政府周三（27 日）繼續開放大埔宏福苑宏道閣、宏盛閣，予居民第二輪上樓執拾個人物品。其中宏道閣居民潘氏一家，今早到場準備回家，潘氏姊妹自製了宏福苑 T-shirt，上面印有二人兒時在屋苑公園玩耍的蝸牛架，以及 1983 年入伙時宏福苑的外貌，「我哋想整呢件 T 恤，好好保留一啲回憶畀自己」。
居民窗戶字句被移除 宏盛5樓廖生：無理由抹殺聲音
宏盛 5 樓住戶廖生的爸爸媽媽，是宏福苑的第一手住戶，自己亦在此居住了 30 多年。今次第二輪上樓，他心態上已當是最後一次，稱因已向社工申請再多一輪，但暫沒政府消息。
他的單位沒被大火波及，故期望這次帶走珍貴電器，例如黑膠唱盤機、音響，但稱兩輪共得 6 小時，料「無可能執得晒」40 多年生活痕跡。
對於近日有居民在單位窗戶張貼字句被阻止，他說「我唔明佢驚啲乜嘢囉，都係大家嘅聲音嚟啫。大家唔同嘅意願，你無理由抹殺咗人哋把聲㗎嘛⋯⋯大家有唔同嘅想法呀嘛。所以我覺得，你無理由收咗人哋把聲。即係你黐喺度，都係發表自己言論咋嘛，無理由搣咗人哋。」
他說自己單位於低層、面向隔音屏障，是外面拍不到的位置，故沒在窗外貼紙，但稱如可以貼，自己會貼「原址重建」、「我愛宏福苑」等字句，稱因自己住了 30 多年，「始終會唔捨得」。他亦不評論回購方案，但如可重建，「梗係揀重建啦」。
問起現況，他說現時居於過度性房屋，「一定係住得唔舒服㗎喇⋯⋯無辦法，無可能大火後比400 幾呎你，回復返你而家生活質素。政府唔會畀，市民觀感唔好，相信啲人都會反對，但住住先啦。」
他期望可優先釐清宏福苑大火的責任誰屬，再處理居住和賠償問題，「而家還返真相畀居民先」。不過觀乎現時聽證會情況，他覺得「個波都係踢嚟踢去，好似大家都唔關自己事咁，睇嚟大家都唔想揹返個責任囉。」
他最後寄語，「繼續向前行啦各位街坊，明天會更好嘅，我相信。」
宏泰30樓曾生：大火時受困 於單位內昏迷十多小時
大火時受困宏泰閣 30 樓的曾生，今天為找朋友而來到宏福苑，期間向記者憶述獲救經過。
曾生說大火當天下午約 3 時許，自己打算不再外出，故只穿底衫褲打算睡覺。突然接獲同住宏福苑的朋友致電稱「呢度火燭」，他才驚覺起火，「真係慘呀真係⋯⋯如果唔係我都死呀，佢打電話畀我，佢真係救咗我呀」。
曾生續說，當時自己一打開門，見到的不是煙，而是火，「啲火衝咗入廁所、廚房，不過好在我閂咗啲門、始終無燒到出去」。他隨即致電 999，消防員着他「匿埋間房，搵啲嘢塞住啲隙」，完成後不久自己就暈倒，昏迷約莫 10 多、20 小時，直至翌早 5 時許，「唔知係咪整定」，見到消防員致電，接聽後獲派人來救。
他說，「啲消防員猛打嚟我都聽唔到，睇個電話原來猛打嚟。仔呀、朋友，打嚟都聽唔到，暈咗喇。」
待消防員上門，他說對方「畀啲好凍嘅嘢包實我，我話好凍呀、好辛苦。佢叫我忍耐呀，有命呀起碼都。」消防員繼而輪流抱他離開，「中層原來呀熱到⋯⋯消防員呀頂得順，真係犀利。」他亦提到，消防員見他沒衫褲，就遞牛仔褲給他暫穿，「條褲唔係我嘅，女裝嘅」。
