大埔宏福苑 7 幢受災大廈的居民，周五（22 日）繼續第二輪上樓。宏仁閣居民胡小姐帶了一幅畫作回家，畫中繪下家中窗外景色，是她最近接受情緒治療時在腦海中浮現的畫面，又希望有時間與家人拍下全家福。她說不想與家園道別，但無奈現時選項「就係賣業權、賣業權同賣業權 3 個 option」，盼有原址重建選項，讓居民真正選擇。
大火中獲救的 85 歲冼婆婆亦說，不會把今次當作最後一次回家，雖然考慮自身年紀，暫時傾向選擇「樓換樓」方案，但仍期望盡快召開業主大會。她又質疑善款用途，「而家不斷畀我感覺，好似就想盡辦法去從中取利」，直言市民寧向慈善團體捐款，「都唔過你政府手，你檢討吓。」
相關報道：
葉家駒尋妻婚戒不果 僅剩錶殼仍會好好收藏「算係少少安慰」
宏新周婆婆漆黑中奏《耶和華是愛》 孫兒Dorz：嫲嫲一口氣攀14樓引全場鼓掌
宏泰85歲冼婆婆：市民寧向慈善團體捐款「都唔過你政府手，你檢討吓」
大火中獲消防員救出的 85 歲冼婆婆，今天再次由親人陪同下，回到經過生死一劫的宏泰閣。
冼婆婆說不會當今次是最後一次回家，「我每次搭車經過，都望住我曾經好鍾意嘅家園。一早一晚，白鷺出去覓食，晚黑去歸巢。嗰一瞬間嘅景致，你哋可能未必有機會見過，但我差不多日日都見，你叫我點捨得？」
但冼婆婆稱目前意向是選擇「樓換樓」方案，因比起與公司進行交易，她較傾向與政府交易，亦說考慮到自身年紀，「我仲係咪等得到呢？」故冀望把業權放給子女，「求其搵返間屋就算數」。
冼婆婆亦嘆息道，如想取回原本宏福苑呎數的單位已「肯定唔得」，提到丈夫是長期病患者，基本上靠她養大 4 個小朋友，他們長大後亦要賺錢幫補家庭，已難以再買到樓，就算買到，「以後食乜呢？佢哋都到退休年齡㗎喇，真係無語問蒼天呀我哋係。」
即使有初步意向，冼婆婆仍期望可召開業主大會，「呢個係必然嘅事啦，如果你（政府）想擺脫自己謠言」。她表示，「而家不斷畀我感覺，好似就想盡辦法，去從中取利」，例如用市民捐款去買宏福苑業權，業權再賣給政府，變相善款「兜個彎擺咗入政府個袋」，她慨嘆道「點解香港政府會係咁？我哋香港人嘅面擺去邊呀？唉，點解會咁嘅呢？」
冼婆婆直言，善款中有 32 億寫明給宏福苑重建之用，質疑政府可如何向捐款者交代，並指現時市民情願把善款捐至仁濟、東華三院，「都唔過你政府手，你自己就好檢討吓啦。不過我講多樣，你識檢討呀，就唔會做啲咁嘅嘢。」
被問及前法團委員江祥發被捕，會否擔心再沒人幫忙爭取開業主大會，冼婆婆稱，居民想召開業主大會，「我唔相信政府係聽唔到嘅」，又指「既然今日江生要避嫌，再唔出嚟喇，佢係有咁嘅情況下，唔出嚟講嘢，我哋都知道乜嘢事嘅，我哋唔會怪佢。」
其後冼婆婆堅定稱，「喺你哋面前講一句，我要開業主大會，我要返嚟宏福苑，我要返屋企」。
她笑道，「喺我立場，我無江生咁有 power（力量）。咁我自己，敢喺你哋面前講啲說話，我已經覺得自己好叻㗎喇。」
宏新14樓Dorz帶87歲嫲嫲上樓 嫲嫲：我一定可以上 希望再次彈琴
住在宏新閣的 Dorz 帶年屆 87 歲的嫲嫲一同上樓。上月第一輪上樓，嫲嫲剛完成手術出院，無法爬上 14 樓，未能與孫兒一同回家。
嫲嫲笑言，昨夜無法入睡，今早特意早起檢查有否遺漏物品，「緊張到頭先手機喺度（示意背包）都唔記得」，但對終於能回家感到開心，「因為始終呢間屋住咗廿幾年喇，所以今次可以上去睇吓，我好開心」。她指已準備好上樓，堅定稱「一定可以上」。
她指，回家後第一時間希望先看房間情況，「入房間睇吓，有乜嘢燒咗，有乜嘢仲未燒，可唔可以攞走」，但指即使無法取回物品亦「無所謂」，「好多嘢都燒咗，而家我都有喇，我一路覺得上帝恩典夠我使用，我個心好平靜，好感恩」。她補充，稍後完成執拾後，希望在家中再次彈琴，彈奏教會詩歌。
Dorz 則指，今天心情較上月上樓「無咁激動」，「咁你上次已經有一次嘅心理準備呀嘛，所以今次⋯⋯都會緊張囉，懷住一個都唔識點形容嘅感覺返嚟，因為都唔想最後一次嘅」。
嫲嫲最後一口氣起登上 14 樓，抵達一刻引來全場掌聲。大火燒不滅周婆婆的信仰，她在漆黑中彈奏一曲《耶和華是愛》，又哼唱起「耶和華是愛⋯⋯在危難也不會變」，感恩天父保守她一家平安。在孫兒面前變成頑童的周婆婆，為可否回廚房尋「刨瓜皮」工具而與 Dorz 拌嘴，Dorz 則為她不顧安全而勞氣。
