蔡天鳳疑遭殺害碎屍案周二（13 日）進行第 15 日審訊。蔡天鳳丈夫譚方駿出庭作供，他說透過鄺港智認識蔡，在鄺突然失蹤後，他與蔡常見面、開始交往，約一個月後同居、商量結婚，蔡並懷孕。譚指，知道父親會給錢蔡，而蔡會投資，但他不知詳情。
譚稱，見過蔡與鄺父母爭執，鄺球夾雜粗口罵蔡是「生仔機器」，更衝向蔡，蔡之後才告知他，其實加多利山單位是屬於蔡。譚相信妻子擔心與他結婚後，她與鄺的兩名子女會被比下去，所以想營造鄺家「過得唔錯」假象，而以他所見，鄺家「冇實質擁有過任何嘅樓」。
Day14｜蔡母完成作供 否認蔡、鄺港智助還賭債 官指部分屬傳聞證供
第四年，我們仍在現場。
支持《法庭線》，讓我們走得更遠。
譚方駿：鄺港智失蹤後與蔡交往
譚方駿周二開始作供，他稱 2013 年底、2014 年初透過鄺港智認識蔡，當時他與鄺是同學。譚之後赴澳洲讀書，放假返港期間，鄺在 Facebook 約他見面，並向他介紹蔡，譚因而認識蔡。在鄺與蔡結婚後，譚曾到訪兩人在黃埔花園的家，也見過蔡的家人。
譚供述，他 2015 年回港後繼續與蔡、鄺見面，及後得悉「鄺港智唔知去咗邊度」。他向蔡查詢，當時蔡稱「人安全嘅，但唔知佢喺邊度」。譚形容當時，「完全唔知咩事，聯絡唔到呢個人⋯⋯跟住之後佢完全消失咗」，直到 2022 年再次見到鄺。
譚提到，他之後與蔡經常外出，「照顧埋啲小朋友一齊，久而久之就發生咗感情」，兩人 2015 年 12 月 8 日正式拍拖。大約一個月後、即 2016 年初，兩人商量「想行落去」，於是結婚。一個月至個半月後蔡懷孕，譚的親女同年 9 月出生。
譚：父給逾 7,000 萬元予蔡投資
譚方駿另提到，與蔡拍拖一個月後，蔡從黃埔花園搬往曼克頓山，他與蔡及親女兒，與譚的父母同住。而蔡與鄺的兩名子女與家傭則住在海逸豪園，但他不知道該單位是租抑或買、費用由誰支付。
譚又指，蔡每天到海逸豪園，譚亦經常到訪，而蔡母張燕花則不時前往。他指，當時沒在海逸豪園見過鄺球，但「（鄺母李瑞香）一段時間會見到一次」。主控、資深大狀郭莎樂問，鄺港智失蹤之後，譚都有照顧蔡與鄺的兩名子女？譚同意，稱「直至去到今日（都有）」。
至於譚家背景，譚方駿指曼克頓山的單位由父母持有。譚父母的譚仔餐廳集團，2018 年以 10 億元出售，而譚的父母、姑丈與姑媽 4 人均為股東，4 人平分收益。郭莎樂提到，當「譚仔」售予日本公司後，當時譚家變得非常富有？譚方駿同意。
譚憶述，隨後一家人由曼克頓山搬到九龍塘海棠路的獨立屋。至於蔡與鄺的兩名子女，則由海逸豪園搬到維港‧星岸，至 2019 至 2020 年間再搬到加多利山單位。譚解釋，因為加多利山與九龍塘獨立屋之間僅 5 分鐘車程，「方便佢（蔡）兩邊睇」。譚不知道誰支付該兩子女的開支。
譚又形容，父親與蔡天鳳的關係「十分良好」，父每月提供 20 至 30 萬元作為生活費，包括子女學費、補習費及旅行支出等，「全部都係 Abby 搞」。父另給錢予蔡投資，共有 7,000 至 8,000 萬元。至於蔡如何用錢，譚指「唔係樣樣我都會知道」，但他知道蔡買了加多利山單位。
譚：目睹鄺球兩次衝向蔡
譚方駿憶述，2022 年暑假前、「喺加多利山時候有個小插曲」，指蔡與鄺港智的女兒在家發燒，蔡與譚到加多利山單位探望，當時鄺港智及鄺家另 3 人亦在場。
