47 名民主派被控「串謀顛覆國家政權」罪一案，周四（3 日）展開第 98 天審訊，陳志全完成共 3 日作供。陳早前供稱對於「35+」能否實現有很大懷疑，主控周天行周四引陳於將軍澳街站發言提及願望是達成「35+」，質疑沒提及不可行。 陳回答時反問，「當你生日許願嘅時候係世界和平嘅時候，你覺得世界和平可唔可以達到呀？」後再稱，認為「希望同埋相信」兩者沒衝突，「贏到多過人哋緊係好事嚟㗎，咁係個願望嚟之嘛」。 陳另被指在街站亦提及「林鄭月娥係傀儡」、「唔畀佢（建制派）有好日子過」等，陳否認前者是指打倒林鄭無用，要打倒中共，又稱後者是指在議會盡力發言，令建制派需繼續開會，「想去馬場跑馬呢都去唔到」。案件周五續，料鄒家成將作供。 周四實時報道： 【實時更新】47人案｜第98日審訊 陳志全完成作供
陳志全完成共 3 日作供
料鄒家成周五將作供
主控周天行周四結束對陳志全盤問，其大狀馬維騉沒有覆問，陳完成合共 3 日作供，散庭後在庭外稱「嘩做完喇，真係開心」。依被告排序，周五將到與陳同樣參選初選新東的鄒家成作供。鄒是被指發起〈墨落無悔〉聲明的 3 人中，唯一不認罪、擬作供的被告。
鄒周四由平日的白色長袖襯衣，改穿黑色西裝外套、黑西褲，並結上黑色領帶。鄒甫入庭，有旁聽者先後高呼「嘩！好靚仔呀！」、「原來咁靚仔嘅！」
在馬指沒有覆問時，被告欄內被告包括柯耀林轉頭望向鄒，鄒點頭回應。其代表大狀陳世傑提出押後周五作供，以便索取最新指示，獲法官批准，但指條件是其主問要簡潔。陳覆，「你知我會的（You know I will.）」。
控方質疑陳志全稱願望是達成「35+」
沒提不可行
陳志全早前於主問作供提到，對於「35+」能否實現有很大懷疑。周天行周四續引陳於 2020 年 6 月底在將軍澳街站的發言，指陳提過有 3 個願望，依次是民主派取得更多議席、「快必」當選，以及自己連任。
周向陳提出質疑，「你願望是達成 35+，你從沒提過 35+ 是不可行」。陳聞言反問，「當你生日許願嘅時候係世界和平嘅時候，你覺得世界和平可唔可以達到呀？」
法官陳慶偉其後問，「你在街站時說出自己都不相信的話？」陳志全答稱，「希望同埋相信，係無衝突囉我覺得，但係你雖然對 35+ 覺得嗰個可能性係好低，但係呢個贏多一席多一席，贏到多過人哋緊係好事嚟㗎，咁係個願望嚟之嘛」。
陳續稱，在街站發言的最後提過，「有人話 35+ 緊係好啦，但係又係講返自己嗰套理論，35- 或者就算唔得，我哋都要好努力喺議會裡面工作」，重申希望得到與相信不可行並沒無衝突。
控方續引街站發言 指提林鄭為傀儡
陳否認意指打倒中共
周天行又指，陳於街站提到「無論邊個出線邊個當選，係未來都係要同心協力抗爭到底，包括我哋之前話，不惜運用基本法賦予立法會議員嘅權力嚟去否決財政預算案…」
就「抗爭到底」，陳指如自己周三所供稱，「其實就係講緊過去有啲議員，佢抗爭係未盡全力，連開會、出席，或者加入委員會，或者發言，或者質詢，都未做足。」
周另指陳提過「林鄭月娥係傀儡」。陳解釋，「個意思就係話其實邊個做（特首），都係咁㗎啦咁樣。不過即使係咁，大家都要出嚟投票」。法官李運騰追問，即誰人做都一樣？陳稱，是指林鄭為傀儡，「即係話佢係執行啲指令咁樣囉，即係佢話唔到事」。
周追問，指他是否意指打倒林鄭無用，要打倒中共？陳答稱，「咁又絕對唔可以咁」，並以《逃犯條例》修訂為例，指由林鄭宣布「壽終正寢」，「…所以你又唔能夠話就算佢係傀儡，你係完全可以唔理佢，因為你都係要透過佢嘅手佢嘅口佢嘅政策，去令到香港人嘅生活改善」。
陳另主動補充，稱因「唔想拖其他人落水」，當他提到「我哋」時，「係畀人唔好咁自我中心嘅說法，即係由『I』 講成『we』咁啫」。
控方質疑參加初選抵抗港共政權
陳否認 稱與政府、建制派很多合作
周天行另問及陳志全於街站的另一段發言：「議會戰線都係抗爭運動一部分…抗爭不可缺少嘅一環。議席係工具、議會係工具，抗爭至係我哋嘅目標，對付呢個港共政權，對付呢個國安惡法至係我哋嘅目標」周指出，陳的意思是參加初選的最終目的是要抵抗港共政權。
陳解釋，民主派作為反對派，議會的對手就是建制派及特區政府，「我哋每日都要鬥智鬥力，去搵出呢個政策上面不完善嘅地方，或者將香港人想要得到而（政府）唔肯落實嘅嘢，要畀壓力佢叫佢落實…如果呢個係咪叫對抗政權呢？如果呢個係，咪係囉。」
