蔡天鳳疑遭殺害碎屍案,周五(20 日)踏入第 42 日審訊,鄺港智第二日作供,他指沒有觸碰亦不曾拿起涉案錘仔,「掂都無掂過」。辯方大狀問以他所知,錘仔是否與蔡的死亡有關?他表示沒有。他又供稱,在蔡遇害當日,他與蔡在七人車上談笑。
Day41 鄺港智:四角關係複雜 譚方駿曾以米線向我示愛
報道涵蓋庭上描述的案件過程細節,或會引起不安。
第四年,我們仍在現場。
支持《法庭線》,讓我們走得更遠。

15:35 休庭 下周一續審
15:15 鄺港智:蔡天鳳有參與盜竊案
辯方大狀 Trevor Beel 續問及鄺港智干犯盜竊罪的情況,問當時蔡天鳳是否知道鄺犯案。
鄺港智供稱,「知道,一齊做㗎嘛」,又指「佢(蔡)幫我睇水囉⋯⋯因為咁我要攞走啲嘢嗰陣時,我要人幫我睇住,即係我交畀佢」。鄺港智確認他當時取走金器等物品。
Beel 引述盜竊案的案情指,鄺港智約於 2013 年 6 月干犯首罪,涉款 6.15 萬元;次罪發生於 2013 年 10 月 19 日,涉款 167 萬元。鄺港智表示不記得。鄺港智在法官提問下確認,他早前已同意盜竊罪的案情。
14:27 鄺港傑一方開始盤問鄺港智
代表鄺港傑的辯方大狀 Trevor Beel 開始盤問鄺港智。
他確認於 2022 年 6 月從內地返港,他在內地期間的生意盈利會匯款予蔡天鳳,用作支付加多利山單位的生活開支。鄺港智稱,返港後他仍有從事鐘錶買賣業務,安排第三方將手錶帶回內地予客人,而售賣鐘錶的利潤則存在錶行,共有「百幾萬」。
Beel 詢問鄺港智返港後,加多利山單位的開支由誰支付?鄺港智表示是蔡。Beel 追問,開支是否包括支付前司機阿信的工資?鄺港智回應,「我唔知道,因為係 Damon(鄺港傑)負責嘅」。
鄺港智確認,他回港後,當時司機阿信負責駕駛七人車 AA3383 。Beel 指及後阿信於 2022年 10 月辭職。鄺港智確認有聽聞此事。
Beel 再指,鄺港傑、蔡或鄺母,以家族外遊為由要阿信放無薪假,逼阿信辭職。鄺港智表示「唔係逼囉,佢做得麻麻地」,又指他回港前已聽聞關於阿信的問題。鄺港智確認,他當時知道家族外遊是令阿信辭職的藉口。
就鄺港傑早前供稱,加多利山管理處投訴阿信的無禮行為,令蔡感到尷尬,鄺港智表示知道此事。
鄺港智確認,阿信辭職後,鄺港傑自 2022 年 11 月中接手司機工作,而胞兄起初不願意接受這個安排,隨後由蔡及鄺母說服胞兄。Beel 指,鄺港傑將家庭放在第一位,比朋友社交更重要。鄺港智同意。
Beel 開始詢問鄺港智與蔡的關係。鄺港智指他 14 歲時開始與蔡交往,及至 15 歲、即 2009 年才搬入黃埔花園。
Beel 追問當時誰提出讓鄺港智同居。鄺港智回應「冇話特別提出,大家自自然然咁樣喎」。
Beel 再指,當鄺港智遷入黃埔花園時,他與蔡同房,相信二人當時已有性行為?鄺港智回應約 14 歲已發生性行為。Beel 追問,當時蔡母不反對?鄺港智回應「佢好鍾意𠻹」。鄺港智確認,他在黃埔花園居住期間開始學習海南話,長子於 2013 年出生,同年 9 月他和蔡結婚,而女兒 X 於 2014 年出生。
13:45 鄺港智否認被蔡激怒而襲擊蔡
辯方大狀安華暉續問及鄺港智潛逃的情況。
鄺港智供稱,他當時打算坐「大飛」離港,他於 2023 年 2 月 22 日或 23 日安排船隻,當時要付 30 萬元,比一般 10 萬元貴。他指,「因為我要話快吖嘛,錢唔緊要」,但稱最終「被人呃咗」、「即係去到碼頭就俾人拉吖嘛」。他解釋當時要離港,「因為我之前俾人通緝緊㗎嘛,同埋我知道出咗事吖嘛,咁張燕花又同我講話警察搵我」。
