宏泰閣、宏建閣災民周四（30 日）繼續分批上樓，有在宏建閣出生及成長的居民，與父母回家執拾後繪油畫抒發情感，畫出被車撞斃的牛、被人道毀滅的野豬與宏福苑，指他們同樣地被毀滅。
多名災民悼念因大火離世的親人，郭太說多名鄰居喪命，不欲再回宏福苑居住；不過彭太說仍有不少居民希望原址重建，形容現時處境有如被逼賣業權，又質疑為何仍然未能讓他們召開業主大會。
政府晚上指，全日共 117 戶 457 人上樓，進出大廈的平均時間是 2 小時 25 分鐘。
Day10｜宏建温小姐盼召業主大會：點解一定要賣業權？
在宏建出生、成長居民
上樓執拾後繪油畫抒發情感
「佢而家就畫緊幅畫去悼念，前面隻牛最近畀車撞死，野豬係 3 月一家幾口誤闖屋村被人道毀滅，最後嗰幾棟就係宏福苑，同樣被毀滅」，Ken 與記者分享妻子今晚剛完成的油畫。
兩人今日下午與外父外母，一同回到宏建閣 14 樓的單位執拾。Ken 說，外父母住在那裡已 40 年，妻子亦在單位出生、成長，直至婚後，兩人逢周末都到外父母的家過夜，但「自從大維修之後冇咗冷氣，就冇得再返去」。
他們除了拿回相簿、貴重物品，亦帶走妻子以往的油畫作品，畫像全是娘家的貓貓和狗狗。
Ken 說，火災當日家中還有兩隻貓貓，警察本來不讓外父返回單位，但最終放行，讓他得以救回貓貓，「佢（外父）話而家對呢個感覺好恐懼，唔敢再嚟住，所以唔夠膽再返去住」。
宏建16樓盧女士：
大火前剛裝修洗手間及廚房
住在宏建閣 16 樓的盧女士指，社工沒發送單位的相片給她，而她獲告知可 4 人上樓。
她指，7、8 年前購入單位，「我哋啲嘢都好新」，「盡量攞得到就拎走晒佢囉」，又指最希望取回求學時的證書，「我哋以前讀嗰啲中學已經執咗笠，全部（證書）紙㗎嘛，同埋我以前唔係 DSE，係中五文憑嗰啲嚟㗎嘛，嗰啲對於我舊一代嚟講都好重要」。
她慨嘆，於火災前剛剛裝修了洗手間及廚房，「即係好似好可惜咁⋯⋯裝修咗一年都冇」。
宏昌彭太質疑先賣業權後揀樓：
「有無咁樣嘅道理呢？」
住在宏昌閣的彭太，今日陪同媽媽上宏建閣中層單位收拾。她住在宏福苑近 30 年，媽媽則住了 20 年，對於政府的災後重置方案，彭太說災民至今仍未有機會詳細了解，卻要他們做出處置業權的決定，做法不合理。
「你要其實係話畀我哋聽應該點樣做呀，佢完全無機會畀我哋居民去好清晰（了解）你嗰啲方案係點樣，係無個喎」。
彭太所指的「機會」，其中一個場合是業主大會，她期望可在會上了解政府方案的詳情。但自從大火發生、法團管委會被解散，5 個多月以來法團一直未召開業主大會，議決屋苑事務，或讓居民集合交流及表達意見。
「咁點解我哋要求開業主大會係唔得呢？點解唔可以嘅？咁多個月囉喎，無理由籌備唔到㗎嘛，係咪呀？咁你未開業主大會，你就要我六月尾之前就要賣咗個業權喎，有無咁樣嘅道理呢？」
她擔憂若按政府次序，先賣宏福苑的業權但最後揀不到適合的居屋單位，居民便會進退兩難，「要我賣咗個業權先，先至再去揀樓喎，咁我揀唔到樓，你叫我賣咗個業權喇，咁點樣呢⋯⋯揀唔啱咁我住邊？係咪繼續住中轉屋吖？你收購價又唔合理啦」。
