宏福苑大火聽證會周四（ 26 日）踏入第四日，居民陸續作證。有遺屬表示，對宏業董事拒絕出席聽證會感到失望，認為所有涉事方都應交代，尤其被點名「通水」的房屋局獨立審查組（ICU） ，「我哋畀個機會佢親自辯解，唔好我哋大眾喺度揣測、未審先判呀嘛。」
居民王淑蘭則提到，聽聞有協助區議員黃碧嬌的義工收授權票，又指有居民關注招標書內容時被義工責罵，「我哋（居民）好難講嘢」。她指，在聽證會上重提火災事件仍感到壓力，但希望可「做返啲嘢」。
相關報道：
10居民作證提及自救、逃生經過 質疑宏業中標有內情
羅曉琪：ICU應作供 勿讓大眾未審先判
在大火中失去媽媽的羅曉琪作證後在場外受訪，指對於宏業董事拒絕出席聽證會，感到「好失望」，指「大家都對佢哋有期望，唔係唔出嚟幫自己辯解係咪啊？」
她認為，所有涉事方都應該傻供，尤其被點名曾向顧問公司鴻毅「通水」的房屋局獨立審查組（ICU），亦應該現身解釋，「我覺得佢自己可以出嚟解釋一下，我哋畀個機會佢親自辯解，唔好我哋大眾喺度揣測、未審先判呀嘛，啱唔啱呀？」
羅曉琪：申請為涉事方因不想再假手於人
針對授權票的問題，羅指知道母親亦曾簽授權票，事前並無徵詢子女意見，「好多時開居民會，都係有街坊直接問佢攞授權票」。她指以她所知，該些街坊均為管委會成員，「我哋做咗咁多年街坊，咁我媽咪都應該覺得可信同可靠，所以我哋通常都係交授權票畀街坊處理」，但不清楚當中有否牽涉政黨參與。
羅又相信，索取授權票的情況「屆屆（法團）都有㗎啦」，因為大部分居民都不會積極參與管委會會議，「你要返工、你要工作嘅時候，你返到屋企都要煮飯湊仔，你邊度得閒去開呢啲會？」她補充，居民不熟悉法團事務，「我哋都會覺得自己都唔識，我哋去開都冇用㗎喎⋯佢哋有專業知識喎、佢哋有經驗喎、又熱心喎，我哋咪將呢一樣嘢交託咗畀人哋。」
她指，現時明白授權或許並非最健康做法，就算不熟悉法團事務亦應該親身出席會議，所以自己才會申請成為聽證會涉事方，「因為我唔想再交託畀任何其他人代表我，我自己親身出席，我嚟咗我唔識、我唔明，都冇得好怨呀嘛」。相反，如果「我下下都將呢一樣嘢交畀其他人嘅話，其實我自己冇盡到呢個責任」。
王淑蘭：作供感壓力但盼「做返啲嘢」
另一居民王淑蘭本身居住在宏志閣，為宏福苑唯一一棟未受大火波及的大廈。她在聽證會上供稱，聽聞有協助區議員黃碧嬌的義工向宏福苑居民收授權票。
她在場外指，這些義工均居住宏福苑，「我哋（居民）好難講嘢」，舉例指過往居民關注招標書內容時，會被義工責罵。王又指，火災後政府有安排解說員、一戶一社工、房署人員親自接觸，但仍另有「打手」指導居民該如何應對。
王指，「打手」自稱代表居民，與政府溝通，「將意見交畀『嗰個黨』」。她沒有點名政黨名稱，僅表示「我唔敢講佢哋囉，一陣間又誹謗又盛」，又指「我唔明白點解一個屋苑的事，不停咁由頭到尾都有政黨嘅參與。」
她提到，在聽證會上重提火災事件感到很大壓力，但仍希望可「做返啲嘢」。
冼善卿：感謝警員平復心情
冼善卿作供後接受傳媒訪問指，出席聽證會作供只是「盡緊公民義務」，因自己在應對火災的態度獲大眾稱讚，「我就覺得，我好似做得啱喎⋯⋯希望講呢啲訊息話畀所有人知道，當我哋遇到咁樣嘅情況之下，我哋用咩心態去處理自己。」
冼又指，希望透過傳媒向消防員致謝，「消防員係救咗我呢條命，而畀我記憶好深刻嘅 4 個，但我唔識佢哋係邊個，我好多謝佢哋救咗我條命。」她又指，撥打 999 熱線後，接線生將電話轉駁警員，該警員讓她心情平復下來，「有種好安全嘅感覺，我動盪嘅心情俾佢壓落嚟，所以我嗰陣時會慢慢思量、聽佢嘅話，好好等，聽佢指示，聚精會神咁去聽，咁就救咗我出嚟喇。」
曾任法團司庫的冼又提及，多年前曾有居民狀告法團主席，敗訴後由區議員黃碧嬌代為支付 3 萬元堂費，「我覺得議員用呢啲錢去幫呢啲成日誣告人嘅人，我覺得唔應該嘅，但係佢係一個有識之士，佢去做，我就唔明點解。」她認為，區議員的薪金應該用於幫助社區。