原計劃安頓好新居便結婚的 Athena，因大火延遲婚期。她與男友於 2024 年底入伙，周日（3 日）重返單位，首次見到沒有棚網遮擋的海景，特意拍照留念。家中設計由二人親自構思，當年曾在梳化合影；如今再坐同一位置復刻照片，為親手建立的家留下最後紀錄。臨別前，她亦以揚琴彈奏《今宵多珍重》作「last dance」道別。
另有患小兒麻痺症、住宏盛中層的居民堅持上樓，形容過去數月災民猶如受「三次傷害」，指大火是「第一次傷害」；長遠住屋安排是「第二次傷害」，「佢美其名有得揀，唔係大石砸死蟹，但石係佢，蟹係我哋，死唔死係我哋先知」。「第三次傷害」，是在聽證會上聽到多名證人承認工作有遺漏，卻以一句「唔理想」帶過，嘆「點解要懲罰嘅唔係做錯事嘅人，而係我哋災民？」
宏盛Athena：因大火延期結婚「Go with the flow」
宏盛閣 18 樓居民 Athena 與男友購入單位，於 2024 年 10 月、大維修展開後正式入伙，原計劃安頓好這個安樂窩便結婚，「依家唔結住，搞埋間屋先⋯⋯Go with the flow」。
二人周日（3 日）獲安排上樓收拾，事前特地準備紅白膠袋、Ikea 袋分工合作，一邊收拾、一邊來回上落，爭取時間帶走家當。單位未受大火波及，Athena 成功尋回最重要的求婚戒指、父親留給她的首飾、揚琴，也慶幸沒遇到最擔心的失竊問題。
事隔 5 個月終可再踏入家園，Athena 形容心情緊張，「尋晚開始瞓唔着，唔識形容，又唔知緊張啲咩，總之就係好緊張⋯⋯ 今朝 6 點幾醒咗，又瞓唔返」。
Athena：首見無棚網海景「特登影咗幾張相」
兩人於大維修後才入伙，單位面向海景，但景觀一直被錄色棚網覆蓋。這天上樓，他們首次看見完整的海景，「好靚嘅、特登影咗幾張相，因為我哋係未見過冇網嘅海景⋯⋯如果我哋可以喺呢度睇到呢個景，喺呢度生活就好喇」。
兩年前新居入伙，兩口子沒有聘請設計師，家中佈置、精心挑選的黃藍配色、掛畫，都載滿二人對未來生活的想像，「（設計）由頭到尾自己兩個人 com 出嚟，所以係無論顏色配置，揀磚、揀地板，每一件傢俬嘅 size，都係我哋自己度，擺位全部都係自己諗」。當年裝修完畢、傢俬齊全後，兩人曾在梳化上溫馨合影，這次再上樓，「我哋應該會復刻影返張一模一樣嘅相」。
Athena：喜歡宏福苑的連繫
回想在宏福苑生活的日子，Athena 形容「最鍾意我哋喺入面嘅回憶，同成個 connection」，喜歡熱情又和睦的鄰里關係，「我哋同隔籬屋婆婆都好好傾」。
如今宏福苑經歷大火、回家的路已面目全非，Athena 指情況有如「生化危機」，「平時放工返去，綠油油一片，有公園，依家行會好似廢墟咁」。面對政府的收購安排、排除原址重建，Athena 亦無奈稱「無得揀」。
屋內奏起《今宵多珍重》作「Last Dance」
踏入家中，屋內仍留着晾在衫架上的衣物，時間凝結在 2025 年的 11 月 26 日。要與親手建立的家園道別，擁有揚琴專業的 Athena 在單位內最後一次彈琴，作為「Last Dance」。Athena 熟練地演奏起《今宵多珍重》，「突然間個腦就有呢啲旋律」。
最後一次在這個家彈奏，Athena 心情忐忑，「因為下次就算有機會再上樓，我都攞走咗（揚琴），咁就冇得再喺入面彈，覺得一定要錄低呢件事」。演奏完畢，男友與友人拍掌，Athena 對門外的工作人員表示「可以開始」，3 小時踏入倒數，4 人立即動身收拾。
4 人先收拾揚琴、琴架，其中兩人負責運至地面，另外兩人爭取時間討論物品去留，同時收拾飾物，照片等。每收拾好一樣物品，便在清單上打剔。短短 3 個鐘在混亂中過去，Athena 認為時間「夠執嘢，但唔夠告別」，本打算如有足夠時間，可以多拍照留念，但收拾期間「執完已經七國咁亂，點影都唔係嗰回事了」。