為了嫲嫲，牽掛宏福苑的 Dorz 說傾向出售業權，「因為一個就嚟 90 歲嘅老人家，佢一定要有一個好嘅安樂窩」，但他無奈形容安置方案似馬戲團，「我哋係啲馬戲團入面嘅野獸、獅子、老虎⋯⋯我哋好想不斷去講啲嘢，我哋盡量都好乖，但唔係喎，你繼續咁樣鞭打我哋」。
宏新周婆婆漆黑中奏《耶和華是愛》 孫兒Dorz：嫲嫲一口氣攀14樓引全場鼓掌
太太捨命救人 宏泰葉生：希望今次找到太太結婚戒指
太太在大火中捨身救人、住在宏泰閣 17 樓的葉家駒，與兩名兒子、大媳婦上樓，指三星期前首次回家，見到單位損毀嚴重，「都冇咩感覺，基本上可以燒到嘅嘢都燒晒，打完仗咁」，取回部分物品，例如服務金牌。
葉家駒說，第二次上樓比較緊張，「唔知點解，尋日瞓得唔好、瞓唔著」，如常在出發前向太太傳送訊息，著對方保佑他尋回物品。「上次我未搵到太太嘅結婚戒指，我自己嗰隻搵到，都溶咗，希望今次搵埋佢嗰隻。」
這次上樓，一家人的行裝較上次輕便，亦沒有攜帶花束，葉家駒說「相信佢應該好完整上到彩虹橋」，又說想在家中播放太太最喜歡的古箏電話鈴聲。
葉家駒上樓後指，最終未能尋回太太婚戒，卻意外找到太太常佩戴的手錶，雖然只剩錶殼，仍為他帶來一絲安慰，「算係其中一個同佢有個聯繫嘅嘢。」
盛載回憶的單位，如今是一片頹垣敗瓦，葉家駒堅持：「無論我屋企變成點，都係我屋企嚟。」然而，政府定下的收購業權「死線」逼近，他坦言「唔會依個階段去諗」，又質疑：「何來你情我願呢？其實喺成個過程，你都係不停咁壓逼緊我哋咋嘛。」
宏福苑再回家特寫｜葉家駒尋妻婚戒不果 僅剩錶殼仍會好好收藏「算係少少安慰」
宏仁中層胡小姐：方案僅「賣業權、賣業權同賣業權」 盼有原址重建選項
「呢個就係我個窗望出去，見到有個好靚嘅畫面，就係見到一個海、見到一個日出。」
宏仁閣中層的胡小姐今天第二次上樓，準備了一幅繪下家中窗外景色的畫，她說自火災後情緒不好，最近在治療時腦海浮現這個景色，所以畫了下來，打算今天放在家中留念。
胡小姐稱上次上樓心情太緊張，昨晚聽着音樂放鬆了一點，趁今天有一點陽光，她希望有餘裕欣賞家的景色，「我真係好想望下我個景，因為咁多年封咗個窗，一路都冇望過出面我哋個海、我哋個景，咁所以我好想，真係有一個機會，可以望返喺我屋企入面，望返出去，去欣賞個景，但係唔知道有冇呢個時間去做」。
她今次回家，特意佩戴寫有「Time to Go Home」的襟針，指有許多「任務」，還希望有時間彈琴、與家人拍攝全家福。可惜爸爸因腳患未能上樓，「我成日都話你想唔想上？佢話唔上喇，上唔到喇，佢成日都話上唔到喇、上唔到喇，我知道佢其實係唔捨得嘅，咁但係佢口冇講出嚟」，她打算稍後與爸爸視像通話，拍下全家福。登記上樓前，她亦與家人在宏福苑前合照。
同樣有腳患的媽媽回家心切，「但係佢好想上去」，一家會盡力協助媽媽回家，「陣間會推住佢又好、傍住佢又好⋯⋯應該可以嘅，慢慢、慢慢、一步一步咁樣上去」。
胡小姐自兩、三歲便在宏福苑居住，她上次上樓，尋回一盒錄音帶，錄下她兒時與妹妹遊玩、彈琴的音軌，「好多珍貴嘅回憶喺裡面，因為呢間屋係見證住我哋嘅成長，爸爸媽媽好辛苦去賺錢去買間樓，有一個安定嘅居所，而家變咗就要流離失所」。
說起宏福這個家，胡小姐不住哽咽起來，「我唔想講道別呢樣嘢，咁但係可能都係一個事實，我希望都可以再上多一次嘅機會，等我慢慢，即係我話，我喺上面 hea 又好、彈琴又好，我鍾意做乜都好，總之返屋企可以做嘅嘢，打機又好，畀我係可以舒服，enjoy 一個自己嘅屋企」。
被問到日後安置會如何選擇，她說「其實而家可以點，個計劃就係賣業權、賣業權同賣業權 3 個 option⋯⋯所以真係希望可以有多一個 option，就係原址重建嘅 option，畀我哋真正嘅居民去選擇。」
她又形容宏福苑好似已進入倒數階段，一眾街坊「講又講咗好多、爭取又爭取咗好多」，仍未能開業主大會商討安置方案，「就算係大家投、大家投票，真係唔係（原址重建）嘅，咁都死心吖⋯⋯而家好似係一路吊住，跟住一路就唔畀你做，跟住就變咗冇 say 嘅」。