承認事實提到,鄺港智被捕時,他身上有中移動的電話 Sim 卡。
鄺港智指,父親鄺球將電話卡給他,是因為他原本使用譚方駿的電話,不時有人來電找譚,令他每次均要告知譚,及後父親得知情況,「嗰陣我就叫佢(鄺球)開張 sim card」。他又稱,「Abby 嗰陣時成日 check 住我電話有冇同 Ivy 聯絡,所以我就要個新電話囉」。
安華暉再問,當時鄺港智有否留意到關於電話實名制的政策。鄺港智表示知道,確認因為他被通緝而無法登記。安華暉續指,在蔡天鳳遇害當天,有人為鄺港智購入新的電話卡,是否巧合?鄺港智表示,「我幾個月前叫佢㗎啦,係巧合」。
安華暉又問,鄺港智為何事發後於龍尾村屋換褲。鄺港智稱,因為衣服及褲子均沾有血跡,他把衣物留在單位內。
安華暉再問及潛逃的情況。鄺港智指,他於 2 月 23 日離開凱旋門單位後,乘的士到東涌會合安排他坐「大飛」的人,翌日再到東涌碼頭。
安華暉再問,他事發當天在 AA3383 七人車內,有否被蔡天鳳激怒而襲擊蔡?鄺港智回應「沒有」。
安華暉另問於大尾篤停車場時,鄺港智有否參與襲擊蔡?鄺表示「沒有」。安華暉再指「事發經過,正是你早前向法官及陪審員所述的情況」?鄺港智確認。
12:41 休庭午膳
12:30 鄺港智:沒計劃用凱旋門單位避難
鄺港智確認,那天是父親鄺球首次提到,他可到凱旋門的單位過夜。
辯方大狀安華暉追問,於 2023 年 2 月 21 日(事發日)之前,是否有計劃讓鄺港智在凱旋門單位避難?鄺港智表示沒有,強調該單位是父親「畀佢二奶」。
至於他被捕時身上有凱旋門的租約及鎖匙,鄺港智解釋,他曾於圓方商場與父親用膳,當時提及此單位,父親着他「上去睇吓囉,話食完飯冇嘢做」。鄺港智遂到單位參觀,隨後父親給他鎖匙,「佢話費事唔記得帶啲鎖匙,就擺一條喺我度」。
庭上證供顯示,鄺港智於事發翌日到貴族鐘錶取回暫存的現金及名錶。他庭上供稱,當時「知道出咗事,我同(蔡母)張燕花通過電話,佢叫我或者返大陸先,我自己都心驚驚,諗住嗱嗱臨攞返啲錢先,就返大陸先,或者澳門」。他又稱,打算「攞返啲錢先,再安排離開香港、避一避,睇吓咩情況」
錶行職員早前供稱,鄺港智當時在電話上聽起來「好 sad」,鄺港智庭上稱,「梗係 sad 喇,電話都聽到我 sad 了,同平時都唔同⋯⋯因為 Abby,即係走咗吖嘛」。
12:00 鄺港智:父稱「會處理」
「我唔知道佢會咁樣處理吖嘛」
至於鄺港智在龍尾村屋的情況,鄺港智庭上稱,他當時與胞兄鄺港傑「清空緊架車嗰啲嘢囉,諗住拎晒入屋先」,包括地氈、「同埋嗰啲紙巾吖,總之車上有啲咩就攞啲咩,嗰時其實我都好亂吖,我出門口嗰袋衫我都攞咗入屋」。
鄺港智稱,他落車時已脫下外套及衣服,因為其衣服左下方沾上血跡,又指血跡「應該係我睇 Abby 嗰陣時整到嘅」。
他續指,及後離開村屋是因為「我驚、同埋我好唔開心,同埋我老竇叫我走先吖嘛,佢會處理」。他補充,「我深知我自己被人通緝緊,如果我唔走、報警、call 白車,都做唔到,咁我咪嗱嗱臨走先」。
他續指,他及後接女兒放學,回家後「扮冇事咁樣」。那天譚方駿問他,「Abby 去咗邊,邊度搵到 Abby」。蔡母張燕花亦致電他,問「姐姐喺咪屋企呀?」他當時回應「唔喺吖,我湊緊、整緊啲小朋友瞓覺」。鄺港智又指,他當晚「飯都冇食呀,淨係啲小朋友食」。及至晚上蔡母通知他「而家報警」,他回應對方,「仆街你報警都唔話我知嘅?」
安華暉問鄺港智,為何對於蔡母報警感不滿?
