黃之鋒被控串謀勾結外國勢力，周四（5 日）在高等法院被判囚 10 年，其中兩個月零兩日與 47 人案刑期同期執行，即加監約 9 年 10 個月。
多名前學民思潮成員到庭旁聽，其中與黃之鋒相識十多年的 Louis 形容，聞判時「個腦有啲空白」，亦觀察到黃的神情略帶失望。他深感 10 年時間漫長，人生會有許多變故，「除咗擔心佢之外，亦都擔心自己有冇咁長時間可以陪伴到佢」，但作為朋友會盡力相伴，亦感謝黃之鋒多年來的陪伴。
前社民連成員黃浩銘則指，希望大家繼續寫信、寄卡，以不同方式陪伴黃之鋒，「希望我哋所有曾經參加過運動嘅朋友，喺呢 10 年裡面，都唔好忘記黃之鋒呢個人。」
相關報道：
判詞速讀｜官指被告屬罪行重大 與羅冠聰同屬主謀
黃親撰求情信：全盤接受後果絕不推諉 盼出獄報親恩
陸委會促停政治濫訴 國際特赦籲撤銷定罪 港府：惡意攻擊抹黑
前學民成員旁聽 與親友相擁而泣
前學民成員 Louis Lee、錢詩文均有到庭旁聽。Louis 抵達法院時表示，希望黃可盡快獲釋，「佢已經喺監獄度過近 6 年時間，希望佢早日見到屋企人同朋友」。他稱上月尾曾探望黃之鋒，對方狀態「OK」，雖然對刑期感到擔心，但仍對世界感好奇，並期待收到好友的信件。
判刑後，錢詩文在庭內哭泣，與親友相擁而哭，Louis 亦雙眼微紅。兩人離開法庭時被多間傳媒追訪，Louis 表示，「今日我哋真係需要啲時間消化件事，所以多謝大家關心同埋支持之鋒，多謝大家。」錢詩文則說，「作為佢嘅親密朋友，我哋今日真係需要啲時間去消化呢件事，所以多謝大家關心。」
Louis：十年變化大 擔心未能陪伴黃
Louis 同日透過語音訊息接受《法庭線》訪問，指雖然已有心理準備黃之鋒的刑期會較長，但「我哋都會擔心佢（黃）而家心理狀況點樣，同埋都覺得 10 年時間，其實都係一個漫長嘅時間⋯⋯除咗擔心佢之外，亦都擔心自己有冇咁長時間可以陪伴到佢。」
Louis 觀察黃聞判「個反應都係失望嘅」，相信他需要時間消化，自己當時則「個腦有啲空白」，深感 10 年後人生可能有很大變故，「可能我哋有人已經成家立室，有人可能已經會去第二個地方去生活咁樣，可能人生好多變化，10 年（刑期）出現嘅時候，咁我哋應該點樣去⋯⋯點樣辦呢？」
Louis：感謝黃一路陪伴
Louis 指，上月探望黃時沒跟他討論刑期，但他與朋友都覺得黃不時「唉聲嘆氣」，對判刑感緊張、焦慮，最後刑期一方面「唔可以話佢預計唔到」，另一方面亦代表案件塵埃落定，「但係都會覺得、都會覺得個時間係比較長，咁點樣去行落去呢？」
但他說，無論如何都會盡力陪伴黃之鋒，「希望 9 年 10 個月之後，真係會見到佢真係出到嚟，呢個係我覺得係最大期望。」
Louis 希望向黃說，「佢覺得我一直陪伴佢，但係我都要掉返轉頭，我都要多謝佢一直陪伴我行咗咁長嘅時間」。在獄中兩人不斷透過書信、探訪溝通，「喺呢個社會，其實呢一切都係唔容易」。
他形容與黃數年間的溝通「對於我嚟講係好珍貴⋯⋯所以我好多謝佢 keep 住咁樣，同埋我會盡量繼續陪伴佢嚟緊嘅路。」
通宵兩晚排隊 雷王蓮：大家「甘心」支持佢
司法機構兩日前公布判刑日期，有市民同日隨即到場輪候旁聽籌，排了兩日通宵。至周四早上 7 時半，高院外有逾 50 人排隊，包括撐着拐仗、年屆 102 歲的佔中「大黃伯」。他形容黃被判刑是「無妄之災」，慨嘆黃初出茅蘆時「都係 16、7 歲之嘛⋯⋯佢根本就係個細路仔。」
排第 8 位的「女長毛」雷玉蓮周二已開始通宵輪候，她手持一張寫上「黃之鋒」的字條及一支金色心形蠟燭，代表「世界嘅朋友同埋支持佢嘅人，都係『甘心』去愛黃之鋒同埋關心佢嘅」。
她憶述 10 多年前認識黃之鋒，黃拿着相機雀躍拍照，因她沒有智能電話，黃便在紙上寫下自己的名字及電話號碼。
她一度哽咽，稱「嚟到呢度，心情呢⋯⋯即係好似自己個兒子被判入獄咁樣」，希望黃可以盡快出獄，照顧年紀逐漸老邁的父母，但不論結果如何，她都會繼續支持黃，「黃之鋒，香港嘅朋友、世界嘅朋友、所有人都支持你嘅，你要努力、你要出返嚟，你係我心目中好好嘅黃之鋒。」
