宏福苑災民首輪上樓執拾周一（4 日）進入最後一天，亦是宏盛閣及宏泰閣災民最後一天上樓。父母在大火中罹難的黃生，稱「媽媽、爸爸喺呢個人禍裡面已經離開咗喇」，又指爸爸罹難當天 70 歲生晨，「所以無機會再同佢講聲『生日快樂』，希望佢哋安息。」
住在宏泰閣低層的歐太為罹難鄰居帶來一紮花、零食，「希望多謝大家過往照顧我哋」，她說是了結一件心事。她說今次小朋友沒能上樓，但畫畫向宏福苑道別，並哽咽引述小朋友寫上一句「11 月 26 日，宏福苑嘅大火災，我冇咗我個童年」。
政府晚上指，第一輪 15 天上樓執拾結束，共有 1,674 戶、6,265 人完成上樓，「整個上樓安排運作大致暢順，秩序良好」。政務司副司長卓永興指：「非常感謝住戶的理解和配合」，又稱只有少於 10 戶需另安排 15 天以外的時間處理上樓，而選擇不上樓的住戶大約有 50 個。
Day14｜重坐梳化復刻合照 揚琴奏《今宵多珍重》道別
指政府沒提供原址重建方案
宏盛梁小姐：好似被人賣咗豬仔咁
宏盛高層住戶梁小姐，表示一家在宏福苑住了 40 多年，大火當天剛好是爸爸的「頭七」，因此今次回家，第一件事是清理爸爸「頭七」的祭壇，餘下時間才用來收拾，大約只能帶走十分一物品，但指收拾困難，因老人家的東西會四處放，每個角落都找到有價值的東西。
她引述之前街坊的比喻，指他們一家在此亦算是總共住了 200 多年，用 3 小時帶走十分一，已覺是「超額完成」。
對於政府現時沒原址重建方案，梁指有感政府反口，因政府起初說會有多元選擇，問卷也曾有原址重建的選項，但現時直接被剔除，「好似被人賣咗豬仔咁囉。」
被問及對宏福苑聽證會的看法，她指自己是門外漢，不知政府部門如何運作，但眼見政府部門就似「依樣唔關我事，嗰樣唔關我事」，對政府的運作方法感驚訝，「卸膊操可以做得咁極致」。
如能召開業主大會，梁認為首先要探討屋苑是否可維修，因屋苑有買火險，而若退一萬步，就算火險不分予業主，認為也可用於維修，令業主搬運時可容易一點。
宏泰27樓張生：在客廳放一束花悼念亡妻
住在宏泰閣 27 樓的張先生，在大火中失去妻子，他與妻子是第一手業主，在宏福苑居住 40 多年，形容「屋企嘅嘢全部都有價值」，他指單位損毀不算嚴重，今日回家，主要拿走妻子的遺物，「其實佢樣樣嘢都好鍾意，咁我哋攞到嘅就攞」。
起火一刻，張生在外，只有妻子在家中。他憶述當時的情況，苦笑說致電給妻子時還以為火勢不會太嚴重，「佢話走唔到呀、好大煙，初初諗唔到咁勁嘅，咁都係話畀佢聽，咁眯埋房囉，係咪？通常都係咁㗎啦⋯⋯之後就⋯⋯因為太大煙，可能啲煙太勁呢」。
他說，今天放下一束花在客廳悼念亡妻，給亡妻的說話則「喺心裡面講咗」。
宏泰30樓余小姐：無法尋回貓貓屍體
成屋擺花，總有一紮紀念到佢
居住在宏泰閣 30 樓的余小姐表示，去年 2 月剛用綠表買入單位，用了數十萬元裝修，與父母、貓貓同住，但僅住了數個月就遇到今次大火。余小姐哽咽表示難以釋懷，「我覺得幾難釋懷，一嚟咁多條人命、咁多條生命，突然間消失咗。」
她形容單位內情況「慘不忍睹」，已經找不到任何實體的東西，連硬幣也被燒至不能辨別圖案，沒有甚麼東西可以帶走。她最希望可以找回貓貓的東西或是屍體，但都沒有結果。
