宏福苑宏道閣、宏昌閣的居民，周二（28 日）繼續分批上樓，為該兩座災民最後一日上樓。父母命喪宏昌閣的蘇生，在父母家中播放《陪著你走》，又在發現父母遺體的位置點起電子燭光、放下鮮花悼念。他臨走時哽咽說：「爹哋媽咪，我哋走喇⋯⋯跟我哋走啊，我哋帶你哋去新屋嗰度呀。」
宏昌閣 29 樓何小姐，在大火失去媽媽，她的單位嚴重焚毀，只能兩人上樓，最後決定由弟弟與弟婦負責。何小姐帶來一束鮮花悼念媽媽，她說假如仍有機會回家，會跟媽媽說，「我哋屋企會好努力同爸爸行呢條路」。
政府晚上指，全日共 130 戶 498 人上樓，進出大廈的平均時間是 2 小時 33 分鐘。
Day8｜李太悼亡夫：我要過新嘅生活喇 高以蕾放紙鶴悼鄰居
Day9｜宏福租戶「上樓難」 宏道丘生：一家三口到場 業主只一人現身卻不讓兒子上樓
相輯：上樓第九日 收拾的家當
攝：翁志偉
宏道謝小姐：因時限到不能折返上樓
無法與單位告別
謝小姐一家四口住在宏道閣逾 40 年，他們的單位在大火中嚴重損毀，廚房完全焚毀，房間及客廳則被熏黑。她的媽媽因行動不便未有一同上樓，而謝小姐與約 70 歲的爸爸及家人周日（26 日）上樓收拾。
謝憶述，當家人得知可上樓收拾時，父母相當興奮，「我阿爸一早幾個月前已經話，幾時可以上去，想快啲攞返啲嘢啊，想睇吓間屋點啊」。一家人又召開「家庭會議」，列出清單及位置，生怕遺漏重要物品；同時準備大鐵鏟、小鐵鏟、紅白藍袋、枱燈、安全鞋等，「好似走難咁」，希望可收拾好全部重要物品。
無法隨行的媽媽特別叮囑她，要取回教會的祈禱手冊；爸爸則緊張想取回相機，「佢話係第二個老婆咁」。謝則希望取回相簿、證書、求學時的獎牌與獎杯等，「都係珍貴、細個好珍貴嘅嘢」。
謝小姐一家均為基督徒，父母為人較豁達，「話冇咗都冇所謂啦，交畀天父，但我又好想要返啲相，因為冇就真係冇㗎啦」。
相隔 5 個月，謝小姐與家人再次步入家中，指即使開盡所有頭燈，現場仍「黑鼆鼆」，「其實都係唔開心嘅，不過呢我又要忍住，因為費事喊咗嘅話呢，咁我就執唔到嘢啦，同埋我又費事屋企人擔心，咁我就忍住冇喊」。
4 人立即拍攝紀錄並收拾，發現家中大部分物品已被熏黑，「但我哋都冇諗咁多，見到相簿就袋袋袋，因為係唔夠時間」，匆匆忙忙完成收拾，帶走掛在牆上的十宇架、少量金器、部分衣物、相簿及獎牌。她說，屋內的時鐘仍停留在 4 時 13 分，即是大火蔓延至她們家的一刻。
他們最終帶走 6 袋家當，幸運地成功取回清單上的物品，亦將媽媽的祈禱手冊、爸爸的相機物歸原主。收拾完畢後，謝一家帶同家當寄倉時偶遇鄰居，「咁佢哋攞咗幾十袋，我覺得佢哋好叻，我都戥佢哋開心」。但她指 3 小時「完全不足夠」，並已向社工表示想再一次上樓，「最想成間屬於我嘅都搬走」。
謝小姐指，父母為宏福苑一手業主，她出生後亦一直住在那裡，直至近年結婚才遷出。謝最喜歡宏福苑的遊樂場，「我細個喺下面玩瀡滑梯，之前又同小朋友同瀡滑梯影相，係超靚㗎嘛，跟住佢（政府）一開始就拆咗個瀡滑梯，我覺得好唔開心，前兩日去到係完全面目全非，因為地下得返啲平地，乜都冇」。
