政府就宏福苑大火成立的獨立委員會，周四（5 日）進行「指示會議」，中環愛丁堡廣場展城館、香港中央圖書館演講廳開放予公眾旁聽，不少宏福苑居民到場了解。
有居民指，父母早已供滿單位，原打算「住到死」、安享晚年，兩人火災時剛好外出，逃過一劫，惟災後她需頻撲為父母申請資助、安排住所。有人則在大火中失去母親，「同佢講咗幾分鐘電話，再搵佢就已經聯絡唔到⋯佢哋百幾人係唔應該死，究竟係邊度出現咗問題呢」。
85 歲在火災獲救的居民，則憶述被困 9 小時及逃生經過，指落樓時獲消防員提醒，需繞過梯間的「大公仔」，「我話『唔好呃我喇﹐我知道係乜嘢』，後面兩個消防員將嗰個遺體拎埋落樓」。
相關報道：
獨立委員會3.19召開聽證會 杜淦堃：資訊顯示有結構性問題「不容忽視」
有年長居民到場始知登記失敗 有網媒被拒入場採訪
母火災去世 女兒：「百幾人係唔應該死」
獨立委員會「指示會議」在展城館多用途廳舉行，開放予公眾旁聽，並於展城館地下、中央圖書館演講廳設有兩個轉播區，共 400 個旁聽名額。多名宏福苑居民、死者家屬到場旁聽。其中太太捨身換五命的葉先生到達展城館，表示暫不回應。
Phyllis 的媽媽在大火中過世，她指當日曾與媽媽通電，「佢話畀我哋知屋企火燭、好大煙⋯同佢講咗幾分鐘電話，再搵佢就已經聯絡唔到」。她指，獨立委員會成立一個多月，「一路未有任何消息，都好心急、想知道進度、時間表，幾時畀我哋返入屋」。
她又說，「佢哋百幾人係唔應該死，究竟係邊度出現咗問題呢，究竟係建築商吖，政府唔同部門有冇監察吖，我哋中間冇參與，但事後係咪可以再了解返，將來唔會有同樣事件發生。」
85 歲獲救居民：火災時做好防禦措施
85 歲、居於宏泰閣的陳太，與兩名女兒前往中央圖書館演講廳旁聽。陳太指，對目前會議感平常心，又慨嘆「到依家都未有機會入去（單位）見過，到底我哋個家係點，唔知」。陳太女兒、陳小姐稱，「我哋都好想知損失有幾慘重」。
陳太又向記者憶述獨自被困大火 9 小時的經歷，提到當日做好防禦措施，例如開窗、開抽氣機器、將風扇向窗外吹，「所以我屋企裡面有入嘅黑煙，但冇停留嘅黑煙，我都僥倖一氧化碳唔係吸入得太多，我用濕咗嘅口罩嚟代替濕毛巾。」
陳小姐則指，當日在樓下看着屋內的母親，「我哋初初隔一個鐘（打電話一次），但越嚟越夜呢，就打得越嚟越密，因為見到個火勢越嚟越犀利」。
陳太：消防員着「檻過大公仔」
陳太指其後獲救，跟隨消防員行樓梯落樓，「（消防員）話 12 樓有個大公仔，你唔使驚，你檻過佢就得喇，一個拖住我，一個抆住我落去。落到 12 樓，佢話，嗱，個大公仔喺度，你檻過佢喇，我話『唔好呃我喇﹐我知道係乜嘢』，後面兩個消防員將嗰個遺體拎埋落樓。」
陳太說，很感激當時協助救援的消防員，以及與她通話的警察，讓她平靜下來，「讚佢哋嘅專業精神」。
陳太居於宏福苑 40 年，「點解宏福苑呢個地方我哋會唔捨得，一嚟景緻好靚，吐露港晨曦⋯交通覆蓋晒成個香港九龍、深圳，24 小時都有車，非常方便嘅中樞點」。
她指，現時與女兒同住公屋，「一個好細嘅空間逼住 3 個人」。對於未來安排，她反問「我哋能夠有咩打算？」提到原區安置潛在選址包括廣福公園，但質疑公園下是一個大石油氣缸，「所以嗰度唔可以用嚟起屋，就起咗一個公園，你依家要起一間屋喺嗰度」。
陳小姐表示，希望宏福苑原址重建，「宏志閣完全冇燒嘅，點解宏志閣居民唔可以返入去住呢？甚至我哋宏泰閣其中有一個方向都冇燒過，點解唔可以返上去睇，點解冇乜點燒過嗰啲，唔可以維修返，畀返居民住呢？」
陳小姐：災後頻撲為父母申資助
另一位居民陳小姐（化名）受訪指，婚前一直與七旬父母居於宏福苑一低層單位，即使婚後遷出單位，仍視宏福苑為家。她指父母年邁不了解聆訊程序，但她關心事態發展，特意前來旁聽，並努力抄寫庭上內容，散庭後再趕回公司上班。但她坦言擔心委員會沒有法定權力，有如「做場戲」。
陳小姐說，父母是宏福苑單位一手業主，單位早已供滿，原打算「住到死」，安享晚年。陳憶述，大維修期間父母家中環境惡劣，父母表示「好大塵，唔好上嚟」，本希望維修後便可繼續安居，最終發生火災。父母火災時剛好外出，逃過一劫，但她認識多年的鄰居好友卻不幸罹難。
她指，災後頻撲為父母申請各項資助，安排住所。父母災後曾短暫居於酒店，又被安排至啟德過渡性房屋，最後決定另行租住單位。她又指，考慮到大埔租金上升，父母只得在新界另一區租住，面對交通不便、居住環境改變，只得盡量適應。
她提及，不論其父母或大部分其他區民，均希望在原址重建，宏福苑景觀「好靚」，交通方便「搭 307 出中環、搭車出旺角，半個鐘就到」，「緊係想住返宏福苑」。
朱小姐：期望盡快獲安排提出訴求
住在宏昌閣的朱小姐指，政府召開指示會議進度「比預期慢」，指周四特意前來了解怎樣搜證等，「我哋係有期望，但今日個會係純粹聽，期望我哋政府盡快安排一次，畀我哋 1,984 戶去提出我哋嘅訴求，so far 我哋未做到呢一樣嘢。」
被問及會否想從聆訊了解起火確實成因，朱指「知道固然好，我話知道又如何，會唔會拉晒嗰班人去坐監吖，或者係嗰間承建商有咩懲罰，冇人知⋯⋯我哋作為一個小市民，我哋可以做啲咩？」
朱又指，早在業主大會見過承建商代表，「一早話咗（承建商）有問題㗎啦，一早睇咗份標書都覺得有問題，但（將工程）判畀佢，我哋都冇辦法」。
潘焯鴻：反圍標組織不能成為涉事方
前業主立案法團管委會委員江先生則指，政府要求解散業主立案法團前後都沒有接觸居民，對於是次指示會議「冇希望」，「又唔畀講嘢」。
關注宏福苑大維修、「中科監察」主席潘焯鴻，在指示會議開始約一小時後離開，指「唔想嘥時間」。潘認為，長期參與宏福苑反圍標、或其他反圍標的組織，不能參與成為委員會的涉事方，無法完整調查所有證據，會令將來調查出現缺陷。
