宏福苑業主「特設銷售計劃」周五（9 日）第八日揀樓。原住宏新閣的 Dorz 與嫲嫲選擇啟德啟陽苑，他稱曾經為攪珠結果可較早揀樓「開心咗一下」，「但諗諗吓其實開心嚟做乜嘢，唔會係值得開心嘅一件事」。
他形容揀樓如電影《Hunger Games》，「即係我揀嘅時候，其他未揀嘅街坊點算呢？」而揀完樓亦非鬆一口氣，「唔通我問財仔借咩講真，我突然要負咗一筆債，對前景有啲擔心囉⋯（料印花稅 10 萬元）真係求吓佢，政府可唔可以有啲恩恤情況喺度呢？」
據政府資料，截至周四累計 250 個已選或已售單位之中，啟陽苑佔逾四成共 103 個，其次為粉嶺樂嶺軒，佔 58 個；第三為九龍灣盛緻苑，佔 42 個。
選購樂嶺軒
現場設穿梭巴士往參觀
政府的「特設銷售計劃」提供 10 個房委會居屋、綠置居，以及房協資助房屋項目予宏福苑業主揀選，據安排，選擇「樓換樓」方案，或者已簽意向書但未正式出售業權的業主，可在選樓階段先揀選並預留單位，而現金收購方案的業主則可購買單位。
周五為揀樓第八日，職員改變首日揀樓時安排，傳媒不得進入場內部分區域，亦不得拍攝電視螢幕上的已選單位。另外，落選購已落成、預計今年第四季交樓的粉嶺樂嶺軒，現場有穿梭巴士讓居民前往新居參觀。
Dorz：突負一筆債憂前景
盼政府補貼印花稅
住在宏新閣的 Dorz 與八旬嫲嫲早上到場，他們選購了啟德啟陽苑。Dorz 早前受訪曾透露，心儀已落成的九龍灣盛緻苑、粉嶺樂嶺軒，希望讓嫲嫲盡快落腳。但他今日指家中有突發事情，跟家人商量後，改為選擇 400 多萬元的啟陽苑單位。
「屋企有啲事發生，揀樓決定唔同，呢兩年緩衝期，buy time 去處理件事。」他說等候入伙期間仍有租屋津貼，考慮在大埔租屋。
他坦言，揀樓後沒有鬆一口氣，甚至形容束手無策，「依家物價越嚟越貴，我唔知點樣 afford 到之後嘅財政負擔、供樓」，他指，「你要諗之後啲錢點樣去處理，賠償（申請）法援、第三次上樓，仲有合安呢？唔見咗啦喎，根本成件事都未完」。
「我望住啲錢，嗰種無形嘅壓力係伴隨而嚟⋯⋯唔通我問財仔借咩講真，我突然要負咗一筆債，對前景有啲擔心囉。」Dorz 預料印花稅 10 萬元，希望政府補貼，「真係求吓佢，政府可唔可以有啲恩恤情況喺度呢？」
訂閱／贊助／購物，支持《法庭線》報道香港，記錄香港。
Dorz：揀樓如《飢餓遊戲》
Dorz 說今日心情矛盾，「其實 Day 1 開始，抽到呢個 number 係開心咗一下，但諗諗吓其實開心嚟做乜嘢，唔會係值得開心嘅一件事」。他說，有種「Survivor guilt」（倖存者內疚）感覺，「即係我揀嘅時候，其他未揀嘅街坊點算呢？」
他續說，「本身件事都唔應該咁處理，《Hunger Games》（飢餓遊戲）咁，用返佢嗰句，May the odds be ever in your favor（願機會永遠對你有利）。」
宏道黃小姐料補貼逾百萬元
宏道閣居民黃小姐則表示，一家五口現時居於親戚家，她同樣選擇了啟陽苑，認為交通方便，加上兒子正就讀幼稚園，「校網可能好啲」。她說，啟陽苑是她的首選，但未能選到面向球場的心儀單位，現時選了 490 呎望九龍城的單位，預計要補貼百多萬元，「OK 嘅暫時」。
黃小姐說，「都想印花稅（政府）有啲幫忙，要畀 10 萬倒，如果可以畀到一半就好啦」。她又說，揀樓後放下心頭大石，「出到嚟話『終於搞掂啦』」，她已跟社工要求第三次上樓，希望取回電器。
翻查政府「特設銷售計劃」網站，截至周四（8 日）下午 5 時 51 分（灝然、樂嶺軒）、今日早上 11 時 54 分（其餘屋苑），累計 250 個已選或已售單位數量，分布如下：
啟陽苑：103 個單位
樂嶺軒：58 個單位
盛緻苑：42 個單位
欣雅苑：23 個單位
匯熙苑：10 個單位
灝然：5 個單位
朗風苑：4 個單位
影輝苑：2 個單位
曉雅苑：2 個單位
裕豐苑：1 個單位