譚憶述，當天蔡天鳳與李瑞香起爭執，源於李着鄺港智「你唔好哄咁埋去（發燒的女兒）」、「一陣間惹到你呀」，蔡便對李說：「你個仔就係仔呀，我個女就唔係女呀，做老豆老母，小朋友病咗，就自然會去睇佢、照顧佢㗎啦，就算病咗又點呀？」譚指「唔記得佢（鄺港智）有出咩聲」。
譚又指，蔡、張「嗌到越嚟越火烈嘅時候，我哋全部人都入咗去（房間）睇咩事，然後就我諗係 Abby（蔡）情緒太高漲，鬧緊李瑞香嘅時候，我就見到鄺球衝埋嚟打 Abby」，譚形容當時鄺球「係制止唔到嘅」，而鄺球亦罵蔡「我屌你老母臭閪、鬧我老婆！」重複了數次。蔡當時亦有反罵鄺球，鄺球又罵「你係啲乜嘢嚟啫，你係生仔機器嚟咋」。
譚續指，當時鄺球先後兩次衝向蔡，第一次衝前時蔡自行避開，但「唔係完全避開到」，被碰到上半身。第二次衝前時，譚上前隔開兩人，譚於庭上示範當時的情況。譚又指，鄺港傑當時亦協助拉開鄺球，隨後繼續爭執，譚及鄺家其他人着鄺球先行離開，鄺球便離開。
譚：妻營造鄺家「過得唔錯」錯覺
譚方駿稱，隨後妻子對他說「老公呀，我哋真係要盡快離開呢一家人啦，佢哋越嚟越恐怖，唔識感恩」。蔡又向他交代加多利山單位情況，譚當時才知道它屬於蔡。
譚解釋，他最初想過單位屬於妻子，但曾在會所看到文件顯示業主為鄺球，就以為是鄺的物業，「當時見到佢（鄺球）名冇驚訝、特登問佢，因為我覺得好正常啫，你買住嗰度」。
譚指，他知道蔡有投資，但那時不知道是加多利山單位。又指蔡曾告訴他，「佢哋一家人（鄺家）都搵到錢、都唔錯㗎」，讓譚家有「（鄺家）唔需要靠人、唔需要乜嘢，佢哋都搞得掂自己」的錯覺。譚庭上指「我依家知係假象，係佢哋一路營造緊出嚟」。
譚又解釋，蔡與鄺港智離婚後，「帶住兩個小朋友，唔係我嘅親生小朋友⋯⋯我哋屋企都叫條件唔錯，喺佢（蔡）角度，唔想喺我哋啲小朋友相處時，佢啲小朋友冇咁矜貴，即係會被比下去，所以佢營造呢個效果畀我哋一家睇」，直到出現爭執。
郭莎樂問，當時實際上由誰供養鄺家？譚指他有猜測，但不肯定，他未曾見鄺家的人工作，「佢哋（鄺家）冇實質擁有過任何嘅樓、冇出過錢畀屋企嘅嘢呀，呢啲係我見到嘅嘢」。
控方開案陳詞提到蔡想女兒轉校至屯門，故擬出售何文田加多利山單位，並搬至屯門。譚提到，當時「呢件事大家都知」，又指以他所知鄺家曾到屯門睇樓。譚又指，發生爭執後蔡禁止鄺球再上單位，又提到第二次才成功讓鄺球簽署委託書，妻亦有把文件帶回家。
譚：不知鄺因盜竊被捕、起訴
就鄺港智的情況，譚方駿指當時不知道鄺因盜竊案被捕、起訴，而他 2015 年底跟蔡天鳳一起後，曾上網搜尋鄺的名字，見到盜竊案資料，但他沒再深究，最後從蔡得知鄺在內地。
郭莎樂指，鄺港智盜竊案事主，獲償還相關款項。譚稱只知涉及數百萬元，但不清楚有否償還。譚又指跟蔡交往後，蔡告知正與鄺進行離婚手續，所以他與蔡 2016 年舉行婚宴時並無註冊，而他知道，蔡獲得與鄺兩名子女的撫養權。
郭莎樂問，譚父在婚宴當晚送了甚麼給蔡？譚稱「好似買咗個袋畀佢」。郭莎樂指曼克頓山單位，譚聞言發笑：「哦，嗰個，咁叫禮物，有」，確認該單位登記在蔡名下。譚指，蔡與譚家關係良好，又指譚家在婚宴前已給予蔡金錢、「當佢一份子」。
調查警：聯絡蔡母因有新資訊需調查
在譚方駿作供前，跟蔡母張燕花聯絡的偵緝警員高恩祺繼續作供，他日前在張作供後，向張詢問黃埔花園地址（見報道）。