她又指，上樓收拾時一度落樓擺放物品，打算再返回單位卻被人員告知時限已到，不容許折返，無法與單位告別，「如果真係道別，其實可以寫啲嘢喺間屋度，我下次上去一定會寫啲嘢喺埲牆啦，或者寫張卡啊，我真係唔捨得㗎」。
宏道27樓歐陽小姐：呢度係我哋嘅家
唔係出得起錢我就要老奉賣畀你
與母親和妹妹同住的歐陽小姐，今早回到宏道閣 27 樓的家中，拿走 4 隻貓貓的骨灰、金器、相簿、證書等家當離開。她透過 WhatsApp 聯絡《法庭線》記者，指單位完好無缺，僅大門因消防破門時損毀，「我哋想表達嘅係，其實宏道閣受損情況真係唔係好大，維修其實就可以住得返⋯⋯我哋都好想知道成個宏福苑嘅驗樓報告」。
歐陽自出生在宏福苑居住，家人是第一手業主，她說上樓 3 小時忙於執拾，「都無咩時間可以感受」。她又強調「我哋唔係咩都可以斷捨離，尤其是對宏福苑，呢度係我哋嘅家，唔係出得起錢我就要老奉賣畀你」，對於政府的收購方案，歐陽指「我唔想面對呢個問題，我完全理解唔到政府背後有咩理據支持點解要咁做？其實咁樣係浪費更多嘅社會資源」。
離開單位之前，歐陽向她的家留下說話：「今日同間屋講咗，今日要暫時再離開先，我哋會再返呢個屋企。」
宏道75歲李生：單位鐵柱加固一無所獲 寄語「及時行樂」
75 歲宏道閣 26 樓住戶李生，特意為今趟上樓買拐杖「慢慢撐上去」，最後休息兩輪，用了「三、四個字」達陣，「最主要還個心願，望吓燒成點」。
他憶述單位燒得「好犀利⋯⋯堆滿晒啲泥土」，內有「八支鐵柱頂住天花」，政府只准每次一個人進入。他曾手執鐵鏟親力鏟泥，「鏟乾淨都搵唔到」其最想找到的勞力士錶、金飾等，他思疑是工人進行加固工程時起貪念取走，但沒打算報警，「搵唔到都算喇，最緊要個人安全啦，無咩嘢，托賴，最緊要安全。」
在宏福苑度過大半生的李生，在此住了 43 年，「我哋白表申請⋯⋯又畀你抽中」，遂由九龍搬至新界，成為大埔的「開荒牛」，更笑對記者話當年，「仲係用緊柴油火車⋯⋯大埔中心睇住佢開發嘅⋯⋯讀書時期新娘潭，呢度一片田地嚟⋯⋯變化得幾犀利呀」。
回憶大火，李稱當天「好在一早出咗門口，約咗個朋友，所以早咗出門口，先避過。如果唔係呀，喺屋企瞓下覺就死啦 ，燒到咁犀利，睇到都傷心」，並提到友人的兒子夜更當值，不幸當天落班後因睡覺喪命。
李續說，去年 11 月友人相約他去旅行，並約他大火當天到銅鑼灣商議旅行細節，故早早出了門，繼而避過大火，「真係好橋妙，世事嘅嘢」。李笑說「我跟住落嚟就去山西，5 月份去山西、6 月份去內蒙。而家要及時行樂喇，做人嘅嘢。有人約你去玩嘅，咁咪去囉。」
鄰居單位尋獲母及兩外傭遺體 李氏兄妹鄰居門外擺花 警要求移至屋內
李國鴻的母親居於宏昌閣高層，大火當日跟兩名女傭在家，疑感害怕找鄰居幫忙，翌日消防員在鄰居單位發現 5 具遺體，包括李家 3 人及鄰居兩人。