鄺港智稱因為他正被通緝,「如果佢報警應該通知我先,跟住我走」。安華暉追問,當時鄺港智關注自己的盜竊罪,還是發生在蔡身上的情況,擔心連累到自己?鄺港智指並非擔心被連累,「Abby 呢件事,嗰陣時未接受呢樣嘢」。
而鄺港智當晚在加多利山單位與蔡母通電話後,便致電予父親鄺球,「你話處理嘅?仆街佢阿媽報咗警」,又問父親「圓方有冇人喺度㗎 」,隨後他便到該處。
鄺港智庭上解釋,下午時父親表示會處理,他便先行離開龍尾村,「之前知道佢會處理,我唔知道佢會咁樣處理吖嘛,我以為佢係報警或者 call 白車」,指父親當時是表示「你唔好理啦,我會處理㗎啦」。
安華暉表示,最終大家都知道鄺球如何處理屍體,但鄺港智當時是否知道會發生此事?
鄺港智表示不知道,他稱事後看《香港01》的報道才知悉,當時感到「好驚」。他續指,父親表示他可以到凱旋門單位,他便收拾物品到該處。

11:35 鄺港智:父與蔡在車上「傾偈」
其後發現蔡倒下、有血
鄺港智續指,他們的七人車 AA3383 抵達大尾篤停車場後,見到父親鄺球所駕駛的另一輛七人車 VY9157,而父親當時已下車。鄺港傑把 AA3383 泊在附近。鄺港智指,當時父親走近、胞兄下車,父親見到鄺港智後,把一份文件交給他並稱「搞掂咗喇」,他表示「好」,把文件放在車上。
鄺港智續指,隨後「老竇上咗車同 Abby 傾偈,跟住我同我阿哥行開咗嘅,一路食緊煙喇,但係就唔係好遠嘅啫,跟住之後食完枝煙返到去,跟住之後⋯⋯應該係我阿哥開門⋯⋯就見到 Abby 瞓咗喺度,跟住我老竇就坐咗喺度喇,本身我個位嚟嘅,跟住之後呢就問佢咩事呀?發生咩事?」父親稱「唔好講住啦,返村屋嗰度先」,隨後父親離開 AA3383,駕駛 VY9157。
鄺港智便走上 AA3383,「我就即刻睇吓 Abby 點樣,跟住就見到已經有血喇,個頭度有血。我有郁佢隻手、叫佢喇,摸吓佢心跳,我亦都有睇吓有冇呼吸了,跟住之後就冇反應了見到」。
及後兩車駛至龍尾村,父親登上 AA3383 檢查蔡是否有生命跡象,「我就話咁點算呀而家,報警定 call 白車定點樣」。父親則回應「吓,你通緝緊㗎喎,啲仔女點算吖?」鄺港智指,「跟住佢就話搬咗入屋先了,跟住之後就係閉路電視影到嗰啲囉」。
辯方大狀安華暉提到,當七人車駛到龍尾村後,鄺港智曾在車內逗留。
鄺港智指他當時留在車內數分鐘,「我就一開頭 check 吓佢(蔡)有冇心跳、有冇反應呀,跟住我就坐咗喺度,老竇就上咗車」。鄺港智指,當時他「好驚、好緊張」,他確認從未遇過此情況,亦未曾預計會發生襲擊事件。
就 CCTV 片段顯示,鄺港智落車後有「揈手」的動作,他庭上稱當時「掹住呢個扶手、用錯力,䟴到隻手」。
控方案情指當時鄺港智有此動作,因為他在襲擊蔡時受傷。鄺港智庭上稱,「我冇受傷㗎,即係被人拉嗰陣時都有 check 過,我冇任何受傷」。
安華暉指,從 CCTV 可見,鄺港智的父親及胞兄當時把蔡天鳳的屍體搬入村屋內,而鄺港智在外「睇水」,因為鄺港智曾提到有人經過。鄺港智庭上形容,「嗰時我好驚,周圍都有人,都有嗰啲、即係閉路電視」。
就控方指鄺港智當時神情冷靜,安華暉問鄺港智,他當時甚麼狀態。鄺港智答,「其實我好緊張、好驚㗎」。
