宏福苑周四（23 日）開放第二及第三幢樓宇予居民上樓收拾，包括最先起火、81 人死亡及 33 人受傷的宏昌閣，另一幢為一人受傷的宏仁閣。災民開始抵達廣福社區會堂登記。政務司副司長卓永興早上指，宏昌有死亡個案的單位，每戶會派各一名臨床心理學家、社工陪同，隨行警員會增至兩人。
在聽證會上作供、自責未提鄰居逃生的謝小姐重回現場，她向記者講述面對 PTSD 的情況，稱「我要去面對返呢樣嘢，咁我先可以喺我人生裡面有一個 ending，即係我覺得呢樣嘢係我唔想逃避咗佢」。前管委會成員江祥發則指，不夠時間執拾，「我唔係考試呀嘛，我返屋企你都限我 3 個鐘頭」。
據現場警方傳媒聯絡隊提供的數字，截至下午約 5 時半，宏仁閣約有 290 人上樓；宏昌閣則有逾 130 人上樓。政府晚上公布，共 424 人上樓。
Day3｜Ada：寫信同屋企講再見 麥生：4個人幾個袋，執得幾多嘢？
宏仁一樓鍾小姐：詩歌琴譜竟然冇燒盡
好似同返自己而家呢個處境講嘢咁
「冇諗過會有紙係冇燒盡，因為好多文件同書都變晒炭」。
居於宏仁閣一樓的鍾小姐指，她的單位「應該叫做全部都燒哂，連房埲牆都冇埋」，上樓前只望「有咩拎到就拎」，而最終她亦沒取回很多東西，但發現她的琴譜「竟然冇燒盡」，「仲見到一首詩歌嘅歌詞」。
鍾憶述，那份琴譜她平時放在電子琴上，過往需幫忙彈琴時才會用上，而琴譜的詩歌是以前的一份神學功課。她說，當時香港正處於「很多變遷動盪」，那份功課是以香港信徒為對象，藉詩歌敬拜鼓勵人要有信心跨過目前的困難。
「其實我都唔記得咗有佢（詩歌歌詞）喺度，但今日見到（覺得）好感動，因為內容好似同返自己而家呢個處境講嘢咁，喺大海翻騰、風暴入面，係依然有盼望同安穩嘅，知道我唔係自己一個人面對」。
鍾住在宏福苑 10 多年，她指今天離家前，在她最多回憶珍藏的位置放了一封信作告別。記者問她有何說話向她的家說，她引述信中一句回應，「重建一個人、一種生活唔知要幾耐，但因為喺呢度經歷過，我知可以的」。
相輯：宏昌宏仁首天逾400人上樓
有人撐助行器上樓
攝：Nasha Chan、COY
首批宏昌、宏仁閣的災民周四（23 日）終於可回家執拾，多人帶備紙箱、行李箱及大袋，但不少人由於單位未受波及，表示不夠時間，只能帶走少數物品。數人坐輪椅、使用助行器，由親友及在場人員協助上樓。
現場觀察，不少人搬走家電，例如抽濕機及大型風扇、電腦螢幕等，亦有人用膠箱帶走衣物。大埔傍晚下了一場大雨，災民穿起雨衣，用手推車搬物，略顯狼狽。據現場警方傳媒聯絡隊提供的數字，截至下午約 5 時半，宏仁閣約有 290 人上樓；宏昌閣則有逾 130 人上樓。
相輯：災民傍晚冒雨帶物品離開
宏仁3樓周小姐：不敢為單位拍照
「寧願宜家拜拜咗，我就唔留念幅相、唔睇喇」
宏仁閣 3 樓住戶周小姐傍晚落樓，披着雨衣離開。她表示，與丈夫婚後在宏福苑置業，住了 20 多年，哽咽稱「同先生結婚諗住喺度告老，無諗過今日就無咗個家」。
她指上樓後，有社工提她為單位拍照，「但係我唔敢影，我驚影咗我之後日後睇返，對我嚟講仲傷痛。寧願宜家拜拜咗，我就唔留念幅相、唔睇喇」，因此最後與家園的道別，是留下一句「同屋企講拜拜囉」。
