宏福苑 7 座大廈的居民，周二（26 日）繼續獲安排上樓。在大火中痛失雙親的蘇生，與太太攜媽媽生前最愛的百合花重返宏昌閣。蘇太說自己怕黑、有幽閉恐懼症，早前不敢回去，但更怕留下遺憾，「我希望試吓上去」。
蘇生指上樓期間收到消息，要求他們不要在窗外張貼「原址重建」標語，否則「有機會影響街坊」。
宏建 29 樓陳生：方案無顧及老人家
宏建 29 樓住戶陳生，表示在第一次上樓之後，發現其單位完全無事、只是沒供電，「同平時返屋企一樣」後，感到「比較嬲」。
他解釋，現時的重置方案，給他感覺是第一件事便是要居民售出業權，「如果唔係，就變相懲罰你哋無重置方案」，但他的爸爸媽媽已退休多年，不會再有收入，就算幸運抽到稍大的單位，也要補價購入，「啲錢邊度嚟呢？」
陳生又說，就算父母選擇取錢方案、外出租屋，「咁嘅年紀有無人租畀你？」有些家庭如只剩下兩個老人家、沒有後生一輩幫忙，「咁點算呢？」
他說這種情況，是各位想得到、自己想得到、其他災民也想得到，「唔知點解有啲人諗唔到，而無呢個同理心。可能佢哋間屋未俾人燒過。可能佢哋間屋俾人燒過就有呢個同理心。」
大火事隔半年，陳生說初時感到彷徨，但幸運每次都能替家人找到地方落腳，目前未來兩年都有著落，但現時安置方案都不太合心水，例如擔心頌雅路西對兩老出入不便，希望會有方案安頓老人家直至終老，「但而家無呢啲方案，亦無顧及老人家」。
父母命喪宏昌閣 蘇生寄語「以力服人者，非心服也」
蘇太：至今未敢聽老爺奶奶求救電話
在大火中痛失爸爸媽媽的蘇生，今天和太太攜帶兩盤花一同重回父母居住的宏昌閣悼念。兩人說，這兩盤黃、白色花籃，有媽媽生前最愛的百合花，他們在剛過去的周末託父母的教會教友，指導他們如何插花以表心意。
蘇太表示，這次是她事隔半年後第一次上樓，解釋稱早前不敢上去，因自己怕黑、有幽閉恐懼症，但更怕這次會是最後一次獲准上樓，「我希望嘗試試吓上去⋯⋯唔想我有遺憾」。
單位被焚毀，蘇太提到不少憾事，例如奶奶生前有一件鍾愛的黃色格仔花冷衫，「但好不幸地成間屋燒晒，件衫都無埋」。她想過為奶奶重新織一件，但冷衫的格仔花圖案，她已忘記怎樣織，而教授那圖案的書，藏在她與丈夫居住的宏志閣內，最終「無辦法喺安息禮，織返件畀佢擺喺陪葬到」。
蘇太又泣稱，自己一直不敢到聽證會，與丈夫至今也未準備好聽老爺奶奶的求救電話。聲線沙啞的蘇太，提到抵達宏福苑之前在車上哭過，又說在大火之後嗓音一直聲沙，因從中經歷不少憤怒、傷感，以致「我係一直都未好過⋯⋯」
蘇生：以力服人者，非心服也
蘇生則表示，大火後半年「真係好痛苦、好辛苦」，指這段時間要處理許多未曾試過要處理的事，期間自己感傷心、憤怒、無奈，「點解要夾硬收咗我地嘅業權，咁係咪剩係得收業權呢個方案呢？慰問無嘅，問責無嘅。慰問都無嘅，從來未聽過嘅。咁係咪一個政府應該做嘅野呢？可以講啦，我相信北韓都唔係咁啦。」
蘇生形容心情空白一片，「我嘅心情好無奈地，連貼一句感謝中央都唔得嘅時候，我唔知講咩好囉」。蘇生批評，「驗樓報告就鎖喺夾萬度唔畀我哋知，咁究竟係咩原因？其實真係好犀利㗎，我覺得佢哋，做到咁極致」。
蘇生最後以孟子名句寄語：「以力服人者，非心服也，力不贍也。以德服人者，中心悅而誠服也」。