家中的貓貓養了三、四年，為了悼念貓貓，余小姐帶了花束及貓貓最愛的玩具，放在單位內各處，「因為我都唔知佢（貓貓）最後喺邊，成屋都擺咗啲花，總有一紮可以紀念到佢。」
對於日後不能再回家，她感到絕望，直言願意用綠表買入單位，是因為喜歡這個地方，「但呢度無咗」。
她回憶指，在大火發生前約半小時，她剛好離家，見到新聞報道火災消息後立即趕回家，但已經不能進入大廈，「睇住燒到啪啪聲」。她當時向警察求助，指有貓貓在樓上單位。大火發生首兩日，她仍然期望可以找回貓貓，但其後知道已經不太可能再出現。她之後期望消防或愛協可以找到屍體，「但最後都係無」。
余小姐希望可以原址重建，「因為我鍾意呢個地方，如果唔鍾意我就唔會揀返呢度啦」。她亦不會因為這個地方曾有很多生命離開，就不想再回來，「嗰啲係我愛嘅人」。
宏盛31樓劉氏夫婦：卡式爐被移到隔壁單位
居於宏盛 31 樓的劉氏夫婦，今天由女兒和女婿陪同上樓收拾。70 幾歲的劉太表示堅持上樓，因對單位有感情，「點都要同間屋講再見囉，因為住咗咁多年⋯⋯即係點講，一個懷念囉，就係上去同間屋講拜拜。」
劉太又說，他們是佛教徒，今趟上樓的當務之急，是「請返啲佛像走、一定要請返啲佛像走⋯⋯其他嗰啲身外物，攞得到就攞。」
問起是否夠時間請走佛像，劉太說屋內有「十幾廿個」佛像，今次是「攞得到就攞」，故希望可有第二次上樓，以便全部取走。另有帶走一些相簿，「而家可以（上載）雲端，以前無㗎嘛，晒相好有價值。」
丈夫劉生則表示，上樓後有兩個怪異地方，一則是雪櫃由廚房被搬至客廳，致他們收拾物品耗時；二則原本每年用於吃盤菜的卡式爐，被移動到隔壁單位，需要待隔壁回覆才可處理，令今趟帶不走卡式爐。
談及大火，劉太表示她們住宏盛頂樓，事發時沒響火警鐘，但從高空見到鄰座大廈起火，於是離開。而由於丈夫要用拐杖助行，「所以搏一舖揸𨋢走」，最終成功逃生。
宏泰葉太：不知在世家屬有否資格出席簡介會
早前已上宏泰閣、代大火中喪命老爺收拾家當的葉太，表示自己今天是特意回來宏福苑，去找民政事務署，跟進現時戶主逝世後的後續安排。
葉太稱，此前曾打過 1823，亦曾嘗試聯絡一戶一社工、市建局等，申報戶主已過身，但沒收到新法團「合安」的聯絡。
葉太續指，「合安」本稱本月上旬會有簡介會，但現時葉家的戶主已去世，在世的家屬聯絡人包括她，有否資格、渠道申請出席，沒有人知道，亦不知何時有簡介會出現，另法團餘下的款項、後續大廈去向、家屬可向誰提出死亡索償，再到「合安」是會管理至何時等，居民都一概不知答案。
她又指，政府解散了原有法團，再委託「合安」去出任新法團，認為既然是委託，即必對「合安」有信心，故「應該基本呢啲嘢要做足」。
宏盛居民蔡生：望政府汲取教訓
唔好畀香港居民再受苦難
76 歲的蔡生是宏盛閣居民，他表示本來很希望上樓，但今日自己剛好骨膜發炎，「但我希望近距離望一望自己嘅屋企。」
他希望港府從今次事件中汲取教訓：「希望政府好好汲收教訓，所有部門都要汲收教訓，唔好畀香港居民再受到呢啲苦難。」
對於安置方案，76 歲的蔡生自言沒有精神和魄力，等候「十年、八年」的重置，希望可以在一、兩年內獲安排地方居住，「我就已經安心⋯⋯我要求唔高」。