周小姐說，上樓後見到自己的單位沒受大火波及，「有得攞都攞晒，都係我哋啲家當」，舉例包括油畫、結婚照、證書、樓契，以及回憶物品如紙、公仔，總共帶走 20 袋物資，因此載滿貨車，她要改搭的士。
但她說還有物品想取回，已向「一戶一社工」申請再次上樓。被問及想取回怎麼，她哽咽道「全部嘢都想攞。全部嘢都係我自己，好辛苦咁買返嚟、建立個屋企，而家就無晒喇⋯⋯」
她續哽咽稱，「由知道可以返屋企之後，無日放心過，都係好緊張，而家真係晚晚瞓唔到。返到嚟其實開心，但係亦都好傷心。因為攞到嘅攞到，明明屋企無事無燒到，但係都係要無咗屋企」。她透露自己正尋求臨床心理學家協助，亦為鄰居單位燒得「好犀利」感嘆。
宏昌3樓姚生：兩兔子喪命
單位損毀好嚴重
宏昌閣 306 室住戶姚先生表示，已在宏福苑居住三、四十年，家中長輩在大火之前已過身，剩下他和胞妹繼續居住。大火發生時，兩人正外出上班，「人就無乜事」，惟單位「燒晒，損毀好嚴重⋯⋯都燒到好爛，溶溶爛爛咁樣⋯⋯啲嘢好多都炭化晒，執唔到啲咩」，舉例稱「所有嘢，廳呀、房呀，所有嘢已經燒毀晒，漆黑一片」。
姚續說，胞妹的兩隻兔子都在大火中喪命，家中亦有母親的神主牌，而兩人今次上樓收拾，「走時有同佢講聲」。
姚說，「好在」大火前家中正裝修，租用了樓下作儲物室，「無燒到，跟住可以 pick up 返好多嘢」，但「住咗咁耐，見到間屋冧咗，心情唔係咁好」。
宏仁10樓余小姐：我屋企好靚㗎
我會嘗試忘記佢
傍晚時分宏福苑下起滂沱大雨，剛落樓離開的宏仁閣 10 樓余小姐，穿着藍色雨衣，受訪時說得淚流滿臉：「想留低我屋企囉，想留低我以前嘅生活，但係我知道無可能。」
余小姐指單位幾乎沒受火災波及，但由於現時儲物空間有限，她只能取走單位中約一半的物品。她反複說「我屋企無燒到，我屋企好靚㗎」，又向記者展示手機裡的舊照，但指即使帶得走物件，也留不住回憶，「梗係攞唔晒啦，生活嘅回憶、記憶喺度㗎嘛，抺唔去㗎」。
她說有掙扎過今天是否上樓，因為一回到家，本已平復的心情又再次波動，她一邊嗚咽一邊說着：「我唔捨得離開我屋企，我唔捨得離開呢度，真係無辦法，係無得返轉頭喇，我會嘗試忘記佢囉，但係我唔知道要用幾多時間先至做到。」
宏昌一樓周婆婆：財物化灰
只帶走英女皇硬幣留給孫兒
宏昌閣一樓的周婆婆指，單位大部分財物已「燒到變晒灰」，最後只帶走一直為兒子、孫兒儲起的「大銀」，包括英女皇頭像硬幣，「乜都無，都唔再去摷，啲金都唔會摷，成堆灰，都唔會執。你接受呢個係咁樣就好囉，一早有心理準備乜都無」。
她又說，「之前我都係好唔開心，咁而家接受咗，OK 囉⋯⋯已經喊咗一輪」，今天見到鄰居特別高興，「講唔到嗰種感覺，係好開心囉。雖然之前情緒唔好，之後見到啲鄰居，即係仲在生，一句講晒，開心。」
周婆婆所住的單位，與疑似最先起火的光井平台非常接近，她提到「住一樓係睇到好多垃圾，因為以前佢有人喺嗰個閘度倒垃圾，而家就無喇。30 幾樓嗰啲發泡膠係咁揼晒落平台。佢係掃過一次垃圾，揼晒平台之後根本無人掃」。