就鄺港傑早前供稱,鄺港智當時一直大哭。鄺港智庭上否認,但指他返回加多利山單位後走入房間哭,因為「唔想俾啲仔女睇」,又形容當時自己「忍唔住嗰啲眼淚就流出嚟,又唔係話嚎哭嗰隻,我唔會有呢啲事嘅」。
鄺港智指,他哭了約「十零分鐘,我知啲仔女喺出邊嘅,我好抑壓我啲情緒,因為我行返出去又要好似冇事咁樣」。
11:12 小休
10:50 鄺港智:蔡車上罵鄺球
表示要「即刻去講清楚佢」
鄺港智續指,在七人車上談天時,他問蔡天鳳「睇樓嗰度睇成點」,蔡當時表示「搞緊囉」,蔡又着他「得閒就去睇吓黃金海岸、滿名山嗰度」。隨後蔡又提及年初一的情況,即「我老竇(鄺球)帶咗啲仔女去玩嘅事件,跟住我醒起同佢(蔡)講,我之前同老竇飲茶,佢(鄺球)就話唔畀佢耐唔時見吓啲孫呢,佢就咩都唔再配合」。
鄺港智指,蔡聞言「開始有啲嬲」,便着鄺港智轉達給鄺球,但鄺港智稱「關於細路仔事,我就冇辦法講喎」。鄺港智指當時蔡「鬧我冇撚用咁樣」,又罵「死老嘢又同我玩嘢」。蔡再問及鄺球身處的地方,表示要「即刻去講清楚佢」,胞兄鄺港傑則回應:「咦,佢(鄺球)都喺大埔」,決定即刻找父親「講清楚」,而蔡亦叫鄺港傑致電鄺母李瑞香,着李接蔡的女兒放學。
鄺港智又提到,當時蔡「一路鬧緊我老竇」,指當時「有啲用海南話,有啲用廣東話,不過我唔記得咗,跟住佢就話唔可以再畀佢見啲孫、怕教壞,跟住話佢臨老入花叢囉」。傳譯員翻譯為「fancy flower bush」。法官祁彥輝追問意思,鄺港智指「我都唔知點解釋」,及後又稱「話啲人老仲走去媾女,或者有啲男女關係」。
辯方大狀安華暉形容,七人車及後駛過蔡長女就讀的學校?鄺港智表示沒有留意,「因為佢鬧咗好耐,同我鬧我老竇」。鄺港智又提到,當時蔡又罵鄺球,「佢 60 幾歲仲喺度媾骨妹呀,跟住就話佢(鄺球)當人哋係老婆、人哋當佢係客人,一陣間啲錢被人呃鳩晒。真係呢世都唔可以畀佢見啲仔女,一陣間教到個仔就媾骨妹、教到個女就做骨妹,就仆街啦」。
安華暉指及後七人車駛至大尾篤停車場,鄺港智庭上確認蔡當時仍生還,「我哋就停車囉,見到我老竇咪停車囉」。
10:28 鄺港智指七人車上與蔡談笑
辯方大狀安華暉再問及 2 月 21 日事發當天的情況,指當天中午鄺港智到旺角新世紀廣場(MOKO)的 Starbucks 與胞兄用膳。
鄺港智指,當天他打算去健身,帶着膠袋、裡面有健身所需的衣物,「我冬天做 gym 就着長袖,天氣凍嗰陣時囉」。而胞兄到場時,鄺港智指「我有同佢講過請教練嗰啲嘢」,「咁佢就話我被人呃、我傻仔,冇人請教練㗎,佢都識喇,教返我轉頭咁樣囉」。
鄺港智又指他當時的身體動作是嘲笑胞兄,「因為佢講起做 gym、又話識教練嗰啲,佢咁嘅身形,好難去說服倒我㗎嘛」。被告欄內的鄺港傑微笑。
鄺港智及後乘搭鄺港傑駕駛的七人車 AA3383。他確認,他上車時,蔡天鳳已在車上、坐在司機位後方座位,而他坐在蔡的左邊,當時蔡「同人傾吓偈、講吓電話」,他自己亦玩電話。
安華暉再指,蔡最後發出的訊息是「好」,而控方指她及後已被鄺港智襲擊。
鄺港智表示不同意,指當時蔡「一路同我講緊嘢」。當時蔡提到「一陣間去 high tea 嘅,跟住之後佢有講到佢阿媽又爭人錢,每個月幫佢還緊啲利息,好大壓力咁」。他指,蔡母張燕花有賭債等,由蔡負擔,形容蔡對此「梗係唔高興啦」,但他當時向蔡稱「算啦,唔係好多唔緊要啦,冇辦法啦」。
