47 名民主派被控「串謀顛覆國家政權」罪，初選時參選港島區的 6 人，包括認罪的袁嘉蔚、梁晃維、徐子見，以及經審訊被裁定罪成的鄭達鴻、楊雪盈和彭卓棋，周二（2 日）在西九龍裁判法院展開首日求情，早上有約 60 人排隊旁聽，包括七一現身銅鑼灣的李盈姿、「劉公子」劉定成及「大黃伯」。
徐子見的數名友人表示，旁聽是表達支持，「畀佢哋知道我哋仲記得」，又指早前探望時，徐的精神不俗，「佢哋唔識去擔心，已經冇咗『擔心』兩個字㗎啦，聽天由命」。
梁晃維的中學班主任林老師稱，梁讀初中時「好純真、性情好真」，而高中時展現領導能力，亦在公開試取得佳績，稱梁關心社會，秉持母校「修己善群」的精神，「喺咁嘅時空入面，佢盡咗佢嘅力量，所以喺歷史層面角度，佢對香港人已經交代咗」。
梁晃維求情信節錄：從未失對港人信心 信終能長風破浪
47人案求情、判詞分析、裁決日報道一覽
早上約 60 人排隊旁聽
法庭周二處理初選時參選港島區的 6 人求情（見另稿），料需時 2 天。截至早上 9 時，有約 60 人在法院外排隊，包括李盈姿、「劉公子」劉定成、年屆 101 歲的佔中「大黃伯」，而政治漫畫家尊子、前支聯會常委徐漢光、前立法會議員邵家臻亦有到庭。
法律代表方面，資深大律師彭耀鴻、李志喜、潘熙、大律師 Trevor Beel、吳靄儀、梁麗幗等早上亦陸續抵達法院。大批警員則在法院外巡邏、戒備，公眾進入法院時，數名警員繼續在入口「一字排開」，法院門口位置亦有警犬。
七一現身銅鑼灣 李盈姿、劉定成今旁聽
昨日七一現身銅鑼灣的李盈姿、「劉公子」，分別於周二清晨近 5 時及 7 時到庭外輪候，兩人均表示周一深夜才回家，亦「瞓得唔好」，故提早出門排隊。李昨遭警方截查，今日堅持往法庭旁聽，「咁旁聽都係我哋嘅權利嚟，佢又冇話唔畀我哋旁聽，佢暗示叫我低調、乖」。
李又稱，曾協助徐子見競選區議員，亦有留意袁嘉蔚的新聞，盼「有真香港人入到去正庭，唔係想畀啲排隊黨霸晒啲位」。
「劉公子」則表示是楊雪盈的朋友，與楊在 2019 年初選時認識，上周曾往收押所探望楊，「佢喺我面前梗係好堅強啦，但喺我面前堅強⋯返到囚室就另一個樣」。劉稱，「我哋只係旁觀者，憑個心去支持佢」﹐又提到其黑衣上的玫瑰花代表生機、轉機，「黑，黑到盡頭就變粉紅、紫紅或者艷陽天啦，希望佢哋再見艷陽天」。
其中一位被告的好朋友、前區議員韋少力亦到法院旁聽，稱每周會探望對方一至兩次，形容對方精神不俗，掛心父母及貓咪。
徐子見友人：佢哋已經冇咗擔心，聽天由命
3 名不願上鏡的徐子見友人亦到場旁聽。蘋果（化名）表示早前曾探望徐，形容徐精神不俗，希望前來旁聽，「show 吓個樣畀佢睇，我哋仲存在嘅」。阿肥（化名）亦於近日探望徐，同樣稱他精神不俗，「唔會好憂愁⋯佢哋唔識去擔心，已經冇咗『擔心』兩個字㗎啦，聽天由命⋯你一定要樂觀啲面對」。
她又指，徐子見「困咗咁耐咩都磨滑晒，無奈、望天打卦，你點諗都唔知個官係點判」。阿肥再稱，旁聽是支持，「畀佢哋知道我哋仲記得」。細 May 姐（化名）亦稱，「最主要唔想忘記，再唔嚟成件事會不了了之」。
另外，其中一名被告的友人阿輝（化名）亦指，有寄信及探望對方，形容對方精神不俗，「同我認識嘅佢都冇變⋯佢都叫我哋記得飲水」，希望精神上支持對方。
梁晃維中學老師：佢對香港人已經交代咗
梁晃維中一時的班主任林老師，周二凌晨 3 時到場排隊。他指自己於 2014 年辭教，開始追蹤社運發展，形容本案「未審先關」，認為情況荒謬，「所以今日要撐到底啦」。林老師憶述，梁晃維就讀初中時「好純真、性情好真」，而高中時展現領導能力，在「校營」培訓師弟，亦在公開試取得佳績。
翻查資料，梁的母校伊利沙伯中學是至今唯一擁有附屬校營的中學，校方會舉辦「營地管理員」（Camp Warden）訓練，訓練學生自立能力。
林老師續指，梁晃維關心社會，秉持母校「修己善群」的精神，笑指梁「後發制人⋯後期越嚟越勇」。林稱，梁於大學畢業後當選區議員，在社會劇烈變化之際投身社運，「當時我（向梁）話你有心理準備啦，唔好聽就係有今日嘅命運，咁佢都承擔咗，到今日亦都係付出咗青春」。
林老師指，梁晃維由大學時期投身社運至還押，一直處之泰然，「（梁）真係同香港歷史、命運結合，基本上佢真係豁咗出去㗎啦，冇所謂惶恐、好意外嘅感覺，心理上都係準備晒，（與我）有講有笑，冇氣餒感覺」。林老師稱，在梁還押期間不時探望梁，亦會入書給他。
除梁晃維外，林老師稱還有其他學生投身社運，他稱「感安慰」、「與有榮焉」，「去到香港嘅命運關鍵點，佢哋亦都付出咗…已經盡咗佢哋嘅力」。
任教歷史的林老師，稱特別能感受到近年來的社會轉變，重申「佢（梁晃維）孭得起呢幾年運動佢個角色，佢亦都係對歷史有交代咗。呢啲係香港歷史必然嘅發展，所謂政權對所有反對者嗰個大審，基本上係必然嘅發展…喺咁嘅時空入面，佢盡咗佢嘅力量，所以喺歷史層面角度，佢對香港人已經交代咗」。
HCCC69/2022、HCCC70/2022