她續說，「起火嗰陣時聞到𤓓味」，街坊均「以為拜神」，又說「我係 3 點零幾分第一批走嗰批，落到嚟 4 架消防車但未有水，個個都未諗到係火燭」。
宏仁4樓住戶：
隔離燒咗，我哋無燒到
宏仁閣 4 樓住戶、不願透露姓名的男士表示，上樓之前希望單位沒被火災波及，最後也確實沒燒過，「但諗唔到隔離都燒咗，諗唔到。諗住剩係上面燒，下面低層無燒，諗唔到低層都有燒到，呢個係最大意外」、「自己間屋算好彩，一牆之隔，隔離燒咗，我哋無燒到。」
他說心情沉重，有分兩轉帶走一些物品，但無意再回去一次，「唔上喇，（啲嘢）搬唔走，無意思⋯⋯」
有災民坐輪椅前往宏昌閣
扶拐仗、步行架上樓
上、下午都分別有坐輪椅的居民登記上樓。他們由親友推至大廈入口對出的有蓋通道，再扶着拐杖或步行架，在同行人士攙扶下一步一步行上樓。
宏昌4樓黎生黎太：望能見鄰居
「知道安好咁呀好囉」
宏昌閣 4 樓住戶黎生黎太，在 7 至 8 年前結婚，然後搬入宏福苑，大火發生時兩人正在外上班、逃過一劫。他們今天上樓亦期待見到鄰居，指一開始火燭時有見過大家，後來有 WhatsApp 群組聯絡，「希望（今天）見到下呀，知道安好咁呀好囉」。
至於自己單位，他們說情況尚可、不算嚴重，指「燒嘅痕跡唔多」，仍見到傢俬、家電，已預備包裝膠紙，希望把大型物品取走，亦想取回貴重物品、照片、證書、結婚照等，另黎生特別想取走飛機、火車模型，早前見到有街坊「渣古」模型猶在，自己也希望能取回模型。
宏昌低層住戶周生：單位燒通晒
慶幸嘅就係個人在
宏昌閣低層住戶周先生，在落樓後乘搭穿梭巴士到大埔墟站離開。他說一家有 4 人上樓，「單位燒得比較嚴重啲，全部通晒㗎喇」，他有想找的東西，「但係都無得講，都變晒灰」，只燒剩一些「細路仔啲回憶」，只能以平常心應對。
事隔幾個月重回家園，他說大火「唔發生都發生咗⋯⋯即係都過咗一段咁長時間⋯⋯變咗個人都要自己放返開囉，無辦法」、「慶幸嘅就係個人在 ，人 OK 嘅，咁就乜嘢都唔緊要」。
宏仁8樓郭女士：好多人都話我哋好貪心
其實我哋係乜都冇晒
住在宏仁閣 8 樓的郭女士是最早入伙宏福苑的一批居民。她指火災燒掉半間屋，情況惡劣，只能「見到有咩就攞咩」，希望尋回貴重物品、相簿等。
郭指，火災至今心情尚未平復，「但係希望啲人唔好成日話我哋貪心⋯⋯好多人都話我哋好貪心，又要求好多嘢，其實我哋係乜都冇晒」。
郭希望屋苑法團管理人「合安」召開業主大會，「俾我哋商量下之後點，希望有一個好方案比我哋⋯⋯有啲宏福苑管理費、盈餘畀返我哋，大維修剩返嘅錢，會唔會畀返我哋」。
宏昌80歲林婆婆：
外出飲茶逃過一劫 盼尋回先人遺照
80 多歲的林婆婆住在宏昌閣低層單位，起火時與家人外出飲茶，「飲完茶就落嚟，見住佢燒，好唔好彩呀，而家⋯⋯無家可歸」。她說現時獲分派在香港仔的住所，這天由親友陪同上樓，幸居於低層單位，尚可行樓梯上落。
林婆婆一度哽咽，稱家中有先人的照片，但不知還能否取回，「一講起就心酸呀，因為有啲先人嗰啲遺照，希望攞到啦，希望攞返啦。」
到宏仁低層單位取物 區生：全部都係廢墟咁
