宏福苑聽證會周一（22 日）踏入第 25 日聆訊，主席陸啟康宣布不會建議轉為具傳召權的法定調查委員會，引起部分居民不滿，質疑多名關鍵證人至今未現身，包括曾任宏福苑法團顧問的大埔區議員黃碧嬌，應出來回應事件。
在大火中痛失丈夫與女兒的吳女士，首度到場旁聽，哽咽指女兒大學畢業、人生剛起步便去世，「你知唔知每日見到你哋咁多條生命喺度，我好羨慕你哋有生命，可以生存喺呢個世上啊，我個女同佢爸爸就咁樣走咗⋯⋯」
她斥事件源於人為疏忽、部門監管不力，但至今無人認錯，憂委員會沒有法律效力，無助居民討回公道，又強調居民非「以災亂港」，而是希望得到一個交代。
相關報道：
Day25｜陸啟康：不會向特首建議轉為法定委員會 不涉政治或公關考量
丈夫與女兒葬火海 吳女士首到場旁聽
宏泰閣居民吳女士，在大火中痛失大學剛畢業的女兒與丈夫，周一（22 日）首度到聽證會旁聽。她在場外激動稱，聽證會不轉為法定調查委員會，無助居民討回公道，強調居民並非「以災亂港」，而是因為有親人「喺最安全嘅屋企，都可以無啦啦冇咗條命」，他們需要一個交代。
她認為，事件源於人為疏忽、部門監管不力，但至今未有人承認錯誤，哽咽指「好多政部門都話『不理想』，不理想即係有錯啦，你哋出嚟認錯呀嘛，香港冇死刑㗎，你哋認錯畀死者一個安息、生者一個安心，你哋咁樣搞法，人哋點生活落去呀，我哋唔係一朝一夕養大個女，我個女啱啱大學畢業，人生先啱啱開始，我好辛苦養大佢你知唔知呀⋯⋯」
吳女士指，自己過去半年幾近精神崩潰，要接受情緒治療，「屋冇咗可以再買過，或者申請政府樓，人生冇咗條命就冇㗎喇，你知唔知每日見到你哋咁多條生命喺度，我好羨慕你哋有生命，可以生存喺呢個世上啊，我個女同佢爸爸就咁樣走咗⋯⋯」
她指，聽證會揭示事件中有人涉貪，「就係個貪字，就係呢個貪，搞到佢哋冇咗條命」，盼政府還死者一個公道，又重申若聽證會沒有法律效力逼使關鍵人物作證，難以向居民交代。
何小姐：不轉為法定委員會 黃碧橋可「橫行」
宏盛閣居民何小姐亦指，一直希望委員會能「升格」成為法定調查委員會，令更多人出來做證人。她本身期望宏福苑舊法團顧問、民建聯大埔南區議員黃碧嬌會現身解釋。如今委員會維持現狀，「咩人都唔洗出，黃碧嬌可以真係『橫行霸道』，佢做咩都得」。
她認為，「佢（黃碧嬌）自己有無做過，其實應該自己出嚟講，唔係我哋去估。但而家佢自己都唔出嚟澄清自己，就更加令人懷疑。」她亦點名指，前宏福苑法團主席鄧國權應現身解釋，為何大維修費用達 3.3 億元。
梁浩軒：部門首長應承擔責任
曾於聽證會作供的宏盛閣居民梁浩軒表示，對委員會不轉為法定委員會感無奈，認為「最低限度」需要工程承建商宏業、工程顧鴻毅等代表交代，亦不點名要求黃碧嬌出來回應事件，「我哋偉大嘅區議員，始終做咗我哋宏福苑咁多年（法團）顧問，出嚟關心吓我哋都好必須。」
「你之前咁關心我哋，呢件事之後就好似消失咗咁⋯⋯你要知道，以前都有啲人投咗你票，作為你曾經服務過嘅選民、街坊，出返嚟講幾句，唔難嘅我相信。當然可能佢貴人事忙⋯⋯但相信講幾句唔係好嘥佢時間。」
梁浩軒又指，即使有些事情未必算違法，例如政府部門協調不足，亦不能否認這些問題與火警相關，舉例指消防處、屋宇署曾爭議後樓梯、大廈外牆由誰負責，居民投訴後各部門又互相「射波」，認為相關部門首長應出來承擔責任。
Phyllis：不接受有議員、公務員仍未作證
同於聽證會曾作供的遺屬 Phyllis 指，相信獨委會決定不轉為法定委員會有其考慮，「既然決定咗，都唔係我哋爭取就可以改變」，亦同意委員會應盡快交報告，否則「拖延 10 年 8 年都唔係好事」，對居民及遺屬都是折磨。
但她強調，不能接受事件中部分關鍵人物，包括議員、法團成員及公務員，至今仍不願作證，「一啲政府官員或者公務員，你唔係服務我哋市民嘅咩？你用咩藉口可以話唔出嚟，或者出到嚟可以話唔記得呢？」
宏仁閣居民何先生亦指，多名重要人物未現身，包括議員、管理處、業委會及承建商代表，令聽證會「好多嘢都唔係好清晰」，對於公眾最終能否全面了解事件成因不感樂觀。