上樓之後，蘇太踏入屋內便哽咽指：「我哋返嚟喇，我第一次返嚟呀」、「我哋返咗嚟」。她以電筒探照一番，見到單位內不少位置已圍上橙網、貼上「危險 單位結構嚴重損毀 只限一名居民進入」。
稍為安頓後，蘇生手捧一束花對著牆壁鞠躬，放在上一輪上樓時擺放的鮮花附近。放下行裝準備收拾時，兩人再次在屋內播放爸爸生前最愛的歌曲《陪著你走》，並為電子蠟燭換電。他們亦在牆上以黃色噴漆，噴上「I Love <3 Daddy Mommy」。
蘇生指上樓期間收到消息，要求他們不要在窗外張貼「原址重建」標語，否則「有機會影響街坊」。
下樓後，蘇生受訪指：「我哋痴咗喺室內，就主要唔想影響後邊，再上樓嘅街坊，因為可能會影響後邊上樓嘅街坊，所以我哋痴咗喺室內」。記者追問字句是甚麼，蘇生答「原址重建」。
記者再問「所以佢係話，『原址重建』唔方便痴出窗外？」蘇生答，「欸，呢個你哋自行判斷。」被問到如何收到訊息，蘇生表示不便回應。記者遂問收到訊息時有何看法，蘇生答「無奈」後哽咽不語。
以車輛比喻收購業權 宏仁謝生：非法被撞點解變賣車？
宏仁中層住戶謝生表示，自己所住單位沒受大火波及，基本上全屋的東西都可以帶走。他不解為何仍要被限制入屋時間。對於政府提出收購業權方案一事，謝生表示「其實我覺得就唔應該去討論個業權」。他引車輛為比喻，稱「如果你買咗架車，你架車係合法駕駛嘅，如果被撞嘅時候，對方係非法駕駛嘅，咁個程序會係點呢？」
「咁對方應該係要有第三者責任保險，然後就應該係搵公證行，睇吓我買嘅嗰架車有咩要賠償，然後就要 claim 對方嘅第三者責任保險，對方嘅第三者責任保險公司呢，佢就要睇吓，個司機係咪有法律責任，有咪 claim 返佢嘅保險公司。」
謝生質疑，「點解而家變咗賣定係唔賣業權呢？ 呢樣嘢合唔合法呢？同埋七成嗰個門檻，業權收購七成嗰個門檻，請問而家係市區重建咩？有強拍門檻㗎咩? 無㗎嘛！咁當然，有人都話要立法去解決嗰啲釘子戶吖嘛⋯⋯咁我想問，嗰口釘，係邊個做出嚟嘅呢? 又係邊個，將口釘，揼落嚿木度呢？」
問起會否想開業主大會，謝生強調不是他想不想開，而是按法例應該要開。他再引車輛比喻指有新業主立案法團取締了舊業主立案法團，情況就似自己買了一輛車 40 年，但被人說自己不懂管理該車，要找人替自己管理該車，到對方接手，就說「你架車要劏喇」，然後又說車輛已屆 40 年、要折舊。他質疑，情況是自己車輛非法被撞，理應找責任人、保險公司賠償。
問及大火距今半年，對調查、安置的進展有何看法，謝生說「個發展？如果你當佢係連續劇咁睇就非常滿意啦。精彩絕倫、 劇力萬鈞、星光熠熠」，舉例稱聽證會上有市建局人員稱，「招標妥」是「由亂及治」的產物，待進化至「2.0」才可解決燒 7 幢大樓的情況，「喂大佬，無招標妥嗰時都未燒七幢，你有招標妥都燒咗七幢？佢係咪調轉咗兩個字？是咪應該由治及亂？」
他又說，自從有人選擇開「獨立委員會」而不是「獨立調查委員會」，他已覺不關自己事，會當連續劇看。謝生最後說，居民現時只能選擇賣或不賣業權，「即係我覺得，你收咗個業權，就算你剷平咗宏福苑，都唔能夠剷走 167 個街坊同埋 1 個消防員 ，仲有 1,900 幾戶無家可歸嘅罪責。」
中風丈夫靠樓梯機登26樓 陳太六口重回宏仁閣：原址重建加油！
居住宏仁閣 26 樓的陳氏一家，這天獲准一家六口回家。因中風要坐輪椅的陳生，在第一輪上樓時只能在樓下公園遠望故居，當時無法言語的他，聽到身旁陳太提起道別就瞬即落淚。
