宏福苑大火將近一年，業主「特設銷售計劃」周一（9 日）踏入第 28 日。曾在聽證會作供的冼善卿，跟兩名女兒到場揀樓，「今次係我人生辦最後嘅大事，因為我有兩個女，我希望畀返個磚頭佢哋住，亦都係佢哋最後嘅歸宿。」
冼婆婆說，從前形容自己是「冇眼淚嘅人」，但這一年來多次落淚，哽咽說：「我連自己都對唔住，因為冇守護好個家」，很多事情只能「無可奈何」接受。
居民早前兩度上樓執拾，冼婆婆因體力不足未能上樓，她希望辦妥買樓手續後，能再有上樓機會，「會慢慢行上去，都要行，真係唔捨得，望一眼，最後喇。」
冼婆婆：盼為女兒留最後歸宿
住在宏泰閣的冼婆婆周一跟兩名女兒 June 及阿 Dow 到場。她說，慶幸選到心儀又負擔得起的單位，但不便透露哪個屋苑。冼婆婆說，「感覺係自己喜歡嘅地方，你覺得好安樂自然，嗰個先係自己嘅家，揀到一個自己認為安樂嘅家就放心。」
她說：「今次係我人生辦最後嘅大事，因為我有兩個女，我希望畀返個磚頭佢哋住，亦都係佢哋最後嘅歸宿」，又說：「感覺終於搵返舊石、磚頭畀兩個女有瓦遮頭，我算係完成咗我成世人嘅責任㗎喇，話好開心又唔係，不過真係有啲開心，我係放下心頭大石。」
回望過去一年，冼婆婆坦言情緒從未如此低落，「我成日話自己係一個冇眼淚嘅人，挺起腰板我都會捱過」，像是經歷父親、丈夫、母親離世，她都不曾哭過。
這一年她卻多次落淚，哽咽說：「我連自己都對唔住，因為冇守護好個家，我呢兩個女點算，都係諗呢啲問題，佢哋對個家亦都貢獻咗好多，如果連一個好嘅居庭都冇得畀佢哋養老，我覺得十分對佢哋唔住。」
她形容，過去一年自己已盡力，仍未能爭取到最想要的結果，「總之，每一樣嘢，我都係無可奈何接受嘅。」
冼婆婆盼能再上樓「望一眼」
不過，她認為「自己仍然安然無恙，都應該感恩嘅」。她又說，這年來感到麻木，「香港本來係一個好溫暖嘅地方，但依家好似好凍⋯⋯我覺得『冷』係一啲政府政策，我又唔識講，只係個感覺好冷，我行路需要一把遮扶住」。她指指撐着的傘，「呢個就係畀我嘅支撐，但係我覺得政府冇畀一個支撐我囉。」
政府早前兩度開放宏福苑予居民執拾，冼婆婆因不夠體力行樓梯未有上樓，「我同女講，我呢一次最後呢，會慢慢行上去，都要行，真係唔捨得，望一眼，最後喇。」她抹一抹眼淚，「我勇敢咁行，我用我最勇敢嘅力量去行。」
女兒：這年來「獲益良多」、大起大跌
冼婆婆的兩個女兒，這一年來要處理善後、安置事情，亦疲於奔命。阿 Dow 形容是「獲益良多」，「因為我從來冇諗過我要見律師，從來冇諗過我要賣樓，從來冇諗過要買樓，呢啲嘢都唔係我經驗範圍嘅嘢，咁唔係話獲益良多咩？」
阿 Dow 自言個性跟母親一樣，必須處理很多事情的時候，「我根本冇時間去傷心、去難過，我就挺起腰板喺度做、去處理」。她又說，最不捨是宏福苑的海景，想起大家都喜歡在縫隙間探頭觀看美景。
June 則形容，這一年來大起大跌，單位剛裝修好，打算等之後退休安老，一家人快樂居住，「只是一年幾之後，就已經變咗一無所有，好唔甘心」。她說，目測大廈結構應該沒很大問題，不明白為甚麼政府不維修，「有冇理據、有冇證明話佢哋係危樓？」
她又說，政府官員鞠躬道歉，「我覺得，佢哋自己出心啦，接唔接受又係另一件事，佢哋嘅所謂道歉，各位街坊都有眼睇，一年後先『適當時間』道歉，我又唔知道原因係為乜。」
冼婆婆則說：「我當電影咁睇，佢係演㗎啫，咁人哋做乜嘢，我係冇權去干涉，我哋只不過係觀眾咋嘛，去睇佢做啲嘢咋嘛，佢哋心裡面被好多嘢包住，我哋邊睇到，佢個腦諗乜嘢更加睇唔到啦。」
