2019 年 11 月 18 日，警方圍堵理工大學，巿民在尖沙咀科學館一帶，聲援被困校內的示威者。10 人被控非法集結罪，周四（11 日）在區院續審。辯方指，21 歲中大男生被告遭警員威嚇及毆打而作出招認，反對其警誡供詞呈堂。 該男生出庭作供，稱當日警方與他錄口供時，他曾不作聲，警員表示「你唔出聲我就作落去，話用嚟掟汽油彈。」他後稱「我冇嘢講」，警員則指「即係玩嘢啦」，遂帶他到廁所「教育」，三度拳打其肚，問「陣間出到去仲有冇嘢講？」。他稱當時感疼痛，只好說「有呀有呀」，並「順佢（警員）意寫」及簽署。案件周五（12 日）續審。
男生被捕後坐警署露天空地
指有警稱「今晚慢慢同你哋玩」
辯方指，第九被告周浩泓遭警員威嚇及毆打而作出招認，反對其警誡供詞呈堂。
周作供稱，2019 年 11 月 18 日早上，他在科學館附近遭截查，其後被帶往深水埗警署。當時周雙手被綁住，與大批人士坐在露天空地，期間他要求喝水，警員遂剪開其索帶，並遞了一杯水給他。
周憶述，有些蒙面警員威嚇被捕人士，「你哋呢班暴徒、垃圾，今晚慢慢同你哋玩」、「你哋唔係好威㗎咩？點解依家啞哂？」、「你試下掂你前面個袋，一槍嘭瓜你哋」。
周：警曾問「收咗幾多安家費」、
叫「唔好搞咁多嘢」
周續供稱，15 至 20 分鐘後，他要求去洗手間，一名軍裝警員帶他前往廁所途中，問他「你跟邊個㗎？」、「你今次收咗幾多錢安家費？」、「你咁 on X 嘅？坐咁多年都肯嘅？」周指，認為警方當他是黑社會，「驚佢會屈我」，故沒有回應。
周稱，不久有女警向他說：「你唔好搞咁多嘢啦，搞咁多嘢就即刻帶你上庭。」周認為，這或跟他向警方提出要求有關。下午約 3 時，周看到新一批被捕人士到達警署，其中兩人頭部流血，「好驚（警員）會唔會陣間都打到我咁樣。」
周：向警稱讀中大 警指「中大單嘢有你份」
周續供稱，等候錄口供期間，數次要求打電話，警員均表示「好忙，陣間先」，又有警員表示「你哋最好乖乖地同我哋合作，趁依家有時間，好好諗吓點解會喺嗰度出現，唔好入到去錄口供口啞啞。」
周指，下午約 5 時被帶往辦公室，同場亦有其他被捕人士正在錄口供。周四處張望時，警員 10760 說：「望乜 X 嘢呀？顧掂你自己先啦！」周在警員詢問下，表示自己就讀中大信息工程系，警員 10760 問：「讀乜 X 㗎？整無人機嗰啲？」
另一名警員聞言亦稱：「你讀中大㗎？前幾日中大嗰單嘢，肯定有你份掟汽油彈啦！你哋當玩遊戲咁，中大玩完啦，冇俾人捉到，咪過理大玩囉。點知今次唔好彩俾人捉到，冇乜嘢嘅，坐返三五七年，出嚟又係一條好漢」。
周：拒回答手套用途 警稱「你唔出聲我就作落去」
周續供稱，警員 10760 將他背囊內的物品倒出，向他詢問勞工手套是否用作掟汽油彈；周不作聲，對方兇惡地說：「依家問緊你嘢呀，你唔出聲係咪啞㗎？你唔出聲我就作落去，話用嚟掟汽油彈。」周隨即表示，是用來玩遊戲機。
周：警稱「帶暴徒入去教育一下」
後在廁所三度遭警拳打
其後，周稱「我冇嘢講」，警員 10760 說：「冇嘢講，即係玩嘢啦」，表示懷疑其衣服上有催淚氣體，帶他往洗手間更衣，又指衣服將來會成為呈堂證供。兩人行到門口，警員向穿着白色衣服、疑是高級督察的人說：「我帶暴徒入去教育一下」，對方回應：「好呀，冇問題，啲暴徒係要教訓一下」。
周表示，在廁所脫去上衣、上身赤祼之際，警員 10760 三度拳打他的肚，「係咪冇嘢講？」、「陣間出到去仲有冇嘢講？」周感疼痛，只好稱「有呀有呀」。他又向周說：「陣間出到去你識做啦，一開始你肯合作咪好囉，唔使嘥我咁多力氣」。
周：警指「認罪先要見律師」
擔心遭警打「順佢意寫」口供
警員向周讀出「羈留人士通知書」，周聽到羈留人士權利包括找律師，遂要求見律師。警員 10760 表示：「咁你係咪認罪呀？認罪先要見律師，唔認罪使乜搵律師呀？」周表示不認罪，遂抄寫由警員提供的聲明。
周：聞警問「有冇發覺多咗浮屍」感害怕
控方質疑大學生竟信幼稚說法
至於口供紙上寫有「我未有時間清除路障，就俾警察拉咗啦」、「我冇嘢改」，周表示自己沒有答過，但因擔心再次遭警員毆打，故「順佢意寫」及簽署。
周又憶述，警員 10760 問他：「有冇發覺呢排多咗好多浮屍？」他表示當時感害怕，「因為我驚我會變成其中一個，我驚佢會打死我。」
周在控方盤問下同意，被警員毆打後，沒有表面傷痕，也沒有求醫。控方質疑周是大學生，竟然相信「浮屍」這幼稚說法，是匪夷所思；周指「真係咁樣諗」。案件周五（12 日）續審。
10 人被控非法集結
10 名被告依次為陳以諾（20 歲，學生）、羅曉峰（32 歲，教師）、蔡希霖（20 歲，學生）、杜俊興（31 歲，侍應）、鄧子健（22 歲，學生）、彭永強（31 歲，地盤工人）、陳杰風（25 歲，無業）、麥俊彥（18 歲，學生）、周浩泓（21 歲，學生）和葉自傑（23 歲，學生）。他們同被控於 2019 年 11 月 18 日，在尖沙咀科學館廣場一帶非法集結。
DCCC854/2020