宏泰29樓黃生：爸爸罹難當天70歲生日
「所以無機會再同佢講聲生日快樂」
黃生與父母一家三口 2006 年搬入宏福苑，住在宏泰閣 29 樓，但父母在大火中罹難。他上樓前受訪，稱「媽媽、爸爸喺呢個人禍裡面已經離開咗喇」，又指父母皆是逃生時在後樓梯死亡，他帶了父母喜歡的花，「希望當然想擺喺後樓梯，但如果唔可以，都想擺喺屋企裡面」。
他憶述，外間最後一次聯絡到媽媽時，她說「喺後樓梯逃生緊，即係好辛苦啦，跟住佢最後尾都係咳到講唔到嘢咁，（當時）大概係兩點十啦」。而大火當日是爸爸 70 歲生辰，媽媽則 60 幾歲。
「因為爸爸（哽咽）發生意外當日就係嗰一日生日，所以無機會再同佢講聲『生日快樂』，希望佢哋安息。」
黃生說，事發至今心情仍然不好，「keep 住好掛住屋企人」，社工幫助足夠，亦有心理輔導。他已從相片大約知道與父母的家「Total Loss」（全部損毀），但今天上樓仍希望找到一些父母的遺物，例如媽媽的首飾，「如果執到就係一個 bonus。」
「有緊張又有啲失望，都等咗 5 個月啦，間屋都唔知變成點，都已經化成灰，啲灰都唔知會唔會已經吹走咗，或者點樣」。他又認為即使如官員稱有 12 小時執捨，仍是不夠，他希望能與居住的家「講聲最後嘅再見」，指是暫別，「唔係一個永遠嘅告別」。
黃生曾經到聽證會，他說對於涉事各方說詞「可以話失望嘅」。
「而家畀我嘅感覺好似係，畀錢人哋燒自己間屋咁樣囉，畀咗錢，都得唔到我哋想要嘅結果，仲要發生呢啲咁嘅人禍，每一個部門都話唔關自己事，但其實每一個部門做多少少，行多一步，咁就可以做到更加多，或者可以避免呢場人禍發生。」
他又指傾向爭取原址重建，「呢度始終係大埔區一個比較方便嘅地方，想搭地鐵又得，搭巴士又得，又有海景又有山景，咩都比較方便」，即使父母在此地罹難，他仍想住在這裡，「因為呢個始終係我成長嘅地方。」
對於政府提出的回購方案，黃生形容「根本就係無得揀，畀啲好似有得揀嘅方案畀居民，但呢啲都唔係原區，叫一個生活咗幾十年喺大埔呢個社區嘅人，搬去第二個區，我覺得好唔合理」，而他仍在考慮會不會賣出業權，望盡量爭取原址重建。
對於政府宣布寬免宏福苑災民稅款，黃生稱「好過無」。
宏新閣22樓龔生：遺失約10萬元金飾 報警都無意思
居住在宏新閣22樓的龔先生，與太太在此居住了 3 年多。他原本上月上樓，但他改期至今天才重回家園。他透露，遺失了 4 隻龍鳳鈪及少量金鏈，價值約 10 萬元，但他沒有報警，「因為報警都幫唔到你，我唔覺得搵得返⋯⋯報警都無意思」。
他指單位得燒毀情況較為嚴重，並沒有很多東西可以取回，「好多嘢喺度，但都用唔到」，故 3 小時的上樓時間足夠。他最後取回了證書、身份證明文件，以及結婚周年相關有回憶的物品。
他指上樓心情緊張，同時亦很無奈，「好多嘢唔接受，都要迫自己接受。就好似唔見咗嘢，都要迫自己接受唔見咗嘢」。
「唔捨得就一定會，不過人都要向前望。」
對於政府的安置方案，龔先生指相信政府有盡力，但一定會有人不滿，因為每個個案的情況不一樣，各單位燒毀的程度亦不相同，方案不可能符合所有人的想法，「但我哋身為居民，希望在政府的幫助下，有一個長遠的安置。」
