宏福苑法團管理人合安，因應 7 月業主大會通過議決，周三（2 日）晚上再舉行特別業主大會。
會上不少居民關注到屋苑的保險問題，質疑大火後仍要支付屋苑保險費的做法不公。多名居民亦批評合安繼續在業主大會上「遊花園」，未能回應安排再上樓等問題。就政府早前公布，有 99.1% 戶業主簽署「接受收購建議信件」，多名業主則感嘆，是在死線之下不情不願賣業權。
宏福苑業主大會 合安新簽升降機保養合約遭居民質疑 指12.13前再開會
宏泰閣歐太：不停用死線推我哋 後面已無路可行
在業主大會結束後，宏泰閣居民歐太向傳媒表示，自己是其中一戶未簽意向書的業主，「截至而家為止，我冇簽意向信，我係嗰 17 戶其中一戶」。
對於政府稱逾 9 成居民同意出售業權，歐太質疑：「如果問下，大家有幾多係出於自願，真係好想出售宏福苑，比例係咪真係咁大？」她指，多名居民在 8 月 31 日才「衝閘」交回意向書，「其實就係大家不甘、不忿，唔去到最後一刻、唔去到走投無路，根本唔願意簽。」
她認為若政府可以將所有問題說明白，「大家簽意向書，一定簽得心甘情願好多。」
「可唔可以唔好不停在後面推我哋，用死線推我哋之餘，不停用唔同部門、新聞，令我哋發現後面已經無路可行之餘，原來我哋而家企緊嘅空間，只夠兩隻腳企，前後左右我都會遇到危險。」
她又指，今日首次知悉，業主將來仍要為屋苑買保險，「你已經收購業權，要我哋買份保險嚟做咩？」
「其實我哋有邊個返到去呢？點解我哋仲要畀呢？呢啲我哋無人知，佢純粹同我講，按法例要求，現有業主要繼續畀嘅錢。」
歐太指，今日會議與之前的一樣沒有任何進展，「居民發問嘅嘢，佢都繼續遊花園」。她指居民最關心何時可以安排再上樓，但大會僅要求居民找一戶一社工和解說員。歐太指，兩次業主大會都是浪費時間、遊花園，「政府既然聽到我哋聲音，唔該幫下我哋」。
宏仁李先生：政府一味恐嚇 非真正願意簽買賣協議
宏仁閣李先生指，關注屋苑內移除公園、鞏固工程等費用由誰支付，是否需要業主分擔，但大會都沒有回應。他指全場數百名居民，但只抽了兩條問題回答，「問題無解決到」。他又指，仍未收到大維修退款的支票，只著他找一戶一社工及解說隊，「解說隊又講返同一堆說話」。他質疑合安只是來幫政府解畫，「根本咩都無做過」。
李先生亦質疑，既然已出售業權，為何仍然要他們支付保險。他指現在居民已無法上樓，「係咪保障個賊上去偷嘢，受咗傷，追究我哋業主嘅責任？」他質疑做法荒謬。
他又批評政府一直沒聽取居民意見，「一味用激將法、恐嚇」，指自己並非真正願意簽買賣協議，「佢不停放恐嚇資訊出嚟，係咪一個政府嘅所為？」
宏建范小姐：主席遊花園未能解答疑問
宏建閣居民范小姐散會後受訪指，自己早前已簽署收購意向書，今天特意請假出席業主大會，是希望「最後一次用宏福苑業主身分，過嚟開呢個會」，亦高興能與街坊見面，「最主要都係好想見到佢哋，頭先見返佢哋都好開心。」
范小姐又指，會上提到宏志閣升降機的維修合約，質疑合安仍定期維修及續約，卻不讓居民上樓。她亦指，合安表示根據法例須繼續購買屋苑保險，以保障屋苑外圍範圍，「咁同樣我都想問，咁根據邊條法例上，我哋唔可以返屋企呢？」合安未有正面回答。她形容主席態度不算惡劣，亦算友善，但回應只是「遊花園」，未能解答居民疑問。
胡小姐、黃小姐：合安未能解答疑問 開會目的未能達到
宏仁閣胡小姐及宏志閣黃小姐在會後指，對業主大會「完全沒有期望」，形容合安與上次一樣，未能解答居民多項疑問。她們說，這次出席主要為了見街坊，因不知會否是最後一次，形容心情傷感、不捨。