彭太指，由政府提出收購呎價至今這幾個月，樓價升幅不少，居民賣出業權得到的錢，屆時將難以負擔私樓與二手居屋。她又認為，政府現時提供的一手居屋選擇有限，部分偏遠，若居民未能揀選，希望政府能提供其他選擇。
她說，居民群組之中有很多人想繼續住在宏福苑，特別是損毀不是最嚴重的宏志閣、宏建閣，但政府說重建需要 10 年時間，「其實我都想（等原址重建）但係你 10 年，以我咁嘅年紀，都唔係好想等，你強逼我，無得咁去等。」她認為政府應該有方法縮短時間，若果能縮短，相信「好多人會想原址重建」。
對於居民現在面對的情況，她形容有如被強逼賣樓，「佢（政府）係說服唔到，但係我而家係無辦法，係要接受喎」。
「離開宏福苑我係好唔捨得」，彭太說，日前重回宏昌閣感覺就似由一個熟悉的地方，變成去了一個陌生的地方，「好似一個廢墟咁樣」，感到心痛、難過。
她說多年來一直很喜歡宏福苑，「我諗住大維修完，就一路長住㗎嘛，我係完全無諗過去賣㗎嘛⋯⋯點解我哋大維修，我哋依然都要捱過去，就係我哋鍾意呢個地方先會繼續住㗎嘛⋯⋯捱過咗呢個大維修，大家咪住得安安樂樂囉，誰不知而家大家冚棒唥都唔安樂」。
對於上樓時間，彭太指緊逼，「我哋有 12 個鐘頭㗎嘛，係咪？⋯⋯但你要執晒成間屋，你覺得有無可能吖？係無可能嘅事嚟㗎嘛」，認為應讓居民再次上樓。她又指發現衣櫃、櫃桶被打開，但慶幸沒東西不見。
宏泰8樓陳生陳太：灰燼中找到
兩孩子百日「石膏腳仔倒模」
宏泰 8 樓住戶陳生、陳太，住在宏福苑十年多，今天落樓後笑着對記者展示，在灰燼中找到兩孩子 100 日大時所製作的「石膏腳仔倒模」。
兩人以幸運、驚喜形容小朋友的「腳仔」石膏倒模失而復得，指單位情況非常惡劣，物品大多變灰燼。他們又指，獲政府通知樓下（即 7 樓）單位「燒得幾嚴重下」，連帶天花的樓層板變薄，所以他們的單位，部分位置只准一人進入，「話小心啲搵，聽到怪聲都要衝出嚟」。
兩人又指，小孩的兩對「腳仔」石膏倒模一開始「無諗住可以掘得返出嚟」，尤其它原本擺放在細房的琴櫈，而細房很多物品都已燒毀，沒料「鏟鏟下竟然有兩個搵返」、「所以掘到可能真係天意囉」。
一場大火令他們失去家園，但陳生說「我覺得住呢度係最正確嘅選擇」，希望可原址重建，指一來對此處有深厚感情，二來宏福苑的地段是「大埔最好」，除了街坊所提的「無敵大海景」外亦能望到廣福公園。
宏泰中層朱生：大維修前買單位
大火前剛完成裝修入伙
「消化唔到㗎，冇可能㗎，只有接受囉。一直喺個腦度，燒咗間屋⋯⋯成副身家喎，諗住有一個屋，一家四口住。跟住一年，無晒。」
住在宏泰閣中層的朱先生表示，他在大維修之前購入單位，一家四口居住，「諗住（而家）大維修喎⋯⋯嚟緊到老唔使煩大維修啦。點知呢個大維修搞到咁樣」，「其實係咪有需要大維修呢就，見仁見智囉」。
他稱，一家人亦趁屋苑大維修，順便裝修單位內部，但入伙不久即遇上火災，而當天正值妻子的生辰，「啱啱裝修好，諗住（與）太太生日慶祝，就嗰日慶祝啦」，又稱「好彩我哋買嘢晏咗，未返到屋企慶祝」，得以避過一劫。
