宏福苑業主「特設銷售計劃」周二（29 日）首日揀樓，當局安排 35 戶參與，程序中午前完成。截至晚上 8 時，計劃網站的資料顯示至少 34 個單位已選或已售。《法庭線》向房屋局查詢，其中一戶是否未有揀樓、是缺席抑或其他原因，局方晚上口頭指沒補充。
據網站資料，多數人選擇預計 2028 年落成的啟德啟陽苑。有人稱「非常之好高興」，因該處交通方便、配套成熟，料扣除出售宏福單位所得後仍需補貼數十萬元。有年屆七旬夫婦稱「要攞晒啲老本出嚟買」，感到壓力。有人料需補貼 100 多萬元，盼能減免印花稅。
「解說隊」陪入場
聽簡介後揀樓
政府的「特設銷售計劃」提供 10 個房委會居屋、綠置居，以及房協資助房屋項目予宏福苑業主揀選，據安排，選擇「樓換樓」方案，或者已簽意向書但未正式出售業權的業主，可在選樓階段先揀選並預留單位，而現金收購方案的業主則可購買單位。
揀樓程序在觀塘綠置居銷售小組辦事處 10 時開始，首天共安排 35 戶參與。早上 9 時，業主陸續到場，每戶均由「解說隊」人員陪同入場，進行簡介後按籌號次序揀樓，場內的電視螢幕不斷更新已選或已售單位，以及每個項目剩餘的單位數目。
七旬劉女士：想盡快上樓「冇得選擇」
料補貼數十萬
75 歲的劉女士與八旬丈夫提早約 45 分鐘到場，兩人是宏建閣的第一手業主，現住在臨時房屋，劉稱，打算購入預計今年入伙的粉嶺樂嶺軒，希望較快上樓，「我哋年紀咁大，係咪我哋需要、急需要屋呢⋯⋯冇得選擇，可以咁講，你想趕住快啲有得住，冇得選擇」。
她又說，為了方便與在大埔上學的孫兒見面，故選擇住在粉嶺，預計要補貼數十萬元買樓，「啲樓價又貴咗，補嘅錢又買唔返自己嗰間屋，要攞晒啲老本出嚟買，又要畀釐印費（印花稅），你話對我哋啲老嘢有冇壓力吖？」
頭籌揀樓李生選啟陽苑：
心情非常之好高興
70 多歲的宏盛高層李生取得頭籌，成功選中心儀的啟陽苑。他認為屋苑交通方便、配套成熟，又指選購過程非常順利，秩序井然、方便，「非常之好高興」。李生指，他選的 385 呎單位比較貴，料需補貼幾十萬元，要動用積蓄，新單位亦細過約 420 呎的舊居，但認為只是兩夫婦居住，一廳一房足夠，「最緊要係安居」。
李生選擇「樓換樓」方案，指已交妥所有文件，惟至今仍未收到「樓換樓券」，形容進度很慢，今日亦只是簽署文件「預留單位」，待收到「樓換樓券」再簽署臨約。不過他稱不擔心，「政府叫得我嚟，我都照做我應做嘅嘢，就算你幾個月後畀（券）我，政府都知咩事，佢唔可能取消我呢個單位」。
李生指，現時暫住房協單位，滿意政府安置，又指大家都想政府補貼印花稅，「但係現實唔係話我宏福苑就一定要有優惠，大家買樓大家住樓，都係要畀呢啲錢，唔可以話我宏福苑，就咩都豁免，大家都一視同仁嘅，佢政策係點，我咪照跟佢政策囉。」
他說：「所有嘢都重頭嚟過，心情亦都上上落落，因為面對一個新環境唔知點樣，但人都好容易適應」。
李生又指，住所仍有很多「值得懷念嘅嘢」，已跟社工申請第三次上樓，惟未獲回音，「一個字，就係等」，盼趁秋季來臨，能舒服地上樓，「希望政府短期內畀到答覆我哋」。
訂閱／贊助／購物，支持《法庭線》報道香港，記錄香港。
李生：最主要今日係想
屋企人揀返一個安然嘅生活
宏盛閣的李生今天陪同父母揀樓，購入啟陽苑的高層單位，他指選擇啟德是因為交通方便、醫療配套齊全，適合長者居住，他料需替父母補貼數十萬元買樓，亦預計要預留裝修費，「如果對老人家負擔係大，我都仲係做緊嘢嘅應該會 OK」。
他說曾考慮大埔的頌雅路西項目，但因為要等數年才落成，而他希望住在臨時房屋的父母盡快安頓，雖然要離開大埔但相信他們亦能適應，「重新適應囉，其實香港地方好易適應嘅啫」。
他的宏盛閣單位沒有太大損毀，現在需要補錢買樓、搬新居，李生稱「心情梗係唔係咁好㗎喇，咁但係人都要作出一啲轉變啦，事情發生咗，我哋都唔好再諗返轉頭，但係你話所有嘅責任嗰啲嘢，由返法律、社會，佢會有一個釐清囉，而家最主要今日嚟講，我係想我啲屋企人去揀返一個安然嘅生活，未來有一個日子會過得好啲」。
宏仁張生：補貼逾百萬
無特別開心、不開心
原居於宏仁閣、已退休的張生順利購入安達臣道灝然約 500 呎單位，料需補貼 100 多萬元，他表示「我唔係想去買房、買樓吖嘛因為，係今次焗住去買樓咋嘛，所以冇乜特別開心，亦都冇特別唔開心，反正係要住囉，呢個最 basic 嘅嘢」。