他贊成召開業主大會，但要想清楚討論議題和目的，並集合有共同意向的居民，否則若無法達成共識亦無意思。他亦希望聽證會「可以有啲結論出到嚟……希望應該負責嘅人，負責返」。
宏泰閣胡生：帶花悼念外傭 盼尋回其手機
胡生由出世一直居住在宏泰閣，至今已經 21 年，家中外傭在今次大火中離世。他指外傭已在其家中工作了 7 年，他今日特意帶了花束，悼念外傭與其他離世的鄰居。胡生表示，事發後已經與工人姐姐的家人聯絡，希望上樓可以找回她的手機，交還其家人。
被問到想和工人姐姐說甚麼，胡生表示：「要講之前都講晒，佢都辛苦啦」。
他指事前已經收到單位門口的相片，可見現場成為「災場」。他自己亦希望可以取回相片和硬碟，「緊要嘅回憶，睇吓搵唔搵到」，其他東西則只是錢財身外物。他表示已打定輸數，料只須上樓一次已足夠取回物品。
被問到會如何與單位道別，他說：「望一眼，記住佢，就 OK。」
宏盛閣74歲麥生：我哋唔係大富大貴
間屋係畢生經營、另一個骨肉
「傢俬冚棒唥都大過你哋（記者），冚棒唥都四五十年前嘅傢俬嚟」。
住在宏盛閣高層的麥先生，落樓後推着手推車期間受訪，他正搬運傢俬，到仁濟的服務站處理暫存。他說今次上樓只能帶走 3 件傢俬，其餘大部分都未能帶走，希望能再次上樓執拾。
「我哋其實間屋好乾淨㗎，除咗灰塵之外，因為我哋無波及到吖嘛」，他以前做設計古董傢俬，傢俬很多都「自己出圖自己做㗎，幾十年都啱用，因為係最簡單嗰個款式」，材質是酸枝、花梨實木，有部分「係泰國花梨嚟㗎」。
麥生說古董傢俬難以估價，「逢係古董嘅嘢，你啱就好貴，唔啱就垃圾嚟，古董即係舊嘢嚟之嘛」，不過上樓時間有限，而且只能走樓梯，很多都帶不走，「局長（副司長卓永興）話齋斷捨離囉，想唔斷都唔得，想唔捨都唔得，而家想唔離都唔得，一定要離喇」。
「無奈梗㗎啦，不過托賴、感恩就係全部屋企人無事囉。」
他稱自己就快 75 歲，屬於宏福苑首批居民，「1983 年入嚟，個個都係二三十歲儲夠錢買樓，第一期入到嚟，宜家呢度 43 年，即係個個都七字頭㗎啦」。
「我哋畢生嘅經營就係呢間屋，我哋又唔係大富大貴，後生仔儲咗一筆錢，又建（買）咗間屋，一路儲吓儲吓啲嘢，細蚊仔出晒身，咁我哋諗住真係住到走嗰日㗎喇，但係（而家）提早畀我哋結束咗間屋囉，係我哋另外一個骨肉嚟㗎間屋，包括我屋入面嘅嘢。」
麥生稱，部分居民「願意交返間屋出嚟」，「無辦法呀，都住咗咁多年，啲火災嘢大家都唔想」，希望「要負責任嘅人全部都要負責任，要拉坐監嘅全部一定要拉坐監，呢個就係我哋個期望」。
他亦有留意聽證會的進展，稱「大家都知道啦吓，承建商肯定有問題，無得抵賴㗎喇，同埋顧問公司，全部都係一擔擔嘅」，他繼續說，「政府嗰啲監察部門呢，不論消防局（處）又好，ICU 又好，或者係屋宇署又好，你喺嗰個聽證會冚棒唥都係，個個都係『A 字膊』㗎，冚棒唥都卸晒膊，即係有待改善，但係就無待清算，呢個就好唔滿意」。
他又稱，特別想感激事發至今，很多社會熱心人士的幫助，包括仁濟等所有社福機構，「同埋唔識嘅，尤其是第一、二日，Day1、Day2，好多四方八面呀，車啲物資嚟呀，真係好好，真係好好」。