區先生今到宏仁閣一樓親戚家中，取回存放的物品，他與家人帶走了數輛單車及頭盔等，近 11 時離開宏福苑。他指，曾上落兩次執拾，第一轉的物品可以先暫托，然後再上樓，而兩次上落及暫托物品都要跟警員登記。
區生續指，親戚家的大門也被燒毀、玄關位置較嚴重，但客廳位置情況還好。他提及行經走廊時，因其他單位都已沒大門 ，可見內部「真係燒得比較⋯⋯好多都爛晒」，傢俬已見不到，「全部都係廢墟咁，冇話有完整嘅嘢喺度」。他亦是宏仁閣住戶，住在中高層，要稍後才能上樓。
宏仁6樓江祥發：執拾時間不足
「我唔係考試呀嘛，我返屋企你都限我3個鐘頭」
居於宏仁閣 6 樓、任期橫跨新舊法團的管委會委員江祥發，與妻兒上樓執拾物品。他說單位沒有被燒，但或受隔離單位高溫影響，入牆的櫃跌出，屋內亦頗凌亂，但指「我比隔離嗰個已經好好多倍，隔離嗰個燒通咗，係我鄰居嚟」。
江又指，不滿只有 3 小時收拾，「即係其實好大壓力，我唔係考試呀嘛，我返屋企你都限我 3 個鐘頭，我諗住瞓返 3 個鐘頭先至落嚟，可唔可以呢真係？即係好大壓力囉，限時限住我，唔知執咩好，入去又唔了解個情況，即係塔晒落嚟，屋又亂晒」。
江說最終收拾到 10 袋物品，不過是提早下來、用不完 3 小時，解釋稱「無心機，因為點解呀，嗰個心情都唔好啦，執，又諗邊啲要、邊啲唔要，思考下，我哋再執」，指主要帶走一些文件，例如畢業證書，另亦有些衣物，而目前只能帶走一成物品，「住咗 30 幾年⋯⋯好多嘢都係要⋯⋯斷捨離」。
他特別提及執拾時見暈，「環境啦，氣氛啦，好焗啦，又要戴頭盔、full gear，頂唔順」。他建議政府維修升降機，就算不能載人，至少可載物，令居民不辛苦。但他稱感謝在場人員協助抬物品。
至於他一家飼養的小狗，江祥發說牠雖然在火場中獲救，但「吸入過量濃煙，救咗出嚟⋯⋯就擺咗個氧氣箱度。咁就扯下扯下，吸得太多濃煙同肺炎，佢都即晚都走咗，我個仔都好傷心」，他們回家見到小狗用過的狗糧、食物兜，也有帶走部分作留念。
有記者問及今次災難對他或香港人而言是怎樣的經歷，江祥發說「經歷？慘劇囉。因為聽證會聽到咁多。唉，個個都話唔關佢事，就關我哋事。真係，好無奈呀。要做嘅嘢做晒喇，可以做啲乜嘢呢？通報又通報晒相關部門，又話唔關佢事，都唔知關邊個事。」
他說最大期望是政府可召開業主大會，稱居民的要求很卑微，「唔係搞事，係想雙向溝通」，哽咽稱，「我哋做問卷嗰陣時，（政府）話呢個唔係你意向，（方案）出嚟又唔同咗，覺得我哋好似被遺棄咁」。
被問及有否與單位道別，他苦笑稱「道別？我都唔知點樣道別，最好整返畀我啦。我唔想道別。」至於會否再回來，他答「一定，一定再返嚟」。
宏仁9樓李生：逃生後瞓咗個幾月醫院
災後奔波「我真係好攰」
早於 1993 年入伙的李先生住在宏仁閣 9 樓，他在宏新閣居民上樓首天亦曾到場，了解安排及視察環境，而今天則戴上口罩，帶備電筒、鏟等工具，準備回自己的家收拾。
被問及單位情況時，李生稱「冇呀，變晒灰呀已經，層樓啲組合櫃、吊櫃，全部都冧晒，廚房啲不鏽鋼鋅盤都燒到熔埋，你話嗰場火幾恐怖，我啲鐵床、不鏽鋼床呢，床架都熔埋⋯⋯窗花當然已經冇晒」。他指稍後將與單位道別，「睇吓搵唔搵到啲嘢」，冀能取回金條、現金等。