李國鴻因行動不便未有上樓，但自製紅白藍尼龍袋的拖拉板給上樓的弟妹，方便他們搬運物品，又列出家電清單讓他們收拾。
李家的單位沒怎受損，兄妹倆取回電視、抽濕機、水壺及風扇等物品，亦取回相簿、40 年歷史的時鐘，以及兩女傭的家當。家中還有各種「古董」，包括裁縫用的頂針、衣車，但兩人不打算取走。
李家收拾後打算到鄰居門口獻花，惟現場警員指不得擺放物品在他人單位，亦不得拍照，兄妹倆擺花悼念後，移走花束至母親及女傭睡房。
李國鴻的母親及兩名外傭在大火期間離世，李的弟妹除了執拾家中物品，亦有尋獲外傭遺物，包括身份證、信用卡及金鏈，李國鴻晚上到工權會交還遺物。
工業傷亡權益會幹事 Esther 表示，4 月初提醒僱主協助外傭收拾遺物，「始終佢哋都需要人幫手，佢哋都分唔到邊個打邊個」。她表示，點算財物後會拍照予僱主，歸還外傭家人。
宏道30樓郭先生：不解為何政府不為居民修理升降機
今天上樓收拾物品的郭氏夫婦，住在宏道閣 30 樓。66 歲的郭生苦笑稱，火災當天正在上班，「好彩未退休咋。如果退休呢，我哋就喺屋裡面喇，唔知會點，可能會死啦」，又提到因有工作在身，能分散注意力，就算災後未能重返宏福苑，亦較其他已退休街坊「輕鬆啲」，「退咗休就辛苦喇，日日望住」。但即使如此，他事發之後亦傾向「唔諗」、「唔望」宏福苑，「新聞都唔想睇咁多」。
為了上樓拾物，郭生說苦練了 10 天腳骨力，又指因沒收到照片、不知單位情況，難以判斷是否有足夠時間收拾物品，「夠都唔定，好難講，盡量攞啦⋯⋯唔攞，咁我哋所有回憶都無晒」。他不解為何政府不為居民修理升降機，就算未能載人，亦可載物，「我哋（居民）都舒服好多」。
他和 63 歲妻子目前暫住中轉屋，他期望可以再次住在宏福苑，「就算無得揀⋯⋯都希望政府改變初衷」。他認為，宏道閣燒得較少，修理後應可再住人，「唔明點解一刀切，七座全部要拆，都唔係好明點解」、「宏志閣收購更加荒謬㖭，嗰座完全無事，做乜要拆佢？一來唔環保，二來你夾硬逼人要走做咩姐？」
情繫宏福苑，郭生解釋因「住慣呢區真係好舒服、真係好舒服，因為個環境啦，尤其是夜晚黑跑步，海濱公園、海邊跑步，其實係好舒服，我覺得都幾難搵到。所以你話如果政府起返俾我，等十年我都等。」
宏昌高層鄧生：找不到 BLACKPINK 簽名照 曾向社工申改期但無回音
一家三口住在宏昌閣高層單位的鄧生，今天連同一位朋友回家執拾。他說單位有窗戶爆開、全屋熏黑，「唔係咁理想，同埋下面燒得好勁」，致放在地上的物品亦受波及，當中廚房損毀嚴重，連膠櫃桶都被燒溶，他本來打算帶走一套不銹鋼廚具，「都冇時間、精力去摷返佢出嚟」。
鄧又指單位光線昏暗，即使帶了照明設備，亦難以翻找細小物件，例如他找不到韓國女團BLACKPINK 成員 Jisoo 的親筆簽名照，「唔知擺咗喺邊個位，咁都幾傷心」，惟幸取回 BLACKPINK 手燈、公仔、本地漫畫家小克為他與太太繪畫的婚照。離開前他亦拿走一壺自己釀製的荔枝酒，「其實我無所謂嘅，佢（義工）話都攞埋啦最後，都臨尾先攞嘅，攞落嚟同佢一齊分享囉之後」。