「我哋最多住多十零年，90 歲唔瓜老襯都入老人院啦」，麥生說，一群 70 幾歲、願意搬走的災民現時希望政府協助統籌新屋清水樓的簡單裝修，因為怕遇到「唔老實嘅裝修工人」造成二次傷害。
「我唔介意佢（政府）收錢，由政府去策劃一啲簡單裝修，譬如間咗房、鋪吓地下咁樣，我哋個個 70 歲以上，我哋無能力搞呢啲嘢，後生佢又要返工，社工都幫唔到你吖嘛呢啲嘢」。
宏盛中高層脫先生：有隱性脊柱裂不能搬重物 獲義工幫忙
宏盛閣中高層住戶脫先生，今日在上樓前透露，最希望可以取回愛犬骨灰、菲林年代的相簿等。他指沒有收到單位的相片，社工相信單位情況尚可，但他看到旁邊的 6 號單位已被燒毀，故亦感到擔心。
對於只得 3 小時收拾，脫先生指自己以往的搬家經驗中，「就算 pack 好所有嘢，斷捨離咗，入晒箱，由電梯落樓到另一大廈宏昌閣，都無可能 3 小時搬得晒」。
脫先生透露，自己有隱性脊柱裂，不適合搬重物，今日有義工幫忙上樓，而 71 歲的母親亦會上樓。他之前已有游泳練習，「如果唔係，都唔知道點樣上度廿幾層樓梯」。
宏泰27樓何小姐：9歲小孩聞異味 一家三口及時逃生
居住在宏泰閣 27 樓的何小姐表示，為了今日上樓，事前有多做運動「練氣」。對於上樓，她覺得消息很混亂，因為有些人家中物品遺失，有些人家中則完好，「抱最大嘅期望，但又有最大失望嘅預備」。
她稱，事前沒有收到單位的相片，但已做好心理準備。她會檢查夾萬是否完好，「唯一僅存仲有機會喺度嘅嘢」，另外亦希望取回小朋友的個人物品。
何小姐稱，9 歲的小孩並沒有要求一同上樓，因為他對逃生時走樓梯的畫面，仍然「有少少驚」。小孩已經寫下了物品清單，希望媽媽代為取回。
何小姐回憶道，事發當時是因為小孩聞到異味，他們才發現有煙傳入廚房，其後聽到對面大廈竹棚起火的聲音，一家三口隨即逃生離開。
宏泰29樓譚生：好多街坊走咗，人禍囉
譚先生居住在宏泰閣 29 樓，在這裡已經居住了 34、35 年，對宏福苑的街坊及環境感到不捨。他 70 多歲媽媽亦想上樓，但長者要登上 29 層樓梯有困難，今日會在現場附近等待。
譚生落樓後受訪，表示他剛才在同層逝世鄰居的單位門外鞠躬，「因為可惜㗎佢哋都」。
有記者問他是否覺得一定只能賣業權，沒其他方案，譚答「真係要問政府，你都睇到安排點樣，你哋個個都知」。記者再質疑「但你可以爭取⋯⋯可以唔賣㗎」。譚答「始終有屋企人嘅，都係等安排。」該名記者其後多次追問同一議題，譚最後說「乜我哋有得揀咩，其實你問咗咁耐，乜我哋有得揀咩？」
譚生上樓前亦曾受訪，他稱最希望見到的鄰居已經在大火中離世，「同層有好多街坊走咗，人禍囉」。
他指事前已收到單位相片，顯示屋內客廳有損毀。他表示火災當日他正在上班，知悉大火後隨即趕回家，「好震驚、好震撼」。
對於今日上樓的心情，譚先生指：「冇得揀㗎嘛，有得揀㗎咩？」，認為居民處於被動角色。被問到會否希望原址重建，譚先生反問：「ban 咗㗎嘛…我哋有得希望㗎咩？有希望㗎咩？」
宏泰27樓莊女士：帶走30多張繪畫作品
最近畫宏福苑「因為我想懷念」
