大埔宏福苑 7 幢受災大廈的居民，周四（21 日）起第二輪上樓，以收拾個人物品。第二輪首批上樓的是宏仁、宏新、宏泰的災民。
其中住在宏仁閣的居民尹先生，批評政府擬用捐款收購業權，是從災民身上「搵著數」，「政府攞捐款當自己嘢，去買災民嘅業權，呢個真係全世界笑話」。
宏仁低層余太：長期病患常覆診
惟大埔安置選項 2029 年才入伙
宏仁低層住戶、將近 70 歲的余太，表示單位沒被燒，上次上樓已帶走重要物品，今次上樓再帶走次要物品，如未開封、新買的用品。
問起安置情況，余太說政府提供的樓，「我全部都揀唔到」，因自己有長期病患，要常到大埔覆診，故「一定要搵返大埔區」，但安置選項中唯一在大埔區的頌雅路西，要至 2029 年才入伙，「我長期病患又咁大年紀，等唔到咁耐」，惟有考慮轉投私人市場。
不過她說其 30 幾年前已供斷的宏福苑單位不曾「補地價」，若接受政府的收購方案，所得的款項將不夠現時買樓，並引述地產代理向她稱，「而家樓價加咗好多成，你都買唔到㗎喇」。她說，此單位原擬住至百年歸老，因此沒想過要售出、亦沒「補地價」，「而家無咗層樓，你話點好呢？係咪打斷晒我所有退休計劃？」
她另批評，政府原公布會向住戶提供為期 2 年的租金資助，但若居民選擇直接取錢方案，將在 2027 年停止租津。她解釋，居民要時間找樓，找到後就算不裝修也要收拾，中間的時間也要租屋，卻會頓失津貼，「最激氣係呢樣嘢喇」。
宏新低層凌女士：原址重建等十年八年唔實際
宏新低層住戶凌女士，是由宏福苑建成後起入住的第一批住戶，大火前有一家三口居住。問起再次上樓心情，凌女士說第一輪上樓時心情較興奮，因不知單位狀況、有甚麼物品可取。這一次上樓，她說心情有些擔憂，因經歷過單位「原來真係焗焗地，有少少唔舒服」。
問起未來去向，她稱曾想過原址重建，無奈步驟多、時間長，要等 10 年、8 年，「有啲真係唔實際」，亦認為租樓不同有自己屋，擔心會沒一個居所。
她認為政府收購價錢合理，因此會接受，亦說收購後可選擇居屋，如選不到可發還款項，認為此變相是有選擇，「始終要抽籤，可能單位唔啱，最尾可攞錢都 OK」。
她又說以她所知也多人想被收購業權，舉例稱有朋友住在宏志閣，對方也想賣業權，「因為呢間屋始終要維修、舊到要大維修，收購咗有選擇去新居屋。」
葉太家翁姑仔命喪宏泰 8 樓：索償程序、業權買賣疑問未解
大火遺屬葉太，其居於宏泰閣 8 樓的家翁及姑仔，在大火中喪命。第二次上樓，她再次攜帶鮮花，稱因「上次啲花應該枯晒喇，想擺返啲新嘅花，屋企有返少少色彩」，又說因上次上樓收拾趕急，亦不確認將來大樓是否會拆，故今趟主力希望打掃整理單位，「嗰度始終係一個家，都希望我哋可以收拾得好啲。」
由於單位業主葉老爺在大火中喪命，葉太近來一直替家人奔波處理「單位的後事」，亦對往後索償程序、業權買賣有許多未解疑問。
她舉例，近來經「合安」的簡介會才得悉，原來業主一旦向政府售出業權後，宏福苑原先的「財產全險」將歸政府所有，但先前政府的解說隊未曾提過，派發的小冊子更說「唔影響你索償」，但原來不影響索償，只是說一般的火險、家居索償。
她亦說，單位業主在大火喪生，承辦宏福苑的保險公司「平安」尚未展開理賠，「合安」對此解釋稱因聽證會未有結果。她希望在決定是否出售業權前，釐清有關理賠應是賣前抑或賣後處理。程序上，又應是「合安」先代「平安」向住戶支出賠償，抑或直接由「合安」要求「平安」支出賠償。
她續說，一般要向保險公司就單位索償，保險公司一般會找公證行調查，再逐項研究理賠，惟現時宏福苑範圍被封鎖，可如何展開索償程序。