他形容自己當時「好頓」、「驚到都係無得驚」，自己「坐喺度都係等住，生又好、死又好，無得諗」。
經受大劫，李生受訪時仍笑容掛臉，他說「而家睇我行得走得，奇蹟呀真係，初初唔行得㗎」，稱自己獲救後在深切治療部昏迷 3 天才醒來，再在醫院住了 2 個半月，現時仍會有容易頭暈眼花的後遺症。心態正面，他解釋因自己「隨時都『去』得㗎啦，80 歲㗎啦已經，睇得好開嘅呢啲。大富大貴咪又係一樣過⋯⋯普普通通咪一樣過，無辦法㗎啦。」
近期上樓，他回去見到屋內的白紙都變成全黑，「證明我吸咗幾多嗰啲煙」，而獲救時所穿的衣服，都洗不掉熏黑之處。現時單位廚廁被燒，但慶幸客廳倖存，亦能帶走膠櫃內的幾萬元現金。
他目前居於香港仔，但說不適應社區，兒子亦已寄出方案信件，決定樓換樓。
問起會否想回宏福苑居住，他答「唉，點會呀你諗吓，拆咗佢再起，要幾耐吖？無可能啦，我都無命。」有記者追問但他想不想回來，他答「我無諗呢度喇。唔想，如果太耐點會想。要拆、要起可能好耐呀。大埔嗰度都要 3 年啦，唔得㗎喇。」
宏盛9樓黃太：點解無人落台？
宏盛 9 樓住戶黃太，哽咽稱再次上樓「無乜心情可以而言」、「次次返到嚟都好傷心⋯⋯好忐忑」，稱單位是屬於居民，何解要他們要被逼簽紙售樓，「自己所有嘅野全部都無晒⋯⋯點解而家要我咁辛苦⋯⋯點解要我哋揹住個背囊上去執返啲嘢，仲好似乞求人地咁樣？」
她認為，售樓之所以不等獨立委員會報告、限於 6 月 30 日或 8 月底前，是政府想居民盡快售出業權，形容「根本而家政府就係睺住我哋嚿肥肉」。她擔心售出業權後，會不獲保險理賠，又認為可用保險賠償作原址重建之用，稱自己可以等，但現在沒此選項。
她直言，居民應要有選擇權，「你唔係要我哋咁樣、咁樣、咁樣做。你唔係我阿爸阿媽，（可以）命令我咁做。就算你係我阿爸阿媽，我都有我嘅選擇權」，其後搖頭嘆息稱「總之就係，呢個政府真係⋯⋯你聽中央話，發生煤礦嗰件事，中央都有人落台，點解我哋會無人落台？我唔使你落台，你出嚟道歉、講句唔好意思。點解你仲喺度死撐話自己無錯？點解要咁樣呢？」
（編按：翻查報道，近日山西煤礦爆炸事件造成最少 82 人死亡，長治市長陳向陽就事件鞠躬致歉。內地最高人民檢察院宣布，對事件掛牌督辦，要求山西省檢察機關協同公安機關及有關部門，對於事故主要責任人員依法從嚴懲處。目前暫未有中央官員落台。）
黃太續說，「我唔係好明，即係你聽習近平講嘢，咁你咪做到徹底囉，但你又唔係。個腦都，個腦唔知係咪大家放晒喺屋企先至返工，我唔係好明白呢個政府囉⋯⋯佢令我極之失望呢個政府，根本唔係為我哋市民。我哋唔係難民，我哋係災民」，並稱自己在事發前曾向宏業投訴過有人抽煙，反獲覆是否同層有人裝修、與自己無關。
對於未能開業主大會，黃太說自己「由希望變咗失望，而家係絕望，真係絕望」，又指現時選擇只剩賣樓，認為政府是想款項收歸己有，稱政府「講到明用善款收購無問題」，質問稱「點對得住捐款？捐畀你唔係收購，係捐畀原址重建、畀我哋㗎嘛。」
最後有記者問到，預期不可再回到屬於她的家有何感受。黃太眼淚盈眶、遠望宏福苑，抿嘴哽咽稱「無得返㗎喇⋯⋯返嚟都，做得啲咩嘢？」
