在 47 人案選擇認罪、被判囚 5 年 7 個月的前元朗區議員伍健偉，周五（25 日）中秋節清晨出獄。他在元朗與「天水連線」成員林進等人飲早茶後，接受記者訪問。
他談及在牢獄單獨囚禁，有很多時間思考，覺得充實，好像「畀咗個機會我去放大假」，身心都有改變，亦認識到很善良的人。他曾傷心、迷茫與憤怒，但無悔當初選擇做的事，而親友的關心是很強的支援。
伍健偉又說，留在香港要面對現實，「今時今日需要更加有智慧、團結」才能追求理想，他會留在香港，亦想重回選區看換了身位之後，會否仍能幫助居民，「因為呢個地方，係我哋付出過嘅地方，我唔會選擇喺呢個關頭一走了之。」
伍健偉：留在香港要面對現實
今時今日需要更有智慧
他稱不經不覺在牢獄度過 5 年 7 個月，他 24 歲入監房，「出返嚟 31 歲，未習慣到三字頭，未習慣俾人叫 Uncle 嘅年紀」。他沒想過能在中秋出獄，一方面對能與親友相聚感高興，但另一方面感觸，仍有很多「手足與前同事」服刑，未能與親友重逢慶祝中秋。
他續指，今年有支聯會被定罪（煽動顛覆案）之前有《蘋果日報》案，亦有很多與他同案的被告仍在服刑及上訴，「所以就好多感受」。
有記者問，他出獄是否已準備接受「新世界」？
伍回答，過去 5 年獨自囚禁，「電視都冇收睇，靠收音機同同事了解資訊，會咁講，我諗留喺香港嘅人，我哋要面對個現實，唔等於我哋接受個現實，客觀環境時代唔同咗，無論紅線，甚或資源、人脈唔同晒，唔能夠否定現實，既然現實係咁，只能用新嘅方法」。
他稱，相信每一個人的人性，「終究對自由同公義帶住一股熱切嘅期望，未來呢樣嘢，相信係由一班堅持信念，而且堅持尋改變、有行動力嘅人去創造」。
他又稱，「監獄或者囚禁呢件事，唔能夠阻止，人對自由嘅渴望。恐懼亦都唔可能去阻止良知嘅呼喚。一時嘅挫折，亦都唔應該阻止對夢想嘅追求。我知道喺呢個地方仍然有好多人係希望香港變得更得好，而大家亦都喺唔同嘅崗位努力。但係今時今日，我哋需要更加有智慧，更加團結，同埋更加要堅定，我哋先能夠達到，追求或者我哋嘅理想」。
伍健偉中秋出獄 陳情稱五大訴求合情理 確認無悔、選擇留港齊上齊落
伍：牢獄中傷心迷茫憤怒
但從沒後悔
伍健偉指，最近看過一篇有關俄羅斯的文章，「係講佢哋個地方，一個良善嘅人，唯一出路係監獄」，續指，「如我嘅版本，喺香港，一個追求真誠嘅人，唯一歸宿可能都係監獄」。
「但我 5 年 7 個月裡面，我有傷心，我有迷茫，亦有憤怒，但無一刻唔為我自己去驕傲，因為當年選擇咗認為對未來香港更好嘅事情，選擇犧牲，有幸為呢個地方同我鍾意嘅香港人去付出呢一切。對於呢件事我從來無後悔過」。
他說每一個改變都係由普通人一小步開始，不能說接着有何計劃，「但會盡我所能留喺香港，幫香港進步，達到夢想、自由公義、人人都免恐懼嘅香港」。
伍：親友不斷關心是很強支援
有記者問，這段時間有甚麼支撐着他？伍望向林進笑稱，「咁要真係問返林進。」
伍解釋初選時，在參舉團體名單排第二的是林進，而他排第一，但他們曾想過由林進排第一，「可能有一刻，其實呢 5 年 7 個月支撐嗰個，就係我，支撐林進，就唔係林進支撐我喇喎。都幾微妙呢個緣份。」
說起林進，伍健偉說兩人相識於 2019 年，形容大家想法成熟、相近，而他從報紙得知，林這段時間努力生活之餘，亦面對很多挑戰。
伍又說在 5 年 7 個月間，自己幾近一天 23、24 小時對着四面牆，親友仍不斷關心自己，這對在囚人士，尤其獨立囚禁多年的人士而言，是一個很強的支援，每天最期盼是探訪和派家書時，「代表住呢個地方有人未忘記我哋，呢個地方仍然有人記得我哋、等緊我哋。咁單單係呢件事，其實我已經好感激每一個朋友、好期待同我一齊嘅人。」
伍：獨囚給予很多時間思考
現在更願意相信每一個人