事隔 5 個月回家，朱生說「一入去個大堂都真係黑色」、「總之唔係牆嘅嘢都係爛㗎喇」，又指他所有模型都遭燒毀。記者問他有否打算再儲模型，他答「都有嘅都有嘅，慢慢儲返囉，當然啦，都要有返間屋先啦」。
他又表示未來打算抽樓，想盡快入住九龍灣、粉嶺的居屋單位，但只有少量供應，擔心屆時只能「硬食」200 多呎的單位，不夠 4 人居住。
宏泰7樓何老太：單位燒成灰燼
「一句講晒，無奈」
宏泰 7 樓的何老太表示，自己是第一手業主，一住就 40 幾年，對於單位被燒成灰燼，她說「一句講晒，無奈」。她把在單位取出的物品，逐一對記者展示被燒的情況，自嘲此情此境仿似「重案組」辦事。
宏建20樓崔太：花梨木傢俬搬不走
盼安排升降機
「我第一個家就係宏福苑，住到𠵱家⋯⋯而家要我哋搬我哋真係唔係好捨得囉」。
宏福苑一手業主崔太，40 多年前與丈夫購入宏建閣 20 樓的單位，大火中幸運地未受波及。他們今早上樓，搬走十幾箱物品，包括老爺 40 多年送作喬遷禮物的花瓶、丈夫到台灣旅行時買的擺設、兒子送的公仔等。
崔太說，家中的一草一木都是一家人多年來用心經營，「經營咗 40 幾年間屋入面啲嘢⋯⋯（嘆氣）全部都係我哋慢慢儲返嚟㗎嘛，而家都搬唔晒㗎」。
她最不捨得擺滿一屋的花梨木傢俬，指因為太重、太大件，難以搬走，她憶述兒子 3、4 歲時，他們發現傢俬尖角容易令幼兒受傷，「咁我周圍搵搵到，啊原來啲花梨（木）傢俬係圓角，啲角位全部圓嘅，咁我咪慢慢儲，儲到錢又買一件、儲到錢又買，因為講平唔平、講貴唔貴，咁你真係要慢慢一件一件咁樣儲返，儲到我而家成屋都係」。
兩年前裝修，崔太亦沒有換新傢俬，「人哋話你用過啲新㗎啦，我唔換，我要用返啲舊嘅」，她希望政府可以安排升降機搬運傢俬，只運貨不載人也可以，「你幫下啲街坊唔使佢哋咁辛苦，政府好似聽唔到我哋講咁」。
崔太指，希望重址重建，她說時眼眶泛淚，哽咽稱不想考慮其他安置方案，「我想返嚟宏福苑啊，我唔想去諗啊，其實冇一個地方我鍾意，全部都好偏遠，我都唔熟悉嗰啲地方⋯⋯算啦，不過都要⋯⋯你都要面對嘅」。
老爺、姑仔宏泰閣罹難
葉太：在單位默哀悼念
葉家完成執拾落樓後，葉生的堂哥向記者表示單位「一片狼籍」，大部分地方都被熏黑。他喚葉爸爸為「阿叔」，說能在單位內找到他生前用的羽毛球拍，亦找到罹難堂妹的鼓和譜架，他們已帶走譜架。
堂哥說，見到葉家的全家福時感受，有些觸景傷情，「如果有得揀，我寧願嗰兩個走咗嘅人喺度，嚟換嗰堆嘢，乜金呀盛，寧願唔要⋯⋯當然而家件事發生咗，搵得返啲嘢都係少少安慰，至少唔會冇晒啲嘢」。
堂哥又說，他們亦帶走了阿叔繪畫的畫，他記得阿叔養過兩隻雀，有一隻飛走了，只剩下另一隻，於是阿叔特意繪畫一隻雀陪伴牠。（葉太指兩雀是大姑仔養的竉物）
被問及有何悼念儀式，堂哥指儀式已在喪禮辦妥，但指「我諗唔係話一定要喺某個時刻、某個時空、某個時間、某個地點去悼念，因為始終係親人。平日生活⋯⋯我爸爸媽媽睇新聞都會諗起呀叔⋯⋯唔會特別去悼念，但係成日會記住記住咁囉」。
