宏福苑業主「特設銷售計劃」周二（29 日）在觀塘綠置居銷售小組辦事處展開首日揀樓，共涉 35 戶。業主早上 9 時陸續到場，先在簡報房了解選樓程序。大約 10 時 45 分，場內的螢幕展示最新已選單位，首 10 個位於房委會的啟陽苑與盛緻苑、房協的樂嶺軒與灝然。
年屆七旬的劉女士與丈夫指，預計要補貼數十萬元買樓，「要攞晒啲老本出嚟買，又要畀釐印費（印花稅），你話對我哋啲老嘢有冇壓力吖？陳生與家人到場揀樓，心儀啟陽苑指近市區、生活配套足夠，又指預計大約要補 100 萬元買樓。
樓換樓頭籌揀樓李生：
心情非常之好高興
選擇「樓換樓券」、取得頭籌揀樓的宏盛高層李生，成功選購心儀的啟陽苑，認為交通方便、配套成熟，又指選購過程非常順利，秩序井然、方便，「心情非常之好高興」。李生又指，單位價錢比較貴，需要補幾十萬元，雖然面積較以前細，但予自己跟太太居住，「一間房足夠」。
李生認為，現時暫住房協的單位，認為政府安置「非常好」，又指大家都想政府補貼印花稅，「但係現實唔係話我宏福苑就一定要有優惠，大家買樓大家住樓都係要畀呢啲錢，唔可以話我宏福苑，就咩都豁免」。
他指，已跟社工申請第三次上樓，盼能趁舒服天氣上樓，「希望政府短期內畀到答覆我哋」。他亦感謝政府盡力協助、社會支援，「所有嘢都重頭嚟過，心情亦都上上落落，因為面對一個新環境，但人都好容易適應」。
李生：最主要今日係想
屋企人揀返一個安然嘅生活
宏盛閣的李生今天陪同父母揀樓，已購入啟德啟陽苑的高層單位，他指選擇啟德是因為交通方便、醫療配套齊全，適合長者居住，他需要替父母補貼數十萬元買樓，亦預計要預留裝修費用，「如果對老人家負擔係大，我都仲係做緊嘢嘅應該會 OK」。
他說曾考慮大埔的頌雅路西項目，但因為要等候數年才落成，而他希望住在臨時房屋的父母盡快安頓下來，雖然要離開大埔但相信他們亦能適應，「重新適應囉，其實香港地方好易適應嘅啫」。
李生指，他住的宏盛閣單位沒有太大損毀，現在需要補錢買樓、搬新居，「心情梗係唔係咁好㗎喇，咁但係人都要作出一啲轉變啦，事情發生咗，我哋都唔好再諗返轉頭，但係你話所有嘅責任嗰啲嘢，由返法律、社會，佢會有一個釐清囉，而家最主要今日嚟講，我係想我啲屋企人去揀返一個安然嘅生活，未來有一個日子會過得好啲」。
七旬夫婦：預計補貼數十萬元
現時住在臨時房屋、年屆七旬的劉女士與丈夫指，希望購入粉嶺的樂嶺軒，因為可以較快上樓，「我哋年紀咁大，係咪我哋需要、急需要屋呢？」她又說，為了方便照顧在大埔上學的孫兒，故選擇住在粉嶺，預計要補貼數十萬元買樓，「啲樓價又貴咗，補嘅錢又買唔返自己嗰間屋，要攞晒啲老本出嚟買，又要畀釐印費（印花稅），你話對我哋啲老嘢有冇壓力吖？」
陳生：啟陽苑售價相對高
大約要補 100 萬元
原本住在宏盛閣 21 樓的陳生，今日與妻子及兩名兒子到場。他指現時在大埔租樓，心儀近市區、生活配套足夠的啟陽苑，但售價相對高，大約要補 100 萬元，「Budget 比我預期多同貴⋯⋯無奈接受，你話好又唔係相當好，差又唔係相當差」。
陳生提到當初攪珠時，兒子比他還緊張，一知悉結果便稱：「老竇，搞掂啦喎！你中頭獎喎、二獎喎！」
陳生形容當時又驚又喜，「喜」是因為相信大機會能選中心儀的啟陽苑，「驚」則是擔心政策有變。至於要支付印花稅，陳生則指「遊戲規則係咁，你情我願，幾時買嘢都係一分錢一分貨，又要平又要靚冇可能」。
張生：盼減免印花稅
原居於宏仁閣的張生則打算購入位於安達臣道的灝然單位，他說看中該處的風景，又指原本居住的宏福苑單位實用面積 447 呎，屋苑內算細單位，但新居屋「越起越細」，現在 400 多呎已屬「大單位」，他預計要補貼近 200 萬買樓，又稱幸好自己有買保險，可以補貼部分費用。
張生又指，希望政府減免一半印花稅，「因為買樓唔係我哋嘅意願嚟㗎嘛，係迫於無奈買樓，迫於無奈就要畀嗰啲稅，政府收稅係啱嘅，但係有冇 discount 呢，咁就值得溝通下嘅⋯⋯我冇諗住買樓㗎嘛，你今次要我買樓，我要畀多次稅吖嘛」。
張生不希望回到大埔或粉嶺居住，以免每天回家都會見到宏福苑，「一定要經過佢（宏福苑）㗎，就算你返粉嶺，你唔經大埔墟，你喺上面嗰個吐露港公路，你都會望到佢嘅，因為佢個位置就係咁好」。張生亦希望買樓後可獲安排第三次上樓，執拾之前遺漏的物品。