莊女士所住的宏泰閣，是今次大火傷亡最嚴重的其中一幢大樓。她表示單位「好彩」沒怎麼被燒，「係有少少灰，我以為會燒到熔熔爛爛，人哋嗰啲係燒得好慘㗎嘛，我哋就無囉，完全無囉，好好彩」。
她今次能順利帶走屋內 30 多張自己親手繪的畫，亦對此感到開心，稱因「估唔到呀，估唔到呀真係」。
她又說那些畫主要都是去旅行的風景畫，自己一畫就 10 幾年，最喜歡繪畫維也納風景哈士達，稱是歐洲最美小鎮，「因為我去過呢，又覺得真係好靚⋯⋯好彩攞到」。她又提到自己學畫是加入香港美術會開始，邊學邊畫，間中有畫展，但笑稱自己不是畫得好好。
被問及有否畫過宏福苑，她說有，但不在宏福苑單位，「嗰幅最近畫，因為我想懷念宏福苑」，該畫主要畫出屋內情況，抒發感受。她解釋，「係驚忘記呀一方面，另一方面都係自己屋企，住咗喺度 43 年⋯⋯個仔咁大囉，個仔 3 歲就搬入嚟住。」
講起大火，她表示「呢個人禍嚟」，又指居民想開業主大會，「但佢哋硬係唔開」，指因若有業主大會，外界就可以知道居民意願，居民亦可表達是走是留。被問及會否想回宏福苑居住，她表示「如果佢整返好，我會㗎。等 10 年我哋都會㗎，我唔怕鬼㗎。我哋嗰座死得最多人口㗎嘛⋯⋯我唔怕鬼㗎，我 OK 㗎。」
宏泰27樓黃先生：好傷心，隔離屋變晒灰、死咗人
莊女士的兒子黃先生表示，媽媽在此宏福苑住了 40 年，自己則在 2008 年遷出，直至大火之前的周末，因一些原因要把家當暫放媽媽的家，起初以為會被燒光，但原來單位沒事，只有個別儲物箱有被打開的痕跡。
黃說當天「係好好彩」，家人都不在家中而避過一劫，「但係就⋯⋯反而係好傷心，隔離屋變晒灰、死咗人」，指該鄰居是他遷出後才搬入，但媽媽認識對方，故有在單位外放了電子蠟燭悼念。
黃講起感受時頻苦笑，「其實我係好傷心，我傷心嘅位，反而係因為（自己）無事呀。即係我有時係會諗，點解會剩係我嗰間（單位）無事嘅呢？人又無事、嘢又無事。即係我，我真係會傻到會諗，如果我間屋係燒咗，但如果我隔離個鄰居唔使死嘅話，咁⋯⋯咁咪燒囉。」
他隨即哽咽，「咁所以，但係嗰陣時又唔可以，諗咁多㗎喇。上到去咪係係咁執、係咁執囉。反而係⋯⋯頭先例如都撞到隔離屋，隔離屋都係燒左嘅，咁唔敢表示出好開心，或者表示出仲有好多嘢剩，真係唔知點解咁好彩。但係，係會傷心囉反而，尤其是行入去嗰條路，真係喺度大個⋯⋯」又提到宏福苑居民的聯繫深，會知道同層以至樓上樓下每個單位住甚麼人，不是現時的樓宇鄰里關係可比。
他亦憶述記得回家路途中的不同設施，但現時宏泰閣、宏新閣的字，被燒至「甩晒皮」，形容「嗰種感覺好恐怖」。他又說，雖然曾看過相，亦間中會回訪宏福苑「望吓」，「但係都好傷心，好傷心、好傷心」。
今次回家，他說希望有下一次上樓，故特意帶了乾花，「希望間屋香返啲」，亦擺了公仔「等佢睇住（單位）」，「而家好多灰塵，唔係好鍾意咁樣，想佢靚返少少。」
宏盛26樓洪小姐：開業主大會好似洪水猛獸咁樣
關於人命嘅嘢你又唔見咁嚴謹
住在宏盛閣 26 樓的洪小姐與朋友帶了幾個行山背囊，她在上樓前受訪，稱難以形容這幾個月的心情，「因為每一次有新啲咩新政策，都好似係一個，再不停喺度受傷，唔係剩係話嗰個火呀，火災之後，每一次嘅任何嘢，都好似不停喺我哋個傷口灑鹽咁嘅感覺囉」。
