」。
孻仔說，這三個小時內，找到父親昔日用過的「木銼」，對他來說意義重大，「我老豆靠呢個，養大 4 個阿哥、 3 個家姐同埋我」。他又說希望找到出世紙，因母親生他的時候已屆 42 歲，「當年係高齡產婦⋯⋯75 年應該係高危」，笑稱自己是伊利沙伯醫院首兩、三代嬰兒，說起出世紙上的號碼仍然自豪。
他形容宏福苑是「福地」，實用面積大，自己住大單位，父親所有工具都藏在士多房。
他特別描述屋內環境，說父親是做「三行」、擅長泥水，屋內的地磚由父親親手鋪上，是 6 寸乘 6 寸的舊式磚，為他們建立一個家，還提起記得自己搬入宏福苑時 8 歲，「無記錯 1983 年 9 月 10 號搬入嚟」。
他說最後帶走了自己的色士風，以及收藏多年的足球世界雜誌，惟慨嘆「我成個人生喺度，咁其實我唔想拎走任何嘢，不過就都無辦法啦」、「成個成長人生就燒晒喇」。
有記者問他今天感受，他說「感受？感受係我唔想今日出現囉」，他又說已向社工申請再一次上樓，「自己屋企嚟㗎嘛，梗係想再上返去多一次啦。」
宏昌6樓羅小姐：燒到見到鋼筋
住在宏昌閣 6 樓的羅小姐下午與親友上樓，逗留約兩小時，拿着一個中型環保袋離開，她說單位「基本上你當燒咗個框架出嚟囉，見到鋼筋嘅」，只能帶走一些親人留下的瓷器留念，「基本上就係燒唔爛嘅嘢」。
羅接受訪問時聲音略微顫動，不過她說心情不太波動，「望咗（家中角落）其實都冇乜特別嘅，都係已經冇晒喇乜嘢都」，亦一早料家中情況很差，上樓僅「望多兩眼」。
宏仁18樓李先生：行樓梯特別特別辛苦 需分8次行
李先生兩兄弟住在宏仁 18 樓，今日回家收拾物品後表示，單位沒有任何損壞，他取回了屋契、金飾、衣物等，亦特意取回了門牌作紀念。他已要求社工安排日後再度上樓收拾。
李先生形容，要行樓梯上 18 樓是「特別特別辛苦」，需要分 8 次慢慢行上樓，中間停頓休息。他指社工安排良好，每兩層就有椅子可供休息。
對於重返家園，他感到有點陌生，「日曆定格咗……肯定唔開心啦」。
宏仁15樓廖生：單位嚴重焚毀 想攞返啲記憶
居住在宏仁閣 15 樓的廖生，稱從相片可見其單位嚴重焚毀，「餐枱、書櫃，咩都無晒」。他有很多東西想取回，但相信都化為灰燼，「想攞返啲記憶」。他已打定輸數，「預咗乜都攞唔到」，坦言有期望反而更失望。
廖生指自己由 25 歲開始在這裡居住，至今已經 43 年，對於上樓感到心情忐忑。他亦擔心有人「爆格」，貴重物品「都唔知仲喺唔喺度」。對於行樓梯會否辛苦，他指會每行 3 層稍作休息。
宏仁閣李小姐：有自己嘅回憶，想上去望一眼
李小姐的嫲嫲和二叔居住在宏仁閣17、18樓兩個單位。其中二叔的單位廚房受到火災波及，而嫲嫲單位情況應還好。今日她主力協助嫲嫲收拾。她亦特意幫二嬸準備了行山杖，以協助上樓。
李小姐指，即使不在此居住，過時過節、暑假都會回來，她一度哽咽，「當然希望可以留耐啲，因為真係喺到長大⋯⋯媽咪今日問點解嚟上樓呀、危險呀，我有我自己嘅回憶，我想上去望一眼」。她形容宏福苑是好好的屋苑，承載很多人的回憶。
她指災民逝世是不應該發生，「希望佢哋屋企人上樓可以好好道別、懷緬」。
爸爸火災中離世
宏昌8樓Jasmine取走波鞋紀念
Jasmine 的爸爸在火災不幸離世，她今天與胞妹回到爸爸居住的宏昌閣 8 樓單位，那裡亦是兩姊妹成長的舊居。Jasmine 說她兩歲時就住在那裡，直至婚後才遷出。她說單位已嚴重燒毀，幸有一個夾萬沒受損，裡面的物件亦齊全，「已經係我哋今日最最大嘅收獲」。