他在揀樓前指，看中該處的風景，又指宏仁舊居實用面積 447 呎，在宏福苑內算是細單位，但新居屋「越起越細」，現在 400 多呎已屬「大單位」。他稱幸好自己有買保險，能分擔部分買樓開支，惟接下來的退休生活要「慳住使」。他盼獲安排第三次上樓執拾物品。
張生又指，希望政府能減免一半印花稅，「因為買樓唔係我哋嘅意願嚟㗎嘛，係迫於無奈買樓，迫於無奈就要畀嗰啲稅，政府收稅係啱嘅，但係有冇 discount 呢，咁就值得溝通下嘅⋯⋯我冇諗住買樓㗎嘛，你今次要我買樓，我要畀多次稅吖嘛」。
張生說，他不希望回到大埔或粉嶺居住，以免每天回家都會見到宏福苑，「一定要經過佢㗎，就算你返粉嶺，你唔經大埔墟，你喺上面嗰個吐露港公路，你都會望到佢嘅，因為佢個位置就係咁好」。
有記者問及，捲入宏福苑法團授權票爭議的民建聯黃碧嬌，日前辭任區議員一事，張生稱不想隨便評論，但覺得黃應該向公眾交代，「從我哋嘅角度嚟講，就覺得佢冇乜擔當囉⋯⋯出嚟講幾句點解會咁做，我就覺得係應該係要做嘅嘢，但係佢好似 so far 都未講過嘢」。
79 歲譚太：揀咗我心水嘅屋
住得一年得一年
79 歲、原住在宏盛閣的譚太是宏福苑一手業主，她與 87 歲行動不便的丈夫選擇粉嶺樂嶺軒 13 樓、約 480 呎兩房單位，「兩公婆一人一個房」，料需補貼 40 多萬元。譚太說，住在新界 40 多年，不習慣九龍，現選中心儀單位感非常開心，「揀咗我心水嘅屋，未試過咁開心，幾十歲。」
她續指，政府曾安排住所，但出入要經斜坡、不太方便，因此與丈夫在外租屋。不過租約將於明年二月期滿，她一度感彷徨，幸好現選中已落成的樂嶺軒，料明年新年能入伙。她又說，最好政府能減免印花稅，「減唔到都無辦法」，對於未來生活只能見步行步，「又唔係好長命，住得一年得一年」。
楊女士：每個地區都比不上宏福苑
有數名宏福苑居民在會場外看着螢幕不斷更新已選或已售的單位，一邊討論揀樓情況。
其中，原住在宏新閣的楊女士稱今天陪街坊揀樓，只能在場外等候，她抽到 1200 多號籌，尚待通知她的揀樓日期，她看到街坊選中心儀的單位「戥人哋開心」，因她的籌號太後，現時暫不會選定心水，「如果（有心水但是）俾人揀咗，咁你就冇㗎啦，係咪先？所以而家都唔諗喇」。
她稱，希望購入與舊單位相近即 400 多呎的單位，「我諗住即係年紀大喇，希望最後嗰幾年住得舒服啲囉」，她希望毋須補錢買樓，因只是她獨居，而她亦退休多年，不能負擔太貴的單位，形容只能「睇餸食飯」。
她又稱，覺得現時的選項「你話好滿意就冇啦，即係每一個地區我會覺得都比唔上宏福苑囉，宏福苑個交通係方便啦，個環境又咁好，咁而家冇辦法啦係咪先？咁都要接受囉」，因預算有限，她不打算選擇樓價較高的啟德，而九龍灣盛緻苑則太少大單位，若到她揀樓時已沒有大單位，則會選擇大埔頌雅路西的項目。
楊暫住在大埔三門仔的「善樓」，頌雅路西項目最早 2029 年才入伙，雖然政府指災民直至上樓可以繼續住在臨時房屋，「話係咁講，唔知會唔會變㗎嘛，呢啲嘢預測唔到嘅，暫時住住先囉」。
被問到對黃碧嬌日前辭職的看法，楊形容「追查呢啲係政府嘅責任喇，我哋就算有意見，都影響唔到政府嘅決定」，住在宏福苑多年，她覺得「佢（黃）冇乜建樹⋯⋯好多嘢都幫唔到我哋」。
政府：預留單位數遠超樓換樓人數
政府周二下午發稿表示，在接受政府收購建議的期限於 8 月 31 日屆滿後，共有 1,971 戶，即 99.3% 業主確認向政府出售業權的意向，當中約 1,700 戶參與「特設銷售計劃」 ，預計 11 月底完成所有選樓程序。
政府指，已簽署買賣協議的業主將會獲邀選樓，若在選樓階段會先為該申請者預留「特設銷售計劃」的新單位，待完成轉讓手續後，會與該申請者簽訂購買新單位的買賣協議。
政府又指，預留房委會及房協共 10 個發展項目，合共超過 4,400 個單位供業主選購，10 個項目分別位於九龍灣、啟德、錦田、將軍澳、屏山、東涌、大埔、粉嶺和觀塘，單位實用面積介乎約 280 呎至約 560 呎，當中實用面積 400 呎或以上的大單位共約 2,800 個，超過單位總數六成，「由於預留單位數量遠超參加『特設銷售計劃』的宏福苑業主數目，不同選樓次序的業主均有充裕及多元化的選擇」。