堂哥又憶述，大火當天他們下午約 3 時知道地點是宏福苑，已即致電阿叔和堂妹，但已沒人接電，相信當時兩人已處境危險。
葉太亦透過訊息回覆記者，指單位「大門口廚房廁所燒毀嚴重，其他係熏黑及爆玻璃散晒落地」，他們找到也帶走了老爺奶奶的合照、全部金飾，亦找到被灰燼覆蓋的全家福，又指「有擺放花悼念佢哋、默哀、再望多次單位窗外風景」。從葉太發送給記者的相片可見，她們曾嘗試抹走全家福上的灰燼，但仍非完全清晰。
她又稱，「感恩今日無落雨，順利進行搜尋收拾，但因好緊張唔夠時間，令我好緊張，未能放慢好好坐低望下間屋。當放下急促收拾的心情，情緒就走咗出來支配咗我。因為心真係好累，而且好愧疚。」
「隻大烏龜都係搵唔到痕跡，希望係有人救走咗。」她又感謝借出物品的朋友及有機構借出物資和提供提醒事項。
上樓前受訪啜泣
稱自責沒及時報警
住在宏泰閣 8 樓的葉家，在大火中失去葉爸爸和其中一位女兒。兒子葉生今天與妻子帶了兩紮花上樓，悼念兩位逝世家人。
葉太表示，大火之前，他們本來是愉快的家庭，但大火之後，「間屋已經灰晒喇」，因此選花時「簡單有少少顏色，畀返少少色彩」，並提到今天是老爺的生忌，6 月則是姑仔的生忌，「希望有花可以陪伴佢哋、慰藉吓佢哋」，又指家中的竉物，「隻貓走咗啦，愛協搵到。隻龜搵唔到，連個大膠箱都搵唔到」。
說起失去的家人，葉太難掩悲傷，多次哽咽痛哭。她說自己由與丈夫拍拖、嫁入葉家已經 20 年，而由於奶奶早年已去世，宏福苑的單位是老爺與兩位姑姑一起居住。
葉太憶述大火當天，她和丈夫是從新聞得知，她乘的士下午 3 時 45 分左右趕入宏福苑，到達時見到封鎖線已至「橋頭」，她衝入封鎖線去到廣福邨，當時有位置供人登記有否家人身在宏福苑。
她哽咽說，「最估唔到話畀佢聽屋企有人，其實幫唔到手，完全唔知道原來要報警嘅，要報警話屋企有人嘅。我唔知囉，我完全唔知，我無做到呢樣嘢囉完全⋯⋯我剩係識去登記囉」，隨即失聲痛哭，「原來登記係無人傳達到係屋企有人囉，原來要報警囉，我無做⋯⋯就係因為無報警，剩係喺度等⋯⋯」
葉太哽咽稱，當時自己不知所措，為找回家人，去過疏散地點，「睇吓有無街坊見到屋企人⋯⋯無人，無人認得⋯⋯」，亦去過老爺最熟悉的大家樂，「因為好驚佢嗰吓一時唔知點，迷失咗」，又逐間醫院搜索，「問吓有無啲昏迷不醒、無身份證明文件嘅人」，但原來「全部都通報唔到」。
葉太痛哭稱，「好後悔無報到警⋯⋯以為去到現場，通知咗人屋企有人，會救囉，原來唔係囉⋯⋯而家諗返好似喺度等佢哋出嚟，點解上面啲人救到，佢哋救唔到⋯⋯佢哋連鐵閘都可能出唔到⋯⋯唔知道原來報警好重要，我都係睇返之前聽證會新聞⋯⋯先知道好多人都有報警，點解我無做到報警，我無報到警⋯⋯如果我哋幾個一齊報警，係咪會有用呀？」
談及上樓安排，葉太說希望待會能夠上去，平和地與老爺、姑仔道別，但隨即亦再次痛哭，「我唔想同佢哋道別㗎⋯⋯點解要道別呀？點解唔可以留長啲嘅時候，或者上去陪耐啲⋯⋯所有嘢被限制」。