Jasmine 更找回一雙爸爸穿的球鞋，得以帶走留念，「冇諗過咁多嘢燒咗，留到對鞋囉，咁所以呢啲，值得留低嘅⋯⋯因為咁大型傢俬都係淨返啲彈簧，竟然對鞋咁完整，咁所以又係surprised 啦，點解對鞋咁完整」，指球鞋表面的污漬斑駁，相信爸爸生前經常穿着。
她說，上午原定只能進入爸爸放租的相鄰單位，最終獲安排一併進入舊居，事前沒料到故沒有準備悼念的花束，而鄰居有帶鮮花悼念爸爸，惟因不能留在屋內，Jasmine 最後只能把花帶走。
她說離家前向爸爸留下一句說話，「叫佢快啲走囉，驚佢仲 stay 喺度」。
眼見成長的舊居成廢墟，Jasmine 慨嘆「唏噓囉，冇諗到會喺一個咁 developed 嘅 city 會發生啲咁嘅事」。
宏昌6樓李生李太：新裝修後住咗4個月
全間屋變灰燼乜都無晒
李生與妻子、兒子住在宏昌閣 601 室，一家住在宏福苑 20 年，單位新裝修後住了約 4 個月就遇上大火。「全間屋變成灰燼，乜都無晒」，李生指單位嚴重損毁，他與妻子「掘足 3 個鐘，掘晒，盡掘」，最後只能找到少量金器，以及結婚時具紀念價值的物品，「燒唔爛就執返走，其他都無喇，乜都無」。
李太哽咽說，很多嫁妝、兒子的證書都已找不到，但不夠時間，「因為頭先 3 個鐘集中喺我個主人房，廳、仔仔間房都未摷」，她解釋，單位很黑，需一邊拿着電筒或大光燈，一邊挖掘，「逐啲逐啲，細微嘅金器係搵到，金耳環我係搵到嘅」，不過有很多雜物覆蓋着未完全燒爛的物品，移開需要一定時間。她指，如有機會會再上樓，「畀多幾個鐘我，我可以坐喺嗰度，慢慢，每一忽每一忽去掘」。
她續指，單位其實剛剛新裝修，「想整理下，將來畀呀仔仔可以再舒服啲有間房，我哋兩個去到老嗰時喺嗰度⋯⋯係囉」。她又指，若政府能提供照明會幫助到災民尋找物品。
宏仁15樓陳小姐：企喺門口已經忍唔住喊
陳小姐今日與父母及妹妹，一同上宏仁閣15樓收拾，指單位大部分完好，今次回家取回了父母年輕時的照片及貴重物品。她表示仍有一些東西太重，包括是父親的音響器材，未能即時取走，希望有機會再次上樓收拾。
對回家的心情複雜，「企喺門口已經忍唔住喊……都要快啲平衝心情去執嘢，因為時間有限」。她形容 3 小時收拾時限「一定不足夠」。
宏昌7樓郭先生：取回亡父煙灰盅紀念 係時候放低
80 後宏昌閣住戶郭先生，因兩、三個星期前遇意外，左腳腳趾骨粉碎性骨折，但他周五選擇撐著兩支拐杖，套上護腳助行鞋回家。他之後取回 12 袋物品下樓，自言上樓過程尚算 OK。
單位是郭先生父親的故居，郭父在大火前已離世。郭先生形容，走入家中的一刻，雖然單位無電，四處漆黑，但仍感到一種「返屋企嘅輕鬆」，家中損毀的情況不算嚴重，主要是廁所被燒毀。
走入單位時，他發現家中一個旋轉木馬時鐘仍然運作，「對住佢然後呆咗一陣」，最終決定取走。他亦取回了一些兒時玩的遊戲卡、LD、黑膠碟等，並在家中放下了一紮膠花作懷緬。
他對單位甚多回憶，因父親晚年時不便行走，大多時間都在客廳看電視。他今日帶走了父親以前常用的玻璃煙灰盅，「因為我由細到大佢（爸爸）都食煙，所以我就帶走，純粹紀念」。
他特別懷念廁所窗外的景色，因為小時往望窗外出去，就會看到爸爸駕車回家的一刻，但如今面目全非，「頭先望出去，迴旋處冇咗、垃圾站冇咗，變咗爛地咁樣，係感觸嘅。」
他最後在離開單位前，喊了一句「bye bye 啦 702」，取下已燒黑得門牌，「成個過程，都係一個道別嘅過程。接受了，這個地方我要離開，可能無得再見。」
「差唔多係時候放低。」
宏仁12樓朱先生：單位面目全非 政府收購呎價不合理