宏盛何小姐：屋內物品具紀念價值、不可能斷捨離
居於宏盛閣近 35 年的何小姐在朋友協助下，把 21 袋家當從 14 樓搬到地面，再轉至暫住的過渡性房屋「策誠軒」，當中包括珍藏多年的黑膠碟及最愛的多啦 A 夢模型公仔，但僅佔家中物品的 3 分 1，CD、梅艷芳年代的錄音帶則要留待下次上樓再取回。
何小姐為聽證會常客，不時在會場內外與記者閒聊，均神情輕鬆。這天上樓後，她神色凝重，講及親眼目睹家園損毀、面對收樓要求時，哽咽拭淚。
何從紅白藍袋中取出兩個未有受損、由朋友贈送的多啦 A 夢模型公仔，形容家中物品「所有都有紀念價值、儲咗好耐」。收拾時其隨行朋友詢問是否要斷捨離，「我唔係好老脾，話你唔好學埋司長講啲嘢，冇一家可以去做斷捨離呢樣嘢，因為我自己住咗 35 年，好多街坊住咗 40 幾年嘅，都真係冇可能」。
何：若立法收樓令人不敢再置業
何小姐指，單位損毀不算嚴重，但亦有熏黑，部分膠箱因高溫溶解，「有一箱已經溶晒嘅多啦 A 夢」無法取回。見到昔日家園面目全非，她慨嘆「我都唔知點解，一間屋可以搞成咁⋯⋯一個火災可以冇咗間屋⋯⋯成個宏福苑我想像唔到點解會變咗咁」。
政府的安置方案排除原址重建，並提出收購業權，何質疑「點解要收業權，我唔係好理解」，又批評合安沒有開業主大會，「都唔知我哋想點」。
不少居民提出希望原址重建，何則認為毋須如政府所指需時長達 10 年，「可能你 5 年都可以」，形容「我哋好似難民咁，我哋連新移民都不如，反而我係一個土生土長嘅香港人，我有納稅嘅，點解火燭你要收我層樓呢，我唔係好明囉」。
對於財政司副司長黃偉綸早前提到或以立法收樓，何直言此舉令人對置業卻步，「咁買咗樓係冇保障嘅嘢嚟，咁我買層樓嚟做咩呢」。
宏盛羅生：災民受「三次傷害」
住在宏盛閣中層、患小兒麻痺的羅生，跟家人和義工上樓。他指對於行樓梯感到吃力，預計只能上落一次，希望取回重要文件。羅生最近忙於善後、出席聽證會，「我哋嘅攰係邊個造成呢？」，又指感到無辜、無奈，「點解要懲罰嘅，唔係一啲做錯嘢嘅人，而係我哋災民？」
羅生說，現時災民的怨氣「比火燒嗰陣更重」，形容災民受到「三次傷害」。
他解釋，火災是「第一次傷害」，長遠住屋安排是「第二次傷害」，「佢美其名有得揀，唔係大石砸死蟹，石係佢，蟹係我哋，死唔死係我哋先知」。他又引述街坊的比喻，「我着開 43 號鞋，你無端畀 36 號鞋我點着？」
羅生說，「第三次傷害」是在聽證會上，聽到證人作供提及工作有甩漏，「最多睇到嘅一句就係唔理想，你唔理想，市民嚟講咪更加唔理想？你自己諗返，上邊做嘢啲人都咁甩漏，下邊啲人做嘢係點呢？」
他說，如果承建商被指誤殺，「嚴重起上嚟講，政府係咪可以話係幫兇呢？」
羅生憶居民聽證會上哭泣
他提起聽證會時哽咽，「大家都好 sad 㗎，每逢講返當日發生嘅事，都有人喊㗎，事隔唔少時間㗎啦，5、6 個月。唔係當事人，當然好快淡忘，但依樣嘢我諗喺宏福苑所有災民嚟講，呢一世都唔會忘記。」
羅生說，不知道會否堅持出席聽證會，但「有能力咪去聽囉」。
「毋忘愛」范寧陪遺屬上樓
協助辦理後事的非牟利機構「毋忘愛」主席、醫生范寧，周日攜帶花束陪伴一名死者家屬上樓。他指，該家庭曾使用機構的殯葬服務，機構知悉離世者家人從海外回港，希望由相熟的人陪同上樓，故由他陪伴。
范寧指出，情緒穩定及期望管理十分重要，「變咗同佢一齊（上樓）會舒服啲，同埋畀定佢啲準備。」而機構除了為居民提供恆常療癒，也在上樓前舉辦工作坊，提醒他們執拾具有情感意義的物件。
范寧提到，自己既是醫護人員，曾到過戰地及地震現場，而是次大火屬突發大型災難，「對於大型事件哀傷處理、事後工作，我諗呢件事喺香港嚟講都前無古人，希望以後都唔好有」。他指機構會盡力提供協助，希望居民、家屬「關關過、過每關咁樣去克服」。