她哭稱，「成件事最錯，錯在點解佢哋喺屋企走唔甩⋯⋯（但）其實佢哋無錯㗎，佢哋只係喺屋企咋。佢哋喺自己最舒服嘅環境㗎咋⋯⋯」她說自己幾歲大的兒子，既掛念但又害怕大埔，指他看了新聞後「問爺爺喺邊」。
今次上樓，除了悼念家人，她說最想找回全家福，「唔知司長係咪都係咁啦，屋企無全家福嘅，屋企無甜絲絲嘅感覺。我哋啲小家庭，係有嘅。」她又說這幾天一直有留意街坊上樓的新聞，「掛住睇新聞啲人帶咩，驚帶漏、做唔足嘢」。
她亦說，早前曾就單位懷疑失竊報案，而警方回覆稱不見搜掠痕跡，「但有成疑」，因近來都許多失物情況發生，「同埋睇相啲櫃有手印，都擔心啲嘢唔喺度。」
宏泰8樓郭太：朋友鄰居「個個都唔喺度」
不希望回到宏福苑居住
宏泰 8 樓郭太表示，在宏福苑建成後即入住，3 名子女之中，最年幼的女兒 1985 年在這裡出世，而他們的孫兒亦在此出生、成長，今天特意帶備相機上樓拍攝，指因名額有限，孫兒就算想上樓也未能成事，故拍下環境「畀個孫睇」。
她說，上樓之前已收到社工照片，「睇到心情都預咗九成」，屋內物品幾乎「一啲都都攞唔到」，家庭照片全數焚毀，亦遺憾找不到自己受浸時收到的禮物，但「咁啱摷到兩對鞋，自己嘢，無燒到」，另家人找到一些工具如螺絲批，亦找到一個盒，「俾佢鏟（到），藏到好底」，未知裡面東西有否焚毀。
郭太現住在啟德的臨時房屋，希望日後可以搬回大埔區，因自己生活圈子全在大埔，現在幾乎每天都回大埔，出席教會、社區中心活動，與街坊飲茶聊天，丈夫則暫住在兒女在廣福邨的家中，「因為佢出去（九龍）唔適應啊，佢又唔知點樣搵食，又唔知點樣搵地方玩」。
雖然不捨得家園，但郭太不希望重新回到宏福苑居住，因難免會想起過世的鄰居、朋友，「宏福苑唔會返㗎喇，就算冇燒到都唔會返㗎喇，因為即係成日你經過，就會諗起囉，同埋啲朋友個個都唔喺度，嚟到又諗起，啊我隔離嗰兩個（鄰居）都唔喺度⋯⋯樓上有個仔又唔喺度，再樓上有個兩公婆一齊唔喺度，嗰兩公婆係我哋同佢一齊跳舞嘅，嗰個仔唔喺度呢，嗰個阿媽我又同佢一齊跳舞嘅」。
郭太說剛才上樓，回想起在宏福苑與孫兒的回憶，「睇住佢哋喺度大，成日喺下面踩單車啊，同佢一齊打羽毛球啊」，希望下次可以與孫兒再次上樓，毋須忙於執拾，靜下來感受在家的時間，「（剛才上樓）又掛住影相、又掛住摷嘢咁，你個心好亂⋯⋯而家定落嚟喇，諗住唔使摷嘢咁，下次再上去呢，再望、慢慢慢望清楚，再個記憶再記返深啲」。
結束訪問後，郭太特意請記者替她與宏泰閣合影，擔心宏福苑「遲啲就拆㗎喇」。
宏建住戶盧生：心情好忐忑
宏建住戶盧生表示，今天回家「心情好忐忑，好期待上去望一望」，稱衣衫應該沒被燒毀，打算回家去取貴重物品，例如金飾、錢及照片。
宏泰住戶曾生：
冀帶走婚照、小朋友畢業照
宏泰樓住戶曾生表示，沒收到自己單位的照片，故暫未知情況，期待損毀不嚴重。5 個月後回家，曾生說心情「緊張啦都會，即係一半一半啦，即係你可以返番自己屋企喇，過咗 5 個月。但係另一個就係，唔知個情況係點」。
他續說，打算帶走家中有紀念價值的東西，主要是小朋友的幼稚園畢業照、結婚照，以及金器等。