這一次，陳生在樓梯機和義工協助下，終可與家人一同回家。陳太表示，自大火首天起，丈夫「幾乎日日都喊，有時喊幾云」，上次回到宏福但未能上樓，丈夫「更加觸景傷情，因為上唔到去，佢喊、見到佢傷心」。
陳太續說，未能回家與祖屋道別，是丈夫的遺憾，一家人曾想過花錢僱人背丈夫上樓，後來有朋友告知可考慮用樓梯機，故且一試，「因為政府都有好多規矩畀我哋，試一試啦。如果能夠上到去就係禮物，上唔到就係天意」。
最終能夠成事，陳太說丈夫「好明顯感覺到開心咗，可以真真正正同間祖屋告別。其實佢而家都會表達唔到，都知道佢係好唔捨得囉⋯⋯佢同我個心都係一樣，希望原址重建，唔好離開宏福苑。」
據他們提供的片段，陳太在樓上摸著頭盔，對單位說出道別感言，「多謝晒 2602 宏仁閣，照顧咗我哋 40 幾年喇。多謝太爺、太嫲你哋嘅支持，多謝今次所有嘅社福機構，都多謝政府喺呢一部分都幾仁慈咁，曾經照顧我哋，我哋希望再返嚟，一定要再返嚟」，並一家人在單位門口，拍下片段說「多謝宏仁閣 2602 照顧咗我哋咁耐喇，拜拜 2602、感恩 2602、暫別 2602 」、「原址重建！加油！」
陳太下樓後，感激借出樓梯機的人，聽到他們來自宏福苑就說不收錢，亦感謝兩位義工協助帶丈夫上樓，「感受到好大嘅愛」，另感謝有醫護和警察在旁照顧。陳太的媳婦則提到，上次只能找到丈夫的結婚戒指，今次她本打算放棄，「最尾我老公同奶奶喺廳嘅灰燼裡面，搵到我嘅結婚戒指。我覺得我嘅遺憾，好似填滿晒」。
陳太又說，希望能開業主大會，並希望善長的損款可用於修復家園，讓他們可重住得以安頓一家六口的家。她最後說，一家人的心願是「希望原址重建，加油努力！我哋慈悲嘅政府，一定會完成我哋嘅心願嘅，加油！」
宏建關太：聽證會揭人為失誤 部門失職累居民「點解我哋要咁慘」
宏建 28 樓住戶關太表示，自己曾做半月板手術，近來亦患膝關節退化，故今次再次上樓，事前每天游水、加強四頭肌訓練，並在上樓前先吃止痛藥，以免同行者等自己。
關太又說，本來要在 2025 年 2 月做膝關節置換手術，幸好兒子和醫生當時建議先運動、延後做手術時間，否則大火時可能仍在屋內休養、未能逃生。她感恩朋友聞訊即仗義提出協助上樓，媳婦亦特意在海外回港幫忙。
上次上樓，關太發現其屋內櫃門均被打開，問起有否報案，她表示「報都無用㗎，點會同你搵得返啲嘢？」今次再次上樓，關太說心情難過，因單位沒事，擔心不夠時間收拾，形容平時換季也不止收拾 3 小時，「而家我哋真係要搬屋，點止執 3 個鐘？」她提到屋內的電視和雪櫃，購入僅約 1 年，今次希望能帶走電視。
說起未來，關太再次以難過形容，稱單位沒事，為何不可重建，又指現在補償的款項，「我哋唔知買到乜嘢，其實係無嘢買到。可能買返半間屋？點解要我哋買返半間屋呢？睇到聽證會所有嘅嘢都係人為，係各大部門唔理嘢，累成我哋咁樣，點解我哋要咁慘呢？⋯⋯我哋真係想原址重建，一間畀返一間我。」
關太又說，年輕時辛辛苦苦工作了幾十年，安排好自己將來、退休生活，即持宏福苑 3 個單位，一間自住，另外兩間放租，「我真係可以即刻退休」，但現時就算補錢、提供綠表資格，「但係我買唔返（樓），我又要做按揭。我做唔做到按揭呢？做唔到。幾廿歲，無人借錢畀我㗎喇」，亦未能再靠收租退休，「係咪對我哋係好唔公平？即係調返轉大家諗吓，我哋嘅切身 ，我哋係咪好慘呀？我哋無咗將來嘅收入呀，我唔知幾時先可以退休呀。」