宏仁閣 12 樓住戶朱先生，表示要上 12 層樓梯不辛苦，又形容過程順利，「我乜都想拎啦梗係」，但單位燒至「面目全非」，無奈稱「成幢樓燒咗八分之一，我就係嗰八分之一 」，因此「無乜嘢執到」，亦不打算再上樓。
他期望政府「做得好啲」、「公平啲」，指「我哋宏福苑個地段咁靚，佢畀 8,000 蚊畀我哋唔合理囉，8,000 蚊一呎好唔合理囉」。
翻查資料，政府早前就收購大埔宏福苑 7 座樓宇業權提出方案，當中就未補地價的宏福苑單位業主，提出以實用面積每平方呎 8,000 元作為收購價。
【圖輯】宏福苑居民持鮮花上樓 頭燈黑暗中閃爍
宏仁12樓謝先生：間屋燒咗，係咪咁決絕可斷捨離？
與家人同住宏仁閣 12 樓的謝先生，今與朋友上樓，希望取回家中大部分物品，「好多都想帶走喎」，惟也沒辦法拿走所有東西，「咁我哋都冇得揀，你只能夠喺佢個選擇裡面再作選擇」。
被問到對副政務司司長卓永興的「斷捨離」論有何看法，謝反問「咁你要問返講斷捨離同埋叫人道別嗰個人啦，如果佢間屋燒咗，佢係咪咁決絕可以斷捨離同埋道別呢？」
謝生在大埔區生活 8 年，火災以來妻兒住在娘家，自己則在大埔的共享空間居住，因兒子在廣福邨上學、自己亦在大埔區上班，「搬去外區我諗係冇乜可能」。
宏仁中層胡小姐：盼可申請再與家人回家道別 「可以彈下琴去回憶」
住宏仁閣中層的胡小姐，這天背著大背包、帶備乾糧、配帶腰封及護腕，準備回家收拾。她說自己心情緊張，「好激動，今朝頭痛，唔知到時情況點樣，執唔執得切、可唔可以同間屋道別⋯⋯」
她說，最希望尋回舊相簿、相機，還有兒時珍藏的物品，「未必係好貴，但好珍貴」。她事前特意練習上落樓梯，「你都見我唔係好大隻」，希望今天可與朋友多走幾轉，盡量帶走家中物品。
她又表示，今日上樓之後，仍希望可再申請與父母一同回家，度過最後時光。「有一次可能係我哋一家人一齊喺間屋道別，真係可以慢慢，唔駛執嘢，（哽咽）可以舒舒服服喺間屋裡面享受⋯⋯最尾呢個鐘頭可以彈下琴，因為我個琴攞唔到落嚟，去回憶返咁多年嘅回憶。」
宏昌8樓陳婆婆帶鮮花悼念鄰居：隔離左右上天堂
陳婆婆住在宏昌閣 8 樓，入伙居住已有 40 多年。擔心上樓時「唔夠氣」，但知道會有人攙扶上樓。她指沒收到「一戶一社工」提供的照片，希望回家取回貴重物品，及有紀念價值的東西，「有啲公仔好想攞返」。
陳婆婆又指，覺得很忐忑不安 ，「隔離左右上咗天堂」，已帶了鮮花悼念鄰居。
宏昌7樓郭先生撐拐杖上樓 指單位盛載亡父回憶
80 後宏昌閣住戶郭先生，兩、三個星期前遇意外，左腳腳趾骨粉碎性骨折，骨頭斷開三節，但他周五選擇撐著兩支拐杖，套上護腳助行鞋回家，「我唔想我錯過，我唯一一次上返去嘅機會，所以我就想上去」。
他所住的宏昌閣，是最先起火的大廈，亦是死傷最嚴重的樓宇之一。郭先生說他以前住在 7 樓，沒收到「一戶一社工」提供的照片，故預料單位情況尚可，「唯有覺得應該無問題，抱住最大嘅希望上去」。他又說，意外後未曾試過走 7 層樓梯，會有朋友攙扶，亦帶備摺櫈隨時休息。
郭又說，在宏福苑斷續地住過 20 至 30 年，要與舊居告別，他最想取回家中用了多年的水樽。兒時與街坊小朋友一起玩耍，而單位盛載他與父親的回憶，「好多佢嘅記憶喺入面。可能日常用嘅嘢，即係佢去（世）之後，我都無特別揼。屋企有佢嘅感覺。」
而他對單位最多回憶的地方是客廳，因現已去世的父親，在晚年時不便行走，「好多時喺個廳度坐、睇電視」。因父親去世，大火之前他原本計劃裝修單位而與妻子、兒子搬回宏福苑，沒料期間發生大火。
居民冒雨回家
今日現場冒雨，早上居民陸續撐傘到場，準備上樓。