鄧稱 3 小時執拾時間「都未執到好多，我諗執咗⋯⋯十分一唔知有冇呢？」他稱因單位情況混亂，不容易拿取物件，「要左砌右砌先至慢慢執到啲嘢」，上落兩三次搬走十數袋物品，希望還可以再次上樓，「諗返起啱啱有啲嘢，一開始諗住攞原來都會攞漏，希望上多次攞返囉」。
他另指本來向社工申請改期但無回音，「見到其他街坊都有啲想改期嘅，但原來完全冇回音嘅，咁所以都係，都今日上咗先囉」。
宏道31樓古箏演奏家：失樂器如失去雙手 「點會斷捨離呢？你都黐線」
住宏道閣 31 樓的馬忠駒是古箏演奏家，已有幾十年演奏經驗，家中擺放了 40 多架古箏。他指單位未被燒毀，中午在朋友及關愛隊協助下，搬走其中十多架古箏，起初擔心自己與友人在 3 小時內未能搬走太多樂器，幸得現場民安隊及警員幫忙，「我預算拎好少咋嘛，得幾對手，點知佢哋幫我拎落嚟，我真係好開心。」
他又指，入屋後未有時間細數，「求其邊個重要啲就推出去」，仍有約三分之二的古箏留在單位，指有些古箏現已買不回，現在的「都唔係呢個樣，都唔係呢啲款，都唔係呢啲質素」，希望稍後可再申請上樓，帶走其餘古箏以及樂譜等。至於已取回的古箏，他指未有熏黑已感到欣慰，因有不少具紀念價值，「幾十年，有啲係老師送嘅，我覺得要攞返。」
他特別提到，其中一架「蝶式箏」由他的老師發明，他於 80 年代帶返香港，「係全港第一個蝶式箏，亦都係我全港第一個彈蝶式箏，所以我一定要攞依樣嘢走。」
對於拾物限制三小時，他表示「全世界都覺得我係唔夠啦」，指做了幾十年人，若有積蓄、有收藏，「嗰個人唔會無嘢㗎嘛」，「即係凡親，可能玩音樂嗰啲，或者某方面去專注，佢一定會收藏嗰啲嘢㗎嘛」。
有記者追問指「但係佢哋要你斷捨離」。馬答「點會斷捨離呢？你都黐線，又令得我憤怒喎。 即係斷捨離，容易講、難做㗎嘛。做咩要我斷捨離啫」。
他解釋，對玩音樂的人而言，若失去樂器，形同「冇咗隻手」，「你係個裁縫，冇衣車、冇盛嘅，跟住你咁點？你係個畫家，冇筆、冇油墨，唔得㗎嘛。」
他表示會將部分古箏搬入倉庫或寄存樂團，又提到樂團六月份會有音樂會，目前已正常排演。
宏昌30樓崔生：單位內發現煙盒杯麵水樽
相信來自鄰屋或工人留下
宏昌閣 30 樓崔生今日上樓，他落樓後向記者提供影片及相片，顯示單位內有大量未燒毀的物品，包括煙盒、杯麵、水樽、衣衫、一批全新獨立包裝口罩，亦有包括他人名字的物品，他估計部分來自其他單位，或者工人在工程後遺留，「咁隔離屋要搵佢嘅物品時，究竟知唔知佢啲物品嚟咗我單位呢？」
崔生又稱，由於大量其他物品堆積，他「入唔到廳嘅範圍」，崔生自己的物品亦被雜物覆蓋。他指雖然單位嚴重燒毀，自己的物品都變成灰燼，但目前無法搜尋自己可以帶走的物品。
崔生亦向記者指，「我只能夠將係嗰啲移開嘅位置嘅 corner 位裡面，盡我可能去搵返一啲係屬於我自己嘅嘢，但我仲要 take care 埋一啲唔係我單位嘅嘢，呢個係，令到我哋喺嗰 3 個鐘頭裡面，其實基本上係無辦法去摷到我要摷嘅嘢啦」。