宏建黃小姐：街坊以踢波喻聽證會 6.30後波都唔駛踢㗎喇
宏建 23 樓住戶黃小姐，今天上樓前被問起大火後半年的心情，她說間中會想起，以前爸爸會在單位內說「而家日子好安穩、啲生活好好。咁我都會同佢講，係呀，因為係港英政府起㗎， 係 8 幾年起，嗰陣時規劃好好」。
黃小姐續說，為何 1980 年代建屋時，大家會覺得舒服、是安居樂業，回歸 20 多年就有所不同？她認為或因「驚嘅嘢好似唔同咗」，解釋以往樓下區議員會擔心沒選票，「上面嘅人」則怕被踢爆內幕，「而家驚嘅嘢唔同咗，係驚貼喺窗口隻字，選票嗰啲好似無咗人提，就係呢個唔同」。
她認為如何安置自己「無得揀」，因目前勢頭是一定要剷去宏福苑、改建公園，居民填問卷、做訪問等亦是石沉大海。她又說，早前有街坊以踢波比喻聽證會，而 6 月 30 日將會是第一個限期收購業權，「相信大家心裡面清楚，6 月 30 號，波都唔使踢㗎喇，好明顯都係拖到回收業權之後，個問題咪解決囉。」
她寄語街坊，知道許多人因大火受情緒牽連、波動，但要自己健康才可更進一步，「所有嘢，有損失、無損失都好，都要有一個角度去釋懷，感情上去釋懷講緊。」
帶走多款本土漫畫周邊 宏昌鄧生：代表香港精神
宏昌高層住戶鄧生表示，第二次上樓有提前部署，例如寫下準備要帶走的物品清單。收拾下樓後，他對記者展示多項珍藏，包括韓國女團 BLACKPINK 成員 Jisoo 的親筆簽名照。
他亦是本地文創的擁躉，帶走的珍藏中，有香港漫畫家陳某的《火鳳燎原》周邊模型，最早追溯至 2003 年；亦有《麥兜》漫畫家麥家碧另一作品「樣衰阿闊」的絕版公仔，形容是代表了「香港精神」；以及小克設計的「聾貓」公仔等，強調許多都「有錢買唔返」。
他另帶走宏福苑 2024 年的業主立案法團投票紀錄，說當時是推翻舊法團主席鄧國權、再選徐滿柑任主席的會議，「嗰次好多人出席，為咗罷免，要換人咁樣」。問起為何要帶走，他說代表業主其實有關心這件事，有親身去投票，「最後阻止唔到（揀選宏業）都係遺憾⋯⋯叫做都有盡過力，一個紀錄囉」。
宏建七旬蕭生：嘆未來難置業「買唔起就算」
宏建 25 樓住戶蕭生表示，在宏福苑住了 40 多年，第一輪上樓時礙於眼疾，只由太太和兒子上樓；今輪只是一試，笑言沒特別準備，因已 70 多歲，「就算畀我哋操練，都操練唔到咩嘢」、「得唔得都好，得就上，唔得就行返轉頭。」
半年沒回家，蕭生說「掛呀梗係有」，又提起這半年要外出租屋，「咪心掛掛，喺出面好似，流離浪蕩咁，而家好啲咁多囉。」
他又說現在不太清楚未來去向，要問年輕人，但指現時提供的安置單位不太合心意，「太貴都無得選擇，睇下邊度平啦」、「你知而家幾廿歲，都唔做按揭，買唔起就算」。
宏昌30樓崔生：上次屋內堆滿垃圾 盼今次尋回求婚戒指
住宏昌 30 樓、第一次上樓發現屋內出現垃圾、煙盒等大量外來物品的崔生，今天再次上樓，他說上兩次主要帶着憤怒、失望回家，今天第三次回家，則抱着平常心，「抱住想見最後一眼嘅心情囉，即係可能同間屋係做一個最後嘅道別」。而太太第一次上樓後，因家中的情況比想像中還要差，已表明不想再上樓，今天沒有一同到來。