宏盛1樓關小姐：解說員如轟炸機催簽名
關小姐一家居住在宏盛閣 1 樓，指家中沒有被大火波及，「但都無辦法、要搬走」。她哽咽表示不捨得宏福苑，由於不知道將來是否仍有機會上樓，今日帶備了紅白藍膠袋，打算「見嘢就掃」。
關小姐希望可以原址重建，「但呢個政府應該都係得過且過就算」。她指善款可足夠修葺大廈，而有部分單位仍然健全。她指全家都希望原址重建，「老人家已經 70 幾歲，佢都話要等。你諗吓，老人家點解會咁鍾情呢度。我小朋友廿幾歲，都係好鍾情呢度，因為實在太方便⋯⋯由細喺度讀書、搭校車返學，都係一個回憶。」
她質疑為何事發半年至今，仍未有報告交代事件，亦未有召開業主大會，「係咪真係咁難？定係想不了了之？」
關小姐形容居民都是「肉隨砧板上」，「政府話要點樣，我哋就要跟住做。」
「你不斷係咁催，解說員又話 6 月 30 日要交，佢好似轟炸機咁，不斷話你聽『要簽啦、要簽啦⋯⋯』其實需要需唔咁急呢？你係咁 chur，我覺得有啲煩囉！」
對於有居民在窗戶展示的字句被移走，關小姐指：「你入到人哋間屋，無可能搣人哋私人嘅嘢……人哋係好冷靜嘅訴求，點解連呢啲都唔畀人呢？」
宏盛低層何生：始終要賣業權，政府差唔多定咗案
居住在宏盛閣低層單位的何生、何太，上次上樓已取回十多袋物件，期望今日可以上樓取回舊照片等物品。他指現在居住的地方，位置亦不足以放置全部舊屋物品，「擺得幾多得幾多」。
何生表示已經遞交了意向書，「所有要求，而家差唔多可以告一段落。你始終要賣個業權畀政府，政府差唔多同你定咗案」。他又指未知道排先排後，不知道會被安排到何區安置。
至於有居民要求原址重建，何生形容是「唔使講、嘥氣」，指以自己的年紀而言，無法再等 7 至 10 年重建，期間亦要額外支付租金，「政府程序都係希望你哋賣業權，大家都唔使搞咁複雜。」
宏盛中層施生：希望可以有多啲選擇
施生今天偕家中長輩，回宏盛中層單位收拾。他說自己兒時在宏福苑居住，後來自己遷出亦經常回來，形容此處是他「充滿回憶嘅地方」。上樓時，施生說自己沒太多情緒，因過程中許多程序要做，亦以收拾為主，又提到家中因長輩較多雜物，較難收拾，幸順利帶走爺爺嫲嫲的遺照，以及有接近 50 年歷史的椅子，另有漫畫等。他另有拍下單位照片，以便日後長輩想看。
受訪時施生看似神情平靜，但他說上樓前一晚有感受，亦預料今晚或之後會有情緒，「大埔係個好溫情嘅地方。你要我搬走，其實係好唔舒服嘅、好難過嘅。同埋大家都明白，宏福苑係我哋所有住大埔嘅人，每日放工、放學返屋企，第一個見到嘅建築物，其實係好標誌性嘅嘢」。
問到對收購的看法，施生表示自己沒參與討論，因「我呢啲後輩就唔多出聲」，但家人傾向售出業權，「但係始終，個猶豫或者困難，始終係賣完之後點呢？個生活點安排呢？其實都無好明確。呢個都係令我哋有困難嘅地方，唔容易去做決定囉。但係亦都，大家都明白無乜選擇呀，喺我哋個環境入面，無可奈何都係理性入面唯一嘅選擇。」