記者追問單獨囚禁的原因，他覺得這 5 年多最大改變是甚麼？伍健偉指單獨囚禁對他而言「有好有唔好」，不好的一面是與人接觸減少許多，例如遇上人多，心情會比以前緊張，「但同時間叫做多咗好多時間畀我思考」，以及在獄中進修。
伍表示，單獨囚禁時可有很多時間處理「日常」，如做運動和閱報，「啲時間對我嚟講，反而係充實嘅，甚或我覺得我有啲似，香港市民畀咗個機會我去放大假。」
伍解釋，「一直以嚟我喺出面，好話唔好聽，我連三餐都好少食足嘅，好多時間瞓覺嘅時間又少，尤其是係嗰個年間、19 年開始，好多時日夜顛倒，好多時可能 24 小時有啲突發嘅嘢要應付」，因此單獨囚禁好的一面是令他可放鬆。
至於他最大改變或想法，伍說他處理自己心情和處事態度較多，「我覺得我自己從容咗，成熟咗，同埋我更加願意去相信，每一個人」。伍說這段時間認識的人都很善良，也很與他交心，甚或大家背景不同，但大家心底追求的很多時都一樣。
伍續說，每人都有一個目標，「只係大家未必搵到方法，或者未必有信心去做」，所以他最大想法，是「希望我可以繼續去幫助唔同有需要嘅人，亦都希望修補一啲，我以前處理得唔好嘅關係。」
伍：耐熱能力同林超英有得揮
有記者關注他今天的衣着，尤其所穿的鞋沒有鞋帶。伍笑稱，這身裝束是他 2024 年求情和判刑當天都穿過的，鞋子是因為有懲教署規定而沒鞋帶。
記者追問是否未習慣能換上自己喜歡的款式。伍健偉笑稱自己「未慣着衫」，指經過多年在獄訓練，「我覺得我哋嘅耐熱能力呢，應該係同林超英先生係有得揮嘅，我覺得佢甚或至未必夠我哋揮𠻹！」
他說，變相現時未慣要在陽光底下穿這麼多衣服，平日都少郁動，「企定定唔郁，好似企鵝喺度」，又說這幾年會「地獄啲諗，好彩我唔係 20 年後先坐監」，否則擔心自己會熱暈。
伍希望再「落區」
即使非區議員仍可幫居民
記者問起，初選案被捕後要提早向警方報到，預期可能會被起訴，為何他前一天仍去「落區」？
伍健偉說當時仍是區議員，他每天都很享受的工作是與街坊溝通接觸，他也說當天是最後一天能接觸自由空間的地方，故希望能與街坊道別，「亦都希望作為最後一次嘅日常，去巡區啦」。
他說因每個社區都是人與人的連結、一步一步創立，「喺嗰段時間，有好多市民都好熱心，去照顧我呢個初哥啦，咁我唯一可以做嘅嘢，係用勤力，去將勤補拙，顯示到我希望為呢個地方服務嘅熱心」。
至於會否想重回自己的選區，伍說「咁呢個一定㗎喇」，他也想周圍走走，看這個地方在這幾年有何不同。他希望如回到嘉湖，「有街坊認得我咁梗係好啦，就算大家可能未必認得我都好，咁我都想睇下，啊，過咗幾年喇喎，到底呢個地方係好咗吖、差咗吖，或者會唔會有一啲地方，今日可以換一個身位，去繼續為呢個地方嘅居民幫手呢」。
伍續說，他認為一個人能做到甚麼事，「唔係因為佢有乜嘢嘅地位，唔係因為佢有乜嘢嘅身位。一個人可以做啲乜嘢，其實只係在乎佢有幾熱心，同埋佢為咗做嗰樣嘢，付出咗幾多」。
他再說，因此就算他已非區議員， 如有一些問題而他可幫忙，他都會繼續，「當然，新時代，我哋都會有一班專業嘅區議員，都好希望佢哋區議員做得好、為市民服務，唔使去話令其他人操心啦」。
伍：唔會選擇喺呢個關頭一走了之
對於有記者問，怎樣看待同案的人都沒有幾個會像他一樣說感受，伍表示未能代同案的人解釋，但他說不是沒有獲釋的被告發言，當中有人很致力性平運動、平權，他也為社會熱心服務，另也有人先處理家庭也不奇。
伍說很多人仍關心他和在牢獄的人，希望他們能知道，自己很感謝他們一直支持，「正如我所講，我哋會再見，因為呢個地方，係我哋付出過嘅地方，我唔會選擇喺呢個關頭一走了之。我希望畀每一個關心緊呢個地方嘅人，或者關心我嘅人知道，我最基本嘅諗法先」。
HCCC69/2022、HCCC70/2022（CACC253/2024、CACC263/2024、CACC268/2024）（FAMC13-20/2026、FAMC22/2026）