但陳提到，「我同無論係建制派定係特區政府，都係好多情況之下都係要合作，先至能夠達到改善香港人嘅生活」，又指這一點是「鐵一般嘅事實」。
法官陳慶偉質疑，他於街站沒提過如何與政府合作以通過草案，反而指會堅持抗爭到底。陳志全則稱，當時在街站是呼籲他人初選投票及提到《國安法》的危險，「當你講緊呢樣嘢嘅時候，你唔會再提合作，咁好分裂㗎嘛個人。」
解釋「唔好畀佢有好日子過」等
陳：令建制派想去馬場跑馬都去唔到
陳又在法官追問下稱，記得在街站上說過「唔好畀佢有好日子過」，解釋指如果民主派不在或無積極提問發言，令很多議案撥款通過，「守住個議會戰線嘅意思就係，唔好畀佢即係快刀斬亂麻，香港人都唔知道就過咗好多撥款議案，可能佢想一個禮拜過到，咁我哋守住不斷發言提問，令佢兩個禮拜、三個禮拜過到…呢個一直以嚟都係我講議會戰線嗰個原則。」
陳又稱，以往民主派、建制派矛盾不大時，立法會會議逢星期三黃昏就完結，「但係我當我入咗議會之後，多數都要星期四下晝或者夜晚先至開得完，咁我話唔好畀佢哋有好日子過呢，就係佢哋星期三晚，佢哋想去馬場跑馬呢都去唔到…」
稱初論論壇前沒與譚得志討論
惟譚事後稱「俾黃之鋒捅咗一嘢」
周天行亦問及 2020 年 6 月初選論壇，引陳志全黨友、人民力量副主席譚得志在九東論壇的言論提問。陳稱事前沒與譚討論在論壇的發言，「我哋唔係第一次選舉，選舉都係各自照顧自己，邊有咁得閒去傾你個論壇、我個論壇講咩啫」。
周追問，陳有否看九東論壇？陳稱沒有，但指譚事後有對他「講返少少呢個論壇發生咩事」，「佢話俾黃之鋒捅左一嘢，話佢（譚）曾經鬧過梁天琦係無賴本土派，問佢會唔會認，問佢會唔會道歉」。
控方擬引譚得志發言盤問陳
官關注可否引「共謀者原則」
周擬再提問時，被李運騰要求交代盤問方向與案相關性。周答陳、譚二人同屬人力，李指同黨不等於譚就是代表陳發言，並提醒控方，法庭已就「共謀者原則」下達裁決，案中被指為共謀者的人之言行，不一定可按該原則呈堂。陳慶偉亦補充指，尤其 2020 年 7 月 1 日（指《國安法》生效）之前的事。
周擬再答時，李打斷指除非控方有基礎說，譚在該論壇上是代表陳志全發言。周續引用譚的發言，問陳是否持相同立場：
…如果我真係有幸入到去，兩次否決《財政預算案》丶癱瘓個政府、林鄭柒婆落台嚟到做bargaining power，爭取五大訴求、缺一不可，尤其是係獨立調查委員會，查嗰個警暴嘅問題，同埋公民提名嘅雙真普選…如果嗰個《財政預算案》，每個香港人派一幢樓喎，一人派十皮嘢喎咁，即係（民主黨胡）志偉呀，同埋阿（公民黨譚）文豪嗰啲，就平時都反對派－－派錢㗎喇，但係今次派十皮嘢喎咁點呀？一樣反對 ，因為呢個係我哋嘅選舉承諾…
陳答，「絕對不是呀！呢個係違反人民力量所講嘅『全民政治回水』呀…我哋爭取咗咁多年，由 day 1 叫財爺直接回水…人人派十萬你都否決呀，俾人斬呀真係！」續指「佢從來無同我講過佢會人人派層樓或 10 萬（元）佢會否決，不過可能佢爆肚啦，我唔解釋啦，我唔揣測」。
被問有否留意戴耀廷記者會說法
陳稱不肯定、不記得
就初選組織者 7 月 6 日、9 日舉行的兩個記者會，陳志全於盤問下稱前者只看過報道。被問知否戴耀廷當日曾說「35+ 目標係憲制…由基本法賦予權力，包括否決預算案」，陳稱不肯定、沒特別留意，「但係戴耀廷呢啲說話應該都講過唔止一次㗎啦」。
至於後者，周問陳有否留意戴當日曾說「35+」計劃目的，是取得立會主導權、行使《基本法》賦予權力，令政府問責？陳答不記得，「因為佢講嚟講去都係嗰啲，都係差唔多㗎啦」。
陳否認意圖顛覆政權等指控
周天行最後指出兩項控方案情，問陳 2020 年 7 月 1 日至翌年 1 月 7 日，是否同意與其他被告，透過奪得立會過半、無差別否決財政預算案，逼使政府回應回「五大訴求」；同期是否有意圖顛覆政權。陳均否認。
截至周四，本案已完成被指為組織者、港島、九西、九東 3 區的辯方案情（新西沒不認罪被告）；正處理的新東，鄒家成、林卓廷、梁國雄、柯耀林尚待展開案情。其餘選區尚待處理案情的，則有超區的李予信及衛生服務界的余慧明。
HCCC69/2022