李憶述，火災當日成功逃生，「我一返落嚟，喺門口已經騾低咗，心臟病發，我瞓咗個幾月醫院」。他稱，已等候回家之日良久，「我唔知道佢點解安排，推遲咗咁多個月」，但稱「我唔夠膽面對入去，我唔知自己上唔上到樓，我而家有種好恐懼⋯⋯呢條路返去好遠」。
火災後，李生四處奔波，「我呢幾個月每一日就係起身就睇吓去邊度、有咩援助，跟住去補領返乜嘢證件、乜嘢證件，跟住返到屋企就睇 WhatsApp，睇嗰啲資訊，plan 定聽日要去邊，我有 5 個月未去酒樓飲過茶，照計我啲退休生活可以朝頭早去行吓山呀，晨運呀，（而家）完全俾『宏福苑』呢 3 個字蓋掩晒，我真係好攰」，更兩度反問記者「有啲乜嘢可以幫到我」。
對於政府的安排，李批評「一塌糊塗，不敢恭維」，「即係由開始發生呢個火警到而家，我唔講話佢政府部門有啲乜嘢疏忽，就算佢嗰個善後你哋有眼見，佢哋做得好咩？講一套做一套」。
宏仁4樓張生：單位新裝修沒受波及
盼能再上樓執拾
宏仁閣 4 樓住戶張生表示，他已在此居住 40 幾年，「由細到大喺度住」，在大火之前才裝修不久，據知其單位沒被波及，也沒收到社工相片，「應該都有啲嘢可以攞返」，打算看看一些家電、電視可否取回，「因為全新」，但大型傢俬應未必能處理。另希望取回貴重物品、相簿等。
他表示對此感到心痛，但指「咁多個災民經歷緊呢件事，我會務實啲去處理咗呢件事先囉，跟住一步一步嚟囉」，他亦希望政府未來可以安排讓居民再次上去收拾物品。
被問及如是最後一次回家，會如何道別單位，他說「講聲『多謝晒囉，拜拜』」，解釋稱「因為喺度大，即係好有感情，當然係好唔捨得，感覺好似無咗個親人咁，乜都好，要睇住老人家，settle 啲嘢，務實啲處理件事。」
另有記者問及家中有哪些角落特別想「睇多兩眼」，他答「基本上成個屋企都想睇多兩眼，唔係剩係角落。」
宏昌低層住戶周先生：家人幸運逃生
將來難再住上下層
周先生自出生已住在宏昌閣，後來父母再購入另一個低層單位，供周與兩名兄弟姊妹居住，火災時周與兄弟姊妹不在家中，父母則幸運逃生。
他說透過社工只收到家門口的照片，不知道裡面情況，但見門口一片熏黑，估計「應該都好差㗎喇」。他帶同一個大行李箱、手推車上樓，「死都要托上去㗎喇」，希望可取走畢業證書、家庭照等留念，「都拎唔到啲咩，都係啲細件嘢」。
他亦打算拍照留念，「你始終有感情嘅⋯⋯上去同屋企 say 個 bye 囉，懷緬下」，並稱已有心理準備與家道別，「都應該 OK 嘅個心情」。
他與家人是 1989 年首批抽樓的宏福苑居民，如今父親失去兩個單位，「實會有啲失落，實會有啲擔憂，你兩間屋都燒晒喎」，亦料將來會與父母在不同屋苑居住，不再像以前一樣住上下層。
被問到是否滿意政府的安置方案，周稱過程中「我覺得佢哋（政府）同居民嘅溝通唔夠，得佢講冇我哋講」，依賴一份「冇話講得好深入」的問卷結果，「淨係話大家傾吓意向嘅啫，唔會攞嚟做啲咩嘅，你哋填咗先啦」，亦沒詳細列出收購呎價，「但而家佢好似攞份問卷嚟做個基準，就話你哋就係咁樣㗎啦」。