被問及為何覺得沒選擇，施生解釋，「如果我遇到一個咁樣嘅，無論係人為，定唔係人為嘅意外啦，咁希望始終都係可以有多啲選擇畀我哋，例如可以係原址重建」，又或可讓長者搬回大埔區或環境相近的社區，稱始終家中長輩已 80 多、90 歲，適應新社區不容易，「選擇如果多啲就好。」
追問下，施生說目前家人期望是取現金的方案，但說在同區不容易找到類似宏福苑的單位，「明白嘅，無啦啦多咗 1,900 幾戶需求，大埔區唔會有咁多單位，明白有個困難。但都希望大家都明白，我哋都有個期望。」
宏盛 8 樓向生：希望政府公布清楚帳項
宏盛 8 樓住戶向生，表示今天天氣炎熱，上樓頗為辛苦，他與友人上樓梯期間也要中途休息。
向生說時間倉卒，只能盡量帶走家中部分家電 ，「但好多⋯⋯家電呀、 床櫃嗰啲，無得傾，一定攞唔到」，期望會有再多一次上樓，「睇吓有咩遺漏。咁急嘅情況點都有啲遺漏。」
向生又說自己是宏福苑第一批入伙的住戶，一住就 40 多年。問起要離開有否不捨，他答「梗有啦，住咗 40 幾年，係咪先？」他讚宏福苑旺中帶靜，交通方便，感嘆「好難搵得返」。
被問及 6 月 30 日售出業權限期臨近，向生說「都無辦法㗎啦，你可以點樣做？」有記者追問如有選擇的話會如何揀選，向生答，「有得揀，就唔係呢個政策、唔係呢啲方案。」
離開之前 ，向生說：「希望政府嗰啲帳項就公布得清清楚楚，咩叫災民捐款，咩叫做公帑，咩叫做保險賠償。希望佢同我哋啲居民交代聲，就係咁多，唔講喇。」
宏盛 3 樓梁生：政府單向溝通 我哋好多意見佢哋有冇聽？
居住在宏盛閣 3 樓的梁生指，上次上樓仍未取回一些漫畫、書本，以及一些大型家居，希望今次上樓可以取回。他形容，每次上樓都會當作是最後一次，「始終 20 幾年，無可能一個道別都唔講」。
對於有居民在窗戶展示的字句被移走，梁生形容可能有人在居民離開單位後，「出於好心」移除標語。他自己沒有準備字句展示，「由一開始發生之後，唔同渠道都表達過，佢都唔聽。Sorry收返，可能佢聽到，只不過深思熟慮考慮之後，就不予接納。」
梁生又舉例指，平日若撞車都會說聲「唔好意思」，「但今次呢件事，聽證會聽得最多唔係『對唔住、我哋盡咗力』，而係『唔理想』。」
梁生希望有報告解釋火災成因，並期望會有雙向溝通，住戶作為持分者表達的渠道卻很有限、不直接，批評政府只是單向溝通，只透過新聞稿、社工、解說隊表達，「我哋好多疑問、意見希望表達……但我哋講有我哋講，但佢哋有冇聽，我唔係好感覺到。」
宏道10樓李太：點解未有官員道歉？
宏福苑大火過去半年，宏道閣 10 樓住戶李太無奈形容這段時間「好頻撲，同埋大家都好攰囉」，指第一次上樓後要找倉庫安置物資，然後要再經歷第二輪，期間還要上班、照顧小朋友，「太頻撲喇、好辛苦」。
李太又說，「我哋其實大家都咁耐，成半年。一個咁大嘅地方，大家無咗屋企，原來唔需要一個高級嘅官員出嚟道歉或者負責任。好似早幾日內地有單事故咁啦，人哋個地區嘅官員，即刻出嚟道歉囉。香港作為一個發展咁全面嘅地區，點解到而家都未有一個官員可以行出嚟道歉，或者負責，剩係喺個聽證會度搬龍門。大家都睇到㗎。」
說起安置，李太說「而家選擇就係，無得揀囉」，指現時選項就似只剩下「賣業權、賣業權同賣業權」。
