宏福苑法團管理人「合安」周日（19 日）召開法團特別業主大會，於大埔、啟德、香港仔與天水圍以廣播形式同步進行。（見另稿）會議期間，有多名業主提早離場，批評合安「遊花園」、問非所答、「成日叫人去問一人一社工」，亦有人批評核數報告資料出錯，合安仍要求業主投票通過。
另有居民慨嘆現時有家歸不得，有難處想申訴，惟擔心被指「以災亂港」，又質疑「高官問責制去咗邊？」，為何大火造成 168 人死亡，「一個官員都唔需要負責？」
相關報道：
宏福苑業主大會｜業主關注核數報告有誤仍投票 逾九成業主通過兩個月內再開會
4 會場設直播 現場拉橙帶設採訪區
合安代表周日於大埔會場主持會議，其餘啟德、天水圍及香港仔華貴社區會堂同步直播。警方在各區會場外均拉起橙帶設採訪區，要求記者在指定範區採訪。
其中在大埔社區中心，早上約 8 時有小販管理隊驅趕門外小販，數十名警員在場巡邏，並於側門以橙帶劃出採訪範圍，居民如接受訪問須到距正門數米外指定位置。若在區外受訪，警方會拍攝情況並上前要求返回採訪區。
啟德會場同樣設有採訪區，惟該位罝與會場入口隔着一段車路，居民若於門前乘搭穿梭巴士上下車，記者難以靠近。
大埔社區中心
宏建陳生：「高官問責制去咗邊？」
宏建閣居民陳先生中午約 1 時提早離場。他指，會上有居民發現核數報告資料出錯，惟合安代表未有正面回應，質疑「份嘢都錯嘅，係咪即係要我哋投反對票？我冇可能見到一份錯嘅嘢投贊成票」。他指合安解釋，報告由舊法團聘請的會計師事務所負責，並於去年 11 月大火後才接管，但他認為合安亦有責任核實。
他指，另有業主質疑未出售業權前，「呢間屋仲係我哋屋企，香港有邊條法例唔畀人返屋企？」惟合安均未有回應。他又提到，政府代表律師早前在聽證會上，竟可「厚顏無恥地」稱政府沒有責任，「因為佢都俾人呃」，形容是「天大嘅笑話。」
他又以前財政司司長梁錦松因偷步買車須問責下台為例，反問「高官問責制去咗邊？點解死咗168 個災民，一個官員都唔需要負責？」他慨嘆有家歸不得，有難處想申訴，亦擔心「可能一個國安法又話你以災亂港，咁你又唔可以亂咁講嘢，但我哋嘅心聲，有冇人可以為我哋去紓緩呢？呢個係好卑微嘅訴求囉我覺得。」
宏泰葉家駒：合安理應服務業主
宏泰閣居民葉家駒表示，大會整體安排不算混亂，但無法解答其疑問，又指合安作為宏福苑管理人應服務業主，例如嘗試代表居民向政府反映，探討可否延遲出售業權的期限。
對於業主要求政府公開 8 幢大廈的勘察報告，合安稱已超出職權範圍，葉家駒質疑，合安負責管理宏福苑公用地方，包括外牆、走廊及天台等，「佢管理嘅地方，每一樣嘢、每一花草樹木，佢都有責任」。
宏盛何小姐：合安「十問九唔應」
現暫居大埔的宏盛閣何小姐，原被安排至天水圍場地。她周六多番致電合安要求更改會場不果，今早與街坊嘗試到大埔會場申請轉場，終獲安排到樓下轉播室。至完成第一次點票後，獲安排到主場地出席大會。
散會後，她形容合安對業主的提問「十問九唔應，只係兜圈，同聽證會一模一樣」。當街坊問及甚麼政府部門阻撓居民進入家園時，又着街坊聯絡「一戶一社工」。何指，合安理應代表居民向政府部門反映問題。
宏志熊小姐：大會如「馬騮戲」
宏志熊小姐則形容業主大會「多餘」，她手持一張寫滿紅字的問題紙，稱一早為會議準備，但獲告知不可發問議程以外的問題。
她又指，業主多次要求保險公司公開相關保險條文，但獲回應是「商業秘密、唔可以公開」，批評會議歷時超過 5 小時，但「乜都答唔到」，稱「多謝合安，不過畀我哋做一場『馬騮戲』咁囉」。
啟德社區會堂
宏仁陳太：過程如嘉年華「遊花園」
居於宏仁閣、丈夫中風靠樓梯機上樓的陳太，散會後形容業主大會「得啖笑」，例如合安提及 12 月再開會，質疑「我哋 8 月 31 號就（賣業權）deadline 㗎啦喎」；除宏志閣外 7 座的勘察報告，要在風季後才能進行，「但我已經唔係業主喇喎，我真係覺得係一個笑話，成個過程都好似嘉年華會，帶我哋遊花園。」
陳太指，合安面對居民提問，「最後結果都係兜個大彎去答」，但指業主大會是一直以來所爭取，希望在 8 月 31 日前能再召開業主大會，「呢個係我哋少少嘅希望，當然佢哋兜個圈話呢樣唔得、法例唔得」。