「我睇新聞就未試過發生呢個情況，即係，呢個唔單止係講緊（被人）移開啲櫃桶，或者被人摷過單位咁簡單，我個單位係俾人當咗係一個垃圾站，我係搵唔到屬於我嘅嘢」，崔生說。
自幼在宏福苑長大的崔生，今早上樓前受訪指原本與父母住在宏建閣，長大後搬遷時，考慮想靠近父母一點，就購入宏昌閣 30 樓單位，後者「都住咗 7 年幾 8 年」，他今天與妻子、朋友上樓收拾，後日則替父母到宏建閣單位收拾。
崔說，收到社工傳來其宏昌閣單位照片，「佢話嚴重焚毀⋯⋯有張門口嘅相，望到入面啲嘢無晒」，當中廚房位置事前已通知他只有一人可以進入。
他指，今次上樓帶備了鏟子、金屬探測器等物品，希望搜回妻子在逃生時未能帶走的結婚戒指，他們結婚 8 年，另外希望取回金器、銀器，「其他嘢都無 expectation（期望）㗎喇，因為都應該都無」，舉例稱屋內原先有許多模型、電腦、相機等都應已被燒毀。至於父母的宏建閣單位，據其了解應該無事。
回顧事件，崔表示心情複雜，「嗰件事，傷害性都大。同埋真係由細開始住到而家，對宏福苑都好有感情。同埋好多街坊其實都唔喺度喇已經，尤其我嗰層，都罹難咗。一方面上到去又抱住無乜嘢拎嘅心情，（另一方面）想返去見最後一面」。
宏道26樓雷生望再上樓：
斷捨離（都）攞唔晒咁多
住在宏道閣 26 樓的雷生落樓後指，今天是兄弟姊妹一同上樓收拾物品，「細佬妹，幾兄弟姊妹一齊合作」，笑稱原預計要用半小時爬上 26 層，但最後 10 分鐘達陣，沿途每 5 層停一停，有櫈休息，亦有人員照顧。
雷指單位「好好彩，唔係波及，係好多塵啫」，又指屋內漆黑，幸有電筒可借。他指今天約花一個多小時收拾，因「今日執之前已諗定晒做啲咩，好輕鬆」，當中有價值、重要的物品大多能夠取回，例如家人的合照，「咁都好開心嘅」。
不過他亦說古董、玩具部分未能帶走，希望有機會下次再上去，亦認為 3 小時不夠，「因為斷捨離，（都）攞唔晒咁多」。雷又稱有拍照留念，向單位道別。
住宏昌父母大火喪生
蘇生：想盡快上到去叫聲 Daddy 媽咪，我返咗嚟
「估唔到上次上完去之後，到半年之後先返到嚟。」蘇生的八旬父母居在宏昌閣，大火期間去世，父親被燒到碳化，母親只餘碎骨和牙齒，透過 DNA 確認身分。
住在宏志閣的蘇生周二（28 日）跟親友上樓，看相片已知悉單位嚴重燒毀，預備燒烤網、金屬探測器等搜索物品，希望尋回父母旅行時所購的陶瓷、紀念品。蘇生準備了一紮花，打算放在遺體被發現的客廳、大門位置，亦分別為父母及「親愛的家」寫上心意咭。
蘇太則不上樓，與蘇生視像電話，跟老爺奶奶告別。蘇生說已有心理準備，但距離上樓越來越近，心情越忐忑，今晨 5 時已起床，「唔希望有遺憾、做漏一樣嘢」。
蘇生憶起，對上一次回家是喝湯，「媽咪好鍾意煲湯畀我飲，再飲唔到媽咪煲畀我飲嘅湯」。他哽咽：「估唔到返屋企嘅路，這麼近那麼遠⋯⋯想盡快上到去叫聲 Daddy 媽咪，我返咗嚟」，也向父母說：「我哋一齊走，我帶你哋去新居」。