他與家人尚未決定接受收購抑或「樓換樓」方案，雖然可向「一戶一社工」表達意見，「但之後社工有冇同政府溝通？我唔知呀，係咪先？」
宏仁8樓李太：因名額有限未能親身上樓
「 他們每一個都不應該死」
住在宏仁閣 8 樓的李太表示，因名額有限，會由家中老人家及其丈夫上樓。她指單位應沒被燒毀得太嚴重，長輩長居於此，對單位非常掛心，「年長嘅人其實好掛心。我哋掛心囉，但係佢哋仲掛心。我哋⋯⋯開放啲，自己都覺得放低啦，但老人家好多時都比較困難⋯⋯佢哋就好掛住囉」。
被問及今次未能親自上去，她說「無辦法啦，希望仲有下一次」，又指已交代家人代為拍照，尤其拍攝家中間隔。她則自行到廣祐樓眺望單位。
李太其後發訊息回覆記者：
大家辛苦了！ 抱歉，這麼遲才回覆大家！先告訴大家，我們的家倖存，家中一切完好。因為丈夫和老人家忙著收拾，暫時我沒收到相片。
我們的家雖然倖存，但已不准我們住了，心中難過，心仍然沉重，很難很難過，因為這麼多的生命無辜死去，他們每一個都不應該死的；這麽多這麽多的家庭被毀，還留下很多傷痛，或許此生永留在心。大家心中有數，這場火災，不是天災，人出生本有良知，明辨是非對錯，誰有參與了或沒有阻止這場災禍的，心知肚明，當生命到最後終結時，每人都要自行負責。讓每人都記取這次沉重的教訓，是用生命和血，及無數家庭的幸福得（到）的教訓，祈盼每人都盡己力，避免參與人禍。
她又在另一訊息稱「心情複雜」：
原本美好努力建構的家，可以突然消失，並不能再回去。誰的錯？是可以避免的！在發夢嗎？甚麼是生命最重要的？
憤怒，傷痛，珍惜，放下，再上路，前面仍充滿盼望，因為死亡不是終結，將來天家再聚，世界仍有很多美麗的事和人，不要被困。
與住宏仁爸爸上樓 劉生：樓契要攞返先
劉先生今早陪同住在宏仁閣低層的爸爸上樓，胞妹亦同行。他稱首先會看看有沒有物品不翼而飛，然後會尋找重要文件、照片等，「最複雜嘅就係樓契，係呀，樓契要攞返先囉」，又稱之前未收到單位情況的相片，今天帶了紙箱備用。
劉先生自己則住在宏昌閣，獲安排星期日上樓。他指逃生時右腿 7.5% 燒傷，康復進度還可以，「香港醫療唔錯，但始終經歷痛楚」，對於上樓時需重新面對經歷，他稱「交畀主囉」。同行的劉父則高聲說「記得係邊個要負責任」。
宏昌204謝小姐：自責未能提鄰居逃生
災後努力面對PTSD
曾經在聽證會作供、住在宏昌閣 204 室的謝小姐及陳先生，早上在大埔墟站附近接受《法庭線》訪問。謝小姐作證時提及，因未能提醒鄰居逃生而自責，她今天向記者道出，原來在災後面對創傷後壓力症（PTSD）。
「其實自己本身都唔知道有事嘅，係去到 12 月尾嘅時候，就開始察覺到身體有啲異常嘅反應，包括手震、心跳，同埋喺新住嘅地方又再一次走火警，之後就好明顯覺得自己，點解有時候有啲身體嘅反應，好似唔尋常地出現」，她說之後覺不妥，經轉介接受評估，確定患上 PTSD，「應該係因為，可能突發性呢啲遇到，變咗就有焦慮同埋抑鬱喺度」。
