宏福苑大火聽證會周四（2 日）第八日進行，亦是第一輪的最後一日。 居民歐陽小姐完場後提及，她在業主大會選擇費用最低的大維修投標商，但最後是費用最高的中標，而過往亦有街坊要求父母投授權票。她又稱對之前跟進不足感內疚，指現了解細節，「就係呢啲唔同大大小小隱患，導致到呢場火災發生」。
另一已完成作證的居民指，之前未曾出席業主大會，現明白如不理事情，有人會「利用大家呢可能啲懶呀，唔理呢件事嘅心態」，蠶食居民的權利。他亦呼籲，「希望一啲話到事嘅人，一啲可能需要承擔返責任嘅人，唔好再喺後面喇，勇敢少少⋯⋯企返出嚟，幫大家還返一個公道」。
相關報道：
物管置邦職員否認宏泰消防曾通知消防泵被關 置邦經理拒作證
居民：我自己都內疚
住在宏盛閣、姓歐陽的兩姊妹，周四下午一同離開會場並接受訪問。姊姊指，她旁聽兩日主要有關消防裝置的部分，「就算我未嚟過聽證會，其實我好多好細節嘅嘢呀，係唔清楚啦，即係原來我都係頭先我啱啱先知道，點解要去維修個消防水缸呢」？
她續指，「呢啲咁 details 嘅，我都係真係好老實講，即係我自己都內疚嘅，即係覺得我自己，嘩！原來我跟得咁唔足㗎，原來有咁多工程嘅嘢原來唔知，咁去導致到佢係其中一個隱患囉，就係呢啲唔同大大小小隱患，導致到呢場火災發生」。
至於被問及有涉事方有不足或失誤，姊姊則指「講真（火災）都過咗成 4 個月啦，即係係咪要保持憤怒呢？嗱！我會覺得理性啲，我而加暫時，我真係嚟咗呢幾日，我個人醒咗呀，我真係好清醒，一眼都冇瞌過眼瞓」。
她解釋，「因為我就係覺得之前可能我瞓得太多囉，我唔理囉 」，而由於父親才是業主，有關大維修的事會交由父母處理，但兩人年事已高，不能全程跟進。她憶述，母親出席大會後，「最鍾意」提及「又打交喇 ，又打交喇，開會，唔好落去喇，唔好落去喇」。
歐陽：有街坊曾要求父母投授權票
「簽個名就得㗎喇」
姊姊提及，父母出席業主大會時，有街坊曾要求他們投授權票「簽個名就得㗎喇」，而「打交呢啲其實次次都有，基本上又話傾到一半又開拖呀」，而據她了解，衝突原因主要是圍繞 3.3 億元的大維修工程及「種票」問題，但 「次次都唔同㗎」。
她又指，她至少兩度出席過業主大會，但她當時是選擇了費用最低的投標商，而據她母親所知，很多街坊的選擇與她一樣，但「出返嚟嘅結果就係最貴（的公司中標）囉，咁我係驚訝囉，咁但係當時當然我都唔識做，我都唔知點樣可以推翻，最終都係肉隨砧板上」。
她亦指，她們原在事前有很多機會參與、提出贊疑，但她們沒有做到，「雖然你當係我事後（出席聽證會），好似有少少係當係畀贖罪券咁樣，會唔會係咁樣呢？但我自己都覺得，咁我都自己點都要抽嚟睇一睇，理智地了解其實當中發生嘅乜嘢事」。
中途才到場旁聽的妹妹則指，現時她更了解各方運作的細節。整體感覺而言，「其實都係有少少無奈，都係有啲無奈，我覺得有啲地方仲係未係好釐清到個責任，未有一個好清晰，即係話可能話某一啲嘅部分，某一啲嘅錯漏，係邊一個部門，或者邊一個 session （部分）可以出嚟清楚交代責任」。
已作證居民：要承擔返責任嘅人
唔好再喺後面喇
首名在聽證會作證的宏盛閣居民梁浩軒，隨後至少兩天繼續旁聽。梁周四憶述，雖然他沒有出席過業主大會，但聽過有人「喺下面嘈」。而據梁了解，有人曾因不能進入大會等問題在會場起爭執，而管理處（置邦）應有人在場，梁質疑為何當時管理處不介入。
梁指，現時「發覺其實你唔理呢啲嘢」，一些想從中獲利的人會「利用大家呢可能啲懶呀，唔理呢件事嘅心態，就慢慢咁樣去蠶食你依個應該有嘅權利」。梁解釋，如可以自己參與抉擇時，就不會如現時「樓又冇、錢又冇」的情況發生。
梁指，希望聽證會可以找出更多真相，「希望一啲話到事嘅人，一啲可能需要承擔返責任嘅人，唔好再喺後面喇，勇敢少少」，並指「大家都成年人嚟㗎嘛，企返出嚟，幫大家還返一個公道，還返一個真相出嚟」。
另外梁提及，他旁聽後曾翻查《公務員守則》。梁指，據他了解公務員除需要跟隨守則行事，「大家其實都可以諗多少少，睇下有冇一個好啲嘅方法」去處理事件，並舉例指消防署曾提及「食煙嗰啲唔關我哋事」，只處理消防裝置的事。
但梁認為，處方可以考慮地盤位置有大量煙蒂，就可介入處理或提醒不同人注意。