陳太續指，居民關注哪部門限制居民上樓，合安回覆「問一戶一社工」，「我今日先知，原來一戶一社工個權力係咁大、咁勁，基本上我都冇咩嘢好講，希望政府真係再大發慈悲，希望真係唔好再玩呢場馬騮戲。」
宏昌李國鴻：合安「成日叫人問一戶一社工」
宏昌閣居民李國鴻批評，會上多項問題未獲正面回應，合安多次著業主向「一戶一社工」查詢。他諷刺道，如果「（一戶一社工）咁重要，點解佢唔派啲一戶一社工上去答呢？即刻有得答呀嘛。」
他指，自己想知道的問題，包括政府收購業權後，如日後拆卸樓宇，保險公司是否毋須再賠償；又質疑合安修改議程不合法，指民政署文件列明由 5% 業主動議開會，所提出的議程不能修改。他又指，現時宏福苑公共空間被封、居民無法進入大廈，合安僅回應是由政府封閉，「咁你要知道原因㗎嘛，因為嗰度係你管理㗎嘛，你唔可以一句，就算數㗎嘛。」
天水圍天暉路社區會堂
宏泰鄭生鄭太：質疑入場安排及監票律師身分
在大火中痛失 5 歲愛女和外傭的宏泰住戶鄭生、鄭太，批評業主大會安排混亂。他們指文件顯示「業主本人」可出席會議，由於兩人是聯名業主，故理解為可同場出席，到場後卻被告知只准一人入內。
鄭生指，為免白行一趟，事前曾問一戶一社工、解說隊能否兩人同場，獲覆他們也未能回答，建議他們親身到場了解，「話因為佢哋層面答唔到我」。兩人到天水圍經一輪爭論，合安說如有空位可安排多一人入內，最終他們等到約 11 時獲准一同入場。
兩人亦不滿合安未清楚交代會上負責監票的律師身分，指有居民在場詢問誰是監票律師，起初無人回應，直至主持指向一位年輕人稱其為律師。該人被追問身分時未有透露姓名及所屬律師樓，又聲稱沒帶卡片，合安也沒再交代。
鄭生指，現時最希望政府正視責任問題，「畢竟屋企人（因大火）走咗嘅話，我哋唔係 focus 喺賠償嗰度，我哋係 focus 返喺責任嗰度。」鄭太亦指，政府官員有監管責任，「唔好剩係丟個波畀承建商。佢地梗係有責任，但唔代表你無責任。」
宏道曾生：業主大會「係一個 show」
宏道住戶曾生形容，業主大會「係一個 show」，指合安「好多嘢都係帶你去遊花園」，尤其是保險問題。
他指 ，政府要求居民在 8 月 31 日前決定是否要出售業權，不然會有法律行動，令業主都傾向出售，但火險方面細節未明，「當我哋問主席，主席無答，不斷遊花園」，亦不滿居民「俾人打散晒」至不同地區，令他們難以溝通。
黃小姐：望合安向政府反映延遲賣樓「死線」
宏志閣居民黃小姐指，，出席會議後最大感受是「好無奈同埋好攰」，認為居民仍未知道保險會否賠、賠多少，卻要在 8 月 31 日前決定是否出售業權，質疑程序上是本末倒置。她又指，保險細節複雜，「我哋有好多老人家，當佢咁解釋畀我哋聽嘅時候，我後生都唔係好明，老人家更加唔係好明佢講啲咩。」
她期望合安可向政府反映，延遲簽署賣樓安排，讓居民先就保險賠償掌握更多資訊，再決定是否簽署買賣合約。
袁生：「做場戲」交報告也做不到
宏建住戶袁先生表示，多名業主最關心堪察報告，希望了解宏福苑為何必須 8 幢全拆卸，「大家都想知點解無咗間屋，但無人畀到個答案。」他坦言，居民都知為何要拆宏福苑，「但係起碼，大家做場戲，都攞返啲報告出嚟吖，係咪？但佢哋都攞唔到，佢都話打風落雨，會攞唔到啲報告出嚟。都無辦法吖。咁我哋小市民嚟㗎嘛，都無嘢可以做。」
袁生說暫時未簽意向書，原打算待業主大會後再決定，現時需處理兩歲孩子升學問題，「自己依 8 個月真係⋯⋯痛苦都係自己一路咁樣一路去解決⋯⋯辛酸就，其實成家人都會辛苦，但都會要去面對。」
香港仔華貴社區會堂
宏建陳生：保險公司問非所答「好似唔識中文」
宏建陳生於華貴社區會堂代母親出席業主大會，形容「要知嘅一早知啦，問完都係兜圈、答唔到」。他指在會上問及有關火險詳情，質疑「如果已經冇咗復修或者重建嘅計劃，呢 20 億係咪就唔需要賠」。他指保險公司「遊花園、好似唔識中文」，問非所答。
他又指，合安原先只准每戶派 1 名業主出席，經居民多番爭取下，才准許另一業主一同出席。陳生認為，合安應該協助而非阻撓居民，且每戶兩人出席，亦只有約 4 千多人，直言「啟德開場演唱會都 5 萬人啦」。