7 月開會時，有業主在會上發現 2025 年核數師報告資料有錯，最後近八成人投反對票。胡小姐指，今次開會合安仍未另聘核數師更正上次報告，感覺連開會最重要的目的也未能達到。
黃小姐則提到，合安指將於 12 月 13 日舉行業主周年大會，「到嗰陣我哋仲有幾多人係業主呢，其實呢個會議，仲有冇意思繼續開呢？所以當今次係最後一次。」
她指，堅持出席今次會議，因想告訴自己，她仍是宏福苑居民，也想讓已離世的街坊知道，他們一直努力堅持，不想失去家園。她哽咽指：「我好心痛、好心痛我哋好努力⋯⋯但我哋做唔到，但我們都好努力咁去堅持。」
宏道翟先生：關注保險受保人問題
宏道閣居民翟生今日提早離開業主大會，他關注尚有一份保險繼續，但如今法團「散晒」，誰才是承保人。翟生指，如果超過 90% 業權落入政府手中，「咁受保人係邊個呢？係政府定係我哋業主呢？」但由於他沒有被抽中，無法提問相關問題。
翟生又指，一般火災不需要政府參與，今次有政府參與是特例，「最近聽到一啲人話，想要、仲想要。唔係咁好囉，要適可而止。」他又指，「人仲喺度，我已經覺得好幸運」。
翟生指，不知道將來是否還有業主大會，「有嘅話我一定參加」。若果是最後一次開會，他會平常心對待，「能夠放過自己、放低自己，日子好過啲。」
宏志潘生提早離場：其實都無得揀
宏志居民潘生，今日提早離開業主大會，指自己已簽署了意向書，「都係得個知字就算」、「邊個方案，其實我哋都無得揀⋯⋯唯有跟住佢走」。
潘生又質疑，今次大會是特意在簽署意向書後才舉行，「都預咗啲人係咁……都係想避啲嘢。」
宏仁謝先生：期望「炳強」釘死失職公務員
宏仁閣居民謝先生並非單位業主，亦未趕及於限時前簽妥業主授權信。他下班後嘗試到大埔會場，希望如有後備空位可入場，但職員表示，只有業主及獲授權人士方可入場。
謝於會場外受訪指，他與家人同住單位約 6 至 7 年，單位沒有受損；業主是其友人，知悉對方已出售業權。他指，家人仍有大量物品留在單位，希望可再次上樓收拾，是次到場是希望了解再上樓的安排，因為「冇任何地方可以問到，點解我唔可以上樓」。
他提到，從新聞得知，有約 10 戶居民可再上樓執拾，曾向一戶一社工查詢，但對方稱不知情。謝先生形容，內心仍有大量疑問，特別提及財政司副司長黃偉綸早前指，有輿論稱政府收回土地後將再建樓賺錢的說法「惡毒」，謝則認為，「你用收購業權方式，剷平宏福苑，同樣惡毒」，形容現時「唔係你情我願賣業權，大部分街坊都係不情不願賣業權。」
謝先生另提到，宏福苑大火中有多個範疇，在大批公務員監管下仍出問題，惟聽證會上他們僅稱「唔理想」。他諷刺：「一係班公務員好流，一係造假嗰班國際級嘅，仲勁過 KK 園」，期望當局追究責任，「炳強用釘死佢嘅態度，釘死嗰啲失職公務員」。
居民陳小姐：被迫、沒選擇下簽意向書 不捨家園
宏仁居民陳小姐在開會前接受訪問稱，對業主大會沒有期望，稱在被迫、沒有選擇下簽署了意向書，「都唔知入去開會可以有啲咩」。但她指今次可能是最後一次業主大會，「只能用最後一次業主身分參加會議」。
陳小姐稱，剛剛才簽署了意向書，「其實我都好唔捨得宏福苑呢個家」。她亦希望能再次上樓，「真誠同呢個屋企講再見，好多我嘅感情喺裡面」。
居民戴生：得返十幾戶，仲有冇必要企硬對抗？
居民戴生表示，對業主大會沒有期望，僅為與街坊聚舊，見到街坊都有哭泣不捨，但沒有選擇，「可能還有 200 、300 戶（拒絕出售業權），還可以企硬，但得返十幾戶，你仲有冇必要去企硬、去對抗？」
「係咪真係要為咗啖氣，始終我有屋企人、小朋友、老婆，無理由為咗啖氣，令佢哋無家可歸。」
宏新梁生：無奈接受，憤怒、含淚、無奈
居住在宏新閣的梁生表示，相信今次大會沒有特別事宜，因一切已成定局，「無奈接受，又憤怒、又含淚、又無奈，政府，好失望」。