她又指，「合安」已接手法團幾個月，但從未真正接觸業主，業主想開業主大會卻一直受阻撓，「而家我哋要開個業主大會都，好似洪水猛獸咁樣，點解要咁驚我哋開個業主大會呢？」
被問及需在業主大會處理甚麼事，洪小姐稱「好多嘢需要」，又指「有啲嘢唔係我哋業主可以自己去做㗎嘛，你有啲嘢需要法團去幫你做㗎嘛，各樣呀申訴嗰啲嘢，需要法團去幫我哋做，咁你（合安）有無幫我哋做吖？如果有做係做咗邊度？（做成）點樣呀？如果未做，點解又未做呢？」
「話晒我哋都係業主吖，而且呢件事我哋已經身心疲累喇幾個月以嚟，吓嘛，每做一樣嘢我哋都好似要好大氣力先去做要求到，但其實開個業主大會係好輕擎嘅嘢，你又要咩查，又要咩冊又剩，但如果關於人命嗰啲嘢你哋可以咁嚴謹，我哋就唔使而家咁多嘢畀你哋做啦」。
洪小姐續指，「關於人命嘅嘢你又唔見咁嚴謹，我哋開個業主大會，簽個名，Google Form 你又話唔知有咩假簽名又乜又剩，咁你點解授權票，打個交叉都可以收貨，關於人命嘅嘢，你啲證書可以重複使用，有無咁嚴謹呢？所以令人好氣憤呀你明唔明呀？呢幾個月心情呀，最最最最多嘅就係憤怒囉，除咗傷心之外，最多最多就係憤怒囉」。
她又說，聽證會揭出的事情「簡直係匪夷所思呀，非常荒謬荒謬荒謬，無辦法形容呀，只有荒謬可以形容呢件事」。
至於單位，洪小姐指未有收到相片，暫未知損毀情況，又指住了 20 幾年，「入面嘅一磚一瓦一針一線都係我哋成啖心機擺喺入面，冇嘢係可以咁容易斷捨離」。
對於政務司副司長卓永興的「斷捨離」建議，她稱「唔知佢個定義係點樣啦，每個人斷捨離呢 3 個字好難應用喺每一個人身上囉，對我哋一般打工仔嚟講，間屋係用我哋成世人嘅心血嚟㗎，唔係你話斷捨離就斷捨離㗎」。
居民吳女士：今朝想喊 噚晚瞓唔着
宏福苑居民吳女士今日帶了大背囊，準備上樓收拾物品。她指沒有收到單之位的照片，因此相信單位沒有太大問題。她表示，希望能夠取回證件，以及一家人由童年至今的相片。
對於相隔半年終於能夠回家，吳女士感嘆：「好慘，今朝都想喊，噚晚都瞓唔着覺。」
宏盛26樓鍾生：不捨鄰居但原址重建可能性低
71 歲宏盛閣 26 樓住戶鍾生，表示在宏福苑住了 40 多年，大火當天一家人都正外出，故沒影響，而自己是看新聞才知悉事件，形容自己「感受唔係咁大」。
今次上樓，鍾生表示想帶走重要和具紀念價值的物品，例如相機、兒時購入的舊唱片和黑膠碟、夾萬裡面物品等。他亦希望碰到鄰居，但料大家都會忙於收拾物品。另自己平時有運動習慣，故料上 26 樓也問題不大。
要離開宏福苑，鍾生說自己不捨得，尤其是朋友、鄰居、設施、空氣，但認為原址重建可能性低，「因為始終都有咁多人⋯⋯唔喺度啦，感覺上無咁好」。
他解釋，自己有點迷信，「覺得就係死咗咁多人喇，佢喺嗰度重建，雖然話可以懷念吓，但覺得好似亂葬崗咁。」
宏泰低層歐太：帶花悼鄰居
感謝街坊過往照顧
居住在宏泰低層單位的歐太，今日帶同花束和零食到場，悼念因大火離世的街坊，「因為宏泰死傷者較多，有些街坊識咗一段日子，所以希望對佢哋表達少少懷念⋯⋯一陣都未知情況，睇吓可唔可以擺低喺大廈出面，尊敬、懷念返佢哋」。