住在宏福苑 40 多年，小小單位滿載回憶、有笑有淚，為一家人遮風擋雨，蘇生說：「我唔想講係告別，我希望係暫別，我希望再喺同一地方重建返，有緣可以喺度再連繫返社區，連繫返我 Daddy 媽咪」。
蘇生說，會跟父母說不用擔心，「我哋學識咗自立，我哋會好好照顧自己，我哋來生希望再報答佢哋恩情」。
攝：Nasha Chan
蘇生屋內播《陪著你走》「爹哋媽咪我哋走喇，跟我哋走呀」
「我媽咪最鍾意嘅龜龜，得返 3 隻咋，本身應該有十幾廿隻㗎⋯⋯」
蘇先生入到單位後，播放《陪著你走》，用鏟子在瓦礫中挖掘，尋回媽媽生前最喜愛的小龜擺設。從蘇先生提供的相片可見，單位嚴重損毀，大多物品化為灰燼、餐桌燒剩支架。
他在發現父母遺體的客廳位置，點起電子燭光、放下兩束鮮花。臨走前，蘇先生與太太視像通話，太太先向「屋仔」道謝，「而家我哋要暫別一陣喇，希望原址重建啦」，之後跟老爺奶奶說：「爹哋媽咪，你如果未上天家，仲停留喺呢度嘅話呢，去你新屋嗰度先啦，和合石嗰度，喺和合石嗰度歇息一陣間就上天家，OK？」
蘇先生最後亦哽咽說：「爹哋媽咪，我哋走喇⋯⋯跟我哋走啊，爹哋媽咪，我哋帶你哋去新屋嗰度呀⋯⋯多謝呢個屋企帶畀我哋 40 幾年嘅歡笑與喜樂，好多謝你⋯⋯有緣再會！」
宏昌29樓何小姐：想跟媽媽說
「我哋屋企會好努力同爸爸行呢條路」
宏昌閣 29 樓住戶何小姐在大火中失去媽媽，單位亦遭嚴重焚毀，她形容單位現時被「封鎖」，因政府人員設了封鎖線，亦告知他們 4 人上樓「一定唔得，我哋個單位一定唔得」，只能兩人上去，而兩人再輪流一人入單位，「因為結構性問題，比較嚴重我哋嗰層，都係基於安全理由，所以應該就唔入得⋯⋯佢講到基本上得門口個位可以入」。
何表示，家人考慮了彼此的體力、心理情況後，決定由弟弟、弟婦上樓，「當然爸爸、我自己其實都好想上，但衝量過自己心理質素真係唔得」、「我驚我克服唔到⋯⋯唔係體力上，係心力上」。而她和爸爸亦已交託弟弟、弟婦，協助取回爸爸媽媽具紀念性的物品、金器、鏡頭等。
何亦說今天帶了一紮花送給媽媽，哽咽稱「盡量個心意都係希望，媽咪可以開心地繼續生活」。她提到平日也會重回宏福苑，因「想探我媽咪」。假如稍後能上樓，她「有啲心事上去想同媽媽講」。她表示想對媽媽說，「希望佢喺⋯⋯去咗一個好安樂、好開心嘅地方，亦都知道佢係好掛住我哋，想我哋過新生活。我哋屋企會好努力同爸爸行呢條路，雖然好艱苦同好漫長時間，但相信會做得到」。
何也說，自己約 20 年前遷出，父母則一直留在宏福苑，大火時媽媽身處家中，「知道嘅時候，其實 4 點幾我嚟到嘅時候、一出火車站嘅時候，見到（佢）住嗰座大廈，全層已經係黑色。黑煙、未着火。但行到過嚟（宏福苑）9 分鐘倒，已經起火喇。當時都好大火⋯⋯其實基本上我係睇晒成個過程，個火警發生嘅」。