被問為何仍要出席，梁生表示「撐囉，撐我哋囉！點都要撐場。」
居民葉家駒：太太因人禍喪生 不論業主身分都會追究責任
在大火失去妻子的葉家駒，及失去母親與外傭的李國鴻一同到場，均表示對業主大會沒有期望。葉家駒形容，今次是「最後一次以宏福人嘅身分參加業主大會」，仍然出席業主大會，是因為「到今日為止，我仲係宏福苑嘅人」。他希望知道法團餘款安排。
被問到，在沒有業主身分後，如何繼續追究事件，葉家駒表示：「以後再關注，就係追究責任嘅問題，我會作為一個死難者家屬的身分。」
「我太太因為呢個人禍而喪失生命，呢一件事實，無論我係唔係宏福苑業主身分，都唔能夠改變呢個事實，我會追究責任。」
對於黃碧嬌捲授權票爭議後一直「失蹤」，葉家駒指民建聯作為大政黨，除了官腔表態外，有沒有認真審視過，「當中牽涉是否只有黃碧嬌一個？」
李國鴻則指，仍不知道如何取回管理費按金，「一味叫你喺度等」。火險賠償金的問題亦一直沒有回答，「都唔知買啲保險嚟做咩，份份都無得賠⋯⋯係咪賠畀政府？」
宏泰冼婆婆：賣業權如惡夢一場 家鄉都冇埋
在大火中獲救的 86 歲冼婆婆表示，自己年事已高，「都唔知道仲有幾多日命」，故早前已交回「收購建議信」。她指，出售業權猶如「惡夢一場 」，形容「好似俾老千千咗」。
她解釋，父親年幼時由佛山來港，形容自己是沒有家鄉的人，早已視宏福苑為家鄉，「而家連宏福苑嘅家鄉都冇埋，咁你話我心情係點樣呢。」
她提到，政府早前稱或會透過立法處理餘下業權，慨嘆居民別無他選，「我哋不過係一個居民，習主席都話，我哋係香港嘅市民，梗係要乖乖地聽政府話，佢說左我哋唔敢行右，佢話右我哋唔敢走左，咁就叫做守法喇。」
至於是次業主大會，冼婆婆表示，自己一日仍是業主，都覺得有責任出席。
冼婆婆會後表示，很多消息都是道聽塗說，來源不明。她在網上見到，政府承諾可以上樓搬走物品，但若沒有電梯，她的冷氣機、洗衣機等都無法搬下來。她感嘆：「佢拆開個心嚟做人，我哋都會好過啲，但佢揞住個良心，我都無辦法。物件係我嘅，人哋唔會肉痛，肉痛只有我自己。」
宏道謝牧師：無法回家仍需交保費 做法奇怪
居於宏道閣 8 樓的謝志宏牧師，指對今次業主大會沒有甚麼期望，「諗住嚟聽吓嘢」。他指很多事情都想知道，包括是為何沒有公開驗樓報告等，批評合安只是政府的傀儡，「派出嚟，咩都答唔到，上次都係咁㗎啦」。
謝牧師指，覺得今次可能是最後一次的業主大會，「心情仍然憤怒，仍然覺得好無謂⋯⋯失望」。他不明白為何政府要一意孤行，拆除整個宏福苑。他指，上周才剛簽署了意向書，簽署後覺得更加憤怒，「點解咁嘅呢，政府處理啲事務。」
被問到為何仍然出席今次大會，謝牧師指：「Present，仍然喺度⋯⋯叫做盡自己責任，行埋呢一步」。
謝牧師在業主大會結束後表示，會議未能解答他的問題，主要是處理保險及合約相關事宜：「合約引起好多討論，宏志閣要繼續畀維修⋯⋯繼續交保險，但所有居民都返唔到去，點解仲要交保險呢？」他認為無法回家，但要繼續交保費的做法很奇怪。
宏盛閣何小姐：料合安會遊花園 志在與街坊一眾
何小姐在業主大會場外指，相信很多問題，包括是驗樓報告等，都不會得到答覆，「因為街坊好多都簽晒買賣協議」。她認為收樓之後，政府成為「大業主」，就不會再有機會召開下一次的業主大會。
何小姐坦言，知道今次將會是最後一次業主大會，今日志在與街坊一眾，認為業主大會沒有甚麼意義，「都知合安會遊花園，上次問咗十條，十條都無答我哋嘢。純粹嚟配合吓佢哋，問吓問題囉，睇吓答唔答囉」。
「始終都係宏福苑嘅事，都要關心吓。雖然好多街坊賣咗，第日大家都會各散東西，過嚟聚吓囉。」