「希望多謝大家過往照顧我哋，始終宏福苑街坊感情好好，比我之前住過大埔其他屋苑好，所以覺得有呢件事好可惜。」
對於早前有居民於鄰居門口獻花時被禁止，歐太認為單位門口等位置都屬公眾地方，希望「可以畀返少少同理心」。
她表示，以往每家每戶都要經過同一條路回家，「撞口撞面全部都係街坊，識嘅固然會打招呼，唔識嘅落雨都會遮埋你，見到你帶住小朋友出入，凍咗會提你著衫」，街坊過時過節亦會在公園相聚，如今屋苑「已經同我哋 11 月 26 日離開一刻唔同晒」。
如今回家上樓，她形容會回想起過往十多年的時光，心情困難、忐忑，「行入屋苑已經好難，行入宏泰閣更難，上到屋企見到自己一手一腳和先生建立嘅家，而家係另一個樣，都好難⋯⋯回家呢條路好漫長」。
歐太表示，早前已經收到社工的相片，顯示單位已被燒毀，預計沒有什麼東西可以收拾，但她仍希望有機會上樓取回一些紀念品。
歐太下樓後，表示今次上樓主要想找回結婚戒指、首飾，但因單位狀況差，「冇無乜特別嘢搵到」，並提到夾萬裡原本放了港幣、外幣、小朋友出世紙、結婚證書、鑽石、錶等物品，最終只見到金器，以及燒剩只見到號碼的紙幣。
歐太上樓前說過想擺下一紮花、零食給逝去鄰居，下樓後她表示警方、社工「都好明白事理」，容許她上樓前放在大堂信箱上，下樓後仍然見到。她說是了結一件心事，指本來好擔心是否可做到，但現時做到，「覺得心裡面舒服一啲」，亦希望物品可以陪伴街坊。
被問及早前覺得回家的路很難行，實際再走一次有何感受，歐太表示入屋苑後「真係每一步都難」，指以往熟悉的公園、大堂入口等，現時「全部都好陌生」，「直情好似另一個地方、另一個屋苑，重新行入一個未去過嘅地方。」
她提到今次小朋友沒能上樓，但有以鉛筆在白紙畫畫向宏福苑道別，並哽咽引述小朋友寫上一句「11 月 26 日，宏福苑嘅大火災，我冇咗我個童年」。她說，「我哋大人都覺得唔容易嘅時候，要小朋友面對一夜間無咗家園」也非易事，至於小朋友想她們協助帶走、過身親人留給他們的物品，今次也未能找到。
歐太又說，雖然事已發生，身為宏福苑街坊，「我諗我哋大家最關心，係想知道點解會發生呢件不幸嘅事。到底點樣將來，香港唔會發生第二次。因為呢個太突然真係大家無試過」。
她續說，希望新的法團「合安」可以召開業主大會，按章讓大家表達意願、知道屋苑發生何事、下一步如何處理屋苑事務，「同埋真係好希望，靠聽證會可以一步一步抽絲剝繭，俾大家知道點解宏福苑會燒咗，點解呢件事會咁嚴重」。
她亦提到，自己一個月前問過解說隊，大廈的保險會否分給業主，抑或如賣了業權「就等於我哋同宏福苑斷絕關係」，亦問過長遠方案，如現時所住的過渡性房屋要收回，政府是否會繼續安排其他過渡性房屋，直至政府方案出爐，但解說隊未能回答。
她續指，「最大問題就係，你話畀我哋聽呢度唔適合居住、原址重建，要諗下一步嘅話，咩都唔知，點諗下一步呢？你同我講呢度起公園，咁不如你起個足球場啦，而家每一日，我哋聽聽證會其實就係踢緊波之嘛。唔同嘅機構、唔同嘅部門，無論公營定私營，其實大家都喺度講緊自己，為緊自己說話，講緊自己嘅故事。好希望聽證會可以令到大家更加多資料，令到宏福苑、走咗嘅居民，還返一個公道。我哋作為業主，得到應有嘅保障。」