鄺港智續指,蔡當時又提到幫譚方駿母親購買衣服,他問蔡「呢排唔買嗰啲天珠吖,轉買衫?」他指當時與蔡在笑,鄺庭上指,「因為 Chris 阿媽好鍾意去買嗰啲飾物、天珠嗰啲嘅,就話天珠嗰啲係慈禧嘅,其實呢度我哋有個 joke 喺度」。
10:00 鄺港智:「掂都冇掂過」錘仔
否認錘仔與蔡死亡有關
第三被告鄺港智繼續出庭作供,由辯方大狀安華暉進行主問。
控方曾指,鄺球參觀龍尾村單位時,曾經與鄺港智電話。安華暉問,鄺港智有否與父親鄺球討論為何要租用該單位;鄺港智於事發前,在 2 月 11 日曾短暫逗留在龍尾村單位,當時他有否對單位感興趣?鄺港智一概表示沒有。
安華暉再問,鄺港智的電話與父親之間的通話紀錄,有部分是由兩子女致電予爺爺聊天。鄺港智確認。
至於鄺球租用的凱旋門單位,鄺港智指由父親租用「畀佢個二奶」。至於鄺球作供時提到,單位可讓鄺港智避開蔡天鳳,鄺港智指父親沒告訴他這件事,而他亦沒有提及過自己要避開蔡。安華暉再指,鄺港智當時住在加多利山單位,而蔡天鳳住在海棠路獨立屋,兩人並非在同一地方?鄺港智確認。
至於鄺港智曾與胞兄鄺港傑多次通話,他庭上解釋「嗰個係我阿哥嚟㗎嘛」,此外胞兄亦擔任司機,「我基本上要啲咩呀、要車呀,小朋友搞啲咩呀,我都會 call 佢」。
控方指由鄺港智向友人 Herman 及 Norman 租用車牌 VY9157 的七人車,是在謀殺蔡時使用,而當時鄺港智向友人聲稱,他原有的車輛要維修,所以要借車。鄺港智庭上指,他當時是為父親借車協助搬屋,又指向友人說謊只是「一個 random excuse,即係我唔會覺得係大話囉,費事咁複雜咁講啫」。
安華暉續指,鄺港智於 2 月 11 日曾到龍尾村單位逗留 27 分鐘。鄺港智庭上解釋,因為當天他與胞兄帶兒子到沙田學網球,胞兄提議「反正都冇嘢做,去睇一睇老竇間新屋喇」。鄺港智指,當時沒有看到刀具、電鋸等物品。而當天他亦曾穿上拖鞋。
安華暉又指,鄺港智曾與胞兄在日本城購物,當時鄺港傑購入保鮮紙、螺絲批等。鄺港智確認,指當時「我就係行吓咋,我都冇買嘢」,沒有留意胞兄購物,亦不知道胞兄購物有何用途。
至於被指為兇器的錘仔上有鄺港智的 DNA,他在庭上指,「但我冇掂過,掂都冇掂過」,稱自己不曾拿着錘仔。安華暉再問,據鄺港智所知,錘仔與蔡的死亡是否有關?鄺港智表示沒有。

3 人被控謀殺、阻止合法埋葬
被告依次為鄺港傑(31 歲,司機)、鄺球(65 歲,退休人士)及鄺港智(28 歲,無業)。鄺港傑由大狀 Trevor Beel、劉奕勤、李宣儀代表;鄺球由大狀戴偉奧(Oliver Davies)及羅天祺代表;鄺港智由大狀安華暉(Andrew J. Raffell)、劉皚淇及鄧樂齊代表。
控方由外聘資深大狀郭莎樂(Charlotte Draycott)、高級助理刑事檢控專員梁育珩、高級檢控官林曉敏、吳希樂與檢控官尹培軒代表。案件由暫委法官祁彥輝(Brian Keith)審理。
3 人承認阻止合法埋葬屍體罪,否認謀殺罪。阻止合法埋葬屍體指,3 人於 2 月 21 日至 23 日期間,在香港阻止蔡天鳳的屍體被合法埋葬;謀殺罪指,3 人在 2023 年 2 月 21 日,在大埔龍尾村 56B 地下謀殺蔡天鳳。
HCCC198/2025