宏志閣居民周三（13 日）再獲安排上樓。雙親在宏昌閣高層單位罹難、本身住宏志閣低層的蘇生形容，「上次上去係好傷心，好想見返父母嘅嘢，今次我係好憤怒」質疑上樓人數、時間均受限，亦要向社工申請，「點解可以對災民咁無情？」他指傾向不賣業權，形容宏福苑是他的根。
住宏志 1 樓的冼小姐則指，不相信有 77% 街坊想賣業權，「咁我就唔知會唔會係啲司長睇錯數字點啦，你知啦，卓（永興）司長咁叻⋯⋯計數」。呂先生亦認為政府收購方案沒吸引力，盼召開業主大會了解居民意向，但相信較難成事，「因為你咁多人聚埋一齊，又唔知會唔會觸動到一啲紅線」。
7樓張生稱不想回遷：
而家收購價都差唔多
住在 7 樓的張先生打算上樓拿走貴重物品和五金工具，他說會將今天當成最後一次回家，「應該都係最後一次㗎喇」。
對於政府的安置方案，張生說「本身冇咩諗法㗎喎，都係睇政府咋喎，我哋呢啲巿民有咩辦法啫？」他亦覺得只剩下宏志閣一座，不想回遷，「我都唔返去㗎喇，零零丁丁得一座，你又有好多嘢要整嘅⋯⋯水電煤乜都要整，第時你拆呢又大塵，加上而家收購價都差唔多，咪自己選擇過一笪地方」。
至於應否召開業主大會，張覺得街坊已各散東西，難以凝聚起來，「而家都好似仙女散花咁樣，點樣開呀？周圍都係，啲人都打散晒咯」。
失雙親蘇生：今次我係好憤怒
我想返去瞓覺，我真係唔想執㗎
雙親在宏昌閣高層單位罹難、本身住宏志閣低層的蘇生，今日亦上樓執拾，他表示 3 小時不足夠搬屋，「如果你話唔收購（指政府收購業權），我哋係咪又搬返上去呢？好矛盾，究竟佢想我點樣」。
宏志閣幸未受火災波及，但居民災後逾 5 個月以來只獲安排兩輪上樓執拾，今次是第二輪。蘇生指，現仍擁宏志閣單位的業權，對於回家要登記、申請感荒謬，「難聽啲講，我唔走、我鎖埋門你奈我咩何呢？你用咩法例去唔畀業主喺個單位入邊呢？」
蘇生指，今次回家與他 4 月底返回宏昌閣父母居住單位時的心情，有「好大對比」，「我上次上去係好傷心，好想見返父母嘅嘢，今次我係好憤怒，點解可以對災民咁無情？你成日話『情』行先，嗰個係咪無情呢？好嬲㗎真係好嬲，好似當我哋地底泥咁樣。」
他憶述，宏志閣的家是自己一手一腳、「死慳死抵」購買的安樂窩，上一輪回家執拾了冬天衣物、必需品，今日再上樓執拾其實他是「百般不願意」，「我想返去瞓覺，我真係唔想執㗎」。他指，《基本法》要求港府必須保障私人財產，「我就最擁護《基本法》，希望特區政府都擁護《基本法》」。
他又指傾向不賣業權，指宏福苑是他的根，宏昌閣是祖家、宏志閣則是安樂窩，「但係因為一場人禍，令到我哋失去咗呢樣嘢」。他認為應盡快召開業主大會，「拖到我哋賣晒業權，唔使開㗎啦喎」。
蘇生又希望取回求婚禮物、「愛的見證」的琴，但考慮到琴沒電、變壞，「攞出嚟我又擺去邊呢，唔通你叫我放喺百零呎嘅過渡性房屋嗰度咩？」，希望下次上樓能拿走，「就算屍骸都想攞到嘅」。他強調，今次「絕對唔係上去道別」。
宏志1樓冼小姐：不信有77%街坊想賣業權
「你知啦，卓司長咁叻⋯計數」
住宏志閣 1 樓的冼小姐，與母親和胞姊一同上樓，希望帶走家電、換季衣物等家當，加上這次有升降機，希望能抬走洗衣機等大型電器。她與家人周二都有參與線上業主簡介會，本想詢問驗樓報告會否公開等，但整晚在 Zoom 舉手卻未被揀中。她形容合安態度「好好，太好喇，適合做政府官員嘅，我信政府㗎，政府可以幫我哋㗎嘛，係咪？」