她期望可盡快召開業主大會，「溝通你係雙方㗎嘛，你唔係隔住搵一戶一社工，或者你搵解說員嚟同我哋講。你應該係雙方同我哋成班業主坐低慢慢一齊傾。畀所謂方案出嚟畀我哋，係咪真係滿足到我哋居民需要？」
李太又說，留意到有居民上樓後，不准貼紙表達宏福苑的情感，她質疑「其實都係幾張紙啫，或者幾句說話，係大家對宏福苑嘅情感囉，咁點解都唔可以呢？因為業權仲喺我哋度，個地方都仲係我哋㗎嘛，點解都唔畀我哋咁樣做呢？」
她說自己單位是望向內園、記者拍不到，故自己沒有貼出紙句，但如貼的話，自己或會留下「我愛宏福苑」，或者其他表達自己心意的字句。
宏道8樓謝志宏牧師：無乜想攞走，期望原址重置
宏道 8 樓住戶、牧師謝志宏，早前在第一輪上樓時已輕裝上陣，當時他只帶備 Ikea 袋，並說因信耶穌故想取回聖經。
這一次第二輪上樓，謝生再次穿著輕便，解釋稱「無乜嘢想攞呀，無乜想攞走呀，所以我無乜特別，上去坐下咁樣」。追問之下，他確認單位其實完整，除消防救火時爆門入屋等之外，沒其餘損毀，一身輕便，只因他仍期望重修之後可以回家。被問及會否不捨得，謝生答「都唔會嘅，因為都期望緊能夠返番去。」
有記者問他，會否擔心今次不取物品，「下次可能永遠無機會再返去？」。謝生答「下次永遠呀？唔知喎。我就期望緊原址重置，能夠維修之後做得到。呢個期望囉，係呀。」謝生又提到，上次家中長輩未能上樓，但見到早前有 80 多歲的婆婆也能上樓，故今次亦希望帶長輩一試。
此外，他期望可召開業主大會，繼而公布數據、討論方案，「一直開唔到業主大會，唔知想點。單方面公布都唔係咁健康，或者程序都唔係咁公義。」
宏道低層潘氏姊妹：自製 T-shirt 保留回憶
居住在宏道閣低層的潘氏一家，今日第二次上樓收拾。潘氏姊妹今日特意身上自製的宏福苑 T-shirt 到場，紀念這個從小到大充滿回憶的家園。
兩姊妹的 T-shirt 前面印有屋苑樓下公園的蝸牛架，「呢度街坊一睇就知係邊個位」。潘姊解釋，母親房間窗戶往外看，就會見到這個蝸牛架。她小時候在蝸牛架玩耍時，會向窗後的母親揮手，而母親亦會從窗戶呼喚公園的孩子回家吃飯。
T-shirt 背面印有1983年宏福苑的樣貌。潘姊解釋是當年父母搬進來時，手抱仍是嬰兒的她，以宏福苑為背景拍了的一張合照。她們將照片中的宏福苑印上 T-shirt，「嚟到今日，宏福苑對我哋嚟講係最好、最舒適嘅成長地方⋯⋯無奈因為人禍，發生咁嘅事，令大家咩都無晒，甚至有啲人都失去咗。所以我哋想整呢件 T 恤，好好保留一啲回憶畀自己」。
潘姊指，今日回來見到宏福苑的大廈時感到心痛，「咁多人離開咗，但到呢一刻無人負責、無一個道歉⋯⋯所有嘢都唔知、唔關自己事，對於我哋嚟講，已經唔知係第幾次傷害」。對於安置方案，潘妹形容根本不知道是否真的有「選擇」。潘姊說：「我哋知嘅選擇，就係賣業權、賣業權、賣業權。」她認為應先召開業主大會，讓居民表達自己的聲音，之後才作決定。
對於想對宏福苑說甚麼，潘妹回答道：「真係好掛住可以返屋企嘅日子，終於可以上第二次，但原來返屋企係咁難嘅，希望街坊都可以好好保重。」