他說上次有一些物品翻找出來後，放在一旁沒有拿走，今天需要帶走，並希望再嘗試尋找求婚戒指和女兒出生時親友送的金粒，「成日個人都會諗，會唔會係自己睇漏眼呀？或者係其實佢可能跌咗喺某個角落度呢，即係我深信佢唔會無啦啦唔見咗㗎嘛」。他說，雖然上次上樓，已移走單位內的大型物件，但還有許多灰塵、碎片，對尋回戒指不會抱太大期望。
崔生在宏福苑長大，結婚時購入宏昌閣單位，他表示「呢度係自己買，咁其實都好有感情啦，其實有機會畀我返嘅時候，其實我都想上去再睇下嘅」，打算會拍照留念，「或者真係再睇多眼囉」。
特寫｜屋內堆滿外來雜物 三度回家未尋回求婚戒指 崔生：命運就係咁
與父重返嫲嫲家 小六Jimmy稱無懼24層「返學都行好多樓梯」
在宏福苑附近小學就讀六年級的 Jimmy ，今天獲大伯讓出上樓位置，與爸爸簡生一同回去嫲嫲在宏昌閣的單位。Jimmy 對此感期待，因上一次「滿咗人」故自己未能同行。
待會要攀 24 層，Jimmy 自信不減，笑稱「因為每日返學都行好多樓梯㗎啦」，並指屆時有許多「有回憶嘅實體物品」想帶走，例如簿和相。
簡生則透露，Jimmy「叫咗我好耐好想上去」，但因上次不夠位未能帶同 Jimmy。第二輪上樓，簡生的哥哥讓出位置，「畀佢上去望一望」，並提到 Jimmy 在大火前，每次放學都是先到嫲嫲的家，故在單位有不少回憶。
簡生又說，自己和哥哥、妹妹，都是在宏福苑長大、在屋苑樓下讀小學，兒子 Jimmy 亦是一樣。大火之後，該小學需遷至其他校舍，甚至分開兩間學校上堂。問起捨不捨得宏福苑，他答「呢個都無辦法嚕。」
下樓後，簡生說甫踏入宏福苑，Jimmy 就見到自己學校，惟對面公園被夷為平地，「當然感覺好失望」。踏入大廈，他稱 Jimmy 心情開始緊張，「眼見四週圍都熏黑，有很多樓層被嚴重焚毀，對於佢嚟講簡直刻骨銘心」。
再攀上 24 樓，他說 Jimmy 見單位狀況較剛才所見的為好，心情才放鬆一點，但他最後沒帶走甚麼，「佢今次上去，主要係簡單即係講到此一遊，因為知道已經冇機會再上去，呢個經歷我相信佢都永不磨滅」。
簡生又提及，Jimmy 曾對自己說，慶幸大火當天嫲嫲已外出，自己則在廣福邨補習社，亦幸好當天學校早放，「沒有人在家避過這一場災難」。
簡生另提到，他和媽媽、兄弟姊妹在單位復刻童年時合照，稱「這是我們最後的留影了」。他們又在家中牆壁留下「我愛宏昌❤️再見 I will be back」、「伴我們走過三十幾年的成長地方」、「宏昌2408 謝謝你❤️」、「在這裏生活過 1983 – 2025.11.26」，又在日曆上圈着大火發生日期，標明「不會忘記」。
宏昌高以蕾以畫寄情：我愛宏福苑、我愛我的家
住在宏昌閣 2405 室的高以蕾，曾在聽證會作證，自責做得不夠好、未及時提鄰居逃生。她今天與姊姊再次回到宏昌單位執拾。她畫了幾幅畫，以彩虹顏色寫上「我愛宏福苑」、「多謝您」、「我愛我的家」、「也愛伴我成長的宏志閣❤️同我最愛的家人❣️」，附上數張她從宏昌閣拍攝的風景照，放在家中。
其姊姊表示，妹妹放入風景照，「佢好想話畀大家知，宏福苑嘅風景真係好靚，其他地方未必再見到！」
姊姊又指，本打算將圖畫貼出窗外，但因大部分窗戶未能打開而改為放在家中。她指妹妹這次剛上樓時「都有喊吓」，但比上次回家心情平復不少，這次亦已執拾大部分物品，毋須再申請上樓。