但她表示，自己不幸在兩場「合安」舉辦的簡介會，都抽不中自己舉手發問，亦但稱簡介會上「啲人問啲問題好得意」，都是一些網上有資料、新聞報道有提及、一戶一社工或民政處可解答的疑難，例如如何知道自己的單位業權權數，「最重要係問呢啲嘢嘅人，係識得上 Zoom meeting，識舉手發問㗎喎」、「呢啲嘢係咪喺寶貴時間，問埋呢啲問題？」
對於「合安」另稱因遺產承辦問題而暫不召開業主大會，葉太質疑如有人事隔一年、三年、五年未辦妥，又或有人遺屬在海外，甚至不擬再處理業權轉換，會否因而一直拖延不召開？
問到會否售出業權，葉太說明白有街坊有急切住屋需要，但其老爺的單位，「屋企人走咗、頭家無咗」，其一家暫時也沒逼切需要售賣，故反而想「睇定啲」才決定，指因政策朝令夕改，又說單位是祖屋，就算不賣、丟空，對目前生活也沒影響，盼可留住單位，「你理得我做咩，總之隨時上去」，以留住老爺和姑仔等記憶。
葉太下樓後，表示第一輪上樓放下的鮮花皆已凋謝，這次順利收拾整齊葉老爺的家，亦見到老爺生前安裝的「鴨仔沖廁器」猶在，有特別拍下來留念。她其後亦與丈夫坐在梳化，與新攜上去的鮮花合照，「坐返喺度，好似屋企人陪伴⋯⋯懷緬下囉」。
宏仁低層倫生：安置要「硬食」 無時間同佢磨
宏仁閣低層住戶倫生，表示單位沒被燒，已於第一輪上樓時收拾最主要需帶走的物品，「個心安樂咗啲」。今次上樓，主要收拾他的「玩具」。追問之下，他笑說是音響器材、唱碟等，提到早前已帶走一大批，希望今次帶走更多。
問到政府安置情況，他說「而家硬食㗎啦，煮到嚟就要食，無辦法㗎喇」，稱因他已幾廿歲人，「我無時間同佢磨」，亦說滿意與否都「唔到我哋講⋯⋯仲有咩好講，無㗎喇」。他說自己將會賣業權，因「我都咁大個咯，點同佢𦧲啫？無得𦧲㗎嘛。」
被問到有否不捨得，他提到自己是宏福苑第一手業主，入伙起居住至大火發生，但捨得與否，他說「無計㗎喇，你唔捨得都要捨得㗎喇。」
宏新中層雲生：難以接受大火中失去哥哥
嫲嫲神主牌料已成灰
宏新中層住戶雲生，其父親在大火前不久去世，再在大火期間失去哥哥。他說至今難以接受哥哥的離開，「你一個活生生嘅人，燒到好似得返舊炭咁。即係昨日佢仲可以同你講到嘢，今日就⋯⋯變咗咁嘅灰咁」。
今次上樓，他最想取回祖先的神主牌，特別提到想找回有嫲嫲照片的神主牌。但下樓後他說找不到，料已被燒成灰。
他亦想找到爸爸和哥哥的遺物，形容自己在一堆灰中，慢慢、慢慢、慢慢地找，終於找到有爸爸年輕樣貌的證件，以及哥哥被火燒後成殘頁的日記紙，上面依稀見到哥哥的字跡。
回憶第一次上樓，他說當時其實難以接受，因親人在大火喪命，單位亦被燒毀，「乜都無咁，心情就好難受」。除了該次上樓有所拜祭，最近他亦趁清明節再拜一次。他說感謝寶蓮寺讓哥哥「上位」，「即係都知道佢走得好辛苦，即係佢，燒到個身都，個身唔完整，好多都唔完整」。
他亦提到自己在宏福苑出世，「真係有個思鄉⋯⋯即係好似香港同中國咁樣，個故鄉係咁。」
他說自己會跟從政府方案，亦明白政府有難處，但希望政府可以多點溝通、體諒失去家人的街坊，「唔係話大家好似打擂台咁，即係要溝通清楚，要互相理解」。
他亦提到，宏福苑有單位的業權，不是單名業主，而是幾人聯名，或需多點時間考慮，亦有街坊因業主去世，或來不及 6 月底前處理業權轉讓，希望政府有所跟進。
此外，他亦希望合安可以多點與居民聯繫，清晰交代大維修款項去向，例如若有人沒交錢會如何安排，認為數目未清，希望可再多加解釋。
宏泰 8 樓郭太：料會「焗住」出售業權
宏泰閣 8 樓住戶郭太在完成上樓後向記者表示，大火當天因自己外出上堂，得以逃過一劫，惟宏泰低座的街坊許多因大火去世，單是其同層就有 3 個單位分別有鄰居的妻子、媽媽、子女、爸爸去世。
