宏福苑業主「特設銷售計劃」周五（9 日）第八日揀樓。原住宏新閣的 Dorz 與嫲嫲選擇啟德啟陽苑，他稱曾經為攪珠結果可較早揀樓「開心咗一下」，「但諗諗吓其實開心嚟做乜嘢，唔會係值得開心嘅一件事」。
他形容揀樓如電影《Hunger Games》，「即係我揀嘅時候，其他未揀嘅街坊點算呢？」而揀完樓亦非鬆一口氣，「唔通我問財仔借咩講真，我突然要負咗一筆債，對前景有啲擔心囉⋯（料印花稅 10 萬元）真係求吓佢，政府可唔可以有啲恩恤情況喺度呢？」
據政府資料，截至周四累計 250 個已選或已售單位之中，啟陽苑佔逾四成共 103 個，其次為粉嶺樂嶺軒，佔 58 個；第三為九龍灣盛緻苑，佔 42 個。
宏福苑業主揀樓Day8 宏新Dorz嘆如《Hunger Games》 突然負一筆債憂前景
