支聯會被指煽顛案周五（21 日）在西九龍裁判法院（暫代高院）裁決，李卓人、鄒幸彤及支聯會被裁定罪成，至周五早上，輪候旁聽人士逾百人。
鄒幸彤媽媽散庭後稱，「希望環境健康啲，乜嘢顏色嘅花草都可以綻放」。李卓人妻子鄧燕娥離開時眼眨淚光，指對裁決感到憤怒，「因為我覺得佢（李卓人）係冇罪嘅，所以喺咁嘅情況下判佢有罪，係好唔公平」。
旁聽者中，有多名前支聯會常委的身影。有常委表示，對李卓人及鄒幸彤的供詞感受深刻，另有常委稱，相信過去曾參與燭光晚會的市民，心中會知如何落墨。
支聯會案判詞速讀 官裁定「結束一黨專政」是結束中共領導 3人對中共懷敵意
法院外逾百人排隊
案件於早上 10 時裁決。約早上約 8 時半，法院外有逾 100 人排隊，包括前支聯會常委陳多偉、職工盟末代主席黃迺元、前區議員陳劍琴、旁聽常客李盈姿、「女長毛」雷玉蓮、年過百歲的「大黃伯」等。
鄒幸彤媽媽、李卓人妻子鄧燕娥、前支聯會常委劉家儀、關振邦、因 47 人案被判囚現已出獄的前職工盟主席吳敏兒、何秀蘭、岑子杰、前民主黨主席劉慧卿、前社民連主席陳寶瑩、前社民連成員「阿牛」曾健成，以及多國領事代表等亦先後抵達法院。
排隊人士指警方檢取匙扣等物品
大批警員在法院外戒備，保安較過往嚴密。警方不准記者在公眾排隊位置停留或拍攝，需移至法院後面、近英華街的一段路才准採訪。
有旁聽常客「姨婆」指，她向警方登記身分時被檢查隨身物品，警員撿取其「法庭線」扣針及去年獨立書祭「無處不閱讀」鎖匙扣，叫她稍後到長沙灣警署取回。
另一旁聽常客李盈姿亦指，警方收走她放在背包內、寫上「逆風前行」字句的記協匙扣，同樣要求她稍後到警署取回，未有解釋原因。李指，已盡量避免帶同可能會被視為敏感的物品到法院，形容心情憤怒，「『逆風前行』有咩問題呀？綠色，又唔係黃色」。
鄒幸彤母親： 願任何顏色花草都可綻放
法官僅開庭 2 分鐘，便宣判李卓人、鄒幸彤、支聯會煽動顛覆罪成。鄒幸彤媽媽散庭後由劉家儀陪同離開，期間多名記者追訪。鄒母被問及對裁決的看法和感受時，她多次表示「多謝大家」、「辛苦晒」，更一度舉手着記者「睇車呀」。
兩人步行至法院外天橋底下，鄒母開腔回應指，「希望環境健康啲，乜嘢顏色嘅花草都可以綻放，就係咁多，OK，謝謝大家，大家辛苦喇。」
同行的劉家儀則指，對裁決結果感到失望，「我哋依然係覺得，我哋一路以來係希望追求民主，我哋一路以來都係真誠地悼念六四嘅死難者，去關懷天安門嘅母親。」
劉表示，他們作為前支聯會常委，都希望案件會上訴，「將我哋應該要講嘅嘢，講清楚、說明白，將所有嘅陳述同埋所有嘅證據，甚至乎我哋認為我哋無罪嘅道理，再一次展現喺法庭、展現喺陽光底下，我哋希望嘅係公道自在人心之外，亦都可以將公義彰顯喺法庭」。
李卓人妻：沒失望但感憤怒
李卓人妻子鄧燕娥離開法院時，眼中隱約閃爍淚水。她稱對裁決沒有失望，但感到憤怒，「因為我覺得佢（李卓人）係冇罪嘅，所以喺咁嘅情況下判佢有罪，係好唔公平，我覺得法官冇考慮到我哋嗰方律師嘅意見同資料」。她說，是否上訴需與李卓人商量。
被問到李卓人庭上反應，她說「遠遠睇見覺得佢平靜嘅⋯⋯佢畀咗個大心心我」。她又指，暫時未思考判刑的問題，但希望不要判得太重。
前常委陳多偉：大家心中會知如何落墨
前支聯會常委陳多偉指，雖然結果一早已預料到，但還是感到難過。他形容，從他們的角度而言，裁決並不公義；雖然社會上有人或不當作（裁決）是甚麼一回事，但在很多人心目中，「我相信我哋每次燭光晚會都十萬、二十萬（人），喺佢哋嘅心入面，會知道呢件事喺我哋每一個人心中，係點樣落墨」。
陳又形容，鄒幸彤在審訊時的自辯「相當精彩」，「好表達到我哋過去幾十年，站喺我哋立場（點解）去做呢件事」。他提到，最近曾探望李卓人和鄒幸彤，指鄒仍然很精靈，雖然消瘦不少，精神尚好。李卓人則立場堅定，「你無論點判，佢嘅立場都好堅定，唔會變，心態好強」。
前常委關振邦：對下周便處理求情感意外
前支聯會常委關振邦亦指，對李卓人及鄒幸彤的供詞感受很深，「佢兩個都被還押咗一段好長嘅時間，但係佢哋個心境、心態各方面仍然好堅定，呢方面係我自己覺得都係感到安慰嘅，佢哋都經歷咗一段咁長嘅時間，喺個態度上面好清楚表達到畀大家知，其實佢哋一路喺支聯會嚟想做嘅嘢，或者所想嘅嘢。」
至於罪成結果，關指屬意料中事，但對法庭排期下周五（28 日）便處理求情感意外，形容本案「拖咗好多年」，「卒之有結果之後，就好似好想好快咁去埋尾」。
前職工盟主席黃迺元：裁決對公民社會影響重大
職工盟末代主席黃迺元則指，裁決對公民社會影響重大，認為過往無論是支聯會或職工盟，對社會公義以至一些歷史事件的承擔，都佔香港社會核心價值中很重要的一部分。
他指，對裁決感到不開心，但相信李卓人及鄒幸彤在審訊中留下的供詞，「我可以話呢個係留畀香港社會同香港市民嘅一啲好重要，曾經喺我哋公民社會入面，有啲咁努力同付出咁多嘅人，一些好重要嘅文件，正正喺法庭入面有紀錄。」
鄧岳君帶六四舊報到場 稱被警告不可帶入庭
曾在開審當日排頭位的前支聯會常委鄧岳君，今天選擇在西九龍法院外靜候裁決結果。
鄧在開庭前受訪指，遭警員告知他所攜帶的支聯會活動文宣、提及六四的舊報紙等，內容涉敏感字句，若他繼續攜帶上述物品便不可進入法庭，但可將物品交給警員暫時保管，散庭後取回。鄧指，即使他承諾不展示，警員也指不可攜帶入法院，故他最後決定不交出物品，留在法院外。
他解釋，「此刻喺未裁決前，我覺得有咁樣嘅權利保管住一啲嘅歷史嘅物品」，又指「我覺得可能係有灰色地帶，我覺得暫時呢啲嘅物品，我嘅理解之下仲未係犯法嘅物品，所以如果佢話係涉嫌有啲嘅違禁品，咁講我就唔接受，我唔認同嘅話，點解會畀你好似繳械咁，去做呢個冇底線嘅妥協。」
鄧岳君及後在法院外聞判時神情冷靜，並向朋友指，相信「阿彤會上訴到終院」，指由於「47 人案」獲批上訴到終院的許可，估計支聯會案亦大機會。
HCCC155/2022