而事件雖已過去幾個月，但爸爸「個狀況就當然唔好啦。第一好唔捨得媽媽，第二好多聽證會消息，各方面嘅嘢，都令到，我諗唔好剩係講切身嘅受害者，相信全香港嘅市民都會好心痛。」
何又透露就樓宇去向，「各方面都搵緊我哋啲家屬，例如講緊層樓嘅安排究竟點樣，好多工序要做」。
相輯：宏昌、宏道閣居民最後一日上樓
攝：翁志偉
宏道21樓盧小姐：多謝呢一個屋企
由細BB仔陪到我咁大
盧小姐落樓後再受訪，指單位「其實就無燒過嘅，完整嘅，只不過好大塵，因為始終咁耐無打掃過」。他們最後帶走 20 個膠箱及紅白藍膠袋，弟弟帶走了包括相機、電腦，父母帶走了財物例如金器和玉，她則帶走了公仔，以及一家人的相簿，「呢啲全部都係具紀念價值嘅嘢」。
她又指，一家四口在家合照，「同屋企講拜拜」。「多謝佢啦，多謝呢一個屋企，咁多年，有好多開心唔開心都喺入面，咁所以，係囉，即係唔知可以講啲乜嘢，但係就，多謝囉，陪咗我由細 BB 仔陪到我咁大」，盧小姐說。
她又指，上樓流程順暢，「好多警察、民安隊幫我哋搬，我哋都唔好意思，上上落落咁多次」，但「3 個鐘頭夠唔夠執，一定係唔夠嘅，肯定唔夠」，他們最後也漏了一些物品未能帶走。
盧小姐今早在上樓前受訪，指一家四口居於宏道 21 樓，大火前幾年自己遷出，但間中會回家，故屋內仍保留許多個人物品，例如自出生起陪伴她的毛公仔、獎牌、鎖匙扣等，並笑稱有儲「YES!咭」，「我係分咗男嘅一幢，女嘅一幢。唔記得仲齊唔齊，所以就希望齊吖」。
盧續說，父母的物品較重要，希望助他們取回金器，以及爸爸、胞弟的菲林相機、單反鏡頭等，另亦希望帶走家中米缸、茶几，「我媽差唔多想成間屋搬走咁滯，但無可能嘅事情嚟㗎嘛」。
她提到，爸爸常覺得有第二次機會上去，但她信心較少，「我就話唔好當有第二次，你知啲安排㗎啦⋯⋯拎晒啲嘢算喇」。
回憶大火，她說事發時爸爸在家，「我嗌醒佢囉好彩」，指自己當時即致電爸爸，「第一次，唔聽。隔多十零分鐘，第二次，喂聽啦喂、醒啦喂、走啦喂」，爸爸起初不太緊張，「無諗到咁遠都燒到嚟」，但爸爸其後說，「嗯，我決定走啦，見到有煙入嚟啦」。
盧說，爸爸事後跟家人說起逃生情況，指當時戴 N95 口罩走樓梯，「落到去黑晒㗎喇」。至於她自己，她說心情上「盡量唔好諗囉⋯⋯出事嗰個零兩個星期好難受，跟住之後 life must go on，你都要返工、做嘢，睇下點樣善後、幫爹地媽咪。都係等今日㗎啫，全部都係等今日執返啲嘢。」
她亦說，「成件事即係，由出事到而家，我諗無一個香港人或者無一個街坊有諗過呢樣嘢，但咁你發生咗都無辦法㗎嘛，你都要面對⋯⋯唔捨得一定有，但都無辦法啦，無奈囉。」
今次上樓，盧說希望能走兩轉，亦帶備了背囊、行李箱、紅白藍袋。被問到有否信心，她笑稱「梗係無啦」，又指「希望走嘅時候執返（間屋）靚靚仔仔」，「完完整整呀嘛，都（想）整整齊齊。雖然爆門爆到亂晒，但都想完完整整嘅所有嘢」。
被問到能否做到政務司副司長卓永興所說的「斷捨離」？盧即答「斷唔到㗎，黐線咩！無可能斷到㗎。但斷唔到嘅，拎唔到嘅，咪影囉。影得幾多得幾多囉。」