冼小姐又指，不會把這次當作最後一次回家，「個業權我未賣㗎嘛，間屋我哋㗎嘛，點解要咁樣逼我哋執嘢走呢？」她又指，以她居住多年對街坊的認識，不相信有 77% 街坊想賣業權，「咁我就唔知會唔會係啲司長睇錯數字點啦，你知啦，卓（永興）司長咁叻⋯⋯計數」。
她說明白可能有街坊因火災不想留在宏福生活，「佢哋想走嘅，人之常情，都理解，咁如果佢哋想走咪賣返個業權畀政府囉，但係有啲人想留低㗎嘛，你唔可以抺殺想留低嘅人」。她質疑宏志閣只需復修而非重建，為何不讓居民回遷，「我間屋冇燒，我點解要賣？」
冼小姐胞姊則形容，簡介會只是合安「片面佢想講乜嘢話畀我聽，就講乜嘢囉，我就只可以接受佢想話畀我聽嘅資訊⋯⋯佢應該代表我哋業主㗎嘛其實，應該係咪？但而家唔似囉，只係想話畀你聽，我做咗啲乜嘢啦，工作報告咁囉你當係」。她批評合安態度迴避，「點解要開 Zoom，就係唔想面對面接觸我哋啦」，亦令合安可選擇性回答問題，促真正召開業主大會。
她說，由 1 歲多搬入宏福苑，住了 40 多年，一家都希望遷回單位居住，「點解我哋突然之間又要好似走難咁，又要清晒個屋企嗰啲嘢，然後又搬去一個我陌生嘅環境？」她亦覺得政府提出的收購價，不足以購入同類型單位，加上家人已年老，難再重新供樓，「點解我哋畀咁多錢維修，就係仲想喺度住先至做呢樣嘢，係咪先？如果唔係我搬走咗啦」。
冼母則透露，解說員曾致電詢問其意向，開首便問「你賣唔賣樓？」其後再補充不同賣樓、樓換樓方案的資料，「三樣都係賣樓⋯⋯咁後尾我問佢，咁如果我唔賣咁有乜嘢睇？佢冇畀第四個條件我」，稱解說員僅指若她不賣樓，毋須寄回意向書。
冼太又指，即使真的有 77% 業主願意出售業權，「點解你唔尊重我 20% 人？我唔搬呀，我唔想搬，點解你唔尊重我？」說起 40 多年在宏福的回憶，冼太不住嗚咽，「幾廿歲人搞啲咁嘅嘢，咁我都想喺呢度生、喺呢度死㗎嘛，點知、點知而家要分開晒，啲朋友又死埋⋯⋯大家嗰陣時都約埋一齊去旅行㗎嘛，而家都冇晒囉，總之我覺得我就嚟崩潰、就嚟癡線」。
宏志6樓林女士：打算出售業權
已退休不想飄泊不定
住在宏志閣 6 樓的林女士，今天與家人一同上樓，拿走工作的獎狀等紀念品，她說 3 小時勉強足夠執拾，但「始終都係幾十年嘅家，乜嘢都喺度、乜嘢都想拎，但係就⋯⋯攞唔走啦」，若有機會希望帶走新買的傢俬、電器。她指有腰痛，今次可搭升降機「梗係好好多啦」。
林形容上樓「百般滋味在心頭」，「都唔知點解個心都係好沉重，係呀，點都放唔得低」。對於政府的安置方案，她說打算出售業權，因認為大維修未完工，不適合回遷居住，而且屋契、管理等問題亦未處理，「既然政府即係有呢個計劃收返嚟⋯⋯最好就係快啲安排，畀我哋可以有返笪安居之所」，她說希望「向好嗰方面諗，快啲安頓好我哋嘅長遠計劃」。
被問到會否希望召開業主大會，林女士嘆了口氣，說「唔知呀，個頭腦都好混亂，我都唔會諗到咁多嘢呀，就係希望快啲畀我即係安頓好，有個地方畀我哋即係安樂咁樣囉」。她慨嘆自己已經退休，不想生活飄泊不定，「所以我先至裝修好嚟，諗住住嘅，估唔到而家人算就不如天算，係啊，即係都諗唔到，即係有一場咁樣嘅災禍」。