謝小姐續說，「我啲情感、情緒是發自喺，可能當其時我真係無辦法叫到我啲鄰居（逃生），呢個應該係我最，一路以嚟我覺得最（在意）嗰個位，開頭會個自責感好強，而家我講無呢就呃你嘅，但係我會識得去釋懷，因為我知道無辦法，因為可以做嘅嘢真係唔多」。
「有啲嘢係你想做都做唔到，因為當其時個 moment 係，你根本有好多事你想做都做唔到」。
她說，這段時間很努力、慢慢面對，「我覺得呢個係每個人如果有同理心，都必然會有呢個難關嘅時間，而家嘅情況係好很多喇已經」，而今天決定到來是希望能了結，「我要去面對返呢樣嘢，咁我先可以喺我人生裡面有一個 ending，即係我覺得呢樣嘢係我唔想逃避咗佢」。
她提及對於是否上樓心情複雜，「其實呢段時間我都有經常返嚟，甚至乎特登攞望遠鏡返嚟，同我老公返嚟睇我哋間屋裡面會唔會仲有啲乜嘢喺度」，而憶起大火當天，「啲鄰居咁樣走咗，我覺得心情是忐忑嘅」，坦言亦擔心回到家的情緒變化。
她不忘提醒其他居民如有類似情況要及時求助，「如果真係有呢，真係要去睇（求助），有時係自己以為唔為意，可能你見到屋苑某啲嘢都會令到你喊，令到你可能好不開心，其實我可能都會有呢啲 signal 喺度」。
丈夫陳先生指體會世事無常
丈夫陳先生則指對生命無常有很深感受，「因為我早幾年呢都一直喺度了解緊，即係呢個世界，我而家生活嘅世界，我見到呢個世界咁常變，咁無常，其實我嗰陣時已經係令到自己好明白到，隨時我而家擁有嘅嘢呢，無端端會無晒㗎」。
「即係，最少我有一日會死。同埋我唔知自己幾時死吖嘛，係咪先？咁即係叫做再印證咗我個信念，即係原來我間屋，我返工，嗰日就返唔到屋企嗰囉喎」。
他說等了幾個月，昨日亦難入睡，「就係有一種莫名嘅緊張」，不過「唔敢期望，你說想攞嘢，當然攞得越多越好，始終自己嘢，但是係你期望越高，你嘅失望越大，咁就盡量唔好期望。」
兩人落樓後再受訪
謝小姐：難想像鄰居在單位內等待
兩人落樓後接受傳媒訪問，謝小姐稱「其實頭先行返上去感覺好大，因為當日落嚟嘅位置全部都黑晒，見到其他鄰居啲屋入面全部燒得好犀利」，指看到很多塑膠物品溶掉，「可想而知個火嘅威力係幾咁大」，稱「我真係好難想像到，啲鄰居喺單位裡面等待嗰個時間」。
她又憶述，事發時完全不知火勢，「我自己落去係完全唔知道咁大火，我仲以為自己可以落去睇下咩事，先再上返去通知鄰居，但原來個火係咁大，同埋當其時係無火鐘響，好多人係唔知道」。
對於重回現場，她指「一定唔係好受，不過無辦法㗎嘛，係咪先？我只可以同鄰居道別，亦都係好想返上去其中一個原因」，又哽咽稱「我嘗試去控制我嘅情緒，因為我知事件已經發生咗，但係我哋都要努力去行呢條路」。
陳生則形容，單位內「燒到七七八八，主人房爆晒玻璃，床褥都燒咗大概三分一」，兩人取回珠寶、首飾、現金等少量財物，以及結婚相，也能取回兩隻貓 Billy 和Charlie 的骨灰，指養了兩貓十幾年，是他們的家人。
宏仁低層住戶林女士：找到媽媽的陳皮
但無法帶走爺爺木櫳酸枝櫈
住在宏仁閣低層的林女士帶着行李箱，今早約 8 時 35 分抵達大埔墟站乘搭免費接駁巴士。