郭莎樂指，高恩祺在張首日作供當晚，向張傳送微信訊息：「你今天作供說，你和你先生，蔡生，早年於黃埔花園的物業，黃埔花園物業的地址是哪裏？」
高庭上解釋，張在庭上提出新資訊，警方需作調查，因此詢問張的黃埔花園地址。郭莎樂指，高不應在審訊期間跟證人聯絡？高不同意，指不能跟張討論案情，但張作供期間一直跟她保持聯絡，包括每日出入、提醒她到庭時間。
蔡母向警提今年初被騷擾
貼街招、座駕被淋紅油
代表鄺港傑的大狀 Trevor Beel 盤問時，展示高恩祺與張 2026 年 1 月 28 日至 2 月 2 日微信紀錄（張發出的為語音訊息，庭上讀出謄本）節錄如下：
2026.1.28
張（與高通話後）傳送一張橫額相片，有「蔡天鳳生母 花姐 借錢唔還 見字速電」等字眼
2026.2.1
張（傳送一張座駕被淋紅油的相片）：我架車而家淋油，而家報警⋯⋯
高：我管理層想知道對方所講既錢銀，係同咩有關？
張：胡西個人呢，我哋之間已經有成六七年冇聯繫㗎喇
高：即係無終（中）生有？你之前提及上一次嘅瓜葛什麼？⋯⋯因為管理層想知多少少，他們覺得事情不合理
2026.2.2
高：管理層指派咗反黑組跟進案件
張：以前大家都係好朋友，佢都經常嚟我屋企食飯，但係以前呢啲麻雀數。即係呢今日我打贏佢，佢就爭我嘅，聽日佢打贏我，大家都可以講後數後數。但係已經 7 年前已經講咗，大家已經互不相欠
跟住佢話佢新義安，佢幫胡西收錢，我話我都冇爭錢收咩錢呀，跟住佢就話仲爭 160 萬，我話冇冇⋯⋯我話呢 7 年幾，我哋都有時打麻雀，成日都有見面，從來冇提過件事。就係呢兩個禮拜，跟住又俾佢貼街招呀，話爭錢唔還，跟住又搵黑社會嚟恐嚇、叫做勒索⋯⋯
佐敦嗰個金沙麻雀館，我都幫襯佢好多⋯⋯我一個人呀，我打金沙嗰度都輸咗幾千萬
高：花姐，你維港星岸是否有個地址？
高：不覺蔡母說法矛盾
Beel 問，張一時稱跟「胡西」6 至 7 年沒聯絡，一時稱「呢 7 年幾，我哋都有時打麻雀」，兩者有矛盾？高恩祺同意。Beel 問，高當時知悉張輸很多錢，關注到有人向張追數？高稱「未關注到」。
Beel 指，高問及張的維港‧星岸地址，但張口供提到「我現時在香港沒有任何物業」，而張庭上供稱，因她跟蔡天鳳名下都有物業，才把加多利山單位登記在鄺球名下，高不覺矛盾？高指：「（口供）講緊 2023 年，佢話嗰時冇物業嘛，但加多利山唔係 2023 年買」，不覺矛盾。
高在代表鄺球的大狀戴偉奧盤問下指，張有否持物業非謀殺案重點，「有好多證據要處理，嗰啲證據，比佢是否有物業更有力」。戴偉奧指，本案主要議題是為何加多利山單位登記在鄺球名下，而非蔡天鳳或張燕花名下，高稱：「係其中一點，我唔覺得係最主要嗰點」。
涉案七人車車主：
借車逾兩周未還
此外，據控方開案，本案牽涉兩輛豐田 Alphard 私家車，一輛是蔡天鳳購買用作接送子女，車牌為 AA3383；另一輛是鄺港智向友人借的私家車，車牌為 VY9157。
VY9157 車主伍登輝（音譯）周二亦作供，提到鄺港智是其胞弟的朋友。伍憶述，胞弟表示鄺的私家車正維修，需借車兩星期，接送子女上學。伍指曾要求鄺盡快歸還，但最終該車借出逾兩星期。
控方展示 2023 年 2 月 7 日晚上 7 時伍住所樓下停車場的情況。他指，見到有人來取車，對方指是「Alex（鄺港智）嘅司機」，又指車上有另一位司機。
HCCC198/2025