陪宏泰閣朋友上樓
簡生：往日常造訪今如「異空間」
簡生表示今天陪同朋友上宏泰閣單位收拾，由於朋友是住在高層單位，消防救火的喉管上不到那麼高、救不到火，而從早前朋友傳來照片所見，單位情況頗為惡劣，故預期已無東西可撿走。
簡生落樓後表示友人的單位中，只燒剩鋼、瓦類的東西，他和友人一起砌的玻璃櫃已燒至變形、縮成一塊，按摩椅亦只燒剩鐵架。
簡生又說，以前不時到友人的家打機，這次上去已經認不出任何物品，有如進入了「異空間」，往日堆滿屋內的模型、公仔也已燒毀。他特別提到，屋內有一雙「安全鞋」未燒盡，遺留下鋼片。
宏昌30樓崔生：從沒怪責鄰居
政府即日聯絡 答應安排清理雜物
住在宏昌閣 30 樓單位、日前上樓發現屋內出現大量外來物品的崔生，周四再現身宏福苑，他表示今天是回宏建閣的舊居，協助父母收拾物品。至於宏昌的單位，崔說他所知的與周三政府記者會一致，即政府會在未來數天安排他和鄰居一同再次上樓收拾，而具體日子、可收拾多久等，暫時未知。
崔生披露事件的翌日，政務司副司長卓永興表示，初步了解是救援同層單位狗隻期間，把雜物放出公共空間所致。
Threads 同日有報稱是崔生的鄰居發帖，向崔生一家致歉，「完全無諗過本人家中雜物會被轉移到鄰居家中，睇到啲新聞鄰居話搵唔到自己嘅嘢，我真係覺得萬分抱歉」，又表示確曾向警方報失兩狗，但兩狗遺體已在 11 月 28 日，由漁護署確認晶片後通知他在大廈大堂尋回，質疑有關雜物轉移的時間點，不是搜救寵物之際，「係咪將罪名推落我兩隻狗度？而且你哋話搵狗，咁點解我哋屋企都有失竊？」
就鄰居的 Threads 帖文，崔生表示經記者轉發他才得知，「我從來無怪責過鄰居，亦都一定係唔關佢哋事。佢哋狗隻嘅情況，其實喺火災發生之後無幾耐嘅時間，其實我都已經得知，同我鄰居講法都係一致。好開心佢哋都無事，希望之後一齊上樓執拾嘅時候會順利啲。」
對於卓永興的說法，崔說「其實我自已個人嘅睇法，對件事幫助唔大。其實都係希望件事，能夠得到一個合宜或者體面嘅處理，始終（自己）唔係當時喺嗰個情況下在場。其實當時發生咩事，我本人都無從得知，無意去揣測咩原因，（但）知道隔離屋狗仔係因火災去世。」
而被問及單位的情況會否令他有感不獲尊重，而安排重新上樓會否可令其釋懷，崔表示，「前天上樓嘅時候，當刻係⋯⋯當然係，有覺得係唔被尊重嘅感覺。同埋有好似我形容咁，係唔開心呀，係有啲氣餒，因為始終都爬咗上 30 層樓，上到屋企見到嘅情況，竟然唔係好似自己預料咁，亦都因為咁而搵唔到好多我應該想搵嘅東西 。」
他續說，感謝傳媒如實報道事件、社工協助，政府已即日聯絡他，商討後續處理方法，亦即再安排上樓，並透露政府有答應會安排工人協助清理。
就崔生的情況，警方周三晚上回覆《法庭線》指，本月 28 日宏福苑一位居民反映在上樓執拾期間發現屋內有不屬於他的物品。經了解，物品是在進行救援及搜索期間移走個別單位物品時遺下。居民已將情況通知警方，政府部門會在未來幾日安排有關住戶再次上樓，部門亦會協助住戶清理。