她稱，其單位沒被火災波及，故沒收到「一戶一社工」發送的相片，指「好多嘢想拎」，包括媽媽「曬咗幾廿年」的陳皮、保險箱鎖匙及保單，又指「梗係想上第二次，咁多嘢搬唔晒」。
林女士落樓後受訪指，家裡「一屋灰」，廚房及客廳的窗戶亦破爛，但成功尋回媽媽的陳皮，亦找到一些有紀念價值的相片。
她說與 3 名親友回家收拾，其中一人曾上落兩次，餘下 3 人僅上樓一次，在場的民安隊亦有提供協助，「有啲喼拎唔郁，都有人幫我哋拎」。不過林女士最後無法取走爺爺留下、有逾百年歷史的木櫳、數張酸枝櫈，還有一些書本，盼能再次上樓，「未上去已經講話（上樓）一次唔夠，上多幾轉都唔夠」。
林女士其後向記者發送，今天在單位中拍攝的木櫳及酸枝櫈照片。
她指，媽媽生前用大洗衣膠袋密封該木櫳，直至今天剪開膠袋，才發現裡面裝着媽媽以往出席飲宴的衣服及布疋。她又憶述 10 多年前曾和媽媽用手推車，將該木櫳推去找人重新上漆。林女士說，由於有太多東西需取走，且也用不上，她沒有拿走那些衣服和布疋。
至於酸枝櫈，相片顯示其中兩張被雜物堆疊着。她同樣表示今天沒辦法取走，並指礙於酸枝櫈太重，即使能再次上樓，亦未必能全部拿走。
記者問會否對這些物品感到不捨，林表示，「也要斷捨離，現實如此，唯有接受啦」，又指「我們死後甚麼也帶不走的⋯⋯萬般帶不走，唯有業隨身」。
宏仁低層住戶陳小姐：尚有一貓未尋回
「如果屋企見到佢，都係過咗身」
宏仁閣低層住戶陳小姐，表示自己在單位內養了 8 隻貓，有 7 隻在災後找得到、目前平安，但尚有一隻約 6 歲的貓貓「細佬仔」未找到。
陳說，她的單位未有被燒，但家門因救火而被打開，故不知「細佬仔」是「走咗出去定喺單位入面」。而「細佬仔」本身是流浪貓，除有貓愛滋外沒其他病痛，「流浪年幾先入我哋屋企，都唔希望佢再變流浪貓」，但亦哽咽稱「望都望佢走咗出宏福苑、做返流浪貓，咩都好，唔希望喺屋企⋯⋯如果屋企見到佢，都係過咗身⋯⋯」
被問及另外 7 隻貓獲救時情況，陳說大火後 3 日內，貓貓是「兩隻、兩隻咁搵返」，另有兩隻分別是聖誕節和元旦日找到，但在不是自己單位的樓層找到。
她說，大火後有託能上宏仁閣的人幫忙在單位內擺放糧食、水，「唔會餓死先，倒晒啲糧喺屋企度。照計如果出嚟食嘢，一個月內未必餓死」，隨後愛協再上其單位，安裝寵物籠和鏡頭，繼而再在聖誕節和元旦日找到，料是「太肚餓而俾愛協執到」。
被問及上樓前的心情，她哽咽稱「有得返去執返有用嘅嘢係開心，但始終會驚返到單位會見到隻貓」。
卓永興：宏昌遺屬會有臨床心理學家、社工陪上樓
政務司副司長卓永興早上約 8 時半在宏福苑現場見記者，指由於宏昌閣焚毀情況嚴重，居民需要更多情緒、心理支援，故每天只會開放 5 個樓層的單位，預計需要 6 天才可安排所有住戶上樓。受災情況一樣的宏泰閣，稍後亦會沿用相同做法。
卓續說，宏昌閣、宏泰閣會每戶由一名警員陪同上落樓，而針對有死亡個案的單位，每戶亦會派各一名臨床心理學家、社工陪同，隨行警員會增至兩人。
卓又提到，原先有 400 多名居民向「一戶一社工」表示有意上樓執拾物品，最新數據增至約 600 人。被問及有住戶收拾物品時被提醒離開的做法是否恰當，卓未回應。