她哽咽稱：「識好多個樓上樓下，包括兩公婆、仔女、仲有阿媽⋯⋯好多好多（都死去）⋯⋯好多全部我識得嘅街坊，係喺我嗰座⋯⋯我哋睇住啲細路哥大⋯⋯」
今趟上樓得以碰見認識多年的鄰居，她說大為感觸，稱該戶的媽媽死去，遺下上樓收拾的子女，自己有份是看著他們長大。而自己離開單位之際，特意找鄰居聊天，「特登 say 個 hi、告別啦」。
她亦提到，自己單位已被燒燼，上次已未能取回東西，但旨在「俾我喺度慢慢再回味吓」，為單位拍照。
未來或要與鄰居各散東西，郭太稱感到不捨、心情不好，但亦想盡快能安置。目前她暫居啟德，丈夫則在留在大埔區內，與兒子同住另一處。她稱樓換樓方案無一適合，因地區太遠；適合的地區則要等 4 年，對其而言都是太長。她料會「焗住」出售業權，因限制了 6 月一定要做。
居民劉小姐：等政府做多一步，我哋無選擇權
今天上樓的劉小姐，表示上一次上樓主要是收拾重要物品，今次則是替小朋友取回物品，例如玩具。劉說，「除咗我哋大人，其實小朋友喺呢件事上面影響都好大」，指小朋友沒法回家，看相片也會有情緒，故希望「當局真係可以做得好睇啲囉，因為小朋友係睇住呢件事㗎。佢哋唔會識得分析咁多，佢哋宜家剩係知道⋯⋯即係（點解）發生呢件事就返唔到屋企嘅呢？我屋企無燒㗎喎，點解返唔到去？呢啲我都答唔到小朋友。」
劉又說，小朋友曾問為何利是錢不見了、是誰拿走，她也不懂回答。被問及是否被盜取，劉反問稱「喺間屋突然間唔左，你會覺得係點呢？即係啲嘢會突然間消失嘅？」
她不評論政府和合安能否解答疑問，亦拒評會否出售業權。但被問及安置情況，她說「我屋企，就永遠都係我屋企，你搵唔到 replacement （取代）㗎喎。」她稱自己由出世就居於宏福苑，自己的小朋友亦是，形容「搵唔到另一個地方比宏福苑更加好」，除了因環境、地理位置外，亦因許多街坊是第一代業主，彼此感情深厚，不少人同區讀書。
她亦說，「我哋啲居民都等緊政府做多一步畀我哋，點樣可以做得再理想啲囉。但如果無辦法嘅話，我哋都要硬食㗎啦，我哋無選擇權嘅而家。」
宏仁 8 樓尹生：我哋係災民，唔係罪人
居住在宏仁閣 8 樓的尹先生，今早在大雨中到達現場，準備上樓。他表示，今日想取回爸爸在數十年前在樓下開士多時，手抱著自己的相片，「上次（第一輪上樓）執唔到，呢次返去搵清楚啲。」
他指自己 3 歲開始住在宏福苑，小時候媽媽要看店時，就會把他暫交到廣福邨廣義樓的親戚照顧，「宏福苑同廣福邨，兩條村好多親戚連著一齊住。鏟走咗宏福苑呢班人，廣福邨好多親戚都連住晒」。他指若要求宏福苑居民搬到別區，「即係叫人分家」。
他指現在居住的過渡性房屋有漏水問題，「煮嘢食煮唔到，沖涼轉個身都轉唔到呀，琴日落咁大雨，嗰啲過度性房屋漏水呀」。
對於法團管理人「合安」日前舉行的簡介會，尹先生形容是「完全無用」，沒有聽取民意，做法欠清晰，「全部都剩係叫我賣業權，乜方案都無既，完全一樣嘢都無」，而政府部門一直推卸責任。
「你唔可以出法例，要我哋居民去賣（業權），已經係有恐嚇成分喇。嚇到啲人個個都乜都唔敢講、唔敢表達。」
「我哋係災民，唔係罪人呀，唔好成日當我哋係罪人好唔好？喺我哋身上搵著數⋯⋯政府攞捐款當自己嘢，去買災民嘅業權，呢個真係全世界笑話」。
被問到對政府有何看法，尹先生以自己做廚房的經驗為例子，「我自己做廚房，啲師傅可能做得耐，無畀人訓話過，無自己去反省，又唔操吓自己，咁咪愈來愈散囉。所以我哋啲新人好積極想做嘢時，做得耐嘅『老屎忽』唔願郁，咩都唔肯做、唔檢討」。