宏志王小姐：單位失澳洲海參、魚翅
曾在聽證會上作證、家開雜貨店的王小姐，與兒子和朋友上樓，表示因單位長期關上、堆滿塵埃，感焗促及暈眩，不足三小時便落樓。她指，取回陳皮、花膠，但不見澳洲海參、魚翅。她指現場沒搜掠痕跡，但「啲嘢移過位我哋知嘅」，引述警方稱着她找清楚。
王小姐指，在宏福苑住了廿多年，環境空曠、「交通配套非常之正」，本來方便兒子跨區上學，但現時住在大埔村屋，則要轉車上學。她上樓後，憶起宏福苑點滴不禁落淚，「可能有少少創傷症」。
她指，暫時未想太多長遠安置方案，「我哋先處理間屋」、「依家唔想去傾」，但對賣業權有憂慮，例如會否失去保險賠償，「好多牽涉緊唔係我哋可以去問、可以去理嘅，係咪賣咗業權等於賣晒所有嘢呢？唔係唔想同政府配合，但好似真係做唔到啲咩嘢。」
宏志低層呂生：當最後一次（上樓）安全啲
宏志閣居民周三（13 日）再獲安排上樓，住在低層單位的呂先生，希望上樓取回文件、衣物、小型家電等物，「我諗啊，當係最後一次（上樓）會安全啲囉 ，因為你始終唔知道將來會唔會有下一次」。
呂生形容綜觀整個宏福苑，宏志閣的景觀、配套可謂最優勝，「我諗都好難搵得返㗎喇，今時今日」。而對於現時政府提出的收購方案，呂稱「我就覺得係冇吸引力」；就「合安」昨在業主簡介會稱修復宏志需 3,000 萬元，他稱「其實如果有幾十億善款，我諗係咪都應該夠呀？」
他希望可召開業主大會，確實地了解不同業主對出售業權的意願，「係咪真係之前電視公布話有 77% 嘅業主傾向賣」，指屆時亦可逐一核實業主的身分，「但係我諗好難搞得成事啦，因為你咁多人聚埋一齊，又唔知會唔會觸動到一啲紅線」。
對於事隔 5 個月才再獲安排上樓，呂生表示「冇得點睇啦，我哋都係等安排嘅啫」，他覺得居民很難提出要求，「我哋都聚唔到埋一齊啦，咁最主要都係，即係我諗，街坊私底下嗰個嗰個心意都係相近嘅，都係希望⋯⋯我唔夠膽代表佢哋講有幾多個人想留低啊」。
宏志林生：你有咩可以選擇？政府幫我哋選擇㗎嘛
宏志閣居民林先生指，想上樓拿走相簿等有紀念價值的物品，因上一次家人上樓時，主要帶走了貴重物品，他也打算多拍攝幾張照片才離開，「因為唔知道幾時返去，又唔知道下次返去會唔會俾人整爛咗某啲嘢」。他形容今天回家心情沉重，「呢度都住咗卅幾年咁樣，你𠵱家我又唔知幾時可以返去，咁梗係沉重啦，同埋咁多街坊離開咗都沉重啦」。
被問到會否擔心下次又要相隔許久才能回家，林生苦笑答「我唔知啊 ，真係政府效率咁高咪等佢處理囉，我都冇得選擇嘅，係囉？你有咩可以選擇？哈哈，政府幫我哋選擇㗎嘛」。
林生的父親是業主，他自己近年已遷出。他稱是否出售業權要交由爸爸決定，但他昨天亦參加網上業主簡介會，覺得「（合安）選擇性去答某啲街坊 ，因為好多人舉手未必答得晒」，他不清楚能否解答所有街坊的疑問。
至於爸爸的意願，林生說「老人家佢冇乜嘢諗呀，佢想返屋企囉淨係」，他說這一次上樓，爸爸亦因年事已高未能同行，「佢哋好想返去就係咁，講完，擔心你都冇用㗎，你唔係可以控制嗰個」，他亦無法回答，假設要支付 3,000 萬元維修費，家人會否仍希望回遷，「呢啲假設性問題嚟㗎喎，答唔到，因為唔係我可以控制到」。