雷玉蓮其後再向傳媒展示金心和紙條時，警員拉起橙帶，並逐步將橙帶推至輪候區逾 5 米外，劃出採訪區，要求傳媒留在採訪區拍攝，並禁止記者在採訪區外拍照。有記者欲訪問旁聽人士，須由警察傳媒聯絡隊人員陪同，在輪候區旁邊採訪。
判刑時，雷在法庭內哭泣，稱「我哋等你出嚟呀」，在被告欄內的黃回應「多謝你哋」。雷離開法庭時表示不欲接受訪問，只感到「好傷心」。
黃浩銘：不要忘記黃之鋒 陳皓桓：黃積極調節心態
前民陣召集人岑子杰、陳皓桓、前社民連成員黃浩銘，旁聽後一同步出法院。
黃浩銘指，10 年刑期相當長，「我希望我哋所有曾經參加過運動嘅朋友，喺呢 10 年裡面，都唔好忘記黃之鋒呢個人，我哋能夠點樣去陪伴佢嘅，我哋就用我哋嘅方法去陪伴佢」，例如寫信、寄卡，正如他今天特意到庭旁聽，「都係想話畀之鋒聽我哋冇忘記佢，我哋希望可以同佢一齊同行。」他希望黃之鋒在未來 10 年繼續好好生活，保持健康。
陳皓桓則表示，任何人面對超過 10 年刑期，對他本人、家人及朋友而言都十分沉重。他說，曾經身為被告的人，都明白長期與外界隔絕的心情，「以前我哋覺得 1 年都好沉重，而家講緊嘅係 10 年，可能有啲人係 10 幾年，當然係非常沉重」，盼望大家互相鼓勵、互相支持。
他又指，據他與黃的書信來往及從朋友口中得知，黃在獄中積極生活，亦有運動鍛煉身體，「雖然環境好差，但係心態上都慢慢調節。」
劉公子：我哋呢代睇唔到（黃出獄） 曾健成寄語「頂住」
「劉公子」劉定成認為，10 年刑期是意料之內，但認為屬重判，「大家都唔開心」。他一度哽咽，指黃之鋒已在囚逾 2,100 日，「仲要坐⋯⋯我哋呢代睇唔到（黃之鋒出獄）、我哋睇唔到」。
他又形容黃「一個後生仔，剛剛踏入 30 歲，啱啱 10 月 13 日生完日，next ten years，佢已經係 40 歲」，反問「人生有幾多個 10 年？已經唔見咗咁多年，再出嚟，思想、精神、智慧，點繼續行落去？」他形容，黃之鋒選擇留在香港面對，其勇氣和精神「浩氣長存」。
前社民連成員「阿牛」曾健成散庭後神情凝重，提到判刑一刻，延伸庭內眾人嘩然，隨即鴉雀無聲。他指心情難過，覺得刑期很重，又指現時是「由治及興」的年代，大家都要謹言慎行，「你行錯一步呢，可能係終身監禁，所以唔好講咁多喇，唔敢講嘢、唔好講嘢」，又哽咽指希望黃之鋒可以「頂住」，在獄中繼續修讀多一些學位，「出嚟仲係可以有作為嘅。」
瑞士籍攝影師：旁聽是責任 退休教師：黃已負歷史任務
曾捲入 2019 年示威案（見報道）的瑞士籍攝影師 Progin Marc Gerard 亦到場旁聽，對黃之鋒被判囚 10 年感到可惜，慨嘆「這個年輕人將在獄中渡過超過一半人生」。他表示，自己今年已 81 歲、居港 50 年，希望 10 年後能見到黃之鋒出獄，亦希望可以到獄中探望黃。
被問及為何特意到場旁聽，他指：「我今天來這裡，因為我覺得這是我的責任，我是香港正發生的事情的一部分，我為何不來？(Today I come here because I think this is my duty. I’m part of what’s happening in Hong Kong. So why should I not come here?）」
旁聽的退休教師林 sir 憶述自反國教運動已留意黃之鋒，2014 年佔領運動曾以教師身分與黃對談，「佢一出嚟已經有自己嗰個風格、風範，氣勢係同一般唔同」。雖然黃現在仍是青年，料要 40 歲才刑滿出獄，但他相信黃已有心理準備，亦觀察黃庭上神情平靜，「尤其面對香港呢個咁嘅時勢、呢個時代，必然佢有佢嘅承擔，所以喜樂就一時啫」。
林又形容，在歷史上 10 年、20 年都稱不上很長的時間，「我哋睇長遠嘅，佢已經負起咗佢嘅歷史任務。」
